1. Wai ih gud fi pripyaa fi wahn dizaasta?

 IF WI pripyaa fi sohnting hed a taim, ih ku help sayv wi laif. Fi egzampl, wen wahn dizaasta hapm, peepl weh mi pripyaa far it ku servaiv ahn help adaz. Wahn aaganaizayshan da Europe weh help peepl seh: “Ih mek wahn big difrens if wi pripyaa hed a taim.”

2. Wai wi shuda pripyaa hed a taim fi di grayt chribyulayshan? (Machyu 24:44)

² Di “grayt chribyulayshan” wahn staat wen nobadi ekspek it. (Mach. 24:21) Bot di grayt chribyulayshan da noh laik wahn dizaasta weh wahn kech wi bai sopraiz bikaaz wi noa ih di kohn. Bowt 2,000 yaaz agoa, Jeezas mi tel ih falowaz fi mek shoar dehn geh redi fi da day. (Reed Machyu 24:44.) If wee pripyaa heda taim, ih wahn bee eeziya fi mek wi bayr op joorin di grayt chribyulayshan ahn help ada peepl.—Look 21:36.

3. Wen wi laan fi bayr op, ga kompashan, ahn shoa lov, how dat help wi fi bee redi fi di grayt chribyulayshan?

³ Dehn ga chree wayz how wi ku pripyaa hed a taim fi di grayt chribyulayshan. Weh wee wahn du if wi haftu preech wahn schrang jojment mesij ahn peepl staat ton gens wi? (Rev. 16:21) Wi need fi laan fi bayr op fahn now soh dat wi ku obay Jehoava ahn chros dat hihn wahn protek wi wen da taim kohn. Weh wi wahn du if wi bradaz ahn sistaz looz som er aala dehn mateeryal tingz? (Hab. 3:17, 18) Wi need fi ga kompashan soh dat wi ku help dehn fi geh evriting weh dehn need. Wen Gag a Maygag staat atak Gaad peepl, weh wee wahn du if wi haftu liv tugeda wid wi bradaz ahn sistaz fi wahn wail? (Ezek. 38:10-12) Wi need fi ga schrang lov fi dehn soh dat wee ku bayr op chroo dehndeh haad taimz.

4. How di Baibl shoa dat wee need fi kip aan di bayr op, ga kompashan, ahn shoa lov?

 ⁴ Di Baibl inkorij wi fi kip aan di bayr op, ga kompashan, ahn shoa lov. Look 21:19 seh: “If unu bayr op til di en, unu wahn sayv unu laif.” Koloashanz 3:12 seh: “Unu mos shoa . . . kompashan.” Ahn 1 Tesaloanyanz 4:9, 10 seh: “Gaad di teech unu how fi shoa lov tu wan anada. . . . Bot wi bayg unu, bradaz, fi kip aan di du dat moa ahn moa.” Dehnya vers geh rait dong fi di disaiplz weh don mi-di bayr op ahn shoa dat dehn ga kompashan ahn lov. Bot dehn mi stil haftu kantinyu werk haad fi shoa dehnya kwalitiz. Soh wee haftu du di saym ting. Fi help wi du dat, mek wi si how di erli Kristyanz mi shoa eech wan a dehndeh kwaliti. Den, wi wahn si how wi ku kapi fi dehn egzampl ahn shoa dat wee redi fi di grayt chribyulayshan.

5. Weh mi help di erli Kristyanz fi bayr op wen dehn mi-di goh chroo haad taimz?

⁵ Di erli Kristyanz mi need fi bayr op. (Heeb. 10:36) Dehn mi fays prablemz jos laik evribadi els. Pahn tap a dat, dehn mi fays ada prablemz bikaaz dehn da-mi Kristyanz. Dehn mi fays persikyooshan fahn di Jooish rilijos leedaz, di Roaman govament, ahn fahn dehn oan famili. (Mach. 10:21) An eevn eena di kangrigayshan, di erli Kristyanz mi haftu mek shoar dehn protek dehnself fahn di apastayt dehn weh mi-di spred faals teechinz weh kuda mi divaid di kangrigayshan. (Aks 20:29, 30) Eevn doa aala dehnya tingz mi-di hapm, di Kristyanz mi stay faytful. (Rev. 2:3) Weh mi help dehn? Dehn mi meditayt pahn di egzampl a Joab ahn di way hihn mi bayr op wen ih mi-di goh chroo haad taimz. (Jay. 5:10, 11) Dehn mi bayg Jehoava fi gi dehn di schrent weh dehn mi need. (Aks 4:29-31) Ahn dehn mi foakos pahn di blesinz weh dehn mi get wen dehn indyoar.—Aks 5:41.

6. Weh wi ku laan fahn weh Merita mi du wen shee mi-di fays persikyooshan fahn ih famili?

⁶ Eena di Baibl ahn wi poblikayshanz, wi ku fain wahn lata egzampl a peepl weh mi bayr op. Wi need fi stodi ahn meditayt pahn fi dehn egzampl soh dat wi ku bayr op tu. Dis da weh help Merita, wahn sista fahn Albania, fi indyoar wen shee mi-di fays persikyooshan fahn ih famili. Shee seh: “Ih mi toch mi haat wen Ah stodi di egzampl a Joab. Hihn mi sofa wahn lat an ih neva noa hoo mi deh bihain it. Bot stilyet, hihn seh: ‘Ah noh wahn giv op mi laayalti, eevn if Ah haftu ded!ʼ (Job 27:5) Ah mi tink bowt how mai prablemz da-mi notn kompyaa tu weh Joab gaahn chroo. Pahn tap a dat, Ai mi noa hoo deh bihain mai prablemz.”

7. Weh wi need fi du eevn if wi noh di goh chroo wahn haad taim rait now?

⁷ If wi pray aal di taim ahn tel Jehoava evriting weh deh pahn wi main, dis wahn help wi fi geh schranga ahn kip aan di bayr op. (Fil. 4:6; 1 Tes. 5:17) Eevn if yu noh di fays wahn haad taim rait now, yoo stil pray wen yu feel sad, kanfyooz, er noh noa weh fi du? If yu aalwayz taak tu Gaad an aks ahn fi help yu wid yu smaal prablemz, wen yu fays biga prablemz yu wahn aalwayz memba fi taak tu Jehoava. Yu wahn kanvins dat hihn noa egzakli wen fi help yu ahn how fi help yu.—Ps. 27:1, 3.

8. How Mira egzampl shoa wi dat if wi bayr op now, wi ku bee redi fi fyoocha prablemz? (Jaymz 1:2-4) (Koment pahn di picha.)

⁸ If wi laan fi bayr op now, wi wahn servaiv di grayt chribyulayshan. (Roam. 5:3)  Wai wi seh dat? Lata bradaz ahn sistaz seh dat evritaim Jehoava help dehn fi indyoar wahn prablem, dehn fayt geh schranga. Dis help dehn fi chros dat Jehoava redi ahn wilin fi help dehn wen wahn nada prablem kom op. (Reed Jaymz 1:2-4.) Mira, wahn painyaa fahn Albania, seh dat fi shee ekspeeryens mi help ahn laan fi bayr op ahn fi kantinyu stay faytful tu Jehoava. Dehn ga taimz wen shee mi feel laik shee da di onli wan wid lata prablemz. Bot shee mi tink bowt how Jehoava mi don help ahn fi di paas 20 yaaz an ih tel ihself: ‘Stay faytful. Noh stap serv Jehoava now, afta ih don help yu fi bayr op chroo soh moch tes ahn fi soh moch yaaz.ʼ Aala wi ku luk bak pahn how Jehoava don help wi fi bayr op. Yoo ku bee shoar dat Jehoava noa bowt eech prablem weh yu mi haftu indyoar ahn hihn wahn bles yu far it. (Mach. 5:10-12) Bai di taim di grayt chribyulayshan staat, yu wahn don noa how fi bayr op, ahn dat wahn help yu mek op yu main fi kantinyu bayr op ahn stay faytful.

9. How di Kristyanz da Antiyak mi proov dat dehn ga kompashan?

⁹ Tink bowt weh mi hapm wen di Kristyanz da Judeeya mi ekspeeryens wahn famin. Wen di bradaz da Antiyak mi hyaa weh hapm tu di bradaz da Judeeya, dehn mi feel sari fi dehn. Bot dehn mi du moa dan jos feel sari fi dehn. Dehn mi du sohnting fi help dehn. “Dehn mi get tugeda fi sen help tu di bradaz da Judeeya; eech wan a dehn mi giv akaadn tu weh dehn kuda mi afoad.” (Aks 11:27-30) Eevn doa di bradaz ahn sistaz weh mi need help mi liv faar, di Kristyanz da Antiyak mi mek shoar dehn du aal weh dehn kud fi help dehn.—1 Jan 3:17, 18.

10. Eena weh wayz wee ku shoa kompashan wen wi bradaz ahn sistaz di sofa bikaaz a wahn dizaasta? (Koment pahn di picha.)

¹⁰ Jos laik di bradaz da Antiyak, wi ku shoa kompashan tu wi bradaz ahn sistaz weh di sofa bikaaz a wahn dizaasta. Wee ku shoa dat wi redi fi help dehn wen wi tel di eldaz dat wi waahn help owt pahn wahn proajek, wen wi gi kanchribyooshan tu di werlwaid werk, ahn wen wi pray fi dehn. b (Prov. 17:17) Fi egzampl, eena 2020, moa dan 950 Dizaasta Rileef Komiti mi faam. Dehnya komiti mi help tek kayr a wi bradaz ahn sistaz aal rong di werl weh mi-di sofa sayka di COVID-19 pandemik. Wi tankful fi di bradaz ahn sistaz weh di tek paat eena di rileef werk. Lov ahn kompashan moov dehn fi diliva tingz weh di bradaz ahn sistaz need, giv inkorijment, ahn help fiks ahn bil hows ahn Kingdom Haal.—Kompyaa 2 Korintyanz 8:1-4.

11. Wen wi shoa kompashan, how dat aana Jehoava?

¹¹ Wen wee help wi bradaz ahn sistaz afta wahn dizaasta hapm, ada peepl noatis. Fi egzampl, eena 2019, Harikayn Dorian mi dischrai wahn Kingdom Haal da di Bahamas. Wen di bradaz mi-di fiks bak di Kingdom Haal, dehn mi aks wahn kanchrakta, hoo da neva wahn witnis, humoch ih mi wahn kaas fi mek hihn du di werk. Hihn tel dehn: “Ah wahn giv evriting weh unu need fi free . . . di ikwipment, di layba, ahn di mateeryal. . . . Ah waahn du dis fi unu aaganaizayshan bikaaz ih amayz mi fi si how unu tek kayr a unu frenz.” Lata peepl eena di werl noh noa Jehoava,  bot dehn doo noatis weh Jehoava Witnisiz du fi help adaz. Da wahn privilij fi noa dat wen wi shoa kompashan, wi ku help peepl fi geh fi noa Jehoava, di Wan weh “ga soh moch mersi”!—If. 2:4.

12. If wee shoa kompashan now, how dat wahn help wi fi bee redi fi di grayt chribyulayshan? (Revilayshan 13:16, 17)

¹² Wai wi wahn haftu shoa kompashan joorin di grayt chribyulayshan? Di Baibl tel wi dat dehn wan weh noh sopoat di govament wahn fays prablemz now ahn joorin di grayt chribyulayshan. (Reed Revilayshan 13:16, 17.) Som a wi bradaz ahn sistaz mait need wi help fi geh di tingz weh dehn need fi servaiv. Wen wi King Jeezas Krais kohn fi joj evribadi, wee waahn mek shoar hihn fain wi di shoa kompashan, soh dat ih ku invait wi fi “inherit di Kingdom.”—Mach. 25:34-40.

13. Akaadn tu Roamanz 15:7, how di erli Kristyanz mi schrentn dehn lov fi eech ada?

¹³ Evribadi mi noa dat di erli Kristyanz mi lov wan anada. Bot yu tink ih mi eezi fi shoa lov? Aala dehn mi kohn fahn difrent bakgrong. Som a dehn da-mi Jooz weh mi laan fi obay di Laa weh Gaad mi gi Moaziz. Bot som a dehn da neva Jooz, soh dehn mi groa op wid difrent kostom. Som a di Kristyanz da-mi slayv, som a dehn yoostu bee slayv, ahn maybi som a dehn mi oan sohn slayv. How dehndeh Kristyanz kuda mi stil shoa lov eevn doa dehn kohn fahn difrent bakgrong? Paal mi inkorij dehn fi “welkom wan anada.” (Reed Roamanz 15:7.) Weh hihn mi meen wen ih seh dat? Di Greek werd weh geh chranslayt az “welkom” meenz fi tek een sohnbadi wid kainis eena yu hows, er aksep dehn az wahn fren. Fi egzampl, Paal mi tel Faileeman how fi welkom Onesimos, wahn slayv weh mi ron weh. Hihn seh: “Aksep ahn bak wid kainis.” (Fail. 17) Prisila an Akwila mi welkom Apolos, hoo mi need fi laan wahn lat moa bowt di chroot, ahn “dehn kehr ahn wan said” ahn help ahn. (Aks 18:26) Di erli Kristyanz neva alow dehn bakgrong fi divaid dehn. Insteda dat, dehn mi welkom wan anada.

14. How Anna an ih hozban mi shoa lov tu adaz?

¹⁴ Wee ku shoa wi lov tu wi bradaz ahn sistaz wen wi bee dehn fren ahn spen taim wid dehn. Wen wi du dat, dehn wahn shoa dat dehn lov wi bak tu. (2 Kor. 6:11-13) Mek wi luk pahn Anna an ih hozban egzampl. Rait afta dehn mi moov tu dehn nyoo asainment da West Africa, di COVID-19 pandemik mi staat. Sayka dat, dehn kudn meet in persn ahn dis mi mek it haad fi mek dehn geh fi noa di kangrigayshan. Weh dehn mi du fi stil shoa lov eena dehn nyoo kangrigayshan? Dehn mi veedyo kaal di bradaz ahn sistaz fi taak tu dehn ahn tel dehn dat dehn waahn geh fi noa dehn beta. Dat mi toch di bradaz ahn sistaz haat ahn dehn mi staat kaal ahn mesij di mishineri kopl regyula tu. Wai di mishineri kopl mi chrai geh fi noa dehn bradaz ahn sistaz? Anna seh, “Ah wahn neva ferget dat eena gud ahn bad taimz sohn bradaz ahn sistaz mi shoa lov tu mee ahn mi famili. Fi dehn egzampl moov mi fi waahn shoa lov tu.”

15. Weh yu laan fahn Vanessa egzampl? (Koment pahn di picha.)

¹⁵ Moas a wi deh eena wahn kangrigayshan weh ful a bradaz ahn sistaz wid difrent bakgrong ahn persnaliti. If wi foakos pahn dehn gud kwalitiz, fi wee lov fi dehn wahn geh schranga. Wahn sista weh naym  Vanessa, weh serv da New Zealand, seh ih yoostu fain it haad fi get lang wid som a di bradaz ahn sistaz eena ih kangrigayshan. Bot insteda kip weh fahn dehn wan weh ga wahn persnaliti weh mi anai shee, ih mek op ih main fi spen moa taim wid dehn. Dis mi help ahn foakos pahn di gud kwalitiz weh Jehoava lov bowt dehn. Shee seh: “Now dat mi hozban da wahn serkit oavaseeya, wi geh fi spen wahn lata taim wid bradaz ahn sistaz weh gat difrent persnaliti. Bot now ih eeziya fi mek Ah get lang wid evribadi an Ah lov dat aala dehn difrent. Ih klyaa fi si dat Jehoava lov dat aala wi difrent tu, bikaaz ih alow wi fi wership ahn noh mata weh bakgrong wi kohn fram.” Wen wi si wi bradaz ahn sistaz di way Jehoava si dehn, wi shoa dat wi lov dehn.—2 Kor. 8:24.

16. Wai wi wahn haftu lov wi bradaz ahn sistaz joorin di grayt chribyulayshan? (Koment pahn di picha.)

¹⁶ How Jehoava wahn protek wi joorin di grayt chribyulayshan? Wi wahn haftu lov wi bradaz ahn sistaz joorin di grayt chribyulayshan. Tink bowt weh Jehoava mi tel ih peepl fi du bifoa Babilan mi geh atak. Hihn mi tel dehn: “Mi peepl, unu goh haid eena unu room ahn kloaz unu doa. Haid unuself fi wahn lee wail til Gaad anga paas.” (Isa. 26:20) Maybi wi wahn haftu fala dehndeh saym inschrokshanz joorin di grayt chribyulayshan. Dehndeh “room” mait di rifaa tu wi kangrigayshan dehn. Joorin di grayt chribyulayshan, Jehoava pramis dat hihn wahn protek wi if wi kantinyu serv ahn lang wid wi bradaz ahn sistaz. Wi haftu werk haad fahn now fi noh jos talarayt wi bradaz ahn sistaz, bot fi ga schrang lov fi dehn. Wi laif wahn dipen pan it!

17. If wee pripyaa fahn now, weh wi wahn ku du eena di grayt chribyulayshan?

¹⁷ “Di grayt day a Jehoava” wahn bee wahn reeli haad taim fi aal hyoomanz. (Zeph. 1:14, 15) Jehoava peepl wahn sofa tu. Bot if wi pripyaa fahn now, wi wahn ku stay kaam ahn help adaz. Wi wahn ku bayr op anda eni prablemz weh kohn wi way. Wen wi bradaz ahn sistaz goh chroo haad taimz, wi wahn ku shoa kompashan ahn du wi bes fi help dehn geh evriting weh dehn need. If wi laan fi lov wi bradaz ahn sistaz fahn now, wi wahn ku stik kloas tu dehn eena di fyoocha. Jehoava wahn bles wi wid evalastin laif eena wahn werl weh noh ga no kaina dizaasta ahn sofarin.—Isa. 65:17.