1-2. (a) Weh waanin Jeezas mi giv ih disaiplz? (b) Wai Jeezas disaiplz mi en op di ron weh ahn lef ahn? (Koment pahn di picha dehn.)

 JEEZAS mi seh: “Eevn doa wahn persn eega fi du sohnting, ih badi mait noh ga di schrent fi du it.” (Mach. 26:41b) Dehnya werdz shoa dat Jeezas mi andastan dat hyoomanz noh perfek. Ih aalso waan wi dat wi noh fi feel laik wi wahn aalwayz schrang inof fi du weh rait. Wahn kopl owaz bifoa Jeezas mi giv da waanin, fi hihn disaiplz mi pramis hihn dat dehn wahn neva disoan ahn. (Mach. 26:35) Dehn mi waahn du weh rait. Bot dehn neva riyalaiz dat wen dehn deh anda presha, ih mi wahn haad fi mek dehn du weh rait. Dat da wai Jeezas mi waan dehn ahn tel dehn: “Kip pahn di lukowt an aalwayz pray, soh dat unu noh giv een tu temtayshan.”—Mach. 26:41a.

² Wen dehn mi ares Jeezas, weh fi hihn disaiplz mi du? Dehn neva kip pahn di lukowt laik weh Jeezas tel dehn fi du. Sayka dat, dehn mi du di opozit a weh dehn mi pramis Jeezas fi du—dehn ron lef ahn.—Mach. 26:56.

3. (a) Wai ih wuda bee foolish fi tink dat wi schrang inof fi aalwayz du weh rait? (b) Weh wi wahn diskos eena dis aatikl?

³ Wi noa fi shoar dat wi wuda neva waahn du eniting weh hert Jehoava. Bot wi haftu memba dat wi noh perfek ahn dat ih ku bee eezi fi wi giv een tu temtayshan. (Roam. 5:12; 7:​21-23) Wi kyaahn fool wiself di tink dat wi wahn bee schrang inof fi aalwayz du weh rait. Wi ku fays wahn  sichuwayshan weh temp wi wen wi lees ekspek it. Dat da wai wi need fi obay Jeezas waanin ahn kip pahn di lukowt soh dat wi ku stay laayal tu Jehoava ahn Jeezas. Dis aatikl wahn help wi du dat. Fers, wi wahn taak bowt weh sichuwayshanz wi haftu kip pahn di lukowt. Den, wi wahn diskos how wi ku protek wiself fahn temtayshan. Ahn terd, how wi ku kantinyu kip pahn di lukowt soh dat wi ku avoid temtayshan.

NOA YU WEEKNIS

4-5. Wai wi haftu bee kyaaful fi noh komit eevn smaal sinz?

⁴ Wahn smaal sin ku stil mek wi rilayshanship wid Jehoava geh week. An if wi noh kyaaful, smaal sinz ku mek wi en op di komit wahn moa seeryos sin.

⁵ Aala wi fays temtayshan, bot eech wan a wi gat wi oan weeknis. Dat meenz dat eech wan a wi ga wahn sertn sin er temtayshan weh mait bee ekschra haad fi fait gens. Fi egzampl, som peepl mait di fait fi noh komit sekshwal imoraliti. Adaz mait di chrai stap ga bad habits laik maastabayshan ahn di wach poarnografi. Sohnbadi els mait di werk haad fi stan op fi weh rait noh mata weh ada peepl mait tink bowt ahn. Wail wahn nada persn mait ga tu moch praid, wahn bad tempa, er wahn nada prablem. Soh da chroo weh Jaymz seh, dat “weh deh eena wahn persn oan haat da weh temp ahn an put ahn anda tes.”—Jay. 1:14.

6. Weh eech wan a wi need fi noa bowt wiself?

⁶ Wat da fi yoo weeknis? Wi haftu bee aanis wid wiself ahn noa wat da wi weeknis. (2 Kor. 13:5) Ih wuda foolish fi mek wi tink dat wi schrang inof fi noh sin. (1 Jan 1:8) Paal mi seh dat eevn wahn machoar Kristyan ku sin ahn giv een tu temtayshan if ih noh kyaaful.—Gal. 6:1.

7. Weh wee need fi pay kloas atenshan tu? Yooz di egzampl eena di paragraaf.

⁷ Wans wi noa wat da wi weeknis, weh wi shuda du? Schrentn wi dizaiya fi du weh rait soh dat wi ku bee schrang inof fi fait wi weeknis. Tink bowt how dehn yoostu protek di siti dehn bak eena Baibl taimz. Di weekis paat a di siti da-mi di gayt, soh dat da di paat weh dehn protek di moas. Jos laik dat, if wee noa wi ga wahn weeknis, wi haftu pay kloas atenshan tu it soh dat wi noh giv een.—1 Kor. 9:27.

 HOW WI KU PROTEK WISELF FAHN TEMTAYSHAN?

8-9. Weh di yong man weh Praverbz chapta 7 taak bowt kuda mi du fi noh komit wahn seeryos sin? (Praverbz 7:​8, 9, 13, 14, 21)

⁸ How yoo ku protek yuself fahn sin? Mek wi si weh wi ku laan fahn di yong man weh Praverbz chapta 7 taak bowt. Hihn mi komit sekshwal imoraliti wid wahn imoaral laydi. Vers 22 seh dat di yong man mi fala shee “rait away.” Bot if wi reed di vers dehn bifoa, wi geh fi si dat hihn mi du sertn tingz weh ih shudn a mi du, ahn dat mek hihn en op di komit wahn seeryos sin.

⁹ Weh aal mi hapm bifoa di yong man mi en op di sin? Fers, hihn mi “paas kloas tu di kaana a wahn schreet wehpaat wahn imoaral laydi mi liv.” Den, ih staat waak tuwaadz fi shee hows. (Reed Praverbz 7:​8, 9.) Wen hihn si di laydi, ih shuda mi ton rong ahn gaahn fahn deh, bot hihn neva du dat. Insted, hihn mi alow shee fi kis ahn. Den ih mi stay ahn lisn wail shee mi tel ahn bowt di pees sakrifais weh ih mek, praabli fi mek hihn tink dat shee da neva wahn bad persn. (Reed Praverbz 7:​13, 14, 21.) If di yong man mi kyaaful an avoid dehndeh sichuwayshan, hihn neva mi wahn geh temtid ahn komit wahn seeryos sin.

10. If wi noh kyaaful, how wi ku en op laik di yong man weh Praverbz chapta 7 taak bowt?

¹⁰ Weh hapm tu di yong man eena Praverbz chapta 7 ku hapm tu eni wan a wi. Afta wahn persn komit wahn seeryos sin, ih mait seh dat di hoal sichuwayshan mi jos hapm tu faas. Er ih mait seh sohnting laik, ‘Ah reeli noh noa how dis mi hapm.ʼ Bot if ih stap ahn reeli tink bowt how ih mi hapm, ih wahn riyalaiz dat ih mi mek sohn bad disizhan bifoa ih mi sin. Fi egzampl, maybi ih mi heng rong wid di rang krowd, chooz bad entataynment, er gaahn sohnweh wahn Kristyan noh sopoas tu goh, weda da in persn er onlain. Maybi ih mi aalso eevn stap pray, reed ih Baibl, goh da meetin, er preech. Soh jos laik di yong man weh Praverbz chapta 7 taak bowt, ih ku en op di sin bikaaz a sohn bad disizhanz ih mek bifoa.

11. If wi waahn protek wiself fahn sin, weh wi fi avoid?

¹¹ Wat da di lesn fi wee? Wi noa dat wi need fi avoid sin. Bot eevn beta yet, wi need fi avoid tingz weh ku mek wi en op di sin. Dat da di point weh Salaman mi-di eksplayn afta ih tel wi weh mi hapm tu di yong man. Hihn seh: “Noh schray weh ahn staat waak pahn fi shee road.” (Prav. 7:25) Ih eevn seh: “Stay faar fahn shee, noh eevn goh fronta ih hows.” (Prav. 5:​3, 8) Soh if wi waahn protek wiself fahn sin, wi need fi avoid eniting er eni sichuwayshan weh ku mek wi sin, eevn if dehndeh tingz bai dehnself noh rang. a—Mach. 5:​29, 30.

12. How Joab mi protek ihself fahn temtayshan? (Joab 31:1)

¹² Joab mi waahn protek ihself fahn sin, soh hihn mi mek wahn kovenant wid ih aiy dehn fi neva luk pahn wahn laydi eena wahn rang way. (Reed Joab 31:1.) Dis mi help hihn fi noh komit adolchri. Wee need fi tek wi weeknis seeryos tu. Jos laik Joab, wi wahn ku protek wiself fahn sin if wi mek it wi goal fi avoid eniting weh ku temp wi.

13. Wai wee haftu bee kyaaful wid weh wi tink bowt? (Koment pahn di picha dehn.)

 ¹³ Wi aalso need fi bee kyaaful wid weh wi tink bowt. (Eks. 20:17) Sohn peepl bileev dat ih noh rang fi tink bowt di bad tingz weh dehn wuda waahn du az lang az dehn noh du it. Bot ih rang fi tink da way, bikaaz di moa wahn persn tink bowt bad tingz, di schranga ih dizaiya fi du weh rang wahn get. Eena wahn sens, da laik ih di dig wahn hoal fi ihself. Sohntaim, bad tingz wahn kom op eena wi main. Bot az soon az dat hapm, wi need fi chaynj weh wi di tink bowt ahn chrai tink bowt sohnting gud. If wi du dat, wi wahn di kil eni rang dizaiya wi mait ga, ahn wi wahn di sayv wi self fahn haftu fait wahn temtayshan weh ku mek wi sin.—Fil. 4:8; Kol. 3:2; Jay. 1:​13-15.

14. Wat els wee ku du fi protek wiself fahn temtayshan?

¹⁴ Wat els wi ku du fi protek wiself fahn temtayshan? Wi need fi reeli bileev dat ih aalwayz beta fi obay Jehoava standadz. Sohntaim ih mait noh eezi fi tink ahn feel di way Jehoava waahn. Bot if wi du dat, ih wahn wert it, bikaaz wi wahn ga wahn kleen kanshans ahn wi wahn reeli hapi.

15. If wi schrentn wi dizaiya fi du weh rait, how dat wahn protek wi?

¹⁵ Wi need fi ga wahn schrang dizaiya fi du weh rait. Wi ku du dat if wi laan fi “hayt weh bad ahn lov weh gud.” (Amos 5:15) Ahn dis wahn help wi fi avoid eniting weh ku mek wi sin. Dis wahn aalso mek it eeziya fi avoid temtayshan if wi fain wiself eena wahn sichuwayshan weh wi neva ekspek. If wi ga wahn schrang dizaiya fi du weh rait, dis wahn help wi fi bee schrang inof fi noh giv een tu temtayshan weh wi neva ekspek.

16. How wi benifit wen wi kip wiself bizi wid spirichwal tingz? (Koment pahn di picha dehn.)

¹⁶ How wi ku schrentn wi dizaiya fi du weh rait? Wi waahn kip bizi di du spirichwal tingz. Wi noh wahn geh temtid fi  du sohnting rang wail wi deh da meetin er eena di minischri. Insted, dehndeh tingz wahn schrentn wi dizaiya fi pleez Jehoava. (Mach. 28:​19, 20; Heeb. 10:​24, 25) Wen wi reed ahn stodi di Baibl ahn tink bowt weh wi laan, wi wahn laan fi lov weh gud ahn hayt weh bad. (Jash. 1:8; Saa. 1:​2, 3; 119:​97, 101) Ahn memba weh Jeezas tel ih disaipl dehn: “Aalwayz pray, soh dat unu noh giv een tu temtayshan.” (Mach. 26:41) Wen wi mek taim fi pray tu wi Pa da hevn, wi ku aks ahn fi help wi, ahn hihn ku schrentn wi dizaiya fi pleez ahn.—Jay. 4:8.

HOW WI KU KANTINYU KIP PAHN DI LUKOWT?

17. Weh weeknis Peeta mi schrogl wid?

¹⁷ Wi ku praabli geh rid a som a wi weeknis. Bot wi mait fain dat wi ga sohn weeknis weh wi kyaahn get oava, ahn wi haftu kip di fait gens dehn. Luk pahn di apasl Peeta egzampl. Hihn mi dinai Jeezas chree taimz bikaaz ih mi frayd. (Mach. 26:​69-75) Ahn laytaraan, ih luk laik Peeta mi get oava da fyaa, bikaaz hihn mi stan op fronta di Jooish Sopreem Koat fi gi wahn witnis. (Aks 5:​27-29) Bot yaaz afta dat, Peeta fyaa mi kohn bak. Hihn mi stap eet wid di Kristyanz weh da neva Jooz kaaz “ih mi frayd fi dehn wan weh serkomsaiz.” (Gal. 2:​11, 12) Maybi Peeta neva did get oava ih weeknis.

18. Wai wi stil haftu bee kyaaful eevn if wi feel laik wi get oava wahn weeknis?

¹⁸ Sohnting laik dat ku hapm tu wee tu. How? Wi mait feel laik wi mi get oava wahn weeknis, bot laytaraan ih mait kom bak. Fi egzampl, wahn brada seh: “Ah mi stap wach poarnografi fi ten yaaz, an Ah mi kanvins miself dat Ah mi get oava di prablem. Bot mai prablem da-mi laik wahn daynjaros wail animal weh jos mi-di wayt fi atak mi wen Ah noh ekspek.” Gud ting di brada neva giv op. Hihn mi riyalaiz dat hihn mi wahn haftu kantinyu fait da weeknis evri day til di nyoo werl kohn. Hihn mi werk haada fi stay faar fahn poarnografi, an ih waif ahn di eldaz eena ih kangrigayshan mi help ahn wahn lat.

19. Weh wi ku du fi fait wahn weeknis weh wi noh get oava yet?

 ¹⁹ Sopoaz wi di fait wahn weeknis weh wi noh get oava yet? Weh wi ku du fi noh giv een tu da weeknis ahn komit wahn sin? Wi haftu memba dat Jeezas mi seh: “Kip pahn di lukowt.” Eevn wen wi feel laik wi schrang, wi haftu kantinyu du tingz weh don help wi fait wi weeknis aredi. (1 Kor. 10:12) Du yu bes fi aalwayz protek yuself fahn temtayshan. Praverbz 28:14 seh: “Wahn persn wahn bee hapi wen ih aalwayz ga lata rispek fi Gaad.”—2 Peet. 3:14.

HOW WI BENIFIT WEN WI KIP PAHN DI LUKOWT?

20-21. (a) Weh blesinz wi wahn get if wi kip di fait gens temtayshan? (b) If wee du fi wee paat, weh Jehoava wahn du fi wi? (2 Korintyanz 4:7)

²⁰ Wi ku bee shoar dat ih aalwayz beta fi kip di protek wiself fahn temtayshan. Wi wahn bee soh moch hapiya if wi liv di way Jehoava waahn dan if wi “injai di plezhaz a sin” weh onli laas “fi wahn lee wail.” (Heeb. 11:25; Saa. 19:8) Di reezn da bikaaz Jehoava mek wi fi liv akaadn tu fi hihn wayz. (Jen. 1:27) Soh if wi liv laik dat, wi wahn ga wahn kleen kanshans ahn wi wahn ku geh evalastin laif eena di fyoocha.—1 Tim. 6:12; 2 Tim. 1:3; Jood 20, 21.

²¹ Sohntaim wi “mait noh ga di schrent” fi du weh rait. Bot dat noh meenz wi kyaahn du notn bowt it. Jehoava redi ahn wilin fi gi wi powa wen wi need it. (Reed 2 Korintyanz 4:7.) Bot fers, hihn ekspek wi fi du fi wee paat. Wi fi du aal weh wi kud fi fait temtayshan evri day. Den wi ku bee shoar dat Jehoava wahn gi wi di powa weh hyoomanz noh naamali gat. (1 Kor. 10:13) Wid Jehoava help, wee ku kantinyu fait gens temtayshan.