1. Weh lata peepl foakos pan tudeh?

 EENA fi wee day, peepl onli kay bowt dehnself. Dehn yooz soashal meedya fi boas bowt dehnself ahn di tingz weh dehn du. Bot onli lee bit a peepl waahn prayz Jehoava. Eena dis aatikl, wi wahn si weh ih reeli meenz fi prayz Jehoava ahn wai wi shuda waahn prayz ahn. Wi wahn laan sohn wayz how wi ku gi Jehoava di prayz an aana weh ih dizerv. Ahn wi wahn si how hihn wahn soon proov dat hihn dizerv fi mek evribadi gi hihn prayz an aana.

WEH IH REELI MEENZ FI PRAYZ JEHOAVA?

2. How Jehoava mi shoa ih powa da Mongt Sainai? (Koment pahn di picha.)

² Di Baibl shoa dat Jehoava amayzin ahn wandaful. Fi egzampl, wahn fyoo dayz afta Jehoava mi free di nayshan a Izrel fahn Eejip, ih shoa dehn ih gloari. Imajin dis: Milyanz a Izrelait mi gyada rong Mongt Sainai fi hyaa weh Gaad mi wahn tel dehn. Wahn tik klowd mi kova di mongtin. Wahn big ertkwayk mi hapm. Dehn mi ga laitnin ahn tonda ahn dehn mi ga wahn lowd naiz weh mi song laik wahn haan. (Eks. 19:​16-18; 24:17; Saa. 68:8) Dat mi amayzin fi di Izrelaits!

3. Weh ih reeli meenz fi prayz Jehoava?

 ³ Jehoava da wahn wandaful Gaad, ahn wee ku help adaz andastan how amayzin hihn amayzin. Wan way wi ku prayz Jehoava da wen wi tel adaz bowt ih grayt powa ahn bowt ih byootiful kwalitiz. Wi aana ahn wen wi prayz ahn fi di tingz ih help wi fi du. (Isa. 26:12) Wahn gud egzampl da King Dayvid. Hihn mi prayz Jehoava eena wahn pryaa weh ih seh fronta di hoal kangrigayshan a Izrel. Hihn mi seh: “Oa Jehoava, yoo soh grayt ahn powaful; byooti, gloari, an aana bilangz tu yoo, bikaaz evriting eena hevn ahn pahn di ert da fi yoo.” Afta Dayvid mi finish seh ih pryaa, “di hoal kangrigayshan prayz Jehoava.”—1 Chron. 29:​11, 20.

4. How Jeezas mi prayz Jehoava?

⁴ Jeezas mi aana ih Pa wen ih tel peepl dat Jehoava da di wan weh giv ahn di powa fi du miraklz. (Maak 5:​18-20) Hihn mi help adaz fi si how amayzin Jehoava amayzin bai di way how ih taak bowt ih Pa ahn di way ih mi chreet peepl. Wahn taim, Jeezas mi-di preech da wahn sinagag ahn wahn laydi weh mi ga wahn deemon eena ahn fi 18 yaaz mi dehdeh. Shee mi ben oava ahn kudn schraytn op ihself ataal. How yu tink shee mi feel? Jeezas mi andastan dat shee mi reeli foschraytid an ih mi waahn help ahn. Soh Jeezas tel ahn eena wahn jentl way: “Mis, yu free fahn yu siknis.” Den ih put ih han pan ahn, “an rait away shee schraytn op an ih staat tu prayz Gaad.” (Look 13:​10-13) Shee mi reeli tankful fi weh Jehoava du far ahn. Ahn wee shuda bee tankful fi weh Jehoava du fi wi tu.

WAI WI WAAHN PRAYZ JEHOAVA?

5. Wat da sohn reezn wai wi rispek Jehoava?

⁵ Wi prayz Jehoava bikaaz wi rispek ahn wahn lat. Hihn ga di powa fi du eniting, an ih wahn neva geh taiyad. (Saa. 96:​4-7) Wi ku si ih wizdom eena di tingz ih mek. Hihn gi wi laif an evriting wi need fi liv. (Rev. 4:11) Hihn laayal. (Rev. 15:4) Evriting weh Jehoava du werk owt egzakli how hihn waahn, an ih aalwayz kip ih pramis dehn. (Jash. 23:14) Noh wanda di prafit Jerimaiya seh: “Owta aala di waiz peepl fahn aala di nayshan dehn, non a dehn ku kompyaa tu yoo.” (Jer. 10:​6, 7) Fi shoar wi ga lata reezn fi rispek wi Pa, Jehoava. Bot wi noh jos waahn rispek ahn, wi waahn lov ahn tu.

6. Wai wi lov Jehoava?

⁶ Wi lov Jehoava bikaaz a ih byootiful kwalitiz. Ih ful a mersi ahn kompashan. (Saa. 103:13; Isa. 49:15) Ahn wen wi di sofa, hihn feel how wee feel. (Zech. 2:8) Jehoava help wi fi geh fi noa ahn soh dat wi ku bee gud frenz. (Saa. 25:14; Aks 17:27) An ih hombl tu; “hihn stup dong fi luk pahn hevn an ert. Hihn lif op peepl weh poa fahn di dos.” (Saa. 113:​6, 7) Bikaaz a aala dehnya reezn, wi waahn prayz Gaad, noh chroo?—Saa. 86:12.

7. Weh wi ku du fi Jehoava?

⁷ Wi prayz Jehoava bikaaz wi waahn adaz geh fi noa ahn. Lata peepl noh noa di chroot bowt Jehoava bikaaz Saytan tel lata lai bowt ahn. Ahn sad fi seh, peepl bileev it tu. (2 Kor. 4:4) Sohn peepl bileev dat Gaad luk fi eni chaans fi  ponish wi fi di ting dehn weh wi du. Som peepl eevn bileev dat Gaad noh kay bowt wi. An adaz bileev da sayka hihn wee sofa. Bot wee noa di chroot. Wan way how wi ku prayz Jehoava da wen wi tel adaz di chroot bowt hihn. (Isa. 43:10) Den, dehn wahn waahn prayz Gaad tu. Mek wi diskos Saam 96, ahn wi wahn laan sohn wayz how wi ku gi Jehoava di prayz an aana ih dizerv.

HOW WI KU GI JEHOAVA DI PRAYZ AN AANA IH DIZERV?

8. Wat da wan way wi ku prayz Jehoava? (Saam 96:​1-3)

⁸ Reed Saam 96:​1-3. Wi ku prayz Jehoava bai di tingz wi seh. Dehndeh vers tel aala Jehoava peepl fi “sing tu Jehoava,” fi “prayz ih naym,” fi “spred di gud nyooz bowt ih salvayshan,” ahn fi “mek aala di nayshan dehn noa bowt ih gloari.” Aala dehndeh da difrent wayz how wi ku prayz fi wee Pa da hevn. Jos laik di faytful Jooz eena di paas, di fers-senchri Kristyanz mi eega fi tel adaz bowt Jehoava an aala di gud tingz weh ih mi du fi dehn. (Dan. 3:​16-18; Aks 4:29) How wi ku kapi fi dehn egzampl?

9-10. Weh wi ku laan fahn Angelena ekspeeryens? (Koment pahn di picha.)

⁹ Sista Angelena, a weh liv da Stayts, mi shoa korij wen ih difen Jehoava wehpaat shee werk. Sins shee mi jos laytli staat werk deh, dehn mi invait ahn fi tel dehn wahn lee bit bowt ihself. Soh shee mi put tugeda sohn pichaz fi shoa dehn how shee hapi fi bee wan a Jehoava Witnisiz. Bot jos bifoa shee mi geh di chaans fi taak, wahn koa-werka mi inchrojoos ihself az sohnbadi weh mi groa op az wahn Witnis. Den, hihn mi staat tu mek fon a weh wi bileev eena. Angelena seh: “Mai haat mi-di beet haad. Bot Ah seh tu miself: ‘Ai noa dat weh hihn di seh da lai. Ah haftu seh sohnting ahn stan op fi Jehoava naym.ʼ”

¹⁰ Afta ih koa-werka finish inchrojoos ihself, shee seh wahn sailent pryaa an ih tel ahn eena wahn kain way: “Wee kohn fahn simila bakgrong. Ai mi groa  op az wahn Witnis tu. Ai da stil wahn Witnis.” Dat da-mi wahn schresful sichuwayshan, bot shee mi manij fi stay kaam. Soh shee shoa dehn di pichaz, an eena wahn rispekful way ih eksplayn weh shee bileev eena ahn how hapi shee feel di serv Jehoava. (1 Peet. 3:15) Wat da-mi di rizolt? Bai di taim Angelena finish, di man mi chaynj ih atichood. Hihn eevn mi tel ahn bowt sohn gud memriz ih mi ga fahn wen ih groa op az wahn Witnis. Angelena seh: “Jehoava dizerv fi mek wi tel di chroot bowt ahn.” Da wahn aana ahn privilij fi prayz Jehoava ahn giv ahn gloari eevn wen adaz taak bad bowt ahn.

11. How Jehoava peepl fala di prinsipl da Saam 96:8?

¹¹ Reed Saam 96:8. Wi ku prayz Jehoava wid di tingz wi oan. Fahn way bak, Jehoava servants aana Jehoava wid weh dehn ga. (Prav. 3:9) Fi egzampl, di Izrelait dehn mi gi moni ahn tingz weh dehn oan fi help bil di templ ahn tek kayr a it. (2 Ki. 12:​4, 5; 1 Chron. 29:​3-9) Eevn som a Jeezas disaiplz mi giv op tingz weh dehn oan soh dat Jeezas an ih apasl dehn kuda ga weh dehn need. (Look 8:​1-3) Di Baibl eevn menshan dat di Kristyanz weh mi liv eena di fers senchri mi sen help fi dehn bradaz ahn sistaz weh mi-di sofa bikaaz a famin. (Aks 11:​27-29) Saym way soh, wee ku prayz Jehoava wen wi mek doanayshan.

12. How wi ku prayz Jehoava wid wi doanayshanz? (Koment pahn di picha.)

¹² Mek wi kansida wahn ekspeeryens weh shoa how wi ku prayz Jehoava wid wi doanayshanz. Eena 2020, Zimbabwe mi ga bad jrai weda weh mi laas fi wahn lang taim. Milyanz a peepl neva ga nof food fi eet, inkloodin wahn sista weh naym Prisca. Bot shee mi kantinyu fi preech evri Wenzdeh ahn Fraideh, eevn joorin di taim wen dehn naamali wuda staat tu pripyaa di grong fi plaant. Fi shee naybaz yoostu mek fon a shee ahn tel ahn, “Yu wahn staav ahn yu wahn ded!” Bot shee neva wori; shee tel dehn, “Jehoava neva ferget fi hihn peepl.” Lee bit afta dat, tanks tu wi doanayshanz, di aaganaizayshan mi sen tingz weh shee  mi need. Fi shee naybaz mi sopraiz, ahn dehn tel ahn, “Gaad aalwayz help yu, soh wee waahn laan moa bowt ahn.” Afta dat, sevn a ih naybaz staat tu gaahn da di kangrigayshan meetinz.

13. How wi kandok ku bring prayz tu Jehoava? (Saam 96:9)

¹³ Reed Saam 96:9. Wi ku prayz Jehoava wid wi kandok. Di Izrelait prees dehn mi haftu bee kleen fi serv da di templ. (Eks. 40:​30-32) Dat impoatant fi wee tu, bot eevn moa impoatant, wi need fi avoid tingz weh Jehoava hayt. (Saa. 24:​3, 4; 1 Peet. 1:​15, 16) Soh wi need fi “geh rid a di oal persn” ahn “put aan di nyoo persn.” Ahn wi aalso need fi tink an ak eena wahn way weh shoa dat wi di kapi Jehoava egzampl an ih byootiful kwaliti dehn. (Kol. 3:​9, 10) Wid Jehoava help, eevn di wosis a peepl ku chaynj dehn bad wayz.

14. Weh wi ku laan fahn Jack ekspeeryens? (Koment pahn di picha.)

¹⁴ Jack mi reeli vailent ahn daynjaros. Peepl mi eevn kaal ahn Deemon. Kaaz a aala di kraim weh ih komit, dehn mi sentens ahn tu det. Soh wail ih mi eena prizn di wayt fi mek dehn kil ahn, hihn mi aksep wahn stodi wid wahn brada weh yoostu vizit di prizn. Eevn doa Jack mi du lata bad tingz eena ih laif, ih mi chaynj an ih geh baptaiz. Hihn mi mek soh moch chaynjiz dat wen da mi taim fi dehn kil ahn, som a di gyaad dehn mi krai anaal. Wahn soalja weh mi werk da di prizn mi seh: “Jack yoostu bee terabl, bot now hihn kompleetli chaynj.” Di week afta Jack ded, di bradaz gaahn kandok di meetin eena di prizn ahn dehn si wahn prizna weh neva yet gaahn da di meetin. Wai hihn gaahn da di meetin? Hihn mi seh dat ih mi reeli impres wid di chaynjiz weh Jack mek eena ih laif, ahn hihn mi waahn noa weh ih need fi du fi pleez Gaad. Soh ih klyaa fi si dat di way wi liv wi laif ku bring prayz an aana tu Jehoava!—1 Peet. 2:12.

 HOW JEHOAVA WAHN SOON PROOV DAT HIHN DIZERV EVRIBADI PRAYZ?

15. How Jehoava wahn soon proov dat hihn dizerv aala di prayz an aana? (Saam 96:​10-13)

¹⁵ Reed Saam 96:​10-13. Di laas fyoo vers eena Saam 96 diskraib Jehoava az wahn King weh joj eena wahn fyaa way. How Jehoava wahn shoa dat hihn dizerv di prayz an aana eena di fyoocha? Ih wahn bring jostis wen ih dischrai Babilan di Grayt bikaaz faals rilijan tel lai ahn du lata bad tingz. (Rev. 17:​5, 16; 19:​1, 2) Maybi peepl weh si Babilan di Grayt geh dischrai mait jain wi ahn staat tu wership Jehoava. Den, da Armagedon, Jehoava wahn dischrai di hoal a Saytan sistem, inkloodin peepl weh hayt ahn an tel lai bowt ahn. Bot ih wahn sayv obeedyant peepl weh lov ahn an weh bring prayz an aana tu ahn. (Maak 8:38; 2 Tes. 1:​6-10) Afta Krais rool fi wahn towzn yaaz, evribadi wahn fays wan fainal tes. Bai di taim dat finish, Jehoava wahn don proov dat hihn dizerv evribadi wership. (Rev. 20:​7-10) Den “di ert wahn ful a peepl weh noa bowt Jehoava gloari, jos laik how di see ful a waata.”—Hab. 2:14.

16. Weh yu mek op yu main fi du? (Koment pahn di picha.)

¹⁶ How amayzin ih wahn bee fi si evribadi gi Jehoava di prayz ih dizerv! Meentaim, mek wi tek evri apachooniti fi prayz Jehoava. Fi help wi du dat, di Govanin Badi chooz Saam 96:8 az di yaateks fi 2025: “Gi Jehoava di prayz weh ih naym dizerv.”