1-2. Hoo da Zaydak? (1 Chronicles 12:​22, 26-28)

 IMAJIN oava 340,000 man gyada tugeda eena wan plays. Aala dehn di laaf ahn taak ahn di sing prayz tu Jehoava tugeda. Dis da weh mi hapm wen aala di Izrelait man dehn mi gyada tugeda rong Hebron fi mek Dayvid bee dehn king. (1 Chron. 12:39) Eena wahn krowd laik dat, moas peepl praabli wudn eevn noatis wahn yong man weh naym Zaydak. Bot Jehoava mi noatis ahn, an Hihn waahn wi noa bowt ahn. (Reed 1 Chronicles 12:​22, 26-28.) a Soh hoo da Zaydak?

² Zaydak da-mi wahn prees weh yoostu werk lang wid Hai Prees Abaiyatar wahn lat. Gaad mi giv ahn wizdom an ih mi help ahn andastan Fi Hihn wil. (2 Sam. 15:27) Zaydak da-mi di kaina persn peepl yoostu goh tu wen dehn need gud advais. Hihn da-mi wahn brayv man tu. Eena dis aatikl, wi wahn laan how Zaydak mi shoa korij.

3. (a) Wai Jehoava peepl need fi shoa korij? (b) Weh wi wahn taak bowt eena dis aatikl?

³ Wi di liv eena di laas dayz, ahn Saytan di atak wi moa dan eva bifoa. (1 Peet. 5:8) Wi need fi shoa korij wail wi di wayt fi mek Jehoava dischrai Saytan ahn fi hihn wikid sistem. (Saa. 31:24) Mek wi taak bowt chree wayz how wi ku shoa korij laik Zaydak.

SOPOAT GAAD KINGDOM

4. Wai Jehoava peepl need fi bee brayv fi sopoat fi hihn Kingdom? (Koment pahn di picha.)

⁴ Wee da Jehoava peepl ahn soh wee chooz fi sopoat Gaad Kingdom noh mata wat. (Mach. 6:33) Bot lata taimz ih tek korij fi du dat. Fi egzampl, wi liv eena wahn wikid  werl an ih tek korij fi liv op tu Jehoava standadz ahn fi preech di gud nyooz bowt Gaad Kingdom. (1 Tes. 2:2) Dis werl di geh moa ahn moa divaid op an ih tek korij fi stay pahn Jehoava said ahn noh get involv eena palitiks. (Jan 18:36) Lata Jehoava peepl ga moni prablemz, geh beet op, er geh put eena prizn bikaaz dehn rifyooz fi tek paat eena palitiks er jain eni aami.

5. Wai Zaydak mi need korij fi sopoat Dayvid?

⁵ Eevn doa Zaydak mi deh da Hebron wid evribadi els di selibrayt bikaaz dehn mek Dayvid dehn king, hihn mi wilin fi du moa dan dat. Hihn mi kehr ih wepan dehn wid ahn jos in kays waar brok owt. (1 Chron. 12:38) Hihn mi wilin fi fala Dayvid ahn help ahn difen Izrel fahn dehn enimiz. Maybi Zaydak neva ga lata ekspeeryens di fait eena waar, bot hihn mi ga lata korij.

6. How Dayvid da-mi wahn gud egzampl fi Zaydak eena di way ih shoa korij? (Saam 138:3)

⁶ Wai wahn prees laik Zaydak kuda mi shoa soh moch korij? Hihn mi laan it fahn di peepl rong ahn. Fi egzampl, Dayvid yoostu aalwayz pen pahn Jehoava fi help ahn fait gens ih enimi dehn. (Saa. 28:7; reed Saam 138:3.) b Ahn di hoal nayshan mi waahn mek Dayvid bee fi dehn king bikaaz a di korij hihn mi shoa wen ih mi ‘leed Izrel enitaim dehn gaahn da waar.ʼ (1 Chron. 11:​1, 2) Zaydak mi ga ada gud egzamplz rong ahn weh hihn kuda mi laan fram, laik Jehoyada an ih son Benaiya lang wid di 22 ada cheef fahn ih famili weh mi sopoat Dayvid. (1 Chron. 11:​22-25; 12:​26-28) Aala dehnya man mi chooz Dayvid az dehn king ahn dehn mi wilin fi protek ahn noh mata wat.

7. (a) Hoo wi ku laan korij fram eena fi wee taim? (b) Weh yu laan fahn Brada Nsilu egzampl eena di veedyo?

 ⁷ Wen wi tink bowt how ada peepl shoa korij ahn stay laayal tu Jehoava ahn fi hihn Kingdom, dat ku help wee fi shoa korij tu. Fi wee King, Jeezas Krais, mi aalwayz pen pahn Jehoava fi schrent. Wen hihn mi deh pahn di ert, hihn mi rifyooz fi get involv wid palitiks eena Saytan sistem. (Mach. 4:​8-11; Jan 6:​14, 15) Eena fi wee taim, wi ga lata egzampl a sohn yong man weh rifyooz fi jain aami er tek paat eena palitiks. Yu ku reed dehn ekspeeryens pahn jw.org. Fi dehn egzampl ku help wee fi shoa korij tu. c

HELP YU BRADAZ AHN SISTAZ

8. Eena weh kaina sichuwayshanz eldaz mait need korij fi help dehn bradaz ahn sistaz?

⁸ Jehoava peepl lov help owt wan anada. (2 Kor. 8:4) Bot dat noh aalwayz eezi fi du. Fi egzampl, wen waar brok owt, di eldaz noa dat dehn bradaz ahn sistaz need inkorijment ahn help. Dehn aalso noa dat dehn mait need fi help tek kayr a dehn spirichwal needz ahn mek shoar dehn ga food, kloaz, ahn plays fi stay. Di eldaz lov di sheep, soh dehn ris dehn oan laif fi mek shoar dehn bradaz ahn sistaz ga weh dehn need. (Jan 15:​12, 13) Wen dehn du dat, dehn di fala Zaydak egzampl.

9. Akaadn tu 2 Samuel 15:​27-29, weh Dayvid mi tel Zaydak fi du? (Koment pahn di picha.)

⁹ Tink bowt how Zaydak mi help ih bradaz joorin daynjaros taimz. Dayvid son Absalom mi waahn kil Dayvid soh dat hihn ku bee king. (2 Sam. 15:​12, 13) Sayka dat, Dayvid mi haftu get owta Jeroosalem rait away! Ih tel ih servant dehn: “Lesgoh ron weh, er els non a wi wahn ku get weh fahn Absalom!” (2 Sam. 15:14) Wail Dayvid an ih servant dehn mi-di lef,  Dayvid kanshos dat sohnbadi mi wahn haftu stay bak fi tel ahn weh Absalom di du. Soh hihn sen tel Zaydak ahn sohn ada prees fi goh bak da di siti soh dat dehn ku paas aan di infamayshan far ahn. (Reed 2 Samuel 15:​27-29.) d Dehn mi haftu bee kyaaful. Absalom da-mi wahn vailent ahn selfish persn weh mi don bichray ih oan pa. Imajin weh hihn wuda mi du Zaydak ahn di ada prees dehn if hihn mi fain owt dat dehn mi-di spai pan ahn fi protek Dayvid.

10. How Zaydak ahn di ada man dehn mi help protek Dayvid?

¹⁰ Dayvid mi aks ih fren Zaydak ahn wahn nada fren weh ih chros, Hushai, fi help ahn. (2 Sam. 15:​32-37) Dehnya man du weh Dayvid aks dehn fi du. Hushai mi win oava Absalom chros ahn play laik ih laayal tu hihn. Soh wen Absalom kom op wid wahn plan fi atak Dayvid, Hushai mi sojes fi mek dehn du sohnting difrent. Di plan weh Hushai sojes mi wahn akchwali gi Dayvid taim fi pripyaa fi di waar. Afta dat, Hushai mi tel Zaydak an Abaiyatar bowt di plan, ahn dehn mi paas aan di mesij tu Dayvid. (2 Sam. 17:​8-17) Wid Jehoava help, dehnya man kuda mi protek Dayvid.—2 Sam. 17:​21, 22.

11. How wee ku shoa korij laik Zaydak wen wi di help wi bradaz ahn sistaz?

¹¹ If wahn daynjaros sichuwayshan kom op ahn yu haftu help yu bradaz ahn sistaz, how yu ku bee brayv laik Zaydak? (1) Fala dairekshan. Eena sichuwayshan laik dehndeh, wi haftu werk tugeda. Obay eni dairekshan yu geh fahn di branch.  (Heeb. 13:17) Di branch giv infamayshan bowt how fi pripyaa fi dizaastaz ahn weh fi du wen wahn dizaasta hapm. Eldaz need fi goh oava da infamayshan aafn. (1 Kor. 14:​33, 40) (2) Bee brayv bot bee kyaaful tu. (Prav. 22:3) Yooz yu kaman sens ahn chrai fi bee az sayf az pasabl. (3) Pen pahn Jehoava. Memba dat Jehoava kay wahn lat bowt yoo ahn yu bradaz. Hihn ku help yoo ahn yu bradaz fi bee sayf wail yu di help dehn.

12-13. Weh yu laan fahn weh mi hapm tu Brada Viktor ahn Brada Vitalii? (Koment pahn di picha.)

¹² Tink bowt Brada Viktor ahn Brada Vitalii ekspeeryens. Dehn da too eldaz weh mi werk haad fi kehr food ahn waata fi dehn bradaz ahn sistaz da Ukraine. Brada Viktor seh: “Wi mi-di luk fi food aal oava di plays. Lata taim peepl mi-di shoot op rong wi. Wahn brada mi gi wi sohn food weh ih mi ga sayv op da ih hows, ahn sayka dis di bradaz ahn sistaz mi ga weh dehn mi need fi servaiv fi wahn wail. Wen wi mi-di load op di chrok wid food, wahn bom jrap bowt 66 fut (20 meeta) fahn wi. Ah mi beg Jehoava aal day fi help mi bee brayv soh dat Ah ku kantinyu help mi bradaz ahn sistaz.”

¹³ Brada Vitalii seh: “Wi mi need lata korij. Di fers chrip weh Ah gaan pan mi tek bowt 12 owaz, an Ai mi-di pray tu Jehoava di hoal way.” Vitalii mi brayv, bot hihn mi kyaaful tu. Hihn seh: “Ah mi kip di beg Jehoava fi gi mi wizdom ahn fi du weh Ah kud fi stay sayf ahn rispek di govament. Soh Ah onli mi jraiv pahn road weh dehn seh wi kuda yooz. Ah mi si how aal di bradaz ahn sistaz mi werk tugeda. Dehn mi moov tingz owta di way fahn di road, dehn mi help kalek ahn load op food, waata, kloaz, an ada impoatant tingz weh di bradaz ahn sistaz mi need, ahn dehn mi gi wi food ahn plays fi res lang di road.”

STAY LAAYAL TU JEHOAVA

14. How wee mait feel if sohnbadi wi lov lef Jehoava?

¹⁴ Wan a di haadis ting wi kuda eva goh chroo da wen wahn famili memba er kloas fren lef Jehoava. (Saa. 78:40; Prav. 24:10) Di moa wi lov di persn, di haada ih ku bee fi deel wid di chraiyal. If yoo di goh chroo sohnting laik dat, Zaydak set wahn gud egzampl weh ku gi yu di schrent weh yu need fi stay laayal.

15. Wai Zaydak mi need korij fi stay laayal tu Jehoava? (1 Kings 1:​5-8)

¹⁵ Zaydak an Abaiyatar da-mi kloas frenz. Too a dehn mi werk tugeda az prees. (2 Sam. 8:17) Dehn mi tek kayr a di “Aak weh bilangz tu di chroo Gaad” tugeda. (2 Sam. 15:29) Di too a dehn mi sopoat Dayvid az king, ahn dehn mi du wahn lat moa tingz tugeda eena dehn servis tu Jehoava. (2 Sam. 19:​11-14) Bot den, kloas tu di en a Dayvid roolaship wen Dayvid mi soon ded, ih son Adonaija mi chrai mek ihself king eevn doa Jehoava mi waahn Salaman bee di neks king. (1 Chron. 22:​9, 10) Wen dat hapm, Abaiyatar mi chooz fi tek said wid Adonaija. (Reed 1 Kings 1:​5-8.) e Hihn neva onli di goh gens Dayvid, bot ih mi-di goh gens  Jehoava. Soh imajin how dat mek Zaydak feel. Bot Zaydak mi disaid fi stay laayal tu Jehoava eevn doa Abaiyatar neva laayal.

16. Weh kuda mi help Zaydak fi stay laayal?

¹⁶ Zaydak mi stay laayal tu Jehoava eevn wen Abaiyatar mi chooz fi bichray Jehoava ahn Dayvid. Dayvid mi noa dat hihn ku aalwayz chros Zaydak. Soh wen Dayvid fain owt weh Adaonaija mi-di chrai du, hihn mi pen pahn Zaydak, Naytan, ahn Benaiya fi mek shoar dat Salaman da-mi di neks king. (1 Ki. 1:​32-34) Zaydak mi spen lata taim wid Naytan an ada servants a Jehoava weh mi sopoat Dayvid az king, ahn dat mi help hihn fi stay laayal. (1 Ki. 1:​38, 39) Soh wen Salaman mi staat rool az king, hihn “mi gi Zaydak di prees di pozishan weh Abaiyatar mi ga.”—1 Ki. 2:35.

17. How yoo ku fala Zaydak egzampl if sohnbadi weh yu lov chooz fi lef Jehoava?

¹⁷ How wee ku fala Zaydak egzampl if sohnbadi weh wi lov chooz fi lef Jehoava? Shoa Jehoava dat yoo wahn stay laayal tu hihn. (Jash. 24:15) Jehoava wahn gi yu di schrent ahn di korij fi du weh rait. Soh pray tu Jehoava ahn stay kloas tu frenz weh laayal tu ahn. Jehoava apreeshiayt yu laayalti ahn hihn wahn bles yu fi dat.—2 Sam. 22:26.

18. Weh wi ku laan fahn Marco ahn Sidse?

¹⁸ Tink bowt Marco an ih waif, Sidse. Fi dehn too daata mi lef di chroot. Marco seh: “Yu lov yu pikni soh moch fahn di taim dehn baan. Yu wuda du eniting fi protek dehn fahn eniting weh ku hert dehn. Wen dehn mi lef Jehoava, dat mi reeli hert wi.” Hihn seh: “Jehoava aalwayz deh bai wi said. Hihn mek shoar dat wen Ai mi week, mi waif mi schrang, ahn wen shee mi week, Ai mi schrang.” Sidse seh: “Da Jehoava gi wi di schrent fi moov aan. Ah mi feel veri sad an Ai mi feel laik da-mi mai faalt dat mi daata dehn mi stap serv Jehoava. Soh Ai taak tu Jehoava ahn tel ahn how Ai feel. Afta dat, wahn sista weh Ah neva si fi wahn lang taim put ih han pahn mi shoalda an ih luk pahn mi ahn seh: ‘Memba Sidse, da noh yu faalt!ʼ Ah kantinyu serv Jehoava wid jai bikaaz ih help mi.”

19. Weh yoo waahn du wen yu di goh chroo wahn haad sichuwayshan?

¹⁹ Jehoava waahn aal fi hihn servant shoa korij laik Zaydak. (2 Tim. 1:7) Hihn noh waahn wi pen pahn wi oan self. Hihn waahn wi pen pahn hihn. Wen yu fain yuself eena eni sichuwayshan weh yu need korij, ton tu Jehoava. Yu ku bee shoar dat hihn wahn help yu bee brayv laik Zaydak!—1 Peet. 5:10.