Mai pa da-mi wahn elda eena di United Church of Canada weh mi deh eena fi wee ayrya. Soh evri week hihn wuda sen mee ahn mi sista da Sondeh skool. Afta dat wi wuda jain ahn fi di cherch servis weh staat 11 aklak. Den eena di aftanoon, wi wuda goh da Kingdom Haal wid wi ma. Ih mi klyaa fi mek wi si di difrens bitween di too rilijan.

Mai ma mi shyaa weh ih mi-di laan fahn di Baibl wid ih gud frenz weh naym Bob ahn Marion Hutcheson. Ahn dehn mi geh baptaiz tu. Eena 1958, Brada ahn Sista Hutcheson mi kehr mee ahn dehn chree son da di Divine Will International Assembly da New York City, weh mi laas fi ayt dayz. Wen Ah luk bak, Ah riyalaiz dat ih neva eezi fi mek dehn kehr mi wid dehn. Bot da asembli da-mi wan a di bes ting weh eva hapm eena mi laif.

Wen Ai da-mi wahn teenayja, wee mi liv pahn wahn faam. An Ai mi laik tek kayr a di animalz weh mi dehdeh. Soh Ah mi reeli waahn stodi fi bee wahn dakta wen ten tu animalz. Mai ma mi tel wahn elda eena di kangrigayshan bowt mi planz. Ahn hihn mi rimain mi dat wi di liv “eena di laas dayz” an ih mi aks mi how Ai mi tink ih wuda afek mi rilayshanship wid Jehoava if Ah goh da  yooniversiti fi sohn yaaz. (2 Tim. 3:1) Soh Ah mi disaid fi noh goh fi haiya ejukayshan.

Afta dat, Ah stil mi-di wanda wat fi du afta Ah finish hai skool. Eevn doa Ah yoostu preech evri weeken, Ah neva reeli injai di minischri an Ah neva si miself di bee wahn painyaa. Mi pa ahn mi onkl mi inkorij mi fi goh werk fi wahn big taim inshoarans kompani da Toronto. Mai onkl mi ga wahn hai pozishan deh, soh Ah mi aksep di jab.

Da Toronto, Ah mi-di werk wahn lat an Ah yoostu spen wahn lata taim wid peepl weh neva serv Jehoava. Soh Ah neva yoostu goh da meetin ahn goh owt ahn preech az moch. Joorin da taim Ah mi-di liv wid mi grampa weh da neva wahn Witnis, bot afta ih ded, Ah mi need fi fain wahn nada plays fi liv.

Brada ahn Sista Hutcheson weh mi kehr mi da di kanvenshan eena 1958, mi chreet mi laik faamli. Dehn mi invait mi fi goh liv wid dehn ahn dehn mi help mi schrentn mi rilayshanship wid Jehoava. Ah mi geh baptaiz eena 1960 lang wid fi dehn son John. Wen John mi staat painyaa, dat mi inkorij mi fi waahn du moa eena di minischri. Di bradaz eena di kangrigayshan mi noatis dat Ah mi-di mek spirichwal proagres. Soh laytaraan, Ah mi geh di privilij fi bee di oavaseeya fi weh wi now noa az di Laif ahn Minischri Meetin.

Eena 1966, Ah mi geh marid tu Randi Berge. Shee da-mi wahn painyaa weh mi ga lata zeel ahn shee mi eega fi serv wehpaat dehn need moa help. Wi serkit oavaseeya mi shoa dat ih kay bowt wi. Hihn mi inkorij wi fi goh help owt di kangrigayshan da Orillia, Ontario. Soh wi mi pak op wi tingz ahn wi mi moov deh.

Az soon az wi mi reech Orillia, Ah mi staat painyaa tu. Dis taim, Ah mi eksaitid jos laik mi waif. Afta Ah staat werk haad fi bee wahn painyaa, Ah staat tu feel di jai weh kohn wen yu yooz di Baibl ahn wen yu si how peepl andastan it. Da mi wahn blesin fi help wahn nais kopl da Orillia fi mek chaynjiz eena dehn laif soh dehn ku staat serv Jehoava.

Wail wi mi-di vizit Toronto, wi mi geh fi meet Brada Arnold MacNamara. Hihn da wan a di bradaz weh mi-di tek di leed da Betel. Hihn mi aks wi if wi wuda waahn serv az speshal painyaaz. Ah mi hori ansa: “Af koars! Az lang az da noh Quebec!” Ah mi seh dis bikaaz Ah mi hyaa how peepl weh taak lnglish da Canada mi feel bowt peepl weh taak French da Quebec, ahn dis mi mek Ah tink negativ tingz bowt di plays. Joorin da taim, peepl mi-di proates gens di govament, dehn mi waahn mek Quebec bee separayt fahn di res a Canada.

Brada Arnold mi tel mi, “Quebec da di onli plays weh di branch di sen speshal painyaaz fi rait now.” Soh rait away Ah tel ahn yes. Ah mi don noa dat Randi mi waahn serv deh. Laytaraan, Ah mi geh fi si dat dis da wan a di bes disizhan Ah mek eena mi laif!

Afta wi mi finish wahn French klaas weh mi tek faiv weeks, mee, Randi, ahn wahn nada kopl mi gaahn da Rimouski. Dis mi deh bowt 336 mailz fahn Montreal. Ih mi klyaa fi si dat wi mi stil ga wahn lat fi laan bikaaz Ah mi mek sohn mistayk wen Ah mi reed wahn anonksment da meetin. Ah mi seh dat wi mi wahn ga wahn lata “oschrij deligayts” da wi neks kanvenshan. Bot Ah mi akchwali meen fi seh dat wi wahn ga lata “Austrian deligayts.”

Wail di foa a wi mi-di liv da Rimouski, foa singl sistaz, Brada ahn Sista Huberdeaus lang wid dehn too daata mi moov deh tu. Brada ahn Sista Huberdeaus mi rent wahn big hows wid sevn bedroom an aala di painyaaz weh liv deh mi help pay di rent. Wi yoostu kaal da hows di White House bikaaz di fronta di hows mi wait an ih mi ga sohn wait poas. Rong 12 er 14 peepl wuda yoozhwali liv deh. Bikaaz mee ahn Randi da-mi speshal painyaaz, wi mi di preech aal day, soh wi mi reeli tankful fi aalwayz ga sohnbadi fi jain wi eena di minischri, eevn joorin di koal weda.

Wi mi geh soh kloas tu di faytful painyaaz dat wi staat tu feel laik faamli. Sohntaim aala wi wuda sidong rong wahn kyamp faiya fi spen taim tugeda er wi wuda pik wahn day fi kuk tugeda. Wan a di bradaz mi noa how fi play sohn myoozik inschrument, soh pahn Satideh nait wi wuda sing ahn daans.

Lata peepl da Rimouski mi waahn stodi di Baibl. Soh eena jos faiv yaaz, wi mi hapi fi si som a wi Baibl stodiz geh baptaiz. Di kangrigayshan mi groa ahn wi mi ga bowt 35 poblishaz!

Da Quebec, wi mi geh sohn gud chraynin pahn how fi preech beta. Ahn wi mi geh fi si how Jehoava help wi eena di minischri ahn how ih mi help wi wid di tingz weh wi need evri day. Wi mi aalso laan fi lov di langwij, di kolcha, ahn di peepl weh mi taak French. Dis mi help wi fi lov ada kolchaz tu.—2 Kor. 6:13.

Wi neva ekspek di branch fi aks wi fi moov da Tracadie, wahn tong weh mi deh pahn di ees said a New Brunswick. Dis mi haad fi wi, bikaaz wi mi jos sain wahn kanchrak fi rent wahn apaatment an Ah mi ga wahn kanchrak fi teech paat taim da wahn skool. Pahn tap a dat, som a mi Baibl stoodyents mi jos ton poblishaz, ahn mee ahn Randi mi bizi di help bil wahn Kingdom Haal.

Wi mi spen di hoal weeken di pray bowt dis mata ahn wi mi gaahn vizit Tracadie. Rait deh mi reeli difrent fahn Rimouski. Bot wi mi mek  op wi main dat sins Jehoava mi waahn wi goh deh, wi mi gwehn. Wi put Jehoava tu di tes ahn wi mi si how hihn help wi. (Mal. 3:10) Randi ga wahn schrang rilayshanship wid Jehoava ahn wahn wilin ahn hapi spirit. Ahn dat mi help fi mek di moov moch eeziya.

Di onli elda eena wi nyoo kangrigayshan da-mi Robert Ross. Hihn an ih waif Linda mi-di serv deh az painyaaz, ahn dehn mi chooz fi stay deh afta dehn fers pikni mi baan. Eevn doa dehn mi bizi di tek kayr a dehn lee bwai, dehn mi reeli inkorij mee ahn Randi bikaaz dehn mi haspitabl ahn dehn mi aalwayz deh owt di preech.

Afta wi mi painyaa da Tracadie fi too yaaz, wi mi geh wahn nada sopraiz. Wi geh wahn invitayshan fi bee paat a di serkit werk. Wi mi serv eena di Inglish serkit fi sevn yaaz, den dehn asain wi tu wahn French serkit. Brada Léonce Crépeault, wi dischrik oavaseeya da Quebec, yoostu tel mi dat Ah giv sohn gud taak. Bot afta dat, ih wuda aalwayz aks mi, “How yoo kuda mek it beta?” a Di persnal inchres weh di brada mi shoa mi help mi fi mek di way how Ah teech beta an eeziya fi andastan.

Wahn asainment weh Ah wahn neva ferget da wen Ah mi werk eena di food dipaatment da di 1978 “Victorious Faith” International Convention da Montreal. Wi mi-di ekspek 80,000 peepl. Evriting mi nyoo: di ikwipment, di menyoo, ahn di inschrokshan pahn how fi pripyaa di food. Wi mi ga 20 big freeza ahn sohntaim dehn neva werk soh gud. Wi mi waahn staat get evriting redi erli fahn di day bifoa, bot wi kudn bikaaz wahn big gaym mi-di hapm da di staydyom. Insted, wi mi en op di staat set op til rong midnait. Ahn wi mi haftu put aan di oavn erli da maanin bifoa di son kom op fi mek wi kuda mek brekfas. Wi mi taiyad, bot Ah mi laan wahn lat fahn di valantyaaz. Dehn mi machoar, haad werkin, hapi, ahn wi da stil frenz op tu now. Da mi wahn privilij fi bee paat a dis impoatant kanvenshan da Quebec, espeshali sins dis da-mi di saym plays weh di bradaz ahn sistaz mi fays persikyooshan joorin di 1940ʼs ahn 1950ʼs!

Ah mi laan wahn lat fahn di ada oavaseeya dehn joorin di kanveshan dehn da Montreal. Bak den, Brada David Splane, hoo da paat a di Govanin Badi now, da-mi di kanvenshan oavaseeya.  Laytaraan, dehn mi aks mi fi tek oava di asainment ahn David mi sopoat mi wahn lat.

Eena 2011, afta wi mi injai 36 yaaz eena di serkit werk, Ah mi geh invaitid fi bee wahn teecha da di Skool fi Kangrigayshan Eldaz. Eena too yaaz wi mi sleep eena 75 difrent bed, bot ih mi wert evri sakrifais. Da di en a eech week, di eldaz mi feel soh tankful bikaaz dehn kuda mi si humoch di Govanin Badi kay bowt dehn ahn dehn rilayshanship wid Jehoava.

Laytaraan, Ai da-mi wahn teecha fi di Skool fi Kingdom Ivanjelaizaz. Di klaas mi aalwayz feel taiyad ahn nervos bikaaz dehn mi ga wahn bizi skejul. Dehn mi haftu sidong eena klaas fi sevn owaz evri day, dehn mi du hoamwerk fi chree owaz evri eevnin, ahn dehn mi haftu du foa er faiv asainment eech week. Mee ahn di ada inschrokta mi eksplayn dat da onli Jehoava mi wahn help dehn fi du it. Ah wahn aalwayz memba how hapi di styoodents mi hapi fi si dat wans dehn mi rilai pahn Jehoava, dehn kuda mi du moa dan weh dehn mi tink dehn kuda du.

Mai ma Baibl stodiz mi mek proagres bikaaz shee mi shoa dat ih kay bowt dehn. Ih mi eevn help mi pa fi chaynj ih atichood bowt di chroot. Chree dayz afta mi ma mi ded, mi pa mi gaahn da Kingdom Haal fi di poblik taak ahn dat mi sopraiz wi. Hihn mi kantinyu aten di meetin dehn fi di neks 26 yaaz. Eevn doa mi pa neva did geh baptaiz, di eldaz mi tel mi dat hihn da-mi aalwayz di fers wan fi deh da di Kingdom Haal.

Mi ma mi set wahn gud egzampl fi mee ahn mi sista dehn. Aal chree Ah mi lee sista ahn fi dehn hozban di serv Jehoava faytfuli. Wan Ah mi sista di serv da di branch aafis da Portugal ahn di ada wan di serv da di branch aafis da Haiti.

Now mee ahn Randi di serv az speshal painyaaz da Hamilton, Ontario. Wen wee mi deh eena di serkit werk, wi mi aalwayz soh hapi fi jain di bradaz ahn sistaz pahn fi dehn ritern vizit ahn dehn Baibl stodi. Bot now, wi soh hapi fi si wi oan Baibl stodiz di kohn fi lov Jehoava. Az wi geh kloasa tu wi bradaz ahn sistaz eena wi nyoo kangrigayshan, wi soh hapi fi si how Jehoava help dehn eena evriting.

Wen wi luk bak, wi reeli apreeshiayt how adaz mi shoa dat dehn kay bowt wi. Now, wi chrai wi bes fi shoa “sinsyaa kansaan” fi adaz, ahn wi inkorij dehn fi du dehn bes fi serv Jehoava eena wateva way pasabl. (2 Kor. 7:6, 7) Fi egzampl, eena wahn famili, di waif, di son, ahn di daata mi-di painyaa. Soh Ah mi aks di hozban if hihn eva tink bowt painyaa tu. Hihn mi seh dat hihn mi-di sopoat chree painyaaz. Soh Ah aks ahn, “Yoo ku sopoat dehn beta dan Jehoava?” An Ah mi inkorij ahn fi injai weh dehn mi-di injai. Eena siks monts taim hihn mi staat tu painyaa tu.

Mee ahn Randi wahn kantinyu fi tel di “neks jenarayshan” bowt Jehoava “wandaful werk dehn,” ahn wi hoap dat dehn wahn injai serv Jehoava jos laik how wee injai it.—Ps. 71:17, 18.