1-2. Eena weh way wahn Kristyan da laik wahn taal taal bildin? (1 Korintyanz 15:58)

 EENA 1978, da Tokyo, Japan, dehn mi bil wahn taal taal bildin weh 60 floa hai. Peepl mi-di wanda how da bildin mi wahn hoal op wen wahn ertkwayk hapm bikaaz eena da siti, dehn wuda aalwayz gat ertkwayk. How di peepl weh dizain dis bildin mi mek shoar dat ih neva mi wahn geh dischrai wen wahn ertkwayk hapm? Dehn mi mek it schrang inof, bot ih mi aalso fleksibl soh dat eevn if wahn ertkwayk shayk it, ih mi wahn stil stay di stan op. Kristyanz da jos laik da taal bildin. Eena weh way?

² Wahn Kristyan need fi bee balans. Ih kyaahn bee tu schrik an ih kyaahn bee tu fleksibl. Wen ih kohn tu Jehoava laa ahn standadz, ih need fi stan op schrang an ih noh fi du notn weh brok Gaad laa. (Reed 1 Korintyanz 15:58.) Wahn Kristyan need fi bee “redi fi obay” Gaad laa noh mata wat. Bot ih aalso need fi bee reeznabl ahn shoa dat ih “noh waahn ih oan way aal di taim.” (Jay. 3:17) Wahn Kristyan weh noa how fi bee balans noh wahn bee tu schrik ner tu saaf wen ih kohn tu di way how ih vyoo Gaad laa. Eena dis aatikl, wi wahn laan how wi ku stan op schrang ahn noh brok Gaad laa. Wi wahn aalso taak bowt faiv wayz how Saytan chrai mek it haad fi mek wi obay Jehoava. Den wi wahn diskos weh ku help wi fi kantinyu obay Jehoava noh mata weh Saytan du.

3. Bays pahn Aks 15:28, 29, wat da som a Jehoava laa?

³ Jehoava da di onli Wan weh ga di rait fi mek laaz ahn hihn aalwayz mek shoar dat dehn eezi fi mek ih peepl andastan. (Isa. 33:22) Fi egzampl, di govanin badi eena di fers senchri mi menshan chree wayz how Kristyanz fi mek shoar  dat dehn noh brok Gaad laa: (1) dehn noh fi wership aidol; dehn fi wership onli Jehoava, (2) dehn fi rispek dat blod hoali tu Jehoava, ahn (3) dehn noh fi komit sekshwal imoraliti. (Reed Aks 15:28, 29.) How wahn Kristyan ku stan op schrang an obay Jehoava eena dehnya chree wayz?

4. How wi shoa dat wi wership onli Jehoava? (Revilayshan 4:11)

⁴ Wi noh wership aidol; wi onli wership Jehoava. Jehoava mi koman di Izrelait dehn fi wership onli Hihn. (Deut. 5:6-10) Ahn wen Saytan mi temp Jeezas, hihn mi tel Saytan dat wi wership bilangz onli tu Jehoava. (Mach. 4:8-10) Soh wi noh wership faals gaadz ahn wi noh wership hyoomanz needa. Fi egzampl, som peepl faymos bikaaz dehn play spoats, sing, ak eena moovi, er maybi dehn da wahn rilijos leeda, bot dat noh meenz wi fi chreet dehn laik gaadz. Wee chooz fi wership onli Jehoava, di wan hoo “mek evriting.”—Reed Revilayshan 4:11.

5. Wai wi fi obay Gaad koman bowt how fi yooz blod?

⁵ Wi obay Gaad laa wen wi vyoo blod ahn laif az sohnting hoali. Wai? Bikaaz Jehoava seh dat blod reprizent laif, ahn laif da wahn preshos gif fahn hihn. (Lev. 17:14) Di fers taim wen Jehoava mi alow hyoomanz fi eet meet, hihn mi koman dehn fi noh eet di blod. (Jen. 9:4) Wen hihn mi gi di Laa dehn tu di nayshan a Izrel, hihn mi ripeet dis koman. (Lev. 17:10) Ahn laytaraan eena di fers senchri, hihn mi dairek di govanin badi fi tel aal di kangrigayshan dehn: “Unu fi kip weh . . . fahn blod.” (Aks 15:28, 29) Soh wen wi di disaid weh medikal chreetment fi aksep, wi obay dis koman noh mata wat. b

6. Weh wi need fi du soh dat wi ku obay Jehoava hai moaral standadz?

⁶ Wi noh brok Gaad hai moaral standadz eena no kaina way. (Heeb. 13:4) Di apasl Paal mi advaiz wi fi “kil” eni rang dizaiyaz weh wi gat eena wi badi. Dis meenz dat wi haftu du evriting wi kud fi geh rid a eni rang dizaiya. Soh wi noh wahn luk pahn eniting er du eniting weh ku mek wi ga wahn rang dizaiya ahn komit sekshwal imoraliti. (Kol. 3:5; Job 31:1) Wen wahn temtayshan kom op, rait away wi waahn geh rid a eni rang dizaiya er tinkin weh ku damij wi rilayshanship wid Jehoava.

7. Weh wi shuda mek op wi main fi du ahn wai?

⁷ Jehoava waahn mek wi bee “obeedyant fahn [wi] haat.” (Roam. 6:17) Wi kyaahn pik wich wan a Ih laa dehn wi wahn obay, bot evriting weh hihn aks wi fi du da fi wi oan gud. (Isa. 48:17, 18; 1 Kor. 6:9, 10) Wi waahn du wi bes fi obay Jehoava ahn feel di saym way how di saamis mi feel wen ih seh: “Ah mek op mi main fi obay yu laa aal di taim, til di en.” (Ps. 119:112) Bot Saytan wahn chrai mek it haad fi mek wi obay Jehoava. Wat da sohn wayz Saytan du dis?

8. Wai Saytan yooz persikyooshan fi chrai stap wi fahn obay Jehoava?

⁸ Persikyooshan. Saytan yooz vailens ahn presha fahn adaz fi mek it haad fi stik tu wi disizhan fi obay Jehoava. Hihn da laik wahn laiyan weh redi fi “eet op” wi ahn dischrai wi rilayshanship wid Jehoava. (1 Peet. 5:8) Di Kristyanz weh mi liv eena di fers senchri mi stik tu dehn disizhan fi obay Jehoava.Sayka dat, peepl weh mi deh gens dehn mi chretn, beet, an eevn kil som a dehn. (Aks 5:27, 28, 40; 7:54-60) Saytan stil yooz persikyooshan fi mek it haad fi  wee tudeh. Wi ku si dis di hapm tu wi bradaz ahn sistaz eena Russia an ada konchriz weh eeda di fays vailent persikyooshan er di geh atak eena ada wayz

9. Wai wi need fi luk owt fi presha weh kohn eena wayz weh noh eezi fi noatis? (Yooz di egzampl eena di paragraaf.)

⁹ Sohntaim presha kohn eena wayz weh noh eezi fi noatis. Saytan noh onli yooz persikyooshan, bot ih aalso yooz “chriks” fi chrai get wi fi disobay Jehoava. (If. 6:11) Noatis how hihn chrai du dis tu Brada Bob, hoo mi deh eena haaspital fi wahn big serjri. Brada Bob mi tel di dakta dehn dat hihn noh wahn tek blod noh mata weh hapm. Di dakta weh mi wahn du di serjri mi agree fi rispek Bob disizhan. Bot di nait bifoa di serjri, wahn nada dakta mi gaahn vizit Bob afta fi hihn famili dehn mi don gaahn hoam. Ih mi tel Bob dat eevn doa ih mait noh need blod, dehn wahn stil ga som redi jos inkays. Maybi di dakta mi tink dat bikaaz Bob famili neva deh rong, ih mi wahn chaynj ih main. Bot Bob mi stan op schrang an ih mi obay Jehoava. An ih mi tel di dakta dat noh mata wat, ih noh mi wahn tek no blod.

10. Wai ih daynjaros fi fala di wizdom a di werl? (1 Korintyanz 3:19, 20)

¹⁰ Wizdom a di werl. If wee tink laik how di peepl eena dis werl tink, wi wahn staat tu ignoar Jehoava laa dehn. (Reed 1 Korintyanz 3:19, 20.) “Di wizdom a dis werl” mek peepl feel laik dehn noh need fi obay Gaad. Sohn Kristyanz weh mi liv da Pergamom ahn Taiyataira mi staat tu bihayv jos laik di peepl weh mi liv rong dehn weh mi wership aidol ahn komit sekshwal imoraliti. Soh Jeezas mi gi di too kangrigayshan schrang kongsl bikaaz dehn mi-di talarayt sekshwal imoraliti. (Rev. 2:14, 20) Tudeh, peepl chrai presha wi fi aksep fi dehn rang tinkin. Wi famili er frenz mait chrai kanvins wi dat wi di bee tu schrik wid wiself ahn dat ih okay fi brok Gaad laa. Fi egzampl, dehn mait klaym seh dat wi ku du wateva wi waahn ahn wi noh haftu obay di standadz weh deh eena di Baibl bikaaz ih oal fashan.

11. Wat da sohn tingz wi noh fi du?

¹¹ Sohntaim wi mait feel laik di inschrokshan dehn weh wi geh fahn Jehoava noh klayr inof. Soh wi mait feel laik ih noh inof fi jos “fala weh rait dong eena di Skripchaz” ahn dat wi need fi ad aan “moa dan” weh mi geh rait dong eena di Skripchaz fi mek tingz klayr. (1 Kor. 4:6) Di rilijos leedaz eena Jeezas day mi sin gens Jehoava wen dehn du dat. Dehn mi ad aan sohn roolz tu di Laa weh Jehoava mi gi Moaziz. Ahn dehndeh roolz mi mek it haad fi mek peepl obay Jehoava. (Mach. 23:4) Jehoava gi wi klayr inschrokshan chroo ih Werd di Baibl an ih aaganaizayshan. Soh wi noh ga no reezn fi ad aan eniting tu di inschrokshan dehn weh Ih gi wi. (Prov. 3:5-7) Wi noh fi ad aan moa dan weh mi geh rait dong eena di Skripchaz, ahn wi noh waahn mek op roolz fi wi bradaz an sistaz bowt tingz weh di Baibl noh ga no roolz bowt.

12. How Saytan yooz “faals teechinz” fi chrik peepl?

¹² Faals teechinz. Saytan yooz “faals teechinz” ahn “faals aidyaaz” fi fool op peepl ahn fi kaaz divizhan monks peepl. (Kol. 2:8) Fi egzampl, eena di fers senchri, fi chrik peepl, Saytan mi yooz teechinz weh bays pahn hyooman tinkin, Jooish teechinz weh neva bays pahn di Baibl, ahn di teechin dat Kristyanz mi stil haftu liv bai di Laa weh Gaad mi giv Moaziz. Dehnya faals teechin mi fool op peepl. Sayka dat, lata  peepl mi tern dehn bak pahn Jehoava, di Wan weh chroo wizdom kohn fram. Tudeh, Saytan yooz di nyooz ahn di intanet fi spred roomaz ahn faals ripoat weh kohn fahn di politikal leedaz. Fi egzampl, joorin di COVID-19 pandemik dis da egzakli weh mi hapm. Wahn lata faals stoari mi-di spred. c Jehoava Witnisiz weh mi lisn tu di inschrokshan weh di aaganaizayshan mi gi dehn neva haftu schres owt er wori tu moch laik adaz weh mi lisn tu roomaz ahn faals stoari.—Mach. 24:45.

13. Wai wi noh fi alow notn fi dischrak wi?

¹³ Tingz weh dischrak wi. Wi need fi foakos pahn “di moa impoatant tingz.” (Fil. 1:9, 10) Wen wi spen taim pahn tingz weh dischrak wi, wi en op di ways wahn lata taim an enerji. Tingz weh wi du evri day laik eet, jrink, rilaks, ahn werk ku dischrak wi, if wi alow dehn fi bee di mayn foakos eena wi laif. (Look 21:34, 35) Pahn tap a dat, evri day wi hyaa er reed nyooz bowt palitiks an ada prablemz. Bot wi kyaahn mek dehndeh tingz dischrak wi bikaaz wi mait staat tu tek said ahn stap bee nyoochral. Saytan yooz aala dehndeh tingz weh wi jos menshan fi chrai mek it haad fi du weh rait. Mek wi luk pahn sohn tingz weh wi ku du fi stan op schrang an obay Jehoava noh mata weh Saytan du.

14. Wat da wan ting weh ku help wi stay pahn Jehoava said?

¹⁴ Tink bowt wai yu mi dedikayt yu laif tu Jehoava ahn geh baptaiz. Yu mi du dehndeh tingz bikaaz yu mi lov Jehoava ahn yu mi waahn deh pahn fi hihn said. Tink bowt weh mi help yu fi bee kanvins dat yu fain di chroot. Yu mi geh fi noa Jehoava chroo yu stodi a di Baibl ahn dis mi help yu fi staat tu lov ahn rispek hihn az yu Pa. Yu fayt mi staat tu groa ahn dis mi mek yu disaid fi ripent ahn stap du tingz weh Jehoava hayt. Insted, yu mi staat tu obay Jehoava ahn liv wahn laif weh mek hihn hapi. Yu mi feel hapi wen yu laan dat Gaad fergiv yu fi aala yu sin dehn. (Ps. 32: 1, 2) Yu mi aten di meetin dehn ahn staat tu shayr wid adaz di wandaful tingz weh yu mi-di laan. Now dat yu don dedikayt yu laif ahn geh baptaiz, yu di waak pahn di road weh leed tu laif ahn yu mek op yu main dat yu wahn stay pahn da road.—Mach. 7:13, 14.

15. How wee benifit wen wi stodi ahn meditayt?

¹⁵ Stodi Gaad Werd ahn meditayt pan it. Wahn chree wahn bee schrang if di roots deh deep dong eena di grong. Saym way soh, wen wi stodi di Baibl, da laik wi di mek wi roots goh deep dong. Soh dis wahn mek wi fayt geh schrang ahn wi wahn stik tu Jehoava. Az wahn chree groa, ih roots goh dong deepa ahn spred owt. Jos laik dat, wen wi stodi ahn meditayt, wi fayt groa schranga ahn wi ga moa kanfidens dat Jehoava way da aalwayz di bes way. (Kol. 2:6, 7) Tek taim fi tink bowt how Jehoava inschrokshan, gaidans, ahn protekshan mi help ih peepl eena di paas. Fi egzampl, eena wahn vizhan, Izeekyel mi si wahn templ ahn hihn mi pay kloas atenshan az wahn aynjel mi-di tek mezhament a dis templ. Dis vizhan mi schrentn Izeekyel an ih aalso teech wi how wi ku liv op tu Jehoava standadz ahn kip wi wership tu hihn kleen. d (Ezek. 40:1-4; 43:10-12) Jos laik Izeekyel, wee wahn benifit wen wi du wahn deep stodi a di Baibl ahn meditayt pahn di tingz weh wi laan.

16. How Bob haat mi protek hihn? (Psalm 112:7)

¹⁶ Mek yu haat bee faytful tu Jehoava. King David mi seh dat hihn wahn neva stap lov Jehoava. Eena wahn sang ih mi seh: “Mai haat faytful tu yoo, Oa Gaad.” (Ps. 57:7) Jos laik King Dayvid, wee ku bee faytful ahn chros Jehoava wid wi hoal haat tu. (Reed Psalm 112:7.) e Mek wi luk pahn how dis mi help Brada Bob weh wi mi menshan erliya. Wen di dakta mi tel Bob dat dehn mi wahn set sohn blod wan said fi hihn jos in kays ih need it, rait away Brada Bob mi tel ahn noh mek dehn eevn chrai tink fi giv hihn blod er els ih mi wahn lef di  haaspital. Laytaraan, afta Bob mi mek da disizhan, ih seh: “Ah neva tink twais an Ah neva wori bowt notn.”

17. Weh Bob egzampl teech wi? (Koment pahn di picha.)

¹⁷ Bob mi stay faytful tu Jehoava bikaaz ih mi don mek op ih main fi stan op schrang ahn stik tu Jehoava lang bifoa ih gaahn eena di haaspital. Fers, hihn mi waahn mek Jehoava hapi. Sekant, hihn mi du ih risaach eena di Baibl ahn di poblikayshan dehn weh bays pahn di Baibl fi fain owt how Jehoava feel bowt laif ahn blod. Ahn terd, hihn mi kanvins dat if ih fala Jehoava advais, ih mi wahn benifit now an eena di fyoocha. Wee ku ga wahn faytful haat tu, noh mata weh kaina chraiyal kom op eena laif.

18. How Bayrak egzampl ku teech wi fi chros eena Jehoava? (Koment pahn di picha pahn di kova.)

¹⁸ Chros eena Jehoava. Bayrak mi ga sokses bikaaz ih mi chros di inschrokshan dehn weh Jehoava mi giv ahn. Di Izrelait dehn neva ga no wepan fi fait eena waar. Bot stilyet, Jehoava mi tel Bayrak fi goh fait gens di Kaynanait Cheef Sisera an ih aami, weh mi ga lata wepan fi fait. (Judg. 5:8) Debora, hoo da-mi wahn prafit, mi tel Bayrak fi goh dong da wahn flat ayrya fi fait gens Sisera ahn fi hihn 900 waar chariyat. Bikaaz di lan mi flat, ih mi luk laik ih mi wahn eeziya fi mek Sisera ahn fi hihn waar chariyat dehn win dis batl. Bot stilyet, Bayrak mi lisn tu weh Debora mi tel ahn. Az di Izrelait soaljaz mi-di kohn dong fahn Mongt Taybor, Jehoava mi sen wahn haad rayn. Dis mi mek ih geh soh modi dat aala Sisera waar chariyat mi geh stok eena di mod, ahn soh Jehoava mi mek Bayrak win di batl. (Judg. 4:1-7, 10, 13-16) Saym way soh, Jehoava wahn mek wi win di batl if wi chros eena hihn ahn fala di inschrokshan dehn weh ih gi wi chroo fi hihn aaganaizayshan.—Deut. 31:6.

19. Wai yoo waahn stay faytful tu Jehoava?

¹⁹ Az lang az wi liv eena dis sistem a tingz, wi need fi kip aan di fait fi stay faytful tu Jehoava. (1 Tim. 6:11, 12; 2 Peet. 3:17) Noh mek tingz laik persikyooshan, presha weh noh eezi fi noatis, wizdom fahn di werl, faals teechinz, ahn tingz weh ku dischrak wi mek wi stap bee faytful tu Jehoava. (If. 4:14) Insteda dat, mek wi stan op schrang, stay faytful tu Jehoava, ahn mek op wi main fi aalwayz lov an obay ahn. Wi aalso need fi bee reeznabl ahn shoa dat wi noh aalwayz waahn wi oan way. Eena di neks aatikl, wi wahn taak bowt how Jehoava ahn Jeezas mi set wahn perfek egzampl fi bee reeznabl.