1. Weh yu mi laan wen yu jos staat stodi di Baibl?

 YOO memba weh yu mi laan wen yu mi jos staat stodi di Baibl? Maybi yu mi sopraiz fi fain owt dat Gaad ga wahn naym. Er maybi yu mi hapi fi laan dat Gaad noh ponish peepl eena hel. Ahn yu mosi mi feel soh eksaitid wen yu laan dat di peepl weh yu lov ku kohn bak tu laif ahn dat yu ku liv wid dehn eena Paradais.

2. Weh kaina chaynjiz yoo mek wen yu mi laan weh di Baibl teech? (Ifeezhanz 5:1, 2)

² Di moa yu mi stodi di Baibl, di moa yu lov fi Jehoava mi groa. Da lov mi help yu fi aplai weh yu mi-di laan. Yu mi staat tu mek beta disizhanz bikaaz yu mi-di fala di waiz advais weh deh eena di Baibl. Yu mi staat mek chaynjiz ahn yu mi werk haad fi bee wahn beta persn soh dat Gaad ku bee hapi wid yu. Jos laik how wahn pikni kapi weh ih ma er pa du, yoo mi staat kapi yu Pa, Jehoava.—Reed Ifeezhanz 5:1, 2.

3. Weh kweschanz wi mait aks wiself?

³ Wi mait aks wiself: ‘Mai lov fi Jehoava schranga now dan wen Ah mi fers ton wahn Kristyan? Sins Ah geh baptaiz, Ai di bee moa laik Jehoava eena di way Ah tink, ak, ahn chreet mi bradaz ahn sistaz?ʼ Eevn if di ‘lov weh yu mi ga fahn di bigininʼ fi Jehoava ahn fi adaz noh schrang laik bifoa, yu noh fi geh diskorij. Sohnting simila mi hapm tu di Kristyanz weh mi-di liv eena di fers senchri. Jeezas neva giv op pahn dehn, ahn hihn noh wahn giv op pahn wee needa. (Rev. 2:4, 7) Hihn noa dat wi ku ga  schrang lov agen, jos laik wen wi mi fers laan di chroot.

4. Weh wi wahn kansida eena dis aatikl?

⁴ Dis aatikl wahn diskos how wi ku ga schranga lov fi Jehoava ahn fi adaz. Den wi wahn laan weh kaina blesinz wee an adaz ku get if wi mek wi lov fi eech ada ahn fi Jehoava geh schranga.

5-6. (a) Weh chalenjiz di apasl Paal mi fays eena ih minischri? (b) Weh mi help Paal fi kip aan di serv Jehoava?

⁵ Di apasl Paal mi liv wahn hapi laif di serv Jehoava, bot ih neva aalwayz eezi fi mek ih du dat. Hihn mi haftu chravl faar, ahn bak den, ih neva soh eezi fi chravl fahn wan plays tu di ada. Sohntaim, wen ih chravl ih yoostu fays “daynja fahn di riva dehn” ahn “fahn teef.” Dehn mi ga ada taimz wen ih enimi dehn wuda beet ahn op bad. (2 Kor. 11:23-27) Pahn tap a dat, som a di bradaz neva aalwayz shoa dat dehn apreeshiayt weh di apasl Paal mi du fi dehn.—2 Kor. 10:10; Fil. 4:15.

⁶ Weh mi help Paal fi kip aan di serv Jehoava? Paal mi laan wahn lat bowt Jehoava persnaliti fahn di Skripchaz ahn fahn di ekspeeryens dehn weh ih mi geh eena di minischri. Paal mi noa fi shoar dat Jehoava lov ahn wahn lat. (Roam. 8:38, 39; Ifee. 2:4, 5) Ahn hihn mi reeli lov Jehoava wahn lat tu. Hihn mi shoa dat ih lov Jehoava wen ih mi kantinyu ‘du ih bes fi help owt di hoali wan dehnʼ ahn wen ih neva giv op.—Heeb. 6:10.

7. Wat da wan way how wee ku mek wi lov fi Jehoava schranga?

⁷ Wee ku schrentn wi lov fi Jehoava wen wi stodi fi hihn Werd. Az yu reed di Baibl, chrai andastan weh eech vers teech yu bowt Jehoava. Aks yuself: ‘How dis Baibl pasij shoa mi dat Jehoava lov mi? Akaadn tu dis pasij, wai Ai shuda lov Jehoava?ʼ

8. How pryaa ku schrentn wi lov fi Gaad?

⁸ Wahn neks way wi ku schrentn wi lov fi Jehoava da wen wi pray evri day ahn tel ahn weh deh eena wi haat. (Ps. 25:4, 5) Jehoava wahn ansa wi pryaaz. (1 Jan 3:21, 22) Khanh, wahn sista fahn Asia, seh: “At fers, Ai mi lov Jehoava bikaaz a di tingz weh Ah mi-di laan bowt ahn. Bot wen Ah staat si how hihn ansa mi pryaaz, dat mi mek mai lov fi hihn geh schranga an ih mi mek Ah waahn du tingz weh pleez ahn.” b

9. How wi noa dat Timoti mi-di mek ih lov fi ih bradaz ahn sistaz groa schranga?

⁹ Sohn yaaz afta Paal mi ton wahn Kristyan, hihn mi geh fi meet wahn gud yong man weh naym Timoti. Timoti mi lov Jehoava ahn hihn mi lov peepl tu. Paal mi tel di Filipiyanz: “Ah noh ga nobadi els fi sen hoo da laik Timoti. Hihn wahn reeli tek kayr a unu.” (Fil. 2:20) Paal neva seh dis bikaaz ih mi noatis Timoti skilz az wahn poblik speeka er az wahn leeda. Insted, Paal mi si humoch lov Timoti mi gat fi ih bradaz ahn sistaz. Fi shoar, di kangrigayshan dehn weh Timoti serv mi luk faawod tu ih vizit dehn.—1 Kor. 4:17.

10. How di mishineri kopl mi shoa dat dehn lov dehn bradaz ahn sistaz?

¹⁰ Wee ku luk fi wayz how wi ku help wi bradaz ahn sistaz. (Heeb. 13:16) Tink bowt wahn nada ekspeeryens fahn di saym mishineri kopl weh wi mi menshan  eena di laas aatikl. Afta wahn bad staam, dehn gaahn vizit wahn famili weh da-mi Witnisiz. Dehn mi fain owt dat di famili roof mi geh dischrai. Bikaaz a dat, di famili neva ga no kleen kloaz fi put aan. Anna seh: “Wi mi kehr dehn kloaz ahn wi mi wash it fi dehn. Den, wi mi aiyan ahn foal evriting bifoa wi kehr it bak tu dehn. Tu wee, dis da-mi sohnting smaal weh wi kuda mi du fi wi bradaz. Bot dis mi mek wi geh fi bee kloas frenz wid dehn op tu dis day.” Di lov weh Anna an ih hozban mi gat mi moov dehn fi waahn help dehn bradaz ahn sistaz.—1 Jan 3:17, 18.

11. (a) How adaz feel wen wi shoa dat wi lov dehn? (b) Akaadn tu Proverbs 19:17, weh Jehoava du wen wi shoa lov tu adaz?

¹¹ Wen wi kain ahn shoa lov tu adaz, dehn wahn ku si dat wee di chrai kapi Jehoava egzampl. Ahn dehn mait apreeshiayt di kainis weh wi shoa dehn, moa dan weh wee ku eva imajin. Khanh, weh wi mi taak bowt erliya, memba aala dehn wan weh mi help ahn wen shee mi yonga. Shee seh: “Ah soh tankful fi aala di sistaz weh mi kehr mi owt eena servis. Dehn mi pik mi op da mi hows, invait mi fi eet, ahn den mek shoar dat Ah reech hoam sayf. Now Ah geh fi si dat dis da-mi wahn lata werk ahn dehn mi du it wid lov.” Af koars, noh evribadi wahn geh wahn chaans fi seh tanks fi weh wi du fi dehn. Dis da weh Khanh seh bowt dehn wan weh mi help ahn: “Ah wish Ah ku pay bak di frenz fi aala di kain tingz weh dehn mi du fi mi, bot Ah noh noa wehpaat dehn liv now. Soh Ah pray fi mek Jehoava pay dehn bak fi mi bikaaz hihn noa weh aala dehn liv.” Weh Khanh seh da chroo. Jehoava noatis evriting weh wi du fi adaz,  noh mata if da sohnting big er smaal. Hihn seeʼt az wahn sakrifais tu ahn, an hihn wahn aalwayz pay wi bak fi weh wi du.—Reed Proverbs 19:17. c

12. How bradaz ku shoa dat dehn lov di kangrigayshan? (Koment pahn di picha dehn.)

¹² If yoo da wahn brada, weh yoo ku du fi shoa dat yu lov yu bradaz ahn sistaz? Wahn yong brada weh naym Jordan mi aks wahn elda weh hihn ku du fi help owt moa eena di kangrigayshan. Fers, di elda mi komen ahn fi di gud tingz weh ih mi don di du, ahn den ih mi giv ahn sohn advais pahn how ih ku du moa. Fi egzampl, di elda mi tel ahn fi chrai reech da meetin erliya soh dat ih ku welkom di frenz, koment moa, preech moa wid ih servis groop, ahn tink bowt wayz how hihn ku help adaz. Wen Jordan mi fala di advais weh di brada giv ahn, hihn neva onli laan nyoo skilz, bot ih lov fi ih bradaz ahn sistaz mi groa schranga. Jordan mi laan dat wen sombadi ton wahn ministeeryal servant ih noh staat tu help adaz; insted, ih kantinyu help dehn.—1 Tim. 3:8-10, 13.

13. How lov mi moov Brada Christian fi serv az wahn elda agen?

¹³ If yoo yoostu serv az wahn ministeeryal servant er wahn elda, memba dat Jehoava noh ferget di werk weh yu mi du fi hihn. Hihn aalso memba di lov weh yu mi gat. (1 Kor. 15:58) Ahn hihn si di lov weh yu kantinyu fi shoa. Wahn brada weh naym Christian mi geh diskorij wen ih mi looz ih privilij fi serv az wahn elda. Stilyet, hihn seh: “Ah disaid fi stil du  evriting weh Ah kud fi serv Jehoava ahn shoa dat Ah lov ahn, weda Ai da-mi wahn elda er nat.” Afta sohn taim, Christian mi staat serv az wahn elda agen. Christian seh: “Ah mi feel nervos fi serv az wahn elda agen. Bot Ah mi disaid dat if Jehoava mi waahn mek Ah serv ahn az wahn elda agen, Ah mi wahn du it bikaaz Ah lov hihn an Ah lov mi bradaz ahn sistaz.”

14. Weh yu laan fahn wahn sista fahn Georgia?

¹⁴ Jehoava servants shoa dat dehn lov peepl tu. (Mach. 22:37-39) Fi egzampl, wahn sista weh naym Elena, weh liv da Georgia, mi seh: “Eena di biginin, di onli reezn wai Ai yoostu preech da-mi bikaaz Ah lov Jehoava. Bot az da lov mi groa schranga, mi lov fi peepl mi geh schranga tu. Ah wuda chrai tink bowt weh dehn di goh chroo ahn weh tapiks dehn wuda waahn taak bowt. Di moa Ah mi du dis, di moa Ah mi waahn help dehn.”—Roam. 10:13-15.

15-16. Bays pahn di pichaz, weh blesinz wi wahn geh wen wi shoa lov tu adaz?

¹⁵ Wen wi shoa lov tu wi bradaz ahn sistaz, aala wi benifit. Afta di COVID-19 pandemik mi staat, wahn brada weh naym Paolo an ih waif mi teech sohn oalda sistaz how fi yooz dehn ilekchranik divais fi preech. Wahn sista weh mi-di fain it haad fi yooz ih divais mi geh fi  laan how fi yooz it gud. Bikaaz a dis, ih kuda mi yooz ih divais fi invait ih famili membaz tu di memoaryal. Siksti a dehn mi aten di Memoaryal chroo veedyo kaal! Di sista ahn fi shee famili mi benifit fahn wat Paolo an ih waif mi du fi dehn. Laytaraan, dis sista mi rait wahn leta tu Paolo an ih seh: “Tank yu soh moch fi teech wi. Ah wahn neva ferget humoch Jehoava kyaa bowt wi ahn how haad unu mi werk fi help wi.”

¹⁶ Dis ekspeeryens mi teech Paolo wahn impoatant lesn. Ih mi rimain hihn dat lov moa impoatant dan nalij ahn gud skilz. Hihn seh: “Ah yoostu serv az wahn serkit oavaseeya. Bot now Ah riyalaiz dat eevn if di bradaz ahn sistaz noh memba mi taak dehn, dehn wahn memba di tingz weh Ah du fi help dehn.”

17. Hoo els wahn benifit wen wi shoa lov?

¹⁷ Wen wi shoa lov tu adaz, wi benifit eena wayz weh wi noh ekspek. Jonathan, hoo liv da New Zealand, mi ekspeeryens dis ihself. Wahn Satideh aftanoon, hihn mi si wahn painyaa brada di preech pahn di road eena di son hat bai ihself. Soh Jonathan mi disaid fi staat werk wid da brada pahn Satideh aftanoon. Bot hihn neva riyalaiz humoch hihn mi wahn benifit wail ih help owt di brada. Jonathan seh: “Bak den, Ah neva injai servis soh moch. Bot az Ah mi geh fi si how di painyaa brada preech ahn how peepl wuda lisn tu ahn, Ah mi staat tu injai di preechin werk wahn lat. Mee ahn di brada mi geh kloas ahn hihn mi help mi fi groa spirichwali, injai di minischri, ahn jraa kloasa tu Jehoava.”

18. Weh Jehoava waahn mek wi du?

¹⁸ Jehoava waahn mek wi ga schrang lov fi hihn ahn fi adaz. Laik weh wi don laan, wi ku schrentn wi lov far ahn wen wi reed di Baibl, meditayt pahn weh wi reed, ahn taak tu ahn eena pryaa evri day. Wee ku schrentn wi lov fi adaz wen wi chrai fain wayz how wi ku help dehn. If wi mek wi lov geh schranga, wi wahn geh kloasa tu Jehoava ahn wi bradaz ahn sistaz. Ahn wi wahn injai dehndeh frenship fareva!