1. How yoo feel bowt di chroot?

 WEE az Jehoava peepl lov di chroot weh wi fain eena Gaad Werd. In fak, wi fayt bays pahn da chroot. (Roam. 10:17) Wi kanvins dat Jehoava da di wan hoo set op di Kristyan kangrigayshan az “wahn sopoat ahn wahn fongdayshan fi di chroot.” (1 Tim. 3:15) Ahn wi hapi fi obay di bradaz “weh di tek di leed” monks wi az dehn eksplayn di chroot fahn di Baibl ahn gi wi dairekshan weh help wi fi du weh Gaad waahn.—Heeb. 13:17.

2. Akaadn tu Jaymz 5:​19, weh ku hapm tu wi afta wi laan di chroot?

² Bot eevn afta wi laan di chroot an aksep dat wi need fi fala di dairekshan fahn Jehoava aaganaizayshan, sohnbadi ku stil leed wi aschray fahn di chroot. (Reed Jaymz 5:19.) Saytan wuda reeli waahn mek wi stap chros di Baibl er di gaidans wi geh fahn Gaad aaganaizayshan.—Ifee. 4:14.

3. Wai wi need fi obay di chroot noh mata wat? (Ifeezhanz 6:​13, 14)

³ Reed Ifeezhanz 6:​13, 14. Soon, di Devl wahn yooz faals infamayshan fi fool op konchriz fi goh gens Jehoava. (Rev. 16:​13, 14) Wi aalso noa dat Saytan wahn werk eevn haada fi fool op Jehoava peepl. (Rev. 12:9) Soh wi ku si wai ih veri impoatant fi chrayn wiself fi tel di difrens bitween chroot ahn lai ahn fi bee obeedyant tu di chroot. (Roam. 6:17; 1 Peet. 1:22) Dat da weh wi wahn need fi du  fi mek wi ku servaiv di grayt chribyulayshan!

4. Weh wi wahn diskos eena dis aatikl?

⁴ Eena dis aatikl, wi wahn diskos too kwalitiz weh wahn help wi rekonaiz di chroot weh kohn fahn di Baibl ahn help wi obay di dairekshan fahn Gaad aaganaizayshan. Den wi wahn diskos chree tingz weh wi need fi du fi kantinyu hoal aan tait tu di chroot.

KWALITIZ WEH WAHN HELP WI REKONAIZ DI CHROOT

5. How lata rispek fi Jehoava help wi rekonaiz di chroot?

⁵ Shoa lata rispek fi Jehoava. Wen wi ga lata rispek fi Jehoava, wi lov ahn soh moch dat wi wuda neva du eniting weh wuda mek hihn beks. Soh, fi mek hihn hapi wid wi, wi wilin fi laan di difrens bitween gud ahn bad ahn bitween chroot ahn lai. (Prav. 2:​3-6; Heeb. 5:14) Wi fi neva mek weh peepl mait seh er du tu wi bee moa impoatant dan wi lov fi Jehoava, bikaaz if wi wuda du dat, wi wuda di pleez peepl, ahn weh pleez peepl moas a di taim noh mek Jehoava hapi.

6. Sins di ten Izrelait cheef dehn mi frayd fi di Kaynanait dehn, weh rang infamayshan dehn mi gi di Izrelaits?

⁶ Wat if di fyaa weh wi ga fi weh peepl mait seh er du tu wi grayta dan di rispek weh wi ga fi Gaad? Yu noh tink dat ku mek wi staat tu bileev sohnting weh goh gens di chroot? Af koars! Tek, fi egzampl, di 12 cheef weh gaahn chek owt di lan weh Jehoava mi pramis fi gi di Izrelait dehn. Ten a dehn mi moa frayd fi weh di Kaynanait dehn wuda du tu dehn. Dehn lov fi Jehoava neva schrang inof. Dehn mi tel di Izrelait dehn: “Wee kyaahn goh op ahn fait gens dehndeh peepl, bikaaz dehn schranga dan wee.” (Num. 13:​27-31) Da chroo, ih mi luk laik  di Kaynanait dehn mi schranga dan di Izrelait dehn. Bot di fak dat dehn mi seh dat di Izrelait dehn mi kyaahn win oava dehn enimi shoa dat dehn neva eevn tink bowt Jehoava. Dehndeh ten cheef shuda mi foakos pahn weh Jehoava waahn di Izrelait dehn du. Dehn shuda aalso meditayt pahn weh Jehoava du fi dehn erliya. If dehn mi du dat, dehn wuda riyalaiz dat di Kaynanait dehn powa da notn kompyaa tu Jehoava powa. Bot di too ada cheef, Jashwa ahn Kayleb, mi waahn pleez Jehoava. Soh dehn tel di peepl: “If Jehoava hapi wid wi, fi shoar ih wahn kehr wi da da lan an ih wahn giv it tu wi.”—Num. 14:​6-9.

7. How wi ku mek wi rispek fi Jehoava groa? (Koment pahn di picha.)

⁷ Bikaaz wi waahn kip di shoa rispek fi Jehoava, wi need fi tink bowt weh pleez hihn evri taim wi mek wahn disizhan. (Saa. 16:8) Wen yu di reed Baibl akonks, aks yuself, ‘If dat da-mi mee, weh disizhan Ai wuda mi mek?ʼ Soh az yu reed bowt di 12 Izrelait cheef dehn, imajin yu di lisn tu di ten cheef di seh dat yoo ahn di res a di Izrelait dehn wahn kyaahn kanka yu enimi. Yoo wuda feel frayd ahn bileev dehn, er yu wuda lov Jehoava soh moch dat aal yu wuda waahn du da pleez ahn? Sad fi seh, wahn hoal jenarayshan a Izrelaits neva rekonaiz dat Jashwa ahn Kayleb mi-di tel di chroot. Bikaaz a dat, Jehoava neva alow dehn fi goh eena di Pramis Lan.—Num. 14:​10, 22, 23.

8. Weh kwaliti wi need fi werk haad fi get, ahn wai?

⁸ Bee hombl. Jehoava mek hombl peepl noa di chroot. (Mach. 11:25) Wen wi waahn laan di chroot, wi aksep help fahn adaz. (Aks 8:​30, 31) Stilyet, doh, wi need fi bee kyaaful fi noh geh prowd. If wi prowd, wi mait staat tu tink dat fi wee opinyan az gud az di prinsipl dehn eena di Baibl ahn di dairekshan fahn Jehoava aaganaizayshan.

9. Weh wahn help wi fi stay hombl?

⁹ Fi mek wi ku stay hombl, wi need fi memba how smaal wi smaal kompyaa tu Jehoava. (Saa. 8:​3, 4) Wi ku aalso aks Jehoava fi help wi bee moa hombl ahn bee redi ahn wilin fi laan. Jehoava wahn help wi put fi hihn tinkin heda wi oan. Wi laan bowt fi hihn tinkin eena di Baibl ahn chroo ih aaganaizayshan. Wen yu di du yu Baibl reedin, luk fi proof dat Jehoava lov wahn hombl persn an ih hayt enibadi weh prowd. Ahn chrai haad fi stay hombl, espeshali wen yu geh wahn asainment weh mek yu ga sohn kaina atariti oava adaz.

HOAL AAN TAIT TU DI CHROOT

10. Hoo Jehoava yooz fi provaid dairekshan tu fi hihn peepl?

¹⁰ Kantinyu chros dairekshan fahn Jehoava aaganaizayshan. Eena di taim a di Izrelaits, Jehoava mi yooz Moaziz ahn den Jashwa fi gi dairekshan tu Fi Hihn peepl. (Jash. 1:​16, 17) Tingz gaahn gud fi di Izrelaits wen dehn rispek dat Jehoava mi apoint dehndeh man fi tek di leed. Ahn honjridz a yaaz layta, da mi di 12 apaslz hoo mi gi dairekshan tu di Kristyan kangrigayshan weh mi jos staat op. (Aks 8:​14, 15) Laytaraan, ada eldaz eena Jeroosalem mi jain di 12 apasl dehn fi gi dairekshan. Sins di bradaz ahn sistaz mi fala di dairekshan fahn dehndeh faytful bradaz, ih “mi schrentn di fayt a di kangrigayshan dehn, ahn di nomba a bileevaz mi-di groa evri day.” (Aks 16:​4, 5) Tudeh, Jehoava bles wee tu wen wi fala  di dairekshan fan ih aaganaizayshan. Bot how Jehoava wuda feel if wi rijek di bradaz weh hihn apoint fi tek di leed? Fi mek wi ku ansa da kweschan, mek wi diskos weh hapm wen di Izrelaits mi-di goh tu di Pramis Lan.

11. Weh mi hapm tu di Izrelait dehn weh gaahn gens Moaziz—di wan weh Jehoava mi apoint fi tek di leed? (Koment pahn di picha.)

¹¹ Joorin di jerni tu di Pramis Lan, sohn impoatant man gaahn gens Moaziz ahn neva rispek di asainment weh Jehoava mi giv ahn. Dis da weh dehn seh: “Aala dehnya peepl [noh jos Moaziz] bilangz tu Gaad; hihn chooz aala dehn, ahn Jehoava deh wid dehn.” (Num. 16:​1-3) Da chroo, eena Gaad sait aala dehndeh peepl mi bilangz tu Gaad, bot Jehoava mi chooz Moaziz fi tek di leed monks Ih peepl. (Num. 16:28) Insteda foakos pahn weh Jehoava waahn, dehn mi foakos pahn weh dehn waahn—fi bee moa impoatant ahn ga moa powa. Soh dehn akchwali mi-di kritisaiz Jehoava, noh Moaziz. Kaaz a dat, Jehoava mi kil di leedaz a di ribelyan an evribadi weh mi sopoat dehn. (Num. 16:​30-35, 41, 49) Jehoava noh chaynj; hihn stil hayt enibadi weh noh shoa rispek fi di dairekshan weh ih aaganaizayshan provaid.

12. Wai wi ku kip di chros Jehoava aaganaizayshan?

¹² Wee ku chros Jehoava aaganaizayshan. Fi egzampl, wen di Govanin Badi noatis dat wi need fi ajos wi andastandin a wahn sertn Baibl chroot er wen wi need fi ajos di way di Kingdom werk aaganaiz, dehn noh ways taim fi mek di chaynjiz. (Prav. 4:18) Wai dehn du dat? Da kaaz dehn waahn pleez Jehoava. Ahn dehn du dehn bes fi mek Gaad Werd gaid dehn wen dehn di mek disizhanz. Dat da di standad weh eech wan a Jehoava peepl shuda fala.

13. Wat da “di standad a gud werdz,” ahn weh wi need fi du wid it?

 ¹³ “Kip di fala di standad a gud werdz.” (2 Tim. 1:13) “Di standad a gud werdz” da Jeezas teechinz an aal ada Baibl teechinz. (Jan 17:17) Dehndeh teechinz da di fongdayshan a evriting wi bileev eena. Jehoava aaganaizayshan teech wi fi mek shoar dat wi chros dehndeh teechinz. Az lang az wi du dat, Jehoava wahn bles wi.

14. How sohn Kristyanz mi stap hoal aan tait tu “di standad a gud werdz”?

¹⁴ Weh ku hapm if wi noh hoal aan tait tu “di standad a gud werdz”? Noatis wahn egzampl. Eena di fers senchri, sohn Kristyanz mi-di spred faals infamayshan dat di day a Jehoava mi kohn. Dehn praabli mi ga wahn leta di serkl rong wid da infamayshan, ahn sohn peepl mi tink dat di apasl Paal mi rait it. Sohn Kristyanz da Tesalonaika mi bileev di roomaz ahn dehn eevn mi-di spred it rong. Dehn neva did chrai chek si if di infamayshan mi karek. Bot dat neva mi wahn kech dehn if dehn mi memba weh Paal mi teech dehn wail hihn mi stil deh wid dehn. (2 Tes. 2:​1-5) Paal mi kongsl ih bradaz fi noh bileev evriting dehn hyaa. Noh onli dat, dehn mi kyaahn seh dehn neva noa how Paal rait, kaaz hihn mi finish aaf ih sekant leta tu di Tesaloanyanz di seh: “Ai, Paal, di rait dis greetin wid mi oan han. Ah aalwayz rait laik dis eena aala mi letaz soh dat unu ku noa dat da mee mi rait it.”—2 Tes. 3:17.

15. How wi ku protek wiself fahn lai weh song laik chroot? Yooz di egzampl eena di paragraaf. (Koment pahn di picha dehn.)

¹⁵ Weh wi ku laan fahn weh Paal mi tel di Tesaloanyanz? Wen wi hyaa sohnting weh noh gree wid weh wi don laan fahn di Baibl er wen wi hyaa roomaz weh kech wi atenshan, wi need fi yooz wizdom fi noa weh fi du. Noatis weh mi hapm joorin di taim a di Soviet Union. Sohn peepl fahn di govament mi gi wi bradaz wahn leta weh dehn klaym mi kohn fahn di bradaz da hedkwaataz. Di leta mi inkorij  di bradaz fi faam wahn separayt aaganaizayshan. Eevn doa di leta mi luk lijit, ih neva fool faytful bradaz. Dehn mi si dat weh da leta mi seh noh mach op wid weh dehn noa bowt di aaganaizayshan. Tudeh, peepl weh deh gens di chroot sohntaim yooz di Intanet er soashal meedya fi kanfyooz wi ahn divaid wi op. Bot wi noh waahn “geh kanfyooz eena di way [wi] tink.” Insted, wi waahn mek shoar fi tink gud ahn si if weh wi reed er hyaa gree wid Baibl teechinz.—2 Tes. 2:2; 1 Jan 4:1.

16. Akaadn tu Roamanz 16:​17, 18, weh wi shuda du if sombadi schray weh fahn di chroot?

¹⁶ Stay yoonaitid wid peepl weh laayal tu Jehoava. Gaad waahn wi wership hihn eena wahn yoonaitid way lang wid wi bradaz ahn sistaz. Wi wahn stay yoonaitid az lang az wi stik tu di chroot. Enibadi weh spred eni kaina infamayshan weh goh gens di chroot onli divaid op di kangrigayshan. Gaad waan wi fi noh “ga notn fi du wid dehn,” er els wi ku staat tu bileev tingz weh da noh di chroot ahn wi ku jraa weh fahn Gaad.—Reed Roamanz 16:​17, 18.

17. How wi benifit wen wi rekonaiz ahn hoal aan tait tu di chroot?

¹⁷ Wen wi rekonaiz di chroot ahn hoal aan tait tu it, wi wahn stay kloas tu Jehoava ahn wi fayt wahn stay schrang. (Ifee. 4:​15, 16) Saytan wahn kyaahn chrik wi wid ih faals teechinz, ahn wi wahn injai Jehoava protekshan joorin di grayt chribyulayshan. Aalwayz hoal aan tait tu weh chroo, “ahn di Gaad a pees wahn deh wid [yu].”—Fil. 4:​8, 9.