Jehoava waahn mek wahn marij bitween too peepl bee hapi, ahn hihn waahn mek dehn injai wahn kloas rilayshanship wid eech ada weh wahn laas fareva. (Mach. 19:4-6) If yu waahn geh marid, how yu ku fain wahn gud marij mayt? Jehoava da wi Kriyayta, soh hihn noa weh wi need fi mek wi ga wahn hapi marij. If wi aplai di prinsipl dehn weh hihn gi wi, wi ku bee reeli hapi. Mek wi luk pahn sohn prinsiplz weh ku help wi.

Fers, wi haftu andastan dis bowt wiself: “Di haat chrikiya dan eniting els an ih korop.” (Jer. 17:9) Wen too peepl weh waahn geh marid meet ahn dehn staat dayt, ih eezi fi mek dehn ga schrang feelinz fi eech ada. Wen dat hapm, ih ku bee reeli haad fi mek dehn mek wahn waiz disizhan. Wen peepl bays dehn disizhan fi geh marid onli pahn feelinz, moas a di taim dehn en op di geh disapointid. (Prov. 28:26) Dats wai too peepl weh jos di geh fi noa eech ada noh fi taak bowt dehn deep feelinz, er mek pramis.

Proverbs 22:3 seh: “Di waiz persn si di daynja ahn haid ihself, bot di wan dehn weh noh ga ekspeeryens kip aan di hed fi daynja ahn sofa di en rizolt.” Wai ih ku be wahn daynja fi yooz daytin websaits? Sad fi seh, wahn lata peepl don gaahn chroo sohn bad ekspeeryens. Som a dehn meet schraynjaz onlain, dehn staat dayt, ahn laytaraan dehn riyalaiz dat di persn mi lai dehn ahn tek advantij a dehn. Dehn aalso ga peepl weh noh aanis weh wuda kriyayt fayk akonk fi chrik inosent peepl ahn teef dehn moni. Sohntaim, di peepl weh du dehnya tingz klaym seh dehn da Witnisiz.

Noatis wahn neks daynja. Wahn lata daytin websait yooz difrent kompyoota proagram weh sopoas tu help yu fain hoo yu shuda dayt. Bot, dehn noh ga no evidens weh shoa dat dehndeh proagram reeli werk. Yu tink ih wuda bee waiz fi chros eena wahn kompyoota proagram fi mek wahn disizhan az impoatant az hoo ku bee wahn gud marij mayt? Wahn kompyoota proagram kuda neva bee beta dan Baibl prinsiplz!—Prov. 1:7; 3:5-7.

Wahn prinsipl weh deh eena Proverbs 14:15 seh: “Di persn wid lee bit a ekspeeryens bileev evriting weh dehn tel ahn, bot di  waiz persn kansida eech step.” Bifoa yu mek op yu main bowt weda wahn persn da wahn gud marij mayt, yu need fi geh fi noa di persn gud. Bot if yu meet sohnbadi pahn wahn daytin websait, dat ku bee haad fi du. Eevn if unu taak wahn lat onlain er si eech ada infamayshan pahn soashal meedya, yu tink yu ku reeli seh yu noa di persn? Sohn peepl weh mi tink dat dehn fain dehn perfek mach, shak fi fain owt dat dehn noh reeli noa di persn gud wen dehn geh fi meet fays tu fays.

Di saamis seh: “Ah noh spen taim wid peepl weh tel lai, An Ah stay weh fahn enibadi hoo da wahn hipokrit.” (Ps. 26:4) Sohn peepl tink dat ih okay fi put wahn lee lai eena dehn persnal infamayshan onlain soh dat dehn ku geh di atenshan weh dehn waahn. Dehn mait haid dehn bad kwalitiz wen dehn di mesij wid adaz onlain. Ih impoatant fi mek wi tink bowt di ansaz tu dehnya kweschanz: “Sohn peepl klaym fi bee baptaiz Witnisiz, bot dat da chroo? Dehn spirichwali machoar? Dehn ga wahn kloas frenship wid Jehoava? Dehn ga di rispek a di bradaz ahn sistaz eena dehn kangrigayshan? Dehn da wahn gud egzampl er dehn da “bad kompni”? (1 Kor. 15:33; 2 Tim. 2:20, 21) Akaadn tu Baibl prinsiplz, dehn free fi geh marid?” Ih haad fi noa dehnya tingz widowt di help a ada Witnisiz weh noa dehn gud. (Prov. 15:22) Wahn laayal servant a Jehoava wudn tink bowt ‘jain tugedaʼ wid sombadi weh noh di serv Jehoava.—2 Kor. 6:14; 1 Kor. 7:39.

Bikaaz ih daynjaros fi yooz onlain websaits fi fain wahn marij mayt, dehn ga beta wayz fi meet ahn staat wahn rilayshanship wid sohnbadi weh yu wuda waahn spen di res a yu laif wid. Wehpaat yu ku fain wahn gud marij mayt? Wen di taim kohn dat wi wahn ku aal meet tugeda agen, wi wahn ga di apachooniti fi geh fi noa adaz wen wi meet tugeda fi di meetinz, kanvenshanz, asembliz, er eni ada soashal gyadarin weh wi gat.

Bot bikaaz a di COVID-19 pandemik, ih noh pasabl fi mek Jehoava Witnisiz meet tugeda da di Kingdom Haal dehn. Soh joorin dis taim, wi aten wi meetin dehn onlain. Dehnya meetinz gi singl Witnisiz di apachooniti fi meet adaz weh singl tu. Yu geh fi si how dehn tek paat eena di meetin ahn yu aalso geh fi hyaa how dehn feel wen dehn koment. (1 Tim. 6:11, 12) Afta di meetin, yu ku spen taim ahn taak wid eech ada eena di difrent braykowt room. Eena dis way, yu wahn ku si how di persn weh yu inchrestid eena ak rong ada peepl, ahn yu wahn ku aalso si weh kaina kwalitiz di persn gat. (1 Peet. 3:4) Az unu geh fi noa eech ada beta, yu wahn geh fi si if unu ga di saym goalz ahn if di too a unu wuda bee gud marij mayt.

If wahn persn waahn wahn hapi marij, ih need fi mek Baibl prinsiplz gaid ahn az ih luk fi wahn marij mayt. Den ih wahn si dat di Baibl karek wen ih seh: “Di persn weh fain wahn gud waif [er hozban] fain sohnting gud, ahn Jehoava bles ahn.”—Prov. 18:22.