SOHN saiyentis weh stodi hischri fain milyanz a briks da aynshent Babilan. Dehnya briks mi geh bayk eena faiya ahn dehn mi yooz it fi bil di siti a Babilan. Aakadn tu Robert Koldewey, wahn saiyentis weh stodi hischri, dehndeh briks mi geh mek “owtsaida di siti wehpaat dehn kuda mi fain gud klay ahn wehpaat lata faiyawud mi deh.”

Sohn saiyentis mi aalso fain proof dat di Babiloanyan govament yoostu ponish peepl eena di saym faiya weh dehn mi yooz fi mek briks. Paul-Alain Beaulieu, wahn ekspert weh stodi di hischri ahn langwij a aynshent Asirya da di University of Toronto, seh: “Sohn Babiloanyan rekad . . . proov dat di King yoostu mek enibadi weh disrispek hihn er ih gaadz geh bon op eena faiya.” Wahn aynshent Babiloanyan rekad weh geh rait dong eena King Nebyukadneza dayz seh: “Dischrai dehn, bon dehn, roas dehn, . . . eena di oavn . . . mek dehn smoak goh op ahn mek dehn ded eena di faiya.”

Dis rimain wi a som a di tingz weh Daniel chapta 3 taak bowt. Een deh wi fain owt dat King Nebyukadneza mi bil wahn big stachu owta goal da wahn plays weh naym Dura weh deh owtsaida di siti a Babilan. Wen di chree Heebroo bwai Shayjrak, Meeshak, an Abednigoh mi rifyooz fi bow dong tu di stachu, King Nebyukadneza mi geh beks. Soh ih aada fi mek dehn heet op wahn fernis “sevn taimz moa dan naamal” ahn fi mek dehn chroa di chree Heebroo bwai een deh. Bot wahn powaful aynjel mi sayv dehn.—Dan. 3:1-6, 19-28.

Di briks weh dehn fain da Babilan proov dat weh di Baibl seh da chroo. Di raitinz weh dehn fain pahn som a di briks mi prayz di king. Di raitin pahn wan a dehn mi seh: “Nebyukadneza, di King a Babilan . . . Di palis, weh Ai di Grayt King bil . . . Mek mi disendants fi rool eena it fareva.” Dis da nayli di saym ting weh deh eena di Baibl da Danyel 4:30, wehpaat Nebyukadneza mi boas ahn seh: “Dis da Babilan di Grayt weh mee miself mi bil op fi di raiyal hows wid mi oan schrent ahn powa ahn fi mi oan gloari ahn fi mi kingship.”