JASHWA mi fays wahn haad asainment. Hihn mi haftu gaid di nayshan a Izrel intu di Pramis Lan eevn doa ih mi fays big chalenjiz weh kuda mi mek ih feel laik giv op. Jehoava mi rimain Jashwa dat ih mi wahn ga sokses. Jehoava mi help Jashwa fi feel moa kanfident wen ih tel ahn: ‘Bee brayv ahn bee schrang. Obay mi Laa. Reed it day ahn nait, soh yu ku tek kyaa fi du aal weh deh een deh. Den yu wahn ga sokses ahn yu wahn ak wid wizdom.ʼ—Josh. 1:7, 8.

Eena dehnya “terabl taimz,” wee fays sohn haad chalenj tu. (2 Tim. 3:1) Wee ku ga sokses laik Jashwa if wi fala di advais weh Jehoava mi giv ahn. Wi need fi reed di Baibl evriday ahn praktis weh wi laan fi mek wi ku deel wid di tes dehn weh wi fays.

Eevn soh, wahn lata wi noa dat wi noh laik stodi an ih noh eezi fi mek wi stodi. Bot sins ih soh impoatant fi stodi di Baibl, goh oava di baks weh naym “ Chrai Dehnya Sojeshanz.” Ih ga sohn gud tip weh ku help mek yu geh di moas owta yu Baibl stodi an injai it.

Di saamis mi sing: “Help mi fi waak eena di way a yu komanment dehn, bikaaz Ah lov dehn.” (Ps. 119:35) Soh yu ku bee veri hapi wen yu reed ahn stodi di Werd a Gaad. Yu wahn fain spirichwal chrezhaz wen yu reed di Baibl.

Eevn doa yu noh haftu gaid wahn hoal nayshan laik weh Jashwa mi haftu du, yu ga yu oan prablemz weh yu haftu deel wid. Soh, if yu stodi an obay wat deh eena di Baibl, yu wahn ga sokses an ak waiz jos laik Jashwa.