1. Akaadn tu Filipiyanz 2:3, how wi ku ga wahn gud rilayshanship wid adaz if wi hombl?

WEN wi hombl, wi wilin fi obay Jehoava bikaaz wi andastan dat fi hihn standadz gud fi wi. (Ifee. 4:22-24) Wen wi hombl, wi tink dat weh Jehoava waahn moa impoatant dan weh wee waahn. Aalso wen wi hombl, wi si adaz az moa impoatant dan wee. Sayka dat, wi ga wahn gud rilayshanship wid Jehoava ahn wi bradaz ahn sistaz eena di kangrigayshan.—Reed Filipiyanz 2:3.

2. Weh di apasl Paal mi rekonaiz, ahn weh wi wahn diskos eena dis aatikl?

² If wi noh kyaaful, doh, wi ku staat tu ak laik peepl eena di werl weh prowd ahn selfish. * Ih luk laik dat da-mi wahn prablem fi di Kristyanz bak eena di fers senchri C.E., bikaaz dis da weh di apasl Paal mi rait tu di Roamanz: “Ah di tel evri wan a unu dat unu mosn geh swel-hed ahn tink seh unu da sohnting wen unu da noh notn. Insteda dat, unu mos bee sensabl wen unu tink bowt unuself.” (Roam. 12:3) Paal mi rekonaiz dat wi haftu rispek wiself. Bot wi need fi bee hombl soh dat wi kip di prapa vyoo a wiself. Dis aatikl wahn diskos bowt chree paats a wi laif weh wi haftu bee hombl soh dat wi noh tink tu moch a wiself eena: (1) wi marij, (2) wi servis tu Jehoava, ahn (3) di way how wi yooz soashal meedya.

3. Wai prablemz ku kom op eena wahn marij, ahn how som peepl chrai fi solv dehn prablemz?

³ Jehoava mi mek marij soh dat hozban ahn waif ku bee  hapi tugeda. Bot bikaaz needa di hozban ner di waif perfek, prablemz wahn aalwayz kom op. Az a mata a fak, Paal mi seh dat enibadi weh geh marid ku ekspek dat dehn wahn ga prablemz. (1 Kor. 7:28) Som kopl mait aalwayz di kwaaril wid wan anada ahn dehn mait en op di tink dat dehn neva shuda mi geh marid tu eech ada. If dehn tink laik peepl eena di werl, dehn wahn hori fi tink dat wahn divoas wuda fiks dehn prablemz. If dat da di kays, dehn wahn di tink onli bowt dehnself ahn weh mek dehn hapi.

4. Weh wi fi avoid eena wi marij?

⁴ Wi noh fi tink dat wi kyaahn sayv wi marij. Wi noa dat akaadn tu di Baibl onli wan reezn deh fi divoas, ahn dat da sekshwal imoraliti. (Mach. 5:32) Soh wen prablemz kom op eena wi marij, wi noh fi bee prowd ahn tink: ‘Mai hozban er mai waif noh eevn kay bowt mee. Ah noh di geh di lov weh Ah dizerv. Maybi Ah wuda bee hapiya wid sombadi els.ʼ If wi tink da way, wi onli di tink bowt wiself ahn noh bowt wi hozban er waif. Di wizdom a di werl tel yu fi fala yu haat ahn du weh mek yoo hapi, eevn if dat meenz dat yu geh wahn divoas. Bot di Baibl seh: “Unu mos luk owt fi wan anada, ahn noh oanli fi unu oanself.” (Fil. 2:4) Jehoava waahn mek yu stay marid, hihn noh waahn yu divoas yu hozban er waif. (Mach. 19:6) Jehoava waahn mek yu tink bowt hihn fers, noh bowt yuself.

5. Akaadn tu Ifeezhanz 5:33, how wahn hozban ahn waif shuda chreet eech ada?

⁵ Wahn hozban ahn waif fi chreet wan anada wid lov ahn rispek. (Reed Ifeezhanz 5:33.) Di Baibl seh dat ih moa impoatant fi gi dan fi get. (Aks 20:35) Wat da wahn kwaliti weh wahn help wahn kopl fi shoa lov ahn rispek? Da kwaliti da  hyoomiliti. Hozban ahn waif weh hombl noh tink bowt dehn oanself bot dehn “tink bowt weh gud” fi di ada persn tu.—1 Kor. 10:24.

6. Weh yu laan fahn weh Steven and Stephanie seh?

⁶ Lata Kristyan koplz hapiya eena dehn marij bikaaz dehn laan fi bee hombl. Fi egzampl, wahn hozban weh naym Steven seh: “If unu da wahn teem, unu wahn werk tugeda, espeshali wen unu ga prablemz. Insteda aks yuself ‘dis wahn gud fi mee?ʼ yu wahn aks yuself ‘dis wahn gud fi wee?ʼ” Ih waif, Stephanie, feel di saym way. Shee seh: “Nobadi waahn liv wid sombadi weh aalwayz di kwaaril wid dehn. Wen wahn prablem kom op, wi chrai fain owt weh kaaz it. Den wi pray, du sohn risaach, ahn taak bowt how fi solv di prablem. Wi chrai fiks di prablem ahn noh fait wid wan anada.” Hozban ahn waif wahn bee hapiya if dehn noh tink tu moch a dehnself.

7. Weh wahn brada shuda du if ih geh wahn asainment eena Jehoava aaganaizayshan?

⁷ Tu wee, da wahn aana fi serv Jehoava eena eni way weh wi kud. (Ps. 27:4; 84:10) Da wahn gud ting if wahn brada wilin fi du moa eena Jehoava servis. Az a mata a fak, di Baibl seh dat if wahn brada di reech owt fi bee wahn oavaseeya, “dat da wahn gud ting.” (1 Tim. 3:1) Bot, wen ih geh wahn asainment, ih noh fi tink tu moch a ihself. (Look 17:7-10) Ih shuda waahn bee hombl ahn serv adaz insted.—2 Kor. 12:15.

8. Weh wi ku laan fahn Daiyachrifeez, Yuzaiya, an Absalom egzampl?

⁸ Di Baibl taak bowt sohn peepl weh mi tink tu moch a dehnself. Daiyachrifeez mi chrai put ihself az leeda eena di kangrigayshan wen hihn neva ga di atariti fi du dat. (3 Jan 9) Yuzaiya mi prowd ahn hihn mi chrai du wahn jab weh Jehoava neva asain ahn fi du. (2 Chron. 26:16-21) Absalom mi chriki an ih mi waahn bee king bad, soh ih mi play laik ih lov di peepl soh dat dehn wuda sopoat ahn. (2 Sam. 15:2-6) Dehndeh Baibl egzampl mek it klyaa dat Jehoava noh pleez wid peepl weh chrai geh gloari fi dehn oanself. (Prov. 25:27) Peepl weh prowd ahn weh waahn adaz luk op tu dehn wahn aalwayz en op eena prablem.—Prov. 16:18.

9. Weh egzampl Jeezas set?

⁹ Jeezas da neva laik dehndeh prowd peepl. Di Baibl seh dat eevn doa Jeezas da-mi laik Gaad, hihn neva eevn tink fi bee eekwal tu Gaad eena no kaina way. (Fil. 2:6) Eevn doa Jehoava da di onli wan weh ga moa atariti dan Jeezas, Jeezas neva tink tu moch a ihself. Ih tel ih disaipl dehn: “Enibadi weh da di lees monks unu da di moas impoatant wan.” (Look 9:48) Da wahn reel blesin fi serv wid painyaaz, ministeeryal servants, eldaz, ahn serkit oavaseeyaz hoo hombl laik Jeezas! If wi hombl, wi wahn shoa moa lov fi adaz. Ahn Jeezas mi seh dat Gaad chroo servants wahn shoa lov fi eech ada.—Jan 13:35.

10. Weh yu shuda du if yu feel laik di eldaz noh di handl prablemz eena di kangrigayshan di way dehn sopoas tu?

¹⁰ Weh yu shuda du if yu feel laik di eldaz noh di handl prablemz eena di kangrigayshan di way dehn sopoas tu? Insteda komplayn, yu ku shoa dat yu hombl ahn dat yu sopoat di bradaz weh di tek di leed. (Heeb. 13:17) How yu ku shoa dat  yu sopoat dehn bradaz? Aks yuself kweschan laik dehnya: ‘Di prablemz weh Ai si eena di kangrigayshan reeli soh seeryos dat di eldaz need fi deel wid dehn? Dis da di karek taim fi fiks dehn? Da mai rispansabiliti fi fiks di prablem? Ai reeli di chrai promoat yooniti er Ai di chrai mek ada peepl tink dat Ai impoatant?ʼ

11. Akaadn tu Ifeezhanz 4:2, 3, weh wahn hapm if wi kip wiself hombl eena wi servis tu Jehoava?

¹¹ Tu Jehoava, ih moa impoatant fi mek wi bee hombl dan fi ga skilz. An ih moa impoatant fi mek wi bee yoonaitid dan fi foakos onli pahn get tingz don tu taim. Dats wai yu fi du yu bes fi kip yuself hombl eena yu servis tu Jehoava. If yu du dat, yu wahn help di kangrigayshan bee yoonaitid. (Reed Ifeezhanz 4:2, 3.) Preech az moch az yu kud. Luk fi eni apachooniti fi du kain tingz fi adaz. Shoa haspitaliti tu evribadi, eevn dehn wan weh noh ga rispansabiliti eena di kangrigayshan. (Mach. 6:1-4; Look 14:12-14) Wen yu kip yuself hombl ahn werk wid yu bradaz ahn sistaz, dehn wahn si dat yu ga skilz, bot moa impoatant dehn wahn si dat yu hombl.

12. Weh di Baibl seh bowt frenship? Pleez eksplayn yu ansa.

¹² Jehoava waahn mek wi injai di taim weh wi spen wid wi famili. (Ps. 133:1) Jeezas mi ga gud frenz. (Jan 15:15) Di Baibl eksplayn how wi benifit wen wi ga chroo frenz. (Prov. 17:17; 18:24) An ih tel wi dat ih noh gud fi mek wi kip tu wiself. (Prov. 18:1) Wahn lata peepl feel  laik soashal meedya da wahn way fi mek dehn ga lata frenz ahn mek dehn noh feel loanli. Bot wi haftu bee kyaaful wen wi yooz soashal meedya.

13. Wai som peepl weh yooz soashal meedya stil feel loanli ahn dipres?

¹³ Risaach shoa dat peepl weh spen wahn lata taim di luk pahn koments er pichaz weh ada peepl poas pahn dehn soashal meedya mait en op di feel loanli ahn dipres. Wai? Ih ku bee bikaaz lata taim peepl poas di bes pichaz a dehnself, dehn frenz, ahn di difrent plays wehpaat dehn chravl. Wen peepl si di priti pichaz weh sombadi els poas, dehn mait feel laik fi dehn laif noh speshal. Wahn Kristyan sista weh 19 yaaz oal seh: “Ah mi staat tu feel jelos wen Ah si dat ada peepl mi ga wahn lata fon pahn di weeken an Ai jos mi deh hoam di du notn.”

14. How di kongsl da 1 Peeta 3:8 ku help wi fi bee waiz wen wi di yooz soashal meedya?

¹⁴ Af koars, yu ku yooz soashal meedya eena wahn gud way. Fi egzampl, fi kamyoonikayt wid yu famili ahn frenz. Bot yu noatis, doh, dat som peepl poas pichaz, koments, ahn veedyo fi kaal atenshan tu dehnself? Ih luk laik dehn waahn aal di atenshan fi dehnself. Som peepl eevn poas sohn rood koments pahn dehn oan pichaz er pahn ada peepl pichaz. Kristyanz sopoas tu bee hombl ahn shoa kansaan fi wan anada, soh dehn shuda neva yooz soashal meedya laik dat.—Reed 1 Peeta 3:8.

15. How di Baibl ku help wi fi noh aalwayz chrai mek peepl tink wi impoatant?

¹⁵ If yu yooz soashal meedya, aks yuself dehnya kweschan: ‘Di picha dehn, veedyo dehn, ahn koment dehn weh Ai poas mek adaz tink dat Ai bregin? Ai di mek ada peepl feel jelos?ʼ Di Baibl seh: “Kaa aal weh deh eena di werl da aal di pleja weh di badi di los aafa, ahn aal di ting dehn weh peepl si ahn waahn, ahn aala di ting dehn weh mek wi haat geh prowd. Dehn ting deh noh kohn fahn Gaad, bot fahn di werl.” (1 Jan 2:16) Wan Baibl chranslayt di frayz “aala di ting dehn weh mek wi haat geh prowd”  az “wi waahn mek adaz tink wi impoatant.” Kristyanz noh feel laik dehn haftu promoat dehnself. Dehn fala di Baibl kongsl: “Noh mek wi geh prowd ahn di ron gens wan anada ahn di jelos wan anada.” (Gal. 5:26) If wi hombl, wi noh wahn bee laik di peepl dehn eena di werl weh prowd ahn weh waahn mek peepl tink dat dehn impoatant.

16. Wai wi noh fi bee prowd?

¹⁶ Wi haftu laan fi bee hombl bikaaz peepl weh prowd noh “sensabl eena di way dehn tink.” (Roam. 12:3) Prowd peepl tink dehn moa impoatant dan evribadi els ahn dehn noh gree wid nobadi. Lata taimz, di way dehn tink ahn di tingz weh dehn du mek dehn hert dehnself er ada peepl. If dehn noh chaynj di way dehn tink, Saytan wahn blain dehn ahn korop dehn main. (2 Kor. 4:4; 11:3) Pahn di ada han, hombl peepl sensabl eena di way how dehn tink bowt dehnself. Dehn andastan dat eena wahn lata way ada peepl beta dan dehn. (Fil. 2:3) Ahn dehn noa dat “Gaad fait gens dehn wan weh prowd, bot ih help dehn wan weh hombl.” (1 Peet. 5:5) Dehn noh waahn bee Jehoava enimi.

17. Weh wi haftu du fi kip wiself hombl?

¹⁷ Fi kip wiself hombl wi haftu du weh di Baibl seh: “Giv op da [oal] way a laif deh wid dehndeh bad habit. Insteda dat, yu fi put aan di nyoo self.” Wi haftu werk haad fi du dat. Wi haftu stodi Jeezas egzampl ahn chrai az haad az pasabl fi liv di saym way. (Kol. 3:9, 10; 1 Peet. 2:21) If wi du dat, wi wahn benifit wahn lat. Az wi chrai haad fi kip wiself hombl, wi famili laif wahn geh beta, wi wahn promoat yooniti eena di kangrigayshan, ahn wi wahn mek shoar dat wi noh yooz soashal meedya eena di rang way. Moa impoatant dan eniting, wi wahn ga Jehoava blesin ahn hihn wahn pleez wid wi.