1. Wai wi ku seh dat Jehoava oan evriting? (Koment pahn di picha da di biginin a dis aatikl.)

EVRITING da fi Jehoava! Hihn oan “di hevn, eevn di hevnz a di hevnz, ahn di ert wid evriting weh deh pan it.” (Deut. 10:14; Rev. 4:11) Soh, bikaaz Jehoava mek wi, aala wi bilangz tu hihn. (Ps. 100:3) Bot, owta aala di peepl weh eva liv, Gaad chooz som peepl weh bilangz tu hihn eena wahn speshal way.

2. Hoo di Baibl seh bilangz tu Jehoava eena wahn speshal way?

² Fi egzampl, Psalm 135 seh dat fi hihn faytful servants eena Izrel bak den da-mi “fi hihn speshal prapati.” (Ps. 135:4) Ahn di buk a Hosea mi prafesai dat som peepl hoo da neva Izrelait mi wahn bee Jehoava peepl tu. (Hos. 2:23) Hozaya prafesi mi kohn chroo wen Jehoava mi chooz som peepl hoo da neva Joo fi rool wid Jeezas da hevn. (Aks 10:45; Roam. 9:23-26) Dis “nayshan weh Gaad set wan said fi ihself” da fi hihn “speshal peepl.” Hihn mi anoint dehn wid hoali spirit ahn chooz dehn fi liv da hevn. (1 Peet. 2:9, 10) How bowt di res a faytful Kristyanz tudeh hoo ga di hoap fi liv pahn di ert? Jehoava seh dat dehn da fi hihn “peepl” tu, ahn “di wan dehn weh hihn chooz”.—Isa. 65:22.

3. (a) Hoo di injai wahn gud rilayshanship wid Jehoava tudeh? (b) Weh wi wahn stodi eena dis aatikl?

 ³ Tudeh, di “lee flak,” weh wahn liv da hevn, ahn di “ada sheep,” weh wahn liv pahn di ert, mek op di “wan flak” weh Jehoava aksep az fi hihn peepl. (Look 12:32; Jan 10:16, NW) Wi waahn shoa wi apreeshiayshan tu Jehoava fi weh ih aksep wi az fi hihn peepl. Dis aatikl wahn diskos difrent wayz how wi ku shoa apreeshiayshan tu Jehoava fi weh ih gi wi dis privilij.

4. Wat da wan way wi ku shoa wi apreeshiayshan fi wi rilayshanship wid Jehoava, ahn how Jeezas mi du sohnting simila?

⁴ Wi dedikayt wi laif tu Jehoava fi shoa dat wi apreeshiayt wi rilayshanship wid hihn. Den, wi geh baptaiz eena waata fi tel evribadi dat Jehoava da wi oana ahn dat wateva hihn aks wi fi du, wi wahn du. (Heeb. 12:9) Jeezas mi du sohnting simila wen ih mi geh baptaiz. Da laik hihn mi-di seh: “Mai dizaiya da fi du fi yoo wil, Oa mai Gaad.” (Ps. 40:7, 8, ftn.) Jeezas mi seh dat hihn kohn fi du Jehoava wil, eevn doa hihn mi baan eena wahn nayshan weh mi don dedikayt tu Gaad.

5, 6. (a) Weh Jehoava du wen Jeezas mi geh baptaiz? (b) Yooz di egzampl fi shoa wai Jehoava apreeshiayt fi wee dedikayshan.

⁵ Weh Jehoava du wen Jeezas mi geh baptaiz? Di Baibl seh: ‘Afta Jeezas don geh baptaiz an ih kom op owta di waata, sayhn taim hevn oapm op ahn ih si di Hoali Spirit di kohn dong jos laik wahn dov. Ahn sayhn taim wahn vais fahn hevn seh, “Yoo da mi Son weh Ah onli lov, an Ah onli pleez wid yu.”ʼ(Mach. 3:16, 17) Aldoa Jeezas mi don bilangz tu Jehoava, Hihn mi hapi fi si dat ih Son mi wilin fi du weh Hihn mi waahn wid aala ih haat. Jos laik dat, Jehoava pleez wen wi dedikayt wi laif tu ahn, an ih wahn bles wi.—Ps. 149:4.

⁶ Fi egzampl, imajin wahn man ga wahn gyaadn wid lata byootiful flowaz. Wan day ih lee daata pik wan a di flowaz far ahn an giv ahn it az wahn gif. Di gyaadn da fi hihn soh di flowaz da fi hihn. How shee ku giv ahn sohnting weh da fi hihn aredi? Wahn lovin pa wudn eevn tink bowt da kaina kweschan. Insted, ih wuda bee hapi fi aksep di gif fahn ih lee daata kaaz shee di shoa dat shee lov ahn. Di flowaz weh ih daata pik mi wahn bee di moas preshos flowaz owta aala di ada flowaz eena ih gyaadn. Jos laik dat, Jehoava hapi wen wi shoa dat wi wilin fi serv hihn wid aala wi haat.—Ex. 34:14.

7. How Malakai diskraib Jehoava feelinz tuwaadz di wan dehn hoo serv hihn wid wahn wilin haat?

⁷ Reed Malachi 3:16. * Wai ih impoatant fi mek yu dedikayt yu laif tu Jehoava ahn geh baptaiz? Da chroo dat fahn di taim yu baan, yu bilangz tu Jehoava, jos laik evribadi els. Bot, tink bowt how ih wuda pleez Jehoava if yu aksep fi hihn roolaship ahn dedikayt yu laif tu ahn fi du fi hihn wil. (Prov. 23:15) Jehoava noa di wan dehn weh wilin fi serv ahn, an ih rait dehn naym dong eena ih buk.

8, 9. Weh Jehoava ekspek fahn dehn wan hoo ga dehn naym eena fi hihn buk?

 ⁸ Wi haftu du sohnting if wi waahn wi naym eena Jehoava buk. Malakai mi seh dat wi haftu “fyaa Jehoava ahn meditayt pahn fi hihn naym.” If wi wership enibadi er eniting els, Jehoava wahn skrach aaf wi naym fahn di buk a laif.—Ex. 32:33; Ps.69:28.

⁹ Soh, wi dedikayshan tu Jehoava da moa dan jos wahn pramis fi du fi hihn wil ahn geh baptaiz. Wi du dehnya tingz onli wan taim eena wi laif, bot wi wership tu Jehoava da wahn way a laif. Evri day, fi az lang az wi liv, wi haftu proov bai wi akshanz dat wi obay Jehoava.—1 Peet. 4:1, 2.

10. Weh klayr difrens wi haftu si bitween sombadi weh di serv Jehoava ahn sombadi weh noh di serv ahn?

¹⁰ Di aatikl bifoa dis wan mi taak bowt di egzampl a Kayn, Salaman, ahn di Izrelait dehn. Aala dehn mi seh dehn mi-di wership Jehoava, bot dehn neva mi-di serv ahn wid aala dehn haat. Dehnya egzampl teech wi dat enibadi weh reeli bilangz tu Jehoava haftu stan op fi raichosnis ahn rijek wikidnis. (Roam. 12:9) Dats wai afta Malakai mi taak bowt di buk “weh gat een di naym a aal hoo fyaa Jehoava ahn meditayt pahn fi hihn naym,” Jehoava taak bowt di “difrens bitween wahn raichos persn ahn wahn wikid persn, di difrens bitween sombadi weh di serv Gaad ahn sombadi weh noh di serv ahn.”—Mal. 3:18.

11. Wai evribadi shuda si dat wi di serv Jehoava wid aala wi haat?

¹¹ Wahn nada way wi ku shoa apreeshiayshan tu Jehoava fi weh ih mi pik wi az fi hihn peepl da chroo wi spirichwal proagres. Evribadi shuda si dat wi deh pahn Jehoava said. (1 Tim. 4:15; Mach. 5:16) Aks yuself: ‘Evribadi ku si dat Ai di serv Jehoava wid aala mi haat? Ai prowd fi tel adaz dat Ai da wan a Jehoava Witnisiz?ʼ Jehoava wuda bee veri sad if afta hihn pik wi az ih peepl, wi shaym fi seh dat wee bilangz tu hihn.—Ps. 119:46; reed Maak 8:38.

12, 13. How som a wi bradaz ahn sistaz shoa dat dehn di haid dat dehn da wan a Jehoava Witnisiz?

 ¹² Ih sad fi seh dat wid som a wi bradaz ahn sistaz, ih noh eezi fi si ‘di difrens bitween sombadi weh di serv Gaad ahn weh noh di serv ahn.ʼ Dehn ak jos “laik di peepl dehn eena dis werl.” (1 Kor. 2:12) Peepl eena dis werl liv how dehn waahn liv. (Ifee. 2:3) Fi egzampl, noh kay humoch kongsl wi get bowt di kaina kloaz wi wayr, som a wi bradaz ahn sistaz stil du dehn oan ting. Dehn put aan kloaz weh tu tait ahn weh shoa tu moch skin, eevn tu wi Kristyan meetin dehn. Er dehn fiks dehn hyaa wid sohn way owt hyaa stail. (1 Tim. 2:9, 10) Bikaaz a dat, ih noh eezi fi tel hoo da fi Jehoava ahn hoo da “too faiv wid di werl.”—Jay. 4:4.

¹³ Wahn nada way how som a wi bradaz ahn sistaz shoa dat dehn noh difrent fahn di werl da how dehn ak da wahn paati ahn weh dehn poas pahn soashal meedya. Di way dehn daans ahn goh aan, da noh di way wahn Kristyan fi ak ataal. Di pichaz weh dehn poas a dehnself ahn di koments dehn mek pahn soashal meedya da noh di way spirichwal peepl fi ak. Dehn noh mait geh disiplin eena di Kristyan kangrigayshan fi eni seeryos sin, bot dehn ku stil ga wahn bad ifek pahn di bradaz weh di chrai kip dehn kandok kleen.—Reed 1 Peeta 2:11, 12.

14. Weh wi need fi du if wi waahn protek wi speshal frenship wid Jehoava?

¹⁴ Evriting eena dis werl inkorij wi fi foakos pahn ‘di plezha weh di badi di los aafa, an aal di tingz dehn weh peepl si ahn waahn, an aala di tingz dehn weh mek wi haat geh prowd.ʼ (1 Jan 2:16) Bot, bikaaz wi bilangz tu Jehoava, di Baibl waan wi ‘fi noh liv laik if no Gaad noh deh, ahn fi giv op di plezha a dis werl weh onli sinful. Wi fi liv wahn laif wid self-kanchroal, weh deesent an aanis, wan weh wahn pleez Gaad.ʼ (Taitos 2:12) Evriting bowt wi shuda tel peepl dat wi bilangz tu Jehoava. Di tingz wi taak bowt, wi habits wen ih kohn tu food ahn jrink, di way wi du wi werk,  ahn di way wi jres shuda tel peepl dat wi di serv Jehoava wid aala wi haat.—Reed 1 Korintyanz 10:31, 32.

15. Wai wi fi chreet wi bradaz ahn sistaz wid kainis ahn lov?

¹⁵ Wi ku shoa wi apreeshiayshan fi Jehoava speshal frenship bai di way wi chreet wi bradaz ahn sistaz. Dehn bilangz tu Jehoava tu. If wi aalwayz memba dat, wi wahn chreet dehn wid kainis ahn lov. (1 Tes. 5:15) Jeezas tel ih falowaz: “If unu lov wan anada, den evribadi wahn noa dat unu da fi mee disaipl.”—Jan 13:35.

16. Weh egzampl fahn di Laa a Moaziz shoa how Jehoava feel tuwaadz ih peepl?

¹⁶ Wahn egzampl fahn di Laa a Moaziz ku help wi andastan how wi fi chreet adaz eena di kangrigayshan. Eena di templ, Jehoava mi set wan said sohn tingz weh dehn mi fi yooz onli fi chroo wership. Di Laa mi gi spesifik inschrokshanz pahn how fi kip dehndeh tingz kleen. Ahn Jehoava mi seh dat dehn mi fi kil enibadi weh neva fala dehndeh inschrokshanz. (Num. 1:50, 51) If Jehoava mi tek soch gud kayr a dehndeh tingz, yu noh tink ih wahn protek ih laayal servants hoo hihn pik az fi hihn peepl? Jehoava mi tel ih peepl: “Hoosoeva toch yoo, di toch mi aiybaal.”—Zech. 2:8.

17. Weh Jehoava di “pay atenshan ahn lisn” tu?

¹⁷ Malakai mi seh dat Jehoava di “pay atenshan ahn lisn” tu how ih peepl deel wid wan anada. (Mal. 3:16) Jehoava “noa dehn wan weh bilangz tu hihn.” (2 Tim. 2:19) Hihn noa evri singl ting wi seh ahn du. (Heeb. 4:13) Wen wi noh kain tu wi bradaz ahn sistaz, Jehoava di “pay atenshan ahn lisn.” Wen wi oapm wi hoam tu wan anada, bee jenaros wid wan anada, fagiv wan anada, ahn kain tu wan anada, wi ku bee shoar dat Jehoava di si aala dat tu.—Heeb. 13:16; 1 Peet. 4:8, 9.

18. How wi ku shoa Jehoava dat wi apreeshiayt di privilij fi bee paat a fi hihn peepl?

¹⁸ Wi waahn shoa Jehoava humoch wi apreeshiayt di privilij fi bee paat a fi hihn peepl. Wi noa dat wen wi mi dedikayt wi laif tu ahn, dat da-mi di waizis chois wi kuda mi eva mek. Eevn doa wi di “liv monks disya wikid ahn sik jenarayshan,” wi waahn peepl si dat wi ‘kleen ahn hoali, ahn mek wi laif bee laik wahn lait tu dehn.ʼ (Fil. 2:15) Soh, wi mek op wi main fi stay weh fahn evriting weh Jehoava hayt. (Jay. 4:7) Ahn wi lov ahn rispek wi bradaz ahn sistaz bikaaz dehn bilangz tu Jehoava tu.—Roam. 12:10.

19. How Jehoava riwaad di wan dehn weh bilangz tu hihn?

¹⁹ Di Baibl pramis wi: “Jehoava wahn neva lef ih peepl.” (Ps. 94:14) Jehoava noh wahn brok dis pramis noh mata weh wi goh chroo. Noh eevn det ku separayt wi fahn di lov weh Jehoava ga fi wi. (Roam. 8:38, 39) “Kaaz if wi liv, wi liv fi di Laad; ahn if wi ded, wi ded fi di Laad. Soh den, weda wi liv er wi ded, wi bilangz tu di Laad.” (Roam. 14:8, Di Jamiekan Nyuu Testiment) Wi luk faawod tu di day wen Jehoava wahn rezorek aala ih laayal frenz. (Mach. 22:32) Eevn now wi di injai lata blesinz. Di Baibl seh: “Di nayshan weh ga Jehoava az dehn Gaad wahn bee hapi, dehn da di peepl weh hihn chooz az fi hihn oan.”—Ps. 33:12.