JEEZAS mi seh: ‘Lata grayn deh fi pik, bot onli lee bit a peepl deh fi werk. Soh pray tu Gaad weh in chaaj a bring een di haavis fi mek ih sen moa werkaz fi werk eena fi hihn feel.ʼ (Look 10:2) Dehnya werdz weh Jeezas mi seh bowt 2,000 yaaz agoa diskraib di sichuwayshan da Myanmar tudeh. Wai? Bikaaz onli bowt 4,200 poblishaz di spred di gud nyooz da Myanmar tu di 55 milyan peepl hoo liv deh.

Bot, Jehoava, hoo deh ‘in chaaj a bring een di haavis,’ toch di haat a honjridz a bradaz ahn sistaz fahn aal oava di werl. Dehn kohn tu dis konchri eena Southeast Asia fi help owt eena di spirichwal haavis werk. Wai dehn lef dehn konchri? How Jehoava bles dehn fi mek di moov? Ahn wat da som a di blesinz dehn di injai? Mek wi fain owt.

Di fos ekspeeryens da fahn wahn painyaa fahn Japan, weh naym Kazuhiro. Ih mi kech fits, ahn di dakta tel ahn noh fi jraiv fi too yaaz. Kazuhiro mi shak. Ih aks ihself, ‘How Ai wahn painyaa now?ʼ Soh ih pray haad ahn bayg Jehoava fi help ahn stil painyaa.

Kazuhiro seh: “Bowt wahn mont layta, mi fren hoo mi-di serv da Myanmar hyaa bowt mi sichuwayshan. Ih kaal mi ahn tel mi: ‘Evribadi da Myanmar get rong pahn bos. If yu kohn ya, yu wahn ku kantinyu painyaa. Yu noh need wahn kaar!ʼ Soh Ah aks mi dakta if Ah ku goh da Myanmar. Ih tel mi: ‘Wahn brayn speshalis fahn Myanmar di vizit Japan rait now. Ah wahn mek yu meet ahn. Soh if yu eva kech fits agen, hihn wahn ku tek kayr a yu.ʼ Ai mi sopraiz! Ah mi si dat az wahn ansa fahn Jehoava.”

Rait away, Kazuhiro sen wahn eemayl tu di branch aafis da Myanmar ahn tel dehn dat hihn an ih waif wuda waahn serv deh az painyaaz. Jos faiv dayz layta, di branch rait bak ahn seh, “Kohn help wi, wi need moa painyaaz!” Kazuhiro an ih waif, Mari, sel dehn kaar, geh dehn veesa, ahn bai dehn playn tikit. Tudeh, dehn hapi fi bee paat a di sain-langwij groop da Mandalay. Kazuhiro seh: “Dis ekspeeryens reeli schrentn wi fayt eena Gaad pramis  da Psalm 37:5 weh seh: ‘Han oava yu planz tu Jehoava; pen pahn hihn, an ih wahn help yu.ʼ”

Eena 2014, Jehoava Witnisiz da Myanmar mi ga di privilij fi aaganaiz wahn speshal kanvenshan. Wahn lata bradaz ahn sistaz fahn difrent konchri mi gaahn. Wan a dehn da Monique, wahn sista eena ih mid-30ʼs fahn di United States. Shee seh: “Afta Ah mi get hoam fahn di kanvenshan, Ah pray tu Jehoava bowt di neks step Ah mi need fi tek eena mi laif. Ah mi taak wid mi payrents bowt mi spirichwal goalz. Aala wi mi feel dat Ah shuda goh bak da Myanmar fi chroo, bot ih mi tek sohn taim ahn lata pryaaz bifoa Ah mi mek mi fainal disizhan.” Monique tel wi wai.

Shee seh: “Jeezas mi inkorij ih falowaz fi ‘figa owt humoch ih wahn kaas.ʼ Soh Ah aks miself: ‘Ai ku afoad fi liv deh? Ai wahn ku sopoat miself eena da konchri widowt haftu spen lata taim di werk?ʼ” Shee seh: “Rait away, Ah riyalaiz dat Ah neva ga inof moni fi moov deh.” Soh, how shee mi mek di moov?—Look 14:28.

Monique seh: “Wan day mi baas tel mi ih waahn si mi. Ah mi nervos bad. Ah mi tink dat ih mi wahn faiya mi. Bot, insted, mi baas tank mi fi mi gud werk, den shee tel mi dat shee wahn gi mi wahn boanos. Wel, da boanos da-mi di egzak amonk weh Ah mi need fi pay aaf mi bilz!”

Monique di serv da Myanmar sins Disemba 2014. How shee feel fi serv eena wahn difrent konchri? Shee seh: “Ah feel soh hapi fi deh ya. Ah di kandok chree Baibl stodi. Wan a dehn da wid wahn laydi weh 67 yaaz oal. Shee aalwayz greet mi wid wahn smail ahn wahn big hog. Wen shee laan dat Gaad naym da Jehoava, shee staat krai. Di laydi seh: ‘Dis da di fos taim eena mi laif dat Ai hyaa dat Gaad naym da Jehoava. Yoo way yonga dan mee, bot yu teech mi di moas impoatant ting Ah kuda eva laan.ʼ Af koars, Ai staat krai tu. Ekspeeryens laik dis wan shoa mi dat fi liv dis kaina laif bring lata satisfakshan.” Laytli, Monique mi ga di privilij fi gaahn da di Skool fi Kingdom Ivanjelaizaz.

Di 2013 Yearbook of Jehovahʼs Witnesses mi ga wahn ripoat bowt di konchri a Myanmar. Wahn sista eena ih erli 30ʼs weh naym Li mi don di liv da Southeast Asia. Shee mi ga wahn ful-taim jab, bot di ripoat eena di Yearbook mek ih staat tink bowt goh serv da Myanmar. Shee seh: “Eena 2014 wen Ah mi gaahn da di speshal kanvenshan da Yangon, Ah mi meet wahn marid kopl weh di serv eena di Chaineez teritori da Myanmar. Sins Ai taak Chaineez, Ah disaid fi moov tu Myanmar fi sopoat di Chaineez groop deh. Ah jain op wid Monique, ahn wi moov tu Mandalay. Jehoava bles wi. Di too a wi mi fain paat-taim werk di teech da di saym skool, ahn wi mi fain wahn apaatment noh faar fahn di skool. Eevn doa di weda hat ahn wi noh aalwayz ga di bes eena laif, Ah injai mi servis ya. Di peepl da Myanmar liv wahn simpl laif. Dehn hombl ahn wilin fi tek di taim fi lisn tu di gud nyooz. Ih soh eksaitin fi si how Jehoava di speed op di werk. Ah reeli bileev dat da Jehoava wil fi mek Ah deh ya da Mandalay.”

Too ada painyaa fahn Japan mi ekspeeryens how Jehoava ansa dehn pryaaz. Di brada naym Jumpei an ih waif naym Nao. Di too a dehn deh eena dehn mid-30ʼs. Dehn mi don di serv eena wahn sain-langwij kangrigayshan da Japan. Soh wai dehn moov  tu Myanmar? Jumpei seh: “Mee ahn mi waif mi aalwayz ga di goal fi serv eena wahn difrent konchri. Wahn brada fahn wi sain-langwij kangrigayshan da Japan mi moov tu Myanmar. Eevn doa wi onli mi ga lee bit a moni sayv op, eena May 2010 wee moov tu. Di bradaz ahn sistaz da Myanmar mi gi wi wahn waam welkom!” How hihn feel fi preech tu peepl weh def da Myanmar? Ih seh: “Lata peepl inchrestid eena di gud nyooz. Wen wi shoa dehn di sain-langwij veedyo, dehn lov it. Wi soh glad dat wi mi mek di disizhan fi kohn serv Jehoava yasoh!”

How Jumpei ahn Nao provaid fi dehnself? Hihn seh: “Afta chree yaaz, wi yooz op moas a di moni weh wi mi ga sayv ahn wi neva ga nof moni fi pay di rent fi di neks yaa. Mee ahn mi waif staat pray haad. Wel, wi geh wahn leta fahn di branch aafis weh wi neva mi-di ekspek. Dehn invait wi fi serv az speshal painyaaz! Wi mi chros eena Jehoava, ahn wi ekspeeryens dat hihn neva faget wi. Ih di tek kayr a wi eena evri way.” Laytli, Jumpei ahn Nao gaahn da di Skool fi Kingdom Ivanjelaizaz tu.

Wai Simone, wahn brada eena ih mid-40ʼs, fahn Italy, an ih waif, Anna, wahn sista eena ih layt 30ʼs, fahn New Zealand, moov tu Myanmar? Anna seh: “Da mi di ripoat eena di 2013 Yearbook bowt Myanmar!” Simone seh: “Da wahn grayt privilij fi serv da Myanmar. Wi noh ga di saym tingz ya fi dischrak wi. Ah ku spen moa taim eena Jehoava werk. Ih amayzin fi si how Jehoava tek kayr a wi wen wi wilin fi goh help owt sohnweh els.” (Ps. 121:5) Anna seh: “Dis da di hapiyis Ai eva feel. Wi ga wahn simpl laif. Ah spen moa taim wid mi hozban, ahn wi ga wahn schranga rilayshanship wid wan anada. Wi geh fi mek nyoo frenz tu. Peepl lov di Witnisiz ahn dehn inchrestid eena di gud nyooz!”

Anna seh: “Wan day, Ah mi-di preech tu wahn yong laydi da di maakit, bot bifoa wi don taak, Ah tel ahn dat Ah wuda waahn meet ahn agen. Wen wi meet agen, shee bring wahn fren wid ahn. Di neks taim, shee bring wahn fyoo moa frenz. Layta, shee bring eevn moa frenz. Now Ah di stodi wid faiv a dehn.” Simone seh: “Peepl eena di teritori frenli ahn dehn waahn laan. Wahn lata dehn inchrestid. Wi jos noh ga inof taim fi stodi wid aala dehn.”

Weh sohn bradaz ahn sistaz mi du bifoa dehn disaid fi moov tu Myanmar? Mizuho, fahn Japan, seh: “Mee ahn mi hozban, Sachio, mi aalwayz waahn serv eena wahn konchri weh need help. Bot wi neva shoar wehpaat fi goh. Wi mi reed di ripoat bowt Myanmar eena di 2013 Yearbook. Di ekspeeryens dehn mi toch wi haat. Rait away wi chek si if wee ku goh serv deh.” Sachio seh: “Wi disaid fi gaahn vizit Yangon, di mayn siti da Myanmar, fi  wan week. Weh wi mi fain owt eena da wan week mi kanvins wi fi moov ya.”

Rodney an ih waif, Jane, da fahn Australia. Di too a dehn deh eena dehn 50ʼs. Dehn ahn dehn son, Jordan, ahn daata, Danica, di serv da Myanmar sins 2010. Rodney seh: “Di way di peepl waahn hyaa di chroot reeli mi toch wi. Fi shoar Ai wuda inkorij ada familiz fi chrai serv eena wahn plays laik Myanmar.” Wai? Ih seh: “Ih wandaful fi si how dis ekspeeryens help wi fi jraa kloasa tu Jehoava! Wahn lata yong peepl spen soh moch taim pahn dehn foan. Dehn bizi wid dehn jab ahn tu kansaan bowt dehn kaar an ada tingz eena dehn laif. Bot fi wee chiljren bizi di laan nyoo werdz fi yooz eena di minischri. Dehn chrai fi laan how fi teech peepl hoo noh noa di Baibl ahn how fi gi wahn ansa eena di loakal langwij joorin di meetin. Dehn spen wahn lata taim di du ada spirichwal tingz weh fon fi du.”

Oliver, wahn brada eena ih layt 30ʼs fahn di United States, eksplayn wai hihn wuda inkorij adaz fi du dis kaina servis. Ih seh: “Ah fain dat Ah geh lata benifits wen Ah du wahn difrent kaina servis dan weh Ah feel komfatabl wid. Now dat Ah liv faar fahn hoam, mi kanfidens ahn chros eena Jehoava geh schranga. Noh mata weh sichuwayshan Ah deh eena, Ah noa Jehoava wahn dehdeh fi mi. Ah di serv wid bradaz hoo Ah neva noa bifoa. Aala wi bileev eena di saym tingz. Dis teech mi dat notn eena dis werl moa impoatant dan di Kingdom a Gaad.” Tudeh, Oliver an ih waif, Anna, di serv eena wahn Chaineez groop.

Trazel, wahn sista weh eena ih 50ʼs fahn Australia, di serv da Myanmar sins 2004. Shee seh: “Ai inkorij enibadi hoo kud, fi goh painyaa sohnweh els. Ai ekspeeryens dat if yoo ga di dizaiya fi goh serv sohnweh, Jehoava wahn bles yu efoat. Ai neva jreem dat Ai wuda di liv laik dis. Dis da di bes laif Ai kuda mi eva wish fa. An Ah feel hapi ahn satisfai wid weh Ah di du.”

Aala dehnya ekspeeryens fahn Myanmar onli toch wi haat, noh chroo? Wi hoap dat dehn inkorij yu fi waahn goh serv sohnweh weh need help. Di bradaz ahn sistaz weh di serv da Myanmar di bayg unu seh, “Pleez, kohn da Myanmar ahn help wi, noh?”