1. Weh di apasl Paal mi seh bowt ihself?

DI APASL PAAL mi admit dat sohntaim hihn mi feel week. Hihn mi seh dat ih badi “di ways weh,” ahn dat ih neva eezi fi du weh rait. Paal mi aalso seh dat Jehoava neva aalwayz ansa ih pryaaz di way hihn mi waahn. (2 Kor. 4:16; 12:7-9; Roam. 7:21-23) Paal mi aalso seh dat di peepl weh mi deh gens ahn mi tink dat hihn week. * Bot hihn neva mek di bad tingz weh adaz mi seh bowt ahn er ih oan mistayk dehn mek ih tink dat hihn neva gud fi notn.—2 Kor. 10:10-12, 17, 18.

2. Akaadn tu 2 Korintyanz 12:9, 10, weh impoatant lesn Paal mi laan?

² Paal mi laan wahn impoatant lesn. Hihn mi laan dat wahn persn ku bee schrang eevn wen ih feel laik ih week. (Reed 2 Korintyanz 12:9, 10.) Jehoava mi tel Paal, “Mai powa werk di bes wen yu week.” Dat meen dat Jehoava wuda mi giv Paal di schrent weh ih mi need. Fers, mek wi si wai wi shudn geh opset wen wi enimi dehn insolt wi.

3. Wai wi ku bee hapi wen peepl insolt wi?

³ Non a wi laik wen peepl insolt wi. Bot if wi enimi dehn insolt wi, an if weh dehn seh mek wi feel opset, wi ku geh diskorij. (Prov 24:10) Soh how wi shuda feel wen peepl insolt wi? Jos laik Paal, wi ku bee “hapi . . . wen dehn insolt  [wi].” (2 Kor. 12:10) Wai? Bikaaz wen peepl insolt wi er ton gens wi, ih shoa dat wee da Jeezas chroo disaiplz. (1 Peet. 4:14) Jeezas mi seh dat peepl mi wahn persikyoot ih falowaz. (Jan 15:18-20) Dat mi hapm tu di Kristyanz eena di fers senchri. Eena dehndeh dayz, peepl weh mi liv anda di Greek kolcha mi vyoo Kristyanz az week ahn foolish. Ahn di Jooz dehn mi tink dehn da “jos aadineri peepl,” laik fi egzampl, di apasl Peeta ahn Jan. (Aks 4:13) Wahn lata peepl mi tink dat Kristyanz da week peepl weh kyaahn fait fi dehnself. Dehn neva get involv eena palitiks, soh dehn mi kyaahn mek chaynjiz eena di govament. Dehn neva jain eni aami, soh dehn kudn fait eena waar er difen dehnself. Ahn peepl eena di kamyooniti mi luk dong pahn dehn.

4. Weh di Kristyanz eena di fers senchri mi du wen peepl mi seh bad tingz bowt dehn?

⁴ Yu tink di Kristyanz eena di fers senchri mi mek di bad tingz weh peepl seh bowt dehn stap dehn? Non ataal! Fi egzampl, di apasl Jan ahn Peeta mi feel laik da wahn aana fi mek peepl persikyoot dehn sayka weh dehn fala Jeezas ahn teech adaz bowt ahn. (Aks 4:18-21; 5:27-29, 40-42) Di disaipl dehn neva ga no reezn fi feel shaym. Eevn doa peepl eena di kamyooniti neva rispek di Kristyanz eena di fers senchri, dehndeh Kristyan mi du moch moa fi help adaz dan dehn enimiz. Fi egzampl, som a di Kristyanz mi rait sohn buk a di Baibl weh stil di help milyanz a peepl tudeh. Ahn di Kingdom weh dehn mi preech bowt don di rool da hevn, an ih wahn soon rool oava aal hyoomanz pahn di ert. (Mach. 24:14) Di powaful Roaman govament weh yoostu persikyoot di Kristyanz noh egzis nohmoh. Bot dehndeh Kristyan di rool az king da hevn now. Di peepl weh mi persikyoot dehn don ded, an if dehn doo geh rezorek, dehn saym Kristyanz weh dehn mi hayt wahn rool oava dehn.—Rev. 5:10.

5. Akaadn tu Jan 15:19, wai peepl eena di werl noh rispek Jehoava peepl?

⁵ Tudeh, som peepl eena di werl noh rispek Jehoava peepl ahn dehn mak wi bikaaz dehn tink wi foolish ahn week. Wai? Bikaaz wi noh ga di saym atichood laik di peepl eena di werl rong wi. Wi chrai fi bee hombl an obeedyant. Bot peepl eena di werl prayz op peepl weh prowd, peepl weh aalwayz waahn du dehn oan ting, ahn peepl weh noh waahn nobadi tel dehn weh fi du. Pahn tap a dat, wi noh get involv eena palitiks, ahn wi noh jain di aami eena no konchri. Wee difrent fahn di peepl eena di werl, soh dehn tink dehn beta dan wee.—Reed Jan 15:19; Roam. 12:2.

6. Weh grayt werk Jehoava di help ih peepl fi du?

⁶ Eevn doa peepl eena di werl tink dat wi week, Jehoava di yooz wi fi du grayt tingz. Hihn ga fi hihn peepl di du di graytis preechin werk eva, ahn hihn di mek shoar dat notn stap dehn. Tudeh, hihn di yooz ih servants fi projoos magazeen weh avaylabl eena moa konchri ahn moa langwij dan eni ada magazeen ahn fi yooz di Baibl fi help milyanz a peepl fi mek dehn laif beta. Da onli Jehoava mek dis werk pasabl. Hihn di yooz wahn groop a peepl weh di werl kansida week fi du dis grayt werk. How bowt eech wan a wi? Yu tink Jehoava ku help wee fi bee powaful tu? If yes, weh wi ku du fi geh fi hihn help? Mek wi kansida chree  tingz weh wi wahn laan fahn di apasl Paal egzampl.

7. Wat da wan lesn weh wi laan fahn Paal egzampl?

⁷ Dis da weh wi laan fahn Paal egzampl: Noh pen pahn yu oan powa ahn skilz wen yu di serv Jehoava. Lata peepl mi admaiya Paal bikaaz a ih sichuwayshan eena laif ahn di skilz weh ih mi ga. Hihn kuda mi bee wahn prowd ahn bregin persn ahn hihn kuda mi pen pan ih oan powa ahn skilz. Hihn mi groa op da Tarsos, wahn siti da Roam. Tarsos da-mi wahn rich siti an ih mi ga wahn faymos yooniversiti. Paal mi ga wahn gud ejukayshan, an ih mi laan fahn Gamalyel, wan a di bes teechaz eena fi hihn taim. (Aks 5:34; 22:3) Ahn Paal yoostu bee wahn impoatant persn monks di Jooish leeda dehn. Hihn mi seh: “Ah yoostu tek mai Jooish rilijan tu haat moa dahn lata dehn wan rong mai ayj.” (Gal. 1:13, 14; Aks 26:4) Bot Paal neva pen pan ih oanself.

8. Akaadn tu Filipiyanz 3:8, how Paal mi luk pahn di tingz weh ih mi lef bihain, ahn wai ih mi “hapi wen [ih] mi week”?

⁸ Paal mi hapi fi lef bihain di tingz weh mi mek ada peepl tink hihn impoatant. In fak, hihn mi riyalaiz dat dehndeh tingz weh ih yoostu ga da-mi loan “gyaabij.” (Reed Filipiyanz 3:8) Wen Paal mi ton wahn Kristyan, ih neva eezi far ahn. Ih oan peepl mi hayt ahn. (Aks 23:12-14) Ahn di Roamanz mi beet ahn op ahn chroa ahn eena jayl. (Aks 16:19-24, 37) Aalso, Paal mi riyalaiz dat hihn neva perfek ahn dat ih neva eezi fi du weh rait. (Roam. 7:21-25) Bot hihn neva stap fala Krais jos bikaaz fi hihn oan peepl mi ton gens ahn. Insted, hihn mi ‘hapi wen ih mi week.ʼ Wai? Bikaaz da mi wen hihn mi week hihn mi si how Gaad mi help ahn.—2 Kor. 4:7; 12:10.

9. How wi shuda feel bowt tingz weh mek wi feel week?

⁹ If wi waahn Jehoava gi wi di schrent weh wi need, wi noh fi mek wi fizikal schrent, wi ejukayshan, wi kolcha, er di  tingz weh wi oan mek wi feel impoatant. Dehnya tingz da noh weh Jehoava si az impoatant. Az a mata a fak, Jehoava chooz peepl weh noh waiz, powaful, er impoatant tu peepl eena di werl. Jehoava chooz fi yooz “dehn wan weh noh ga no powa ataal.” (1 Kor. 1:26, 27) Soh eevn if yu feel laik yu noh ga fizikal schrent, yu noh ejukaytid, er if peepl luk dong pahn yu kolcha er bakgrong, yu ku stil serv Jehoava. Yu ku vyoo yu sichuwayshan eena wahn pazitiv way. How yu ku du dat? Memba dat wen yu noh ga di tingz weh peepl kansida fi bee impoatant eena di werl, yu wahn ku si how Jehoava gi yu powa. Fi egzampl, if yu frayd fi peepl weh chrai mek yu dowt weh yu bileev, pray tu Jehoava. Aks ahn fi gi yu di korij fi taak tu adaz bowt weh yu bileev. (Ifee. 6:19, 20) If yu di schrogl wid wahn seeryos kandishan, aks Jehoava fi gi yu di schrent weh yu need fi stay az bizi az yu kud eena fi hihn servis. Evri taim yu si how Jehoava help yu, yu fayt wahn groa ahn yu wahn geh schranga.

10. Wai wi shuda waahn laan bowt di egzampl a faytful peepl eena di paas laik weh Heebrooz 11:32-34 taak bowt?

¹⁰ Paal da-mi wahn gud styoodent a di Baibl. Hihn mi laan wahn lata tingz fahn di egzampl a faytful servants a Jehoava weh hihn mi reed bowt. Wen Paal mi-di rait tu di Heebroo Kristyanz, ih mi aks dehn fi tink bowt dehndeh egzampl a faytful servants a Jehoava. (Reed Heebrooz 11:32-34) Kansida di egzampl a King Dayvid, hoo da wan a di egzampl weh Paal mi fala. King Dayvid neva onli haftu deel wid persikyooshan fan ih enimi dehn, bot eevn fahn dehn wan weh yoostu bee ih frenz. Az wi luk pahn Dayvid egzampl, wi wahn andastan wai dat kuda mi help Paal ahn how wi ku fala Paal egzampl.

11. Wai sombadi kuda mi luk pahn Dayvid laik ih da-mi wahn week persn? (Koment pahn di picha pahn di kova.)

¹¹ Golaiyat, hoo da-mi wahn powaful soalja, mi si Dayvid az sombadi weh week. Wen Golaiyat mi si Dayvid, hihn mi tek ahn mek papishoh. Aftaraal, Golaiyat mi biga dan Dayvid, an ih mi ga beta ikwipment ahn chraynin fi fait waar. Pahn di ada han, Dayvid neva ga non a dehndeh tingz. Dayvid mi luk week bikaaz ih da-mi jos wahn lee bwai, noh wahn soalja weh chrayn fi fait eena waar. Hihn mi pen pahn Jehoava, ahn Jehoava mi giv ahn di powa fi fait Golaiyat.—1 Sam. 17:41-45, 50.

12. Wat da wahn nada chalenj weh Dayvid mi fays?

¹² Dayvid mi haftu deel wid wahn nada chalenj weh kuda mi mek ih feel week. Dayvid mi noa dat Jehoava mi chooz Saal az king oava Izrel, soh Dayvid mi laayal tu ahn. Fers, King Saal mi rispek Dayvid. Bot afta dat, Saal mi geh prowd ahn den ih mi jelos Dayvid. Ih mi chreet Dayvid bad, an ih mi eevn chrai kil ahn.—1 Sam. 18:6-9, 29; 19:9-11.

13. Weh Dayvid mi du wen King Saal mi chreet ahn bad?

¹³ Eevn doa Saal mi chreet Dayvid bad, Dayvid mi stil ga rispek fi di king weh Jehoava mi apoint. (1 Sam. 24:6) Dayvid neva blaym Jehoava fi di bad tingz weh Saal mi du. Insteda dat, Dayvid mi pen pahn Jehoava fi mek ih giv ahn di schrent weh ih mi need fi bayr op chroo da haad taim.—Ps. 18:1, hedin.

14. Weh sichuwayshan Paal mi fays weh mi simila tu Dayvid wan?

 ¹⁴ Di apasl Paal mi fays wahn simila sichuwayshan tu Dayvid wan. Paal enimi dehn mi moa powaful dan hihn. Wahn lata di leeda dehn weh mi eena powa mi hayt ahn. Lata taim, dehn mi beet ahn an chroa ahn eena jayl. Peepl weh shuda mi bee Paal fren mi chreet ahn bad jos laik weh mi hapm tu Dayvid. Som Kristyanz mi eevn ton gens ahn. (2 Kor. 12:11; Fil. 3:18) Bot Paal mi win owt oava evribadi weh mi ton gens ahn. How hihn mi du dat? Hihn neva stap preech noh mata weh dehn mi du ahn. Hihn mi stay laayal tu ih bradaz ahn sistaz eevn wen dehn mi let ahn dong. Moa dan eniting els, hihn mi stay faytful tu Gaad. (2 Tim. 4:8) Hihn kuda mi du aala dis bikaaz hihn mi pen pahn Jehoava, noh pan ih oan schrent.

15. Weh wi sopoas tu du ahn how wi ku du it?

¹⁵ Yu frenz, famili, er peepl weh yu werk wid insolt yu? Sombadi eena di kangrigayshan eva chreet yu bad? If dat da di kays, jos tink bowt di egzampl weh Dayvid ahn Paal set. Yu ku kantinyu fi “win oava eevl bai di gud weh [yu] du.” (Roam. 12:21) Wen peepl ton gens wi, wi noh fait dehn laik how Dayvid mi fait Golaiyat. Insteda dat, wi win oava eevl wen wi help peepl fi laan bowt Jehoava ahn di Baibl. Yu ku du dat wen yu pen pahn di Baibl fi ansa peepl kweschan dehn. Yu ku aalso du dat wen yu kain ahn shoa rispek tu dehn wan weh chreet yu bad ahn wen yu du gud tu evribadi, eevn tu yu enimi dehn.—Mach. 5:44; 1 Peet. 3:15-17.

16-17. Weh Paal mi aalwayz memba?

¹⁶ Bifoa Paal mi ton wahn Kristyan, hihn mi kruwil tu Gaad peepl. (Aks 7:58; 1 Tim. 1:13) Jeezas ihself mi stap Saal, hoo wi noa tudeh az Paal, fahn persikyoot di Kristyan kangrigayshan. Jeezas mi taak tu Paal fahn hevn an ih mi mek ih geh blain. Fi geh bak ih sait, Paal mi haftu geh help fahn di saym peepl weh hihn  mi-di persikyoot. Hihn mi hombl ihself ahn mek Ananaiyas help ahn fi si agen.—Aks 9:3-9, 17, 18.

¹⁷ Afta dat, Paal mi geh fi bee wahn impoatant persn eena di Kristyan kangrigayshan, bot hihn neva ferget di lesn weh Jeezas mi teech ahn wen ih mi deh pahn di road tu Damaskos. Paal mi kantinyu fi bee hombl ahn hihn mi wilin fi aksep help fahn ih bradaz ahn sistaz. Hihn mi noa dat dehn da-mi “wahn big help” far ahn.—Kol. 4:10, 11.

18. Wai wi noh waahn aksep help fahn adaz sohntaim?

¹⁸ Weh wi ku laan fahn Paal egzampl? Wen wi mi fers laan di chroot, wi mi wilin fi aksep help fahn adaz bikaaz wi mi noa dat wi need wahn lata help. (1 Kor. 3:1, 2) How bowt now? Maybi wi di serv Jehoava fi wahn lang taim now ahn wi mait ga lata ekspeeryens, bot wi mait noh bee wilin fi aksep help fahn adaz espeshali if dehn jos kom eena di chroot. Bot wahn lata taim, Jehoava yooz wi bradaz ahn sistaz fi schrentn wi. (Roam. 1:11, 12) Soh, if wi waahn geh schrent fahn Jehoava, wi need fi aksep di help weh wi bradaz ahn sistaz gi wi.

19. Weh mi mek Paal du aal weh ih mi du?

¹⁹ Afta Paal mi ton Kristyan, hihn mi du wahn lata amayzin tingz. Wai? Bikaaz hihn mi laan dat ih noh mata wehpaat wahn persn kohn fram er humoch schrent, ejukayshan, er moni ih gat. If di persn hombl ahn chros eena Jehoava, ih ku du lata gud tingz. Jos laik Paal, aala wi shuda (1) pen pahn Jehoava, (2) laan fahn Baibl egzamplz, ahn (3) aksep help fahn wi bradaz ahn sistaz. Den yes, noh mata if wi feel week, Jehoava wahn gi wi di schrent fi du eniting!