1. Eena weh way wahn Kristyan shuda bee laik wahn kuknat chree? (Koment pahn di picha.)

 YOO eva si weh hapm tu wahn kuknat chree wen di breez di bloa haad? Di chree wuda ben, bot ih noh brok. Dis teech wi dat wen wahn chree fleksibl, ih noh wahn brok wen schrang breez bloa. Saym way soh, az Kristyanz, wi need fi bee fleksibl soh dat wen tingz eena wi laif geh haad, wi ku kantinyu serv Jehoava ahn bee hapi. Eena weh way wi ku bee fleksibl? Wi fleksibl wen wi noh aalwayz waahn wi oan way, wen wi aksep chaynjiz eena wi laif, ahn wen wi rispek di disizhanz weh ada peepl mek ahn di way dehn tink.

2. Weh kwalitiz wahn help wi fi aksep chaynjiz eena wi laif ahn weh wi wahn diskos eena dis aatikl?

² Az servants a Jehoava, wi waahn bee reeznabl. Wi aalso waahn bee hombl ahn shoa kompashan. Eena dis aatikl, wi wahn si how dehndeh kwalitiz mi help sohn bradaz ahn sistaz fi kantinyu bee hapi eevn doa dehn laif mi chaynj. Ahn wi wahn si how dehndeh kwalitiz ku help wee tu. Bot fers, mek wi si how Jehoava ahn Jeezas set di perfek egzampl fi bee reeznabl.

3. How wee noa dat Jehoava noh waahnt ih oan way aal di taim?

³ Jehoava da “di Rak” bikaaz hihn schrang ahn notn kyaahn moov ahn. (Deut. 32:4) Bot stilyet, hihn noh aalwayz waahnt ih oan way aal di taim. Jehoava fleksibl, soh eevn doa tingz eena di werl kip di chaynj, hihn wahn mek  shoar dat aala ih pramis stil kohn chroo. Jehoava mi mek hyoomanz fi bee laik hihn. Soh, wee ga di abiliti fi bee fleksibl wen tingz eena fi wee laif chaynj. Jehoava gi wi Baibl prinsiplz weh eezi fi andastan soh dat wi ku mek gud disizhanz noh mata weh prablemz kom op eena wi laif. Jehoava da “di Rak,” bot eevn soh, hihn reeznabl. Wi ku si dis fahn di egzampl weh ih set ahn fahn di Baibl prinsiplz weh ih gi wi.

4. Gi wahn egzampl weh shoa dat Jehoava mi reeznabl wid ih peepl. (Levitikos 5:7, 11)

⁴ Aala Jehoava inschrokshanz perfek ahn reeznabl. Jehoava noh schrik wid peepl. Fi egzampl, hihn mi shoa dat ih reeznabl wid di Izrelait dehn. Hihn neva ekspek di rich peepl ahn di poar peepl fi gi di saym sakrifais. Jehoava mi alow di Izrelait dehn fi gi sakrifais akaadn tu weh dehn kuda mi afoad.—Reed Levitikos 5:7, 11.

5. Gi wahn egzampl weh shoa dat Jehoava hombl ahn dat ih ga kompashan.

⁵ Jehoava hombl an ih ga kompashan. Dis moov ahn fi bee reeznabl. Fi egzampl, wen Jehoava mi wahn dischrai di wikid peepl da Sadam, hihn mi shoa dat ih hombl. Jehoava mi sen ih aynjel dehn fi tel Lat fi ron goh da di mongtin dehn. Bot Lat mi frayd fi goh deh. Soh, ih mi beg Jehoava fi mek hihn an ih famili goh da wahn tong weh naym Zoawar. Bot dis da-mi wahn tong weh Jehoava mi don disaid fi dischrai. Soh Jehoava kuda mi foas Lat fi obay Ahn. Stilyet, Jehoava mi alow Lat fi goh hed ahn du weh ih mi waahnt, an Ih neva dischrai Zoawar. (Jen. 19:18-22) Honjridz a yaaz layta, Jehoava mi shoa kompashan tu di peepl da Niniveh. Hihn mi sen Joana fi tel di wikid peepl dehn dat Niniveh mi wahn geh dischrai. Bot afta di peepl dehn da Niniveh mi ripent, Jehoava mi feel sari fi dehn an ih neva dischrai dehn.—Jonah 3:1, 10; 4:10, 11.

6. How Jeezas mi shoa dat hihn reeznabl jos laik ih Pa?

⁶ Jeezas mi reeznabl jos laik ih Pa. Jehoava mi sen Jeezas pahn ert fi preech tu “di peepl a Izrel weh da laik sheep weh laas.” Bot Jeezas mi shoa dat ih reeznabl wen ih mi du weh ih Pa sen ahn fi du. Fi egzampl, wahn laydi hoo da neva wahn Izrelait mi tel Jeezas: “Wahn deemon di kaaz mi daata fi sofa bad.” Ahn shee mi bayg Jeezas fi heel ahn. Soh Jeezas mi shoa kompashan ahn heel di laydi daata. (Mach. 15:21-28) Tink bowt wahn nada egzampl. Joorin Jeezas minischri pahn ert, hihn mi seh: “Hooeva seh dat dehn noh noa mee . . . , Ai wahn seh dat Ai noh noa dehn needa.” (Mach. 10:33) Bot weh Jeezas mi du wen Peeta mi disoan ahn chree taimz? Hihn neva disoan Peeta. Jeezas mi noa dat Peeta mi sari fi weh ih  mi du ahn dat hihn da-mi wahn faytful man. Afta Jeezas mi kohn bak tu laif, ih mi gaahn si Peeta an ih pasabl dat ih tel ahn dat ih fergiv ahn an lov ahn.—Look 24:33, 34.

7. Bays pahn Filipiyanz 4:5, weh kaina repyutayshan wee shuda waahn ga?

⁷ Wee don si proof dat Jehoava ahn Jeezas reeznabl. Bot wat bowt wee? Filipiyanz 4:5 shoa wi dat Jehoava waahn mek wi bee reeznabl. (Reed.) Aks yuself dehnya kweschanz: ‘Peepl si mi az sombadi weh reeznabl, fleksibl, an eezi fi get lang wid? Er dehn si mi az sombadi weh schrik, haad fi get lang wid, an aalwayz waahn mi oan way? Ai chrai foas peepl fi du tingz di way Ai tink da di karek way? Er Ai lisn tu ada peepl opinyan an agree wid dehn wen ih okay fi du dat?ʼ Di moa wi chrai bee reeznabl, di moa wi wahn di kapi Jehoava ahn Jeezas egzampl. Mek wi si eena wich too sichuwayshan wi ku shoa dat wi reeznabl. Di fers wan da wen tingz eena wi laif chaynj. Ahn di sekant wan da wen ada peepl noh si tingz di way wee si tingz.

8. Weh ku help wi fi bee reeznabl wen tingz eena wi laif chaynj? (Koment pahn di futnoat.)

⁸ If wi reeznabl, dat meenz dat wi wahn fleksibl wen tingz eena wi laif chaynj. Wen chaynjiz hapm, wi mait fays prablemz weh wi noh ekspek. Fi egzampl, aal af a sodn, wi mait geh sik reeli bad. Er laif ku geh reeli haad fi wi wen dehn ga wahn sodn chaynj eena di govament er di way how dehn manij moni. (Eccl. 9:11; 1 Kor. 7:31) Eevn wahn nyoo asainment mait bee haad fi aksep. Noh mata weh chalenjiz wi fays, wi ku ajos tu wahn nyoo chaynj eena wi laif wen wi fala dehnya foa step: (1) aksep di chaynj, (2) tink bowt di fyoocha, (3) foakos pahn pazitiv tingz, ahn (4) du tingz fi adaz. b Mek wi si how dehnya foa tingz mi help som a wi bradaz ahn sistaz.

9. How Emanuele ahn Francesca mi deel wid chaynjiz weh dehn neva ekspek?

⁹ Aksep di chaynj. Emanuele ahn Francesca mi geh asain fi serv az mishineriz da wahn farin konchri. Jos wen dehn mi laan di nyoo langwij ahn geh yoostu dehn nyoo kangrigayshan, di COVID-19 pandemik mi staat ahn dehn mi haftu stap deh rong peepl. Den wan day, Francesca ma mi ded. Dis da-mi sohnting weh dehn neva ekspek. Francesca mi reeli waahn goh hoam ahn bee wid ih famili, bot ih kudn chravl bikaaz a di pandemik. How shee mi koap wid weh mi-di hapm? Fers, Emanuele ahn Francesca mi pray tugeda an aks Jehoava fi help dehn fi noh wori tu moch ahn fi tek eech day az ih kohn. Jehoava mi ansa dehn pryaaz da jos di rait taim chroo ih aaganaizayshan. Fi egzampl, dehn mi wach wahn intavyoo weh mi inkorij dehn wahn lat. Eena di intavyoo, di brada mi seh: “Di kwika yu aksep di chaynj, di kwika yu wahn bee hapi agen. Den, yu wahn staat mek di bes owta di sichuwayshan.” c Sekant, dehn mi werk haad fi du foan witnisin beta ahn sayka dat dehn mi eevn staat wahn Baibl stodi. Terd, dehn mi tankful fi di inkorijment weh dehn mi  geh fahn di bradaz ahn sistaz eena di kangrigayshan. Wahn nais lee sista doz sen dehn wahn shaat lee mesij wid wahn Baibl vers evri day fi wahn hoal yaa. Wee wahn bee hapi wid weh wi ku du if wi aksep chaynjiz weh hapm.

10. Weh mi help Christina fi ajos tu wahn big chaynj eena fi shee laif?

¹⁰ Tink bowt di fyoocha ahn foakos pahn pazitiv tingz. Christina, wahn sista fahn Romania weh mi liv da Japan, mi feel sad wen di Inglish kangrigayshan weh shee mi deh eena mi haftu jain wid wahn nada kangrigayshan. Shee neva kantinyu tink bowt weh mi hapm. Insted, shee mi disaid fi du ih bes eena ih nyoo Japanese kangrigayshan ahn preech eena Japanese. Shee mi aks sombadi weh shee doz werk wid fi help ahn laan fi taak Japanese beta. Di laydi mi agree fi yooz di Baibl ahn di Injai Laif Fareva! broashoar fi help Christina laan Japanese. Christina mi laan fi taak Japanese beta. Pahn tap a dat, di laydi mi waahn laan moa bowt di chroot. Wen wi tink bowt di fyoocha ahn foakos pahn pazitiv tingz, wi ku geh blesinz weh wi neva ekspek.

11. How wahn kopl mi ajos wen dehn mi fays moni prablemz?

¹¹ Du tingz fi adaz. Wahn kopl weh liv eena wahn konchri wehpaat wi werk deh anda ban, mi staat ga moni prablemz bikaaz di govament mi oa wahn lata moni. Weh mi help dehn fi deel wid dis prablem? Fers, dehn mi staat kot dong pahn tingz weh dehn neva reeli need. Den, insteda foakos pahn dehn oan prablemz, dehn mi mek it dehn goal fi help adaz. Soh dehn mi spen wahn lata taim di preech. (Aks 20:35) Di hozban mi seh, “Wen wi stay bizi eena di minischri, wi ga les taim fi tink bowt wi prablemz ahn moa taim fi foakos pahn Gaad Werd.” Wen tingz eena wi laif chaynj, ih impoatant fi kantinyu help adaz, espeshali eena di preechin werk.

12. How di apasl Paal egzampl ku help wi fi bee fleksibl wen wi preech?

¹² Wi need fi bee fleksibl wen wi preech. Wi aalwayz meet peepl weh ga difrent bileef, atichood, ahn kolcha. Di apasl Paal mi fleksibl, ahn wee ku laan fahn fi hihn egzampl. Jeezas mi apoint Paal fi bee “wahn apasl tu di nayshanz.” (Roa. 11:13) Paal mi preech tu di Jooz, Greek peepl, peepl wid hai ejukayshan, vilijaz, govament ofishalz, an eevn kingz. Fi toch peepl haat wid di gud nyooz, Paal mi “du evriting weh ih kud fi help aal kaina peepl.” (1 Kor. 9:19-23) Weneva hihn wuda taak tu peepl, hihn mi aalwayz tink bowt dehn kolcha, dehn bakgrong, ahn dehn bileef. Dis mi help ahn fi bee fleksibl. Wee wahn ku help moa peepl if wi fleksibl an if wi tek taim fi tink bowt wayz how wi ku help eech persn.

13. Bays pahn 1 Korintyanz 8:9, weh daynja wee ku avoid if wi rispek di disizhanz weh adaz mek?

¹³ If wi reeznabl, dat wahn help wi fi rispek di disizhanz weh ada peepl mek. Tink bowt dehnya egzampl. Dehn ga sohn sistaz weh laik wayr maykop ahn som weh noh wayr maykop non ataal. Dehn ga bradaz ahn sistaz weh jrink alkohol now an agen ahn som weh noh jrink non ataal. Aala wi waahn bee helti, bot eech wan a wi chooz fi tek kayr a wiself eena difrent wayz. If wi tink dat wi aalwayz rait ahn wi chrai kanvins wi bradaz ahn sistaz fi du weh wee du, wi ku  stombl dehn ahn brok di pees eena di kangrigayshan. Fi shoar, wi noh waahn du dat! (Reed 1 Korintyanz 8:9; 10:23, 24) Mek wi luk pahn too egzampl weh shoa how Baibl prinsiplz ku help wi fi bee balans ahn stil ga pees wid adaz.

14. Wich Baibl prinsipl ku help wi disaid if wi kloaz ahn hyaa stail deesent?

¹⁴ Kloaz ahn hyaa stail. Jehoava noh gi wi schrik roolz bowt weh kaina kloaz wi ku wayr ahn weh kaina hyaa stail wi ku gat. Insted, ih gi wi Baibl prinsiplz weh wi ku fala. Wi need fi jres eena wahn way weh shoa dat wee da Gaad peepl. Soh, wi fi jres eena wahn rispektabl way weh deesent ahn “sensabl.” (1 Tim. 2:9, 10; 1 Peet. 3:3) Wi noh waahn kaal atenshan tu wiself bai di way wi jres. Baibl prinsiplz ku help eldaz fi noh mek op roolz bowt kloaz ahn hyaa stail. Fi egzampl, wahn taim sohn eldaz eena wahn kangrigayshan mi waahn help sohn yong bradaz weh mi-di kapi wahn papyula hyaa stail. Di hyaa stail mi shaat, bot ih neva luk neet. How di eldaz mi help di yong bradaz widowt song laik dehn mi-di mek op wahn rool? Di serkit oavaseeya mi sojes fi mek di eldaz taak tu di bradaz ahn tel dehn, “If yu deh pahn stayj ahn di aadyans di foakos moa pahn di way yu luk dan weh yu seh, den maybi sohnting rang wid yu kloaz ahn yu hyaa stail.” Di eldaz neva mek op wahn rool, bot dis simpl eksplanayshan mi help di yong bradaz fi andastan weh dehn mi need fi du. d

15. Wat da sohn Baibl laaz ahn prinsiplz weh ku help wi mek gud disizhanz bowt medikal chreetment? (Roamanz 14:5)

¹⁵ Medikal chreetment. Eech persn haftu disaid how dehn wahn tek kayr a  dehn helt. (Gal. 6:5) Wen wahn Kristyan chooz medikal chreetment, ih need fi obay di Baibl laaz ahn stay weh fahn blod ahn spiritizm. (Aks 15:20; Gal. 5:19, 20) Az lang az dehn noh brok Jehoava laa, dehn ku chooz wateva medikal chreetment dehn waahn. Sohn peepl goh si daktaz fi medikal chreetment an adaz bileev eena nachral chreetment. Eevn if wi feel laik di chreetment weh wi di tek da di bes, wi need fi rispek wi bradaz ahn sistaz rait fi disaid weh chreetment dehn waahn yooz. Aala wi need fi memba dehnya points: (1) Onli Gaad Kingdom ku geh rid a siknis fareva ahn gi wi perfek helt. (Isa. 33:24) (2) Eech persn haftu “bee shoar eena dehn oan main” dat dehn di mek di bes disizhan fi dehn helt. (Reed Roamanz 14:5.) (3) Wi noh fi joj adaz fi di disizhanz weh dehn mek ahn wi noh fi du notn weh stombl dehn eeda. (Roam. 14:13) (4) Lov wahn help wi fi mek shoar dat wi persnal disizhanz noh brok di pees eena di kangrigayshan. (Roam. 14:15, 19, 20) If wi memba fi fala dehnya foa points, wi wahn ga wahn kloasa rilayshanship wid wi bradaz ahn sistaz ahn wi wahn help fi kip di pees eena di kangrigayshan.

16. How wahn elda ku shoa dat ih reeznabl wen ih werk lang wid ada eldaz? (Koment pahn di picha dehn.)

¹⁶ Eldaz need fi bee reeznabl. Dehn noh fi waahn dehn oan way aal di taim. (1 Tim. 3:2, 3) Fi egzampl, wahn elda noh fi ekspek ada eldaz fi aksep fi hihn opinyan, jos bikaaz ih oalda dan dehn. Hihn noa dat Jehoava hoali spirit ku moov eni elda fi seh sohnting weh wahn help dehn mek wahn waiz disizhan. An if moas a di eldaz agree pahn wahn disizhan weh noh goh gens Baibl prinsiplz, wahn reeznabl elda wahn sopoat da disizhan eevn if hihn wuda prifaa sohnting els.

17. How wi benifit wen wi noh aalwayz waahn wi oan way?

¹⁷ Wi benifit eena lata wayz wen wi noh aalwayz waahn wi oan way. Wi injai wahn kloasa rilayshanship wid wi bradaz ahn sistaz ahn wi ga pees eena di kangrigayshan. Wi hapi fi serv Jehoava az wan big hapi famili weh ful a peepl weh ga difrent persnaliti ahn kolcha. Pahn tap a dat, wi hapi fi noa dat wi di kapi Jehoava egzampl wen wi noh aalwayz waahn wi oan way aal di taim.