Nicolas ahn Céline mi fays wahn difrent prablem wen dehn moov. Dehn mi geh wahn asainment fahn di branch aafis da France fi serv da wahn nyoo kangrigayshan. Dehn seh: “Wi mi reeli eksaitid wen wi fers moov, bot den wi staat mis wi frenz fahn wi oal kangrigayshan. Wi noatis dat wi mi stil need fi werk moa fi geh kloasa tu wi bradaz ahn sistaz fahn wi nyoo kangrigayshan.” a Soh sins ih noh eezi fi moov tu wahn nyoo kangrigayshan, how yu ku bee hapi ahn feel laik yu da paat a di nyoo kangrigayshan? Weh di bradaz ahn sistaz eena di kangrigayshan ku du fi help yu? How yoo ku inkorij adaz eena yu nyoo kangrigayshan, ahn how dehn ku inkorij yoo?

FOA BAIBL PRINSIPLZ WEH KU HELP YU

1. Pen pahn Jehoava. (Saa. 37:5) Wahn sista fahn Japan weh naym Kazumi mi serv eena wahn kangrigayshan fi 20 yaaz. Ih mi lef fahn da kangrigayshan bikaaz di plays weh ih hozban werk mi chransfer ahn tu wahn nada plays. How shee mi “put [ih] laif eena Jehoava han”? Shee seh: “Ah poar owt mi haat tu Jehoava. Oava ahn oava, Ah tel ahn how Ah mi feel frayd, loanli, ahn schres owt. An eech taim Ah mi pray, hihn mi help mi.”

Weh yu need fi du fi bil op yu chros eena Jehoava? Jos laik how wahn plaant need waata ahn nyoochriyents fi groa, da rait soh wi need fi feed wiself spirichwal food soh wi fayt ku geh schranga. Nicolas, weh wi mi taak bowt erliya, mi seh dat wen hihn tek taim fi tink bowt di egzampl a Aybraham, Jeezas, ahn Paal ahn di sakrifais weh dehn mi mek fi serv Jehoava, fi dehn egzampl mi reeli schrentn fi hihn fayt. Saym way soh, if yu  kip wahn gud skejul fi stodi di Baibl, ih wahn help yu fi deel wid eniting weh mait chaynj eena yu laif. Ahn yu ku shayr tingz weh yu laan wid di bradaz ahn sistaz eena yu nyoo kangrigayshan fi inkorij dehn tu.

2. Noh kompyaa di too kangrigayshan. (Ikl. 7:10) Jules mi haftu deel wid wahn difrent kolcha wen ih mi moov fahn Benin, Africa, tu di United States. Hihn seh, “Ah mi feel laik evri taim Ah meet sohnbadi nyoo, Ah mi haftu tel dehn evriting bowt miself.” Hihn neva yoostu dat, an ih mi mek ih staat tu kip weh fahn di bradaz ahn sistaz eena di kangrigayshan. Bot wen hihn mi geh fi noa di bradaz ahn sistaz beta, ih mi feel difrent. Hihn seh: “Noh mata wehpaat wi liv, peepl da di saym. Wi jos taak difrent ahn du tingz eena wahn difrent way. Ih impoatant fi mek peepl bee dehnself.” Soh wi noh waahn kompyaa wi oal kangrigayshan wid wi nyoo kangrigayshan. Wahn painyaa sista weh naym Anne-Lise seh: “Ah mi moov bikaaz Ah mi waahn laan nyoo tingz, noh bikaaz Ah mi-di ekspek mi nyoo kangrigayshan fi bee jos laik mi oal kangrigayshan.

Wen wahn elda moov, ih noh fi kompyaa ih oal kangrigayshan wid ih nyoo wan. Jos bikaaz di bradaz du tingz difrent eena di nyoo kangrigayshan, noh meenz dat di way dehn du it rang. Soh ih gud fi laan wai di bradaz du tingz wahn sertn way eena da ayrya bifoa yu seh eniting. (Ikl. 3:​1, 7b) Ih beta fi teech di bradaz bai yu gud egzampl insteda chrai foas dehn fi du tingz di way yoo waahn.—2 Kor. 1:24.

3. Bee bizi eena yu nyoo kangrigayshan. (Fil. 1:27) Ih tek wahn lata taim ahn haad werk fi moov, bot ih impoatant fi goh da meetin wid yu nyoo kangrigayshan rait away. An if pasabl, goh da meetin da di Kingdom Haal soh yu meet di bradaz ahn sistaz. Tink bowt dis: If di bradaz ahn sistaz eena yu nyoo kangrigayshan noh si yu er bayli si yu, how dehn wahn ku sopoat an inkorij yu? Lucinda an ih too daata mi moov tu wahn big siti da South Africa. Shee seh: “Mi frenz mi inkorij wi fi staat du tingz wid wi nyoo kangrigayshan rait away, laik werk wid adaz eena servis ahn gi koment da meetin. Wahn neks ting wi mi du da aafa fi mek di bradaz ahn sistaz yooz wi hows fi meetin fi feel servis.”

Wi schrentn wiself ahn wi bradaz ahn sistaz wen wi “werk haad tugeda” eena wi nyoo kangrigayshan. Anne-Lise, weh wi mi taak bowt erliya, seh dat fi shee eldaz mi inkorij ahn fi preech wid evribadi eena ih nyoo kangrigayshan. How dis advais mi help shee? Shee mi seh: “Rait away Ai noatis dat dis da-mi wahn impoatant way fi mek Ah feel laik Ai da paat a di nyoo kangrigayshan.” Wen yu wilin fi help owt ahn du tingz laik kleen ahn tek kayr a di Kingdom Haal, yu shoa dat yu si di nyoo kangrigayshan az fi yoo kangrigayshan now. Di moa yu du tingz eena di nyoo kangrigayshan, di kwika di bradaz ahn sistaz wahn geh komfatabl wid yu, ahn yu wahn feel laik di nyoo kangrigayshan da yu famili.

 4. Mek nyoo frenz. (2 Kor. 6:​11-13) If peepl noa dat yu kay bowt dehn, ih eeziya fi mek dehn bee yu fren. Soh chrai kohn erli da meetin ahn stay bak aftawodz soh yu ga inof taim fi taak tu di bradaz ahn sistaz. Chrai haad fi laan dehn naym. Wen yu frenli ahn laan peepl naym, dehn wahn laik yu ahn yu wahn ku mek gud frenz.

Insteda wori bowt weda er nat di bradaz ahn sistaz wahn laik yu, jos bee yuself rong dehn. Da way, dehn wahn reeli geh fi noa yu. Yu ku fala Lucinda egzampl. Shee seh: “Wi ga gud frenz bikaaz wi invait di bradaz ahn sistaz fi kohn da wi hows.”

“WELKOM WAN ANADA”

Wen sohnbadi goh da wahn difrent kangrigayshan fi di fers taim, ih mait feel reeli nervos. Soh weh yoo ku du fi mek ih feel welkom? Di apasl Paal mi seh: “Welkom wan anada jos laik how di Krais mi welkom unu.” (Roam. 15:7) Wen eldaz kapi Jeezas egzampl, dehn wahn ku help bradaz ahn sistaz fi feel welkom eena di nyoo kangrigayshan. (Si di baks weh naym “ How Yu Ku Mek Tingz Goh Gud Wen Yu Chaynj Kangrigayshan.”) Bot da noh jos di eldaz. Evribadi eena di kangrigayshan ku help dehn feel welkom tu, inkloodin di pikni dehn.

Wat els wi ku du fi help sohnbadi feel welkom? Wi ku spen taim wid dehn. An if dehn need help fi setl een, wi waahn du wi bes fi help dehn. Fi egzampl, wahn sista mi noatis dat dehn mi ga wahn nyoo sista eena ih kangrigayshan. Soh shee tek owt taim fi kehr di sista rong soh dat ih geh fi noa di tong beta, an ih teech di sista how fi kech di bos ahn chrayn dehn. Di nyoo sista mi reeli apreeshiayt weh di sista du far ahn, an dat mi reeli help ahn fi setl een.

IF YU CHAYNJ KANGRIGAYSHAN, IH KU HELP YU GROA

Wahn yong berd mait frayd fi lef di nes fi di fers taim, bot wans ih staat flai, ih wahn ku flai hai eena di skai. Saym way soh, wen yu moov tu wahn nyoo kangrigayshan, yu need fi geh rid a eni fyaa weh hoal yu bak fahn du moa fi Jehoava. Den, yu wahn ku flai hai jos laik di yong berd ahn yu  wahn ku spred yu wingz eena Jehoava servis. Nicolas ahn Céline seh: “Wan a di bes way fi groa da fi chaynj kangrigayshan. Wen wi mi staat meet nyoo peepl an ajos tu wahn nyoo plays, ih help wi fi si dat wi mi need fi werk pahn sohn moa Kristyan kwalitiz.” Jean-Charles famili mi benifit wen dehn mi chaynj kangrigayshan. Hihn seh: “Sins wi moov tu di nyoo kangrigayshan, wi pikni dehn di du wahn lat moa fi Jehoava. Afta jos wahn kopl monts, wi daata staat tu gi taak pahn di midweek meetin, ahn wi son mi ton wahn poblisha.”

Wat if yu kyaahn moov tu wahn kangrigayshan weh need moa help? If dat da di kays, den chrai yooz di sojeshanz fahn dis aatikl eena di kangrigayshan weh yu deh eena rait now. Pen pahn Jehoava ahn du az moch az yu kud wid di bradaz ahn sistaz eena yu kangrigayshan. Fi egzampl, yu ku mek planz fi werk wid dehn pahn feel servis. Yu ku mek nyoo frenz er spen moa taim wid di frenz weh yu don gat soh dat unu rilayshanship geh schranga. Yu tink yu ku help sohnbadi eena yu kangrigayshan weh nyoo er weh need help? Yu ku bee shoar dat “Gaad pleez wid dehndeh kaina sakrifais.” (Heeb. 13:16) Ahn memba dat lov da weh mek evribadi noa dat yu da wahn chroo chroo Kristyan. Soh if yu shoa lov, yu wahn jraa kloasa tu Jehoava tu.—Jan 13:35.

Eevn doa wi bradaz ahn sistaz fays lata chalenjiz wen dehn chaynj kangrigayshan, dehn hapi eena dehn nyoo kangrigayshan. Soh if yoo chaynj kangrigayshan, yoo ku bee hapi tu. Anne-Lise seh: “Wen Ai mi chaynj kangrigayshan, Ai kuda mi mek moa frenz.” Sayka weh sista Kazumi gaahn chroo, shee kanvins dat “wen yu chaynj kangrigayshan yu ku si how Jehoava help yu eena wayz weh yu kuda neva imajin.” Ahn Brada Jules seh: “Di frenz weh Ai ga now help mi fi feel laik Ah fit een wid mi nyoo kangrigayshan. Ai feel laik mi nyoo kangrigayshan da mai famili, soh Ah wuda fain it reeli haad if Ah eva haftu lef.”