Di neks yaa, di bradaz mi tel di Betel famili dat dehn mi wahn need help da di South Africa branch bikaaz dehn mi-di geh wahn nyoo masheen fi print. Ah mi valantyaa fi goh, an Ah mi reeli hapi wen dehn pik mi. Dehn mi aalso pik chree ada bradaz. Dehn da: Dennis Leech, Bill McLellan, ahn Ken Nordin. Dehn tel wi dat wi mi wahn stay da South Africa fi wahn lang taim!

Ah mi kaal mi ma an Ah tel ahn: “Ma, Ah ga nyooz fi yu. Ah gwehn da South Africa!” Mi ma da-mi wahn kwaiyet persn bot shee mi ga schrang fayt ahn wahn schrang rilayshanship wid Jehoava. Shee neva seh moch, bot Ah mi noa dat shee mi sopoat mi. Eevn doa mi ma ahn mi pa mi sad bikaaz Ah mi wahn deh faar fahn dehn, dehn neva gaahn gens mi disizhan fi goh da South Africa.

Da Brooklyn Betel, dehn mi chrayn di foa a wi fi chree monts soh wi ku laan fi werk wid wahn spesifik taip a printa. Den wi mi chravl pahn wahn ship fi goh da Cape Town, South Africa. Wi mi staat chravl eena di eevnin fahn Cape Town tu Johannesburg pahn wahn chrayn. Ah mi jos tern 20 yaaz oal. Wi fers stap da-mi eena wahn lee tong da Karoo. Ih mi dosti ahn hat. Di foa a wi mi luk owt di windo di wanda weh kaina plays dis. Weh dis nyoo asainment wahn bee laik? Afta sohn yaaz wen wi mi vizit di ayrya agen, wi mi fain owt dat dehnya lee tong neva dat bad ataal. Dehn mi nais ahn peesful.

Fi wahn fyoo yaaz, mi asainment da-mi fi werk wid di Linotype masheen. Dis masheen mi pripyaa di lain dehn a di letaz fi print di Wachtowa an Awayk! magazeen dehn. Di branch aafis mi print magazeen eena wahn lata difrent African langwij. Noh onli fi South Africa bot fi di ada konchriz eena Africa tu. Wi mi hapi dat wi mi kohn aal di way fahn Canada fi werk pahn dis printin masheen ahn wi mi-di mek gud yoos a it!

Laytaraan, Ah mi werk eena di Fakchri Aafis weh mi deel wid tingz weh ga fi du wid di printin, shipin, ahn chranslayshan werk. Mai laif mi bizi bot Ah mi injai weh Ah mi-di du.

Eena 1968, Ah marid Laura Bowen, wahn painyaa sista weh mi liv kloas tu Betel. Shee mi werk da Betel an ih mi taip fi di Chranslayshan Dipaatment. Bak den if yu mi-di serv da Betel ahn yu geh marid, yu wuda geh wahn neks asainment. Soh wen wi mi geh marid, dehn mi asain wi az speshal painyaaz. Ah mi staat tu geh lee worid bikaaz Ah mi-di serv da Betel fi ten yaaz aredi, an Ah neva haftu wori bowt how fi tek kyaa a sertn needz. Now Ah mi-di wanda how wi mi wahn servaiv pahn wahn speshal painyaa bojet. Evri mont eech wan a wi mi geh 25 rand. Bak den dat mi wert $35, U.S. Bot wi wuda onli geh dis moni if wi mi reech di amonk a owaz, ritern vizits, ahn giv owt di amonk a lichricha weh wi mi sopoas tu giv owt. Wid da moni wi mi wahn need fi pay rent, bai food, pay fi wi pasij, medisn, an eni ada persnal ekspens.

Wi mi geh asain az painyaaz fi serv eena wahn lee groop kloas tu di siti a Durban, weh deh pahn di Indian Ocean. Lata Indian peepl mi liv deh, ahn lata dehn da-mi chiljren a di werkaz hoo mi gaahn da South Africa fi werk da di shuga indoschri eena di layt 1800ʼs. Now dehn mi-di du difrent kaina werk bot dehn mi stil kip dehn kolcha ahn food, espeshali dehn nais kori. Ahn dehn mi eevn taak English, soh wi neva need fi laan wahn nyoo langwij fi preech tu dehn.

Wahn speshal painyaa mi fi spen 150 owaz eech mont eena di minischri. Soh mee ahn Laura mi mek wahn skejul soh dat wi ku spen siks owaz eena di minischri di fers day. Ih mi hat bad. Wi neva ga no ritern vizits ahn no Baibl stodiz, soh wi mi haftu preech fahn hows tu hows fi siks owaz. Noh tu lang afta wi mi staat preech, Ah tek wahn luk pahn mi wach an Ah si dat da-mi onli 40 minits sins wi mi staat preech! Ah staat tu wanda if wi mi wahn ku du dis asainment.

Bot soon, wi mi geh lee moa aaganaiz. Evri day wi mi pripyaa wahn sanwij ahn wi wuda put wi soop er kaafi eena wahn termos. Wen wi mi redi fi tek wahn brayk, wi wuda paak wi lee kaar bai wahn chree fi geh lee shayd. Sohn kyoot lee pikni wuda kohn rong ahn stayr pahn wi bikaaz wi mi luk difrent! Eena jos wahn fyoo dayz, wi mi noatis dat di res a di day goh faasa afta di fers too er chree owaz eena di minischri.

Wi mi feel soh hapi fi shayr di chroot fahn di Baibl wid peepl eena dis teritori! Dehn da-mi sohn veri kain ahn frenli peepl. Wi mi fain owt dat di Indian peepl mi ga lov ahn rispek fi Gaad. Wahn lata di Hindu peepl mi aalso aksep di Baibl mesij. Dehn mi hapi fi laan bowt Jehoava, Jeezas, di Baibl, di pramis a wahn nyoo werl eena di fyoocha, ahn di hoap fi di ded. Wan yaa layta, wi mi ga 20 Baibl stodiz. Evri day wi mi injai di eet wid wan a di famili dehn weh wi mi stodi wid. Wee mi reeli hapi.

Bot soon wi mi geh wahn nyoo asainment fi du serkit werk lang di koas a di byootiful Indian Ocean. Evri week, wahn famili wuda invait wi fi stay da dehn hows wail wi vizit an inkorij di kangrigayshan. Dehn mi mek wi feel laik wi da-mi paat a dehn famili. Wi mi injai fi spen taim wid dehn ahn dehn chiljren ahn wi mi eevn geh fi play wid dehn pets. Afta too wandaful yaaz, owta di blooz, wi geh wahn foan kaal fahn di branch. Di brada mi seh: “Wi wuda waahn unu kohn bak da Betel.” Ah mi tel ahn: “Wi reeli hapi owt ya.” Bot, af koars, wi mi wilin fi tek aan eni asainment.

Da Betel Ah mi geh asain fi werk eena di Servis Dipaatment, wehpaat Ah mi ga di privilij fi werk lang wid bradaz weh mi ga lata ekspeeryens. Eena dehndeh dayz, afta di serkit oavaseeya vizit wahn kangrigayshan hihn wuda sen wahn ripoat tu di branch. Bays pahn di ripoat a di serkit oavaseeya, di Servis Dipaatment wuda sen wahn leta tu di kangrigayshan. Dehnya leta mi fi inkorij ahn help di kangrigayshan eena wateva dehn  mait need. Dis da-mi lata werk fi wi bradaz weh chranslayt fahn Xhosa, Zulu, an ada langwij intu English ahn den fan English intu ada difrent African langwij. Ai mi reeli apreeshiayt dehnya chranslaytaz hoo mi aalso help mi fi andastan di haad taim weh wi African bradaz ahn sistaz mi gaahn chroo.

Joorin da taim, peepl da South Africa mi liv anda wahn govament weh mi separayt di difrent rays dehn ahn gi dehn dehn oan set ayrya fi liv. Bikaaz a dis, peepl fahn di difrent rays dehn kudn spen taim wid wan anada. Wi African bradaz mi taak dehn oan langwij, preech eena dehn oan langwij, ahn ga dehn meetin eena dehn oan langwij.

Ah neva noa wahn lata blak African peepl, bikaaz di peepl weh mi liv eena di teritori weh dehn mi asain mi eena mi taak loan English. Bot now Ah mi ga di chaans fi laan bowt di blak African peepl, dehn kolcha, ahn dehn chradishanz. Ah mi laan bowt di chalenjiz weh wi bradaz mi fays bikaaz a di loakal chradishanz ahn rilijos bileef dehn. Dehn mi ga lata korij fi rijek di chradishanz weh noh bays pahn di Baibl ahn fi rifyooz fi fala eniting weh mi ga fi du wid spiritizm. Dehn mi du dis eevn doa dehn famili ahn peepl eena di vilij mi deh gens dehn. Eena di vilij dehn, wahn lata peepl mi poa ahn som a dehn neva eevn gaahn da skool, bot dehn mi ga rispek fi di Baibl.

Ah mi ga di privilij fi werk pahn sohn leegal kays weh mi ga fi du wid freedom a wership an fi stay nyoochral. Dehn mi ga sohn yong Witnis weh mi geh tek owt fahn skool bikaaz dehn mi rifyooz fi jain eena di pryaaz ahn himz. Fi dehn laayalti ahn korij mi reeli mek mi fayt geh schranga.

Eena di lee African konchri weh naym Swaziland, di bradaz dehn mi fays wahn nada chalenj. Wen King Sobhuza ll mi ded, evribadi eena da konchri mi fi tek paat eena sohn chradishan weh ga fi du wid di wership a di ded. Di man dehn mi fi shayv aaf dehn hyaa, ahn di uman dehn mi fi kot dehn hyaa shaat. Wahn lata di bradaz ahn sistaz gaahn chroo persikyooshan bikaaz dehn mi rifyooz fi tek paat eena dis chradishan weh ga fi  du wid di wership a di ded. Fi dehn laayalti tu Jehoava mek wi reeli hapi. Wi mi laan wahn lat fahn wi African bradaz bowt weh ih meen fi ga laayalti ahn payshens. Ahn dat mi bil op wi fayt.

Eena 1981, Ah geh asain bak tu printin. Ah mi help owt di yooz kompyoota eena di printin werk. Dat da-mi wahn eksaitin taim. Di way how wi print mi-di chaynj wahn lat tu. Wahn loakal saylz man mi gi di branch wahn nyoo masheen weh wi kuda chrai owt fi free. Wi mi en op di geh faiv a dehnya nyoo masheen ahn wi mi stap yooz di ada nain Linotype masheen weh wi mi gat. Wi mi aalso geh fi set op wahn nyoo printin masheen ahn dis mi alow wi fi du moa printin dan eva bifoa.

Di kompyoota dehn mi help wi fi fain nyoo wayz fi put di infamayshan pahn di payj di yooz MEPS, weh da di Multilanguage Electronic Publishing System. Fahn di taim sins wee foa Betelaits gaahn werk da South Africa, teknalaji mi geh beta ahn beta! (Isa. 60:17) Bai den, di foa a wi mi don marid painyaa sistaz weh mi lov Jehoava wahn lat. Mee ahn Bill mi stil deh da Betel. Ken ahn Dennis mi don staat rayz wahn famili.

Moa ahn moa werk mi deh fi du da di branch. Dehn mi-di chranslayt ahn print Baibl lichricha eena wahn lata difrent langwij, ahn dehn mi-di ship dehn tu sohn ada branch. Bikaaz a dat, dehn mi need wahn nyoo Betel bildin. Di bradaz dehn mi bil wan da di wes paat a Johannesburg eena wahn byootiful ayrya, ahn dehn mi dedikayt it eena 1987. Da-mi wahn privilij fi bee paat a aala dis ahn fi serv wid di Branch Komiti da South Africa fi lata yaaz.

Da-mi wahn big sopraiz eena 2001 wen dehn mi invait mi fi serv wid di nyoo Branch Komiti da di United States. Eevn doa wi mi sad fi lef wi werk ahn frenz da South Africa, wi mi soh eksaitid fi staat wahn nyoo laif az paat a di United States Betel famili.

Bot wi mi wori kaaz wi mi wahn deh far fahn Laura ma weh mi-di geh oalda. Wi mi wahn kyaahn du moch far ahn way fahn New York, bot Laura chree yonga sista mi aafa fi help ih ma. Dehn tel wi: “Wee kyaahn deh eena speshal ful-taim servis, bot if wi luk afta mami, ih wahn help unu fi kantinyu wid unu asainment.” Wi soh tankful fi dehn.

Jos laik how Laura sista dehn tek kayr a dehn ma, mai oalda breda an ih waif, weh mi liv da Toronto, Canada, mi help wi fi tek kayr a mi ma, hoo da-mi wahn wido. Bai den, doh, mi ma mi-di liv wid mi breda an ih waif fi moa dan 20 yaaz aredi. Noh tu lang afta wi mi reech New York, mi ma mi ded. Wee reeli apreeshiayt how mi breda an ih waif mi lov ahn tek kayr a mami til ih mi ded. Da wahn blesin fi ga famili membaz weh sopoat yu ahn weh wilin fi ajos dehn laif fi tek kayr a payrents weh di geh oalda! Dat da wahn big rispansabiliti weh ku bee wahn chalenj sohntaim.

Fi sohn yaaz, mi asainment da di United States da-mi fi werk wehpaat dehn print lichricha. Dis werk di geh moa ahn moa eeziya fi du. Now, Ah di werk eena di Perchesin Dipaatment. Da wahn grayt privilij fi serv lang wid bowt 5,000 Betelaits ahn 2,000 valantyaaz fi di paas 20 yaaz!

Siksti yaaz agoa, Ah neva tink mi laif mi wahn bee laik dis. Chroo aala dehnya yaaz, Laura kompleetli sopoat mi. Ah ga wahn wandaful laif! Wi cherish aal di difrent asainment dehn weh wi mi geh an aal di wandaful peepl weh wi mi werk wid, inkloodin di bradaz da di difrent branch weh wi vizit eena difrent paats a di werl. Ah don oava 80 yaaz oal, soh a ga les werk fi du bikaaz di yonga bradaz dehn di geh chrayn fi du di werk.

Di saamis mi rait: “Di nayshan weh ga Jehoava az dehn Gaad wahn bee hapi.” (Ps. 33:12) Dat da chroo! Ah soh hapi dat Ah ku serv Jehoava lang wid fi hihn hapi peepl.