Di evidens shoa dat Jeezas mi staat tu serv az Hai Prees wen ih mi geh baptaiz eena di yaa 29 C.E. How wi noa dat? Wen Jeezas mi geh baptaiz, hihn mi shoa dat ih mi wilin fi aafa op fi hihn laif az wahn sakrifais pahn wahn alta. Dis alta da wahn simbolik alta weh stan fi Gaad wil. (Gal. 1:4; Heeb. 10:5-10) Sins wahn alta da wahn impoatant paat a wahn templ, di spirichwal templ mi praabli staat tu egzis di saym taim wen Jeezas mi geh baptaiz. Jehoava grayt spirichwal templ stan fi evriting weh mek it pasabl fi mek wi wership ahn di rait way bays pahn Jeezas ransom sakrifais.—Mach. 3:16, 17; Heeb. 5:4-6.

Di grayt spirichwal templ mi need wahn hai prees fi serv een deh. Soh Jehoava mi “poar owt di Hoali Spirit ahn ih powa” pahn Jeezas fi anoint hihn az Hai Prees. (Aks 10:37, 38; Maak 1:9-11) Bot how wi noa dat Jehoava mi apoint Jeezas az Hai Prees bifoa ih mi ded ahn rezorek? Di egzampl a Ayron ahn di hai prees dehn weh mi serv afta hihn wahn help wi fi ansa da kweschan.

Di Laa weh Gaad mi gi Moaziz seh dat onli di hai prees kuda mi gaan eena di Moas Hoali a di tabernakl, ahn laytaraan, eena di Moas Hoali a di templ. Wahn kertn mi separayt di Hoali fahn di Moas Hoali. Di onli taim di hai prees wuda paas chroo da kertn da-mi pahn Atoanment Day. (Heeb. 9:1-3, 6, 7) Ayron ahn di hai prees dehn weh mi serv afta hihn mi staat tu serv az hai prees bifoa dehn paas chroo di kertn ahn gaan eena di Moas Hoali. Saym way soh, Jeezas mosi mi staat tu serv az Hai Prees bifoa ih mi ded, an ih mi haftu ded bifoa ih kuda mi paas “chroo di kertn, weh da fi hihn oan badi,” tu laif da hevn. (Heeb. 10:20) Sayka dat, di apasl Paal mi seh dat Jeezas mi kohn “fi bee di hai prees,” ahn den ih paas chroo di “tent weh . . . grayta ahn moa perfek” ahn “gaan eena hevn ihself.”—Heeb. 9:11, 24.

No difrens deh bitween wen di nyoo kovenant mi leegalaiz ahn wen ih mi staat tu fongshan. Wai wi seh dat? Wen Jeezas mi gaan op da hevn ahn prizent di valyu a fi hihn perfek hyooman laif weh ih mi aafa op fi wee, hihn mi-di staat di proases fi leegalaiz di nyoo kovenant. Dat mi aalso mek di nyoo kovenant staat tu fongshan. Bot dat da noh aal weh mi haftu hapm.

Fers, Jeezas mi gaahn fronta Jehoava. Den, Jeezas mi aafa op di valyu a fi hihn sakrifais tu Jehoava. Den fainali, Jehoava mi aksep di valyu a Jeezas sakrifais. Di kovenant neva fongshan di way ih sopoas tu til aala dehnya ting mi hapm.

Di Baibl noh tel wi egzakli wen Jehoava mi aksep di valyu a Jeezas sakrifais. Soh wi kyaahn seh egzakli wen di nyoo kovenant mi leegalaiz an aalso staat tu fongshan. Bot wi doo noa dat Jeezas mi gaan op da hevn ten dayz bifoa Pentikaas. (Aks 1:3) Sohn taim joorin dehn ten dayz, Jeezas mi aafa di valyu a fi hihn sakrifais tu Jehoava, ahn Hihn mi aksep it. (Heeb. 9:12) Wi noa dis bikaaz a weh mi hapm pahn Pentikaas eena di yaa 33 C.E. (Aks 2:1-4, 32, 33) Soh bai den di kovenant mi don leegalaiz an ih mi-di fongshan.

Fi rivyoo, di nyoo kovenant mi leegalaiz ahn staat tu fongshan afta Jehoava mi aksep di valyu a Jeezas sakrifais. Fahn den, di kovenant di fongshan wid di Hai Prees, Jeezas, az di helpa fi di kovenant.—Heeb. 7:25; 8:1-3, 6; 9:13-15.