1. Wai ih impoatant fi goh da di Memoaryal evri yaa?

 DI RANSOM da wahn preshos gif fahn Jehoava! (2 Kor. 9:15) Bikaaz Jeezas mi sakrifais ih laif fi wi, wi ku ga wahn kloas frenship wid Jehoava ahn wi ku ga di hoap fi liv fareva. Wi ga lata gud reezn fi tank Jehoava fi di ransom. Wi ku si dat ih reeli lov wi! (Roam. 5:8) Wi noh waahn tek it fi grantid; wi aalwayz waahn shoa dat wi tankful. Wan way how wi ku du dat da wen wi obay Jeezas koman fi goh da di Memoaryal evri yaa.—Look 22:​19, 20.

2. Weh wi wahn diskos eena dis aatikl?

² Dis yaa, wi wahn selibrayt di Memoaryal pahn Satideh, Aypril 12, 2025. Fi shoar aala wi waahn mek planz fi dehdeh. Eech wan a wi wahn benifit joorin Memoaryal taim if wi meditayt a pahn weh Jehoava an ih Son du fi wi. Eena dis aatikl, wi wahn diskos weh di ransom teech wi bowt Jehoava an ih Son. An eena di neks aatikl, wi wahn diskos how wi benifit fahn di ransom ahn how wi ku shoa how tankful wi tankful far it.

 WEH DI RANSOM TEECH WI BOWT JEHOAVA

3. How wan man laif ku bai bak laif fi milyanz a peepl? (Koment pahn di picha.)

³ Di ransom teech wi dat Jehoava lov jostis. (Deut. 32:4) Wai wi seh dat? Tink bowt dis: Wen Adam neva obay Gaad, ih mi ton wahn sina ahn ded. Ahn bikaaz wee da fi hihn pikni, wee da sina tu, ahn sayka dat wi ded. (Roam. 5:12) Soh fi set wi free fahn sin ahn det, Jehoava sen ih Son fi ded fi wi. Bot how wan man laif ku bai bak laif fi milyanz a peepl? Dis da weh di apasl Paal mi seh: “Sayka wan man [Adam] weh disobay Gaad, evribadi da sina. Saym way soh, sayka wan man [Jeezas] weh mi obay Gaad, lata peepl wahn bee raichos.”—Roam. 5:19; 1 Tim. 2:6.

4. Wai Jehoava neva alow Adam obeedyant pikni fi liv fareva?

⁴ Wai Jehoava neva jos disaid fi alow Adam obeedyant pikni fi liv fareva? Dat wuda song gud tu wee, noh chroo? Ahn Jeezas neva mi wahn haftu ded needa. Bot yu tink Jehoava kuda eva du sohnting laik dat? No. Sayka jostis, Jehoava kudn ignoar Adam sin ahn di fak dat aala fi hihn pikni da sinaz.

5. Wai wi ku bee shoar dat Jehoava wahn aalwayz du weh rait?

⁵ Sopoaz Jehoava did alow Adam pikni fi liv fareva eevn doa dehn neva perfek. Weh wuda mi hapm? Peepl mait wanda if Jehoava wahn du di rait ting eena ada sichuwayshanz. Dehn mait dowt weda er nat Jehoava wahn kip aala ih pramis dehn. Bot wi noh need fi wori bowt dat, bikaaz Jehoava mi wilin fi sakrifais ih oan Son fi di sayk a jostis. Soh wee ku bee shoar dat hihn wahn aalwayz du weh rait.

6. Weh di ransom teech wi bowt Jehoava lov? (1 Jan 4:​9, 10)

⁶ Wi laan dat di ransom teech wi bowt Jehoava jostis, bot moa impoatant ih teech wi bowt ih lov fi wi. (Jan 3:16; reed 1 Jan 4:​9, 10.) Di ransom teech wi dat Jehoava waahn wi liv fareva ahn bee paat a ih famili. Wen Adam mi sin, Jehoava mi kik ahn owta ih famili. Ahn soh aala wi baan owtsaida Jehoava famili. Bot bikaaz a di ransom, aal hyoomanz weh ga fayt eena Gaad an obay ahn wahn ku bee paat a ih famili eena di fyoocha. Eevn now, doh, Jehoava ku fergiv wi sin dehn ahn wi ku ga wahn gud rilayshanship wid hihn ahn wid wi  bradaz ahn sistaz. Jehoava reeli lov wi fi chroo!—Roam. 5:​10, 11.

7. Weh wi laan bowt Jehoava lov wen wi tink bowt aal weh Jeezas mi sofa?

⁷ Wi ku andastan humoch Jehoava lov wi wen wi tink bowt humoch ih mosi mi hert ahn fi si ih Son sofa. Saytan klaym dat no hyooman wahn stay faytful tu Gaad wen dehn deh anda tes. Fi proov ahn rang, Jehoava mi alow Jeezas fi sofa bifoa ih ded. (Joab 2:​1-5; 1 Peet. 2:21) Jehoava mi-di wach fahn hevn wen dehn mak Jeezas, flag ahn, an nayl ahn pahn di stayk. Jehoava mi si ih Son weh ih lov wahn lat goh chroo dis paynful det. (Mach. 27:​28-31, 39) Jehoava mi ga di powa fi stap aala dat fahn hapm. Di peepl mi eevn seh: “If Gaad waahn help ahn, mek Hihn reskyu ahn.” (Mach. 27:​42, 43) Hihn kuda mi du dat. Bot if hihn mi reskyu Jeezas, den Jeezas neva mi wahn pay di ransom. An if Jeezas neva pay di ransom, den wee neva mi wahn ga no hoap fi di fyoocha. Dat da wai Jehoava alow ih Son fi sofa ahn ded fi wi.

8. How Jehoava mi feel wen ih si ih Son di sofa? (Koment pahn di picha.)

⁸ Da chroo, Jehoava neva yooz ih powa fi sayv ih Son, bot dat noh meenz dat hihn noh ga feelinz. If wee ga feelinz, den Jehoava ga feelinz tu. Memba, di Baibl seh dat wee mek fi bee laik hihn. An ih aalso seh dat sohn peepl “hert” ahn, an mek ih feel “sad.” (Saa. 78:​40, 41) Memba weh mi hapm wid Aybraham? Jehoava mi tel Aybraham fi sakrifais Aizak, ih onli son. (Jen. 22:​9-12; Heeb. 11:​17-19) Wi ku onli imajin how hihn mi feel wen ih mi-di geh redi fi kil Aizak. Now tink bowt how Jehoava mosi mi feel wen ih si how peepl taacha ih Son ahn kil ahn.—Wach di veedyo weh naym Kapi Dehn Fayt—Aybraham, Paat 2 pahn jw.org.

9. Weh Roamanz 8:​32, 38, 39 teech wi bowt humoch Jehoava lov wee ahn wi bradaz ahn sistaz?

⁹ Di ransom teech wi dat nobadi lov wi moa dan how Jehoava lov wi. (Reed Roamanz 8:​32, 38, 39.) Ahn Jehoava lov wi moa dan humoch wee lov wiself. Yoo waahn liv fareva? Jehoava waahn dat eevn moa. Yoo waahn fergivnis fi yu sinz? Jehoava waahn dat eevn moa tu. Aal weh hihn waahn da fi mek wi shoa fayt ahn bee obeedyant. Di ransom da wahn preshos gif fahn Jehoava weh reeli shoa wi humoch ih lov wi. An eena di nyoo werl, wi wahn laan bowt eevn moa tingz weh ih du fi wi bikaaz ih lov wi.—Ikl. 3:11.

 WEH DI RANSOM TEECH WI BOWT JEEZAS

10. (a) Weh mi bada Jeezas di moas bifoa ih ded? (b) Eena weh wayz Jeezas mi proov dat Jehoava rait? (Koment pahn di baks weh naym “ Jeezas Sakrifais Proov Dat Jehoava Rait.”)

¹⁰ Jeezas reeli kay bowt ih Pa repyutayshan. (Jan 14:31) Peepl mi akyooz Jeezas dat hihn mi insolt Gaad ahn dat ih da-mi wahn kriminal. How yu tink dat mi mek Jeezas feel? Hihn mi feel bad bikaaz dat wuda giv ih Pa wahn bad naym. Dat da wai hihn mi pray: “Faada, if ih pasabl, pleez noh mek Ah jrink owta dis kop.” (Mach. 26:39) Bot bikaaz Jeezas mi stay faytful tu Jehoava til ih ded, hihn mi proov dat Saytan laiyad.

11. How Jeezas mi shoa dat ih reeli lov peepl? (Jan 13:1)

¹¹ Di ransom aalso teech wi dat Jeezas reeli kay bowt peepl, espeshali ih disaiplz. (Prav. 8:31; reed Jan 13:1.) Fi egzampl, Jeezas mi noa dat ih asainment pahn ert neva mi wahn bee eezi, espeshali bikaaz ih mi noa dat ih mi wahn sofa ahn ded eena wahn terabl way. Stilyet, eena aal weh ih du, wi si di lov weh ih ga fi peepl; ih neva jos du it kaaz da mi wahn asainment fahn Jehoava. Insted, ih preech, teech, ahn serv peepl wid aala ih haat. Ahn di day ih mi wahn ded, Jeezas mi tek taim fi wash ih apasl dehn fut fi teech dehn, inkorij dehn, ahn komfert dehn. (Jan 13:​12-15) Ahn tink bowt how Jeezas mi shoa dat ih kay bowt peepl eevn wen ih mi eena lata payn di ded pahn di stayk. Ih mi shoa kansaan fi di kriminal weh mi deh saida ahn wen ih komfert ahn an tel ahn ih wahn deh eena Paradais. Ahn bikaaz ih mi wori bowt ih ma, ih aks Jan fi tek kayr a ahn. (Look 23:​42, 43; Jan 19:​26, 27) Soh Jeezas  mi shoa dat ih lov peepl di hoal wail ih mi deh pahn ert, noh jos wen ih ded fi wi.

12. How Jeezas di help wi tudeh?

¹² Da chroo dat Jeezas mi ded “onli wan taim fi geh rid a fi wee sin dehn, ahn hihn noh wahn ded agen,” bot hihn stil di du lata tingz weh di help wi tudeh. (Roam. 6:10) Weh hihn di du fi wi? Jeezas di werk haad fi help wi benifit fahn evriting weh pasabl bikaaz a di ransom. Hihn da wi King, Hai Prees, ahn di hed a di kangrigayshan. (1 Kor. 15:25; Ifee. 5:23; Heeb. 2:17) Da hihn in chaaj fi gyada di anointid ahn di big krowd a peepl. Da werk wahn finish bifoa di en a di grayt chribyulayshan. b (Mach. 25:32; Maak 13:27) Hihn yooz di faytful ahn waiz slayv fi kip di gi wi weh wi need fi serv Jehoava ahn stay faytful joorin dehnya laas dayz. (Mach. 24:45) Ahn wen hihn di rool oava wi joorin di towzn yaaz, hihn wahn kip di werk fi help wi. Jeezas neva jos giv op ih laif fi wi, ih du soh moch moa dan dat. Jehoava reeli gi wi wahn preshos gif!

KIP DI LAAN NYOO TINGZ

13. How meditayshan ku help yu fi kip di laan bowt di lov weh Gaad ahn Krais ga fi wi?

¹³ If wi kip di meditayt pahn di lov weh Jehoava ahn Jeezas shoa, wi wahn laan eevn moa bowt it. Dis yaa, joorin Memoaryal taim, yu ku praabli reed wan er moa a di Gaspl dehn. Noh chrai reed tu moch wan lik. Ih beta if yu tek yu taim wen yu di reed soh dat yu ku luk fi ada reeznz wai wi fi lov Jehoava ahn Jeezas. Ahn wateva yu fain eena yu Baibl reedin, shayr it wid adaz.

14. How wi ku kip di laan bowt di ransom an ada tingz wen wi du risaach? (Koment pahn di picha.) (Saam 119:97 ahn futnoat)

¹⁴ If yu deh eena di chroot fi lata yaaz, yu mait tink dat yu noh ga notn nyoo fi laan bowt Jehoava jostis, ih lov, ahn di ransom. Bot wi wahn aalwayz ga nyoo  tingz fi laan bowt dehndeh kaina tapik. Soh weh yu ku du? Reed ahn stodi di infamayshan weh wi fain eena wi poblikayshanz. An if yu fain sohnting weh yu noh andastan, du sohn risaach. Den, kip di tink bowt di tingz weh yu laan ahn weh dehndeh tingz teech yu bowt Jehoava, Jeezas, ahn di lov weh dehn shoa fi yu.—Reed Saam 119:97 ahn futnoat.

15. Wai ih impoatant fi kip di saach fi nyoo tingz eena di Baibl?

¹⁵ Noh geh diskorij if yu noh fain sohnting nyoo er eksaitin evri taim yu sidong ahn reed er du risaach. Eena wahn way, da laik yu di luk fi goal. Wen yu di luk fi goal, yu ku spen owaz er eevn dayz bifoa yu fain di smaalis pees a goal. Bot yu wudn giv op, bikaaz goal wert wahn lat. Weh wi laan fahn di Baibl faar moa preshos dan goal! (Saa. 119:127; Prav. 8:10) Soh bee payshent ahn kip di reed yu Baibl evri day.—Saa. 1:2.

16. How wi ku kapi Jehoava ahn Jeezas egzampl?

¹⁶ Wen yu stodi, tink bowt how yu ku yooz weh yu laan eena yu laif. Fi egzampl, wi ku kapi Jehoava jostis wen wi noh shoa fayvritizm. Wi ku kapi Jeezas lov fi ih Pa wen wi wilin fi sofa fi Jehoava naym. Ahn jos laik Jeezas, wi ku shoa lov fi adaz wen wi wilin fi goh owta wi way fi help dehn. Wahn nada way how wi ku kapi Jeezas egzampl da wen wi teech peepl di chroot soh dat dehn ku ga di chaans fi benifit fahn di ransom.

17. Weh wi wahn diskos eena di neks aatikl?

¹⁷ Di moa wi andastan di ransom, di moa wi wahn bee graytful far it, ahn wi wahn lov Jehoava ahn Jeezas eevn moa. Ahn di moa wee lov dehn, di moa dehn wahn lov wee. (Jan 14:21; Jay. 4:8) Soh mek wi yooz evriting weh Jehoava gi wi fi mek wi kip di laan bowt di ransom. Di neks aatikl wahn help wi fi si sohn wayz how wi benifit fahn di ransom ahn how wi ku shoa dat wi tankful fi Jehoava lov.