1-2. (a) Akaadn tu Jeezas koman da Machyu 28:18-20, wat da di mayn goal a di Kristyan kangrigayshan? (b) Weh kweschanz wi wahn ansa eena dis aatikl?

DI APASL dehn mosi mi veri eksaitid wen dehn mi get tugeda pahn di mongtinsaid. Afta Jeezas mi geh rezorek, hihn mi aks dehn fi meet hihn da da plays. (Mach. 28:16) Dat da-mi praabli di taim wen “ih apyaa tu moa dan 500 a wi bradaz ahn sistaz dehn sayhn taim.” (1 Kor. 15:6) Wai Jeezas mi aks ih disaipl dehn fi meet ahn deh? Fi gi dehn wahn eksaitin koman: “Goh ahn chrayn peepl fahn owta aala di nayshan dehn fi bee mi disaipl dehn.”—Reed Machyu 28:18-20.

² Di disaipl dehn weh mi hyaa Jeezas werdz, mi layta geh fi bee paat a di fos-senchri Kristyan kangrigayshan. Di mayn goal a da kangrigayshan da-mi fi mek moa disaiplz a Krais. * Tudeh, lata kangrigayshanz a chroo Kristyanz deh, ahn dehndeh kangrigayshanz ga di saym mayn goal az di erli Kristyanz. Eena dis aatikl, wi wahn diskos foa kweschanz: Wai ih impoatant fi mek disaiplz? Weh aal wi need fi du mek disaiplz? Da aal Kristyanz tek paat eena di werk fi mek disaiplz? Ahn wai wi need payshens fi du dis werk?

3. Akaadn tu Jan 14:6 ahn 17:3, wai ih impoatant fi mek disaiplz?

³ Wai ih soh impoatant fi mek disaiplz? Bikaaz onli Krais disaiplz ku bee Gaad fren. Pahn tap a dat, peepl weh fala Krais egzampl ga wahn beta laif now ahn ga di hoap fi liv fareva eena di fyoocha. (Reed Jan 14:6; 17:3, NW.) * Fi shoar, Jeezas gi wi wahn impoatant rispansabiliti, bot wee noh du dis werk bai wiself. Di apasl Paal mi seh dat hihn ahn sertn bradaz mi-di ‘werk tugeda wid Gaad.ʼ (1 Kor. 3:9) Dis da wahn privilij weh Jehoava ahn Krais gi tu imperfek hyoomanz!

4. Weh wi ku laan fahn Ivan ahn Matilde egzampl?

⁴ Wi geh wahn lata jai wen wi mek disaipl. Kansida di egzampl a Ivan an ih waif, Matilde, fahn Colombia. Dehn mi preech tu wahn yong man weh naym Davier. Di yong man mi tel dehn: “Ai waahn mek chaynjiz eena mi laif, bot Ah kyaahnt.” Davier da-mi wahn baksa an ih mi yooz jrogz, ih mi jrink tu moch lika, an ih mi-di liv wid ih gyalfren, Erika, widowt marid. Ivan seh: “Wee mi staat tu stodi di Baibl wid hihn. Di vilij wehpaat hihn mi liv mi faar faar, ahn soh wi mi haftu raid wi baik fi mailz ahn mailz pahn sohn modi road. Wen Erika mi si dat Davier bihayvya an atichood mi chaynj, shee mi jain een pahn di stodi.” Wid taim, Davier mi stap yooz jrogz, ih mi stap jrink, an ih mi stap du baksin. Ih mi aalso geh marid tu Erika. Matilde seh: “Wen Davier an Erika mi geh baptaiz eena 2016, wi mi memba dat Davier yoostu seh: ‘Ai waahn chaynj, bot Ah kyaahnt.ʼ Wi mi soh hapi dat wi mi jos staat tu krai.” Dis egzampl shoa wi how wi feel soh hapi wen wi help peepl fi bee Krais disaiplz.

5. Wat da di fos ting wi need fi du fi mek disaiplz?

⁵ Di fos ting wee need fi du da fi “luk fi” di peepl wid di rait haat kandishan weh wilin fi laan bowt Jehoava. (Mach. 10:11) Wen wi tel evribadi weh wi meet bowt Jehoava, wi proov dat wee da Jehoava Witnisiz. Ahn wen wi obay di koman weh Jeezas gi wi fi preech, wi proov dat wee da chroo Kristyanz.

6. Weh ku help wi fi ga sokses eena di minischri?

⁶ Som peepl weh wi meet reeli eega fi laan di chroot fahn di Baibl. Bot wahn lata ada peepl noh seem inchrestid wen wi fos taak tu dehn. Wi mait haftu du sohnting fi mek dehn waahn laan moa bowt di Baibl. Fi ga sokses eena di minischri, wi need fi pripyaa gud. Luk fi spesifik tapiks weh peepl weh wi meet wahn bee inchrestid eena. Den plan how yu wahn inchrojoos eech tapik.

7. How yu wuda staat wahn kanvasayshan wid sombadi, ahn wai yu tink ih impoatant fi lisn ahn shoa rispek?

⁷ Fi egzampl, yu mait aks sombadi eena di teritori: “Yu wuda main if Ah aks yu opinyan pahn sohnting? Lata prablemz weh wi ga tudeh afek peepl aal oava di werl. Yoo tink wi need wahn govament weh rool oava di hoal werl fi solv dehnya prablemz?” Den yu ku diskos Daniel 2:44. Er yu ku tel sombadi  sohnting laik dis: “Ah wuda laik fi noa weh yu ga fi seh pahn dis mata. Weh yoo tink da di bes way fi teech pikni fi ga gud manaz?” Den yu ku diskos Deuteronomy 6:6, 7. Wateva sobjek yu chooz fi diskos, tink bowt di peepl weh yu wahn taak tu. Imajin how dehn wahn benifit if dehn laan weh di Baibl reeli teech. Wen yu di taak tu dehn, ih veri impoatant dat yu lisn tu dehn ahn rispek dehn opinyan. If yu du dat, yu wahn andastan dehn beta, ahn dehn mait waahn lisn tu yu.

8. Wai wi fi kip di chrai fi mek ritern vizits?

⁸ Bifoa wahn persn disaid fi staat tu stodi di Baibl, yu need fi spen moa taim an enerji di mek ritern vizits. Wai? Bikaaz peepl mait noh deh hoam, er dehn mait noh bee aybl fi taak tu wi di neks taim wi vizit dehn. Aalso, yu mait need fi goh bak sevral taimz bifoa di persn wilin fi aksep wahn Baibl stodi. Memba, wahn plaant groa wen yu waata it regyula. Sayhn way soh, wahn inchrestid persn lov fi Jehoava ahn fi Krais ku groa wen wi diskos Gaad Werd di Baibl wid dehn regyula tu.

9-10. Wai wi ku seh dat evri chroo Kristyan need fi help fi mek wi ku fain peepl weh waahn laan bowt Gaad?

⁹ Evri Kristyan need fi help fain peepl weh waahn bee Krais disaipl. Wi ku kompyaa dis werk tu di werk weh wahn groop a peepl du fi fain wahn chail weh laas. Wai wi seh dat? Kansida weh mi hapm tu wahn chree-yaa-oal lee bwai weh mi geh laas. Bowt 500 peepl mi tek paat eena di saach. Fainali, bowt 20 owaz afta di lee bwai mi gaahn misn, wan a di valantyaaz mi fain ahn eena wahn feel. Di persn  neva waahn peepl prayz ahn fi weh ih mi fain di lee bwai. Insted ih seh: “Wi mi fain di lee bwai bikaaz aala wi mi-di werk tugeda.”

¹⁰ Lata peepl feel laik da lee bwai. Dehn feel laas. Dehn noh ga no hoap, bot dehn waahn sombadi help dehn. (Ifee. 2:12) Oava ayt milyan a wee di werk tugeda fi fain dehnya peepl weh need help ahn weh ga di rait haat kandishan. Yoo mait noh bee di wan hoo fain sombadi weh waahn stodi di Baibl. Bot, ada poblishaz weh werk eena da sayhn teritori mait fain sombadi weh waahn laan di chroot fahn Gaad Werd. Wen wahn brada er sista fain sombadi weh waahn bee wahn disaipl a Krais, evribadi weh mi help eena di saach ga gud reezn fi rijais.

11. Eevn if yu noh di kandok wahn Baibl stodi, eena weh ada wayz yu ku help fi mek disaiplz?

¹¹ Eevn if yu noh di kandok wahn Baibl stodi, yu stil ku help mek disaiplz eena ada wayz. Fi egzampl, wen yu si sombadi nyoo kohn da di Kingdom Haal, yu ku welkom dehn an help dehn. If yu shoa lov da way deh, yu ku help di persn si dat wee da chroo Kristyanz. (Jan 13:34, 35) Eevn doa di koment dehn weh yu gi da di meetin mait bee shaat, yu wahn teech nyoo disaiplz fi ekspres weh dehn bileev eena. Dehn wahn laan fi du it eena wahn sinsyaa ahn rispekful way. Yoo ku aalso werk lang wid wahn nyoo poblisha eena di minischri ahn help ahn fi yooz di Skripchaz fi teech peepl ahn fi reezn wid dehn. Wen yu du dat, yu wahn di teech ahn fi kapi Krais egzampl.—Look 10:25-28.

12. Yu tink wi need speshal skilz fi mek disaiplz? Pleez eksplayn yu ansa.

¹² Non a wi shuda tink dat wi need speshal skilz fi teech adaz fi bee disaiplz a Krais. Wai nat? Kansida di egzampl a Faustina, weh liv da Bolivia. Shee mi kyaahn reed wen shee mi fos meet di Witnisiz. Now, shee laan fi reed lee bit. Shee mi geh baptaiz ahn shee lov fi teech adaz. Yoozhwali, shee kandok faiv Baibl stodiz evri week. Eevn doa Faustina kyaahn reed az gud az moas a ih styoodent dehn, shee don help siks peepl fi geh baptaiz.—Look 10:21.

13. Eevn if wi veri bizi, wat da som a di blesinz weh wi ku injai wen wi mek disaiplz?

¹³ Lata Kristyanz bizi bikaaz dehn ga lata impoatant tingz fi du. Bot eevn bizi Kristyanz mek taim fi kandok Baibl stodiz, ahn dehn fain lata jai wen dehn du it. Kansida Melanie egzampl. Shee mi-di rayz ih ayt-yaa-oal lee gyal da Alaska bai ihself. Shee mi aalso ga wahn ful-taim jab an ih mi haftu help tek kyaa a ih pa  weh mi ga kyansa. Melanie da-mi di onli Witnis eena di tong wehpaa ih liv. Shee yoostu pray fi schrent fi goh goh preech eevn doa ih mi koal, kaaz shee mi reeli waahn fain sombadi fi stodi di Baibl wid. Afta sohn taim, ih mi meet Sara, hoo mi eksaitid fi laan dat Gaad ga wahn persnal naym. In taim, Sara mi aksep wahn Baibl stodi. Melanie seh: “Pahn Fraideh eevninz, Ah yoostu feel nak owt, bot mee ahn mi daata wuda stil goh du di stodi. Di too a wi benifit wahn lat fahn dat. Wi mi injai du risaach fi Sara kweschan dehn, ahn wi mi soh hapi fi si shee geh kloas tu Gaad ahn geh fi bee ih fren.” Sara mi geh di korij fi bayr op eevn doa ih famili ahn frenz mi staat chreet ahn bad. Ih mi en op di lef ih cherch, an ih mi geh baptaiz.

14. (a) Wai wi seh dat fi mek disaiplz da laik fishin? (b) How Paal werdz da 2 Timoti 4:1, 2 afek yoo?

¹⁴ Eevn if yu noh mait fain sombadi yet weh waahn bee wahn disaipl a Krais, noh giv op, kip aan di saach. Memba dat Jeezas mi seh dat peepl weh mek disaiplz da laik fishaman. Wahn fishaman mait fishin fi owaz bifoa ih eevn kech wan fish. Ih mait haftu werk layt da nait er erli da maanin, ahn sohntaim ih eevn mait haftu chravl faar. (Look 5:5) Sayhn way soh, sohn Kristyanz spen lata owaz di preech tu peepl ahn di saach payshent-wan fi peepl weh mait waahn laan bowt di chroot. Dehn goh da difrent plays fi saach. Wai yu tink wi du  dat? Soh wi ku meet moa peepl. Evribadi hoo werk haad eena dis way naamali geh blesinz. Dehn fain peepl weh inchrestid eena wi mesij. Yu tink yoo ku chrai preech joorin wahn taim wen ih eeziya fi fain peepl? Er maybi yu ku luk fi difrent plays wehpaat peepl akchwali deh fi preech di gud nyooz tu dehn.—Reed 2 Timoti 4:1, 2.

15. Wai wi need payshens wen wi kandok Baibl stodiz?

¹⁵ Wai wi need fi ga payshens wen wi kandok Baibl stodiz? Wan reezn da bikaaz wi need fi du moa dan jos help di styoodent fi noa ahn lov weh di Baibl teech. Wi need fi help ahn fi noa ahn lov di Wan weh gi wi di Baibl. Ahn wi noh onli need fi teech wahn styoodent weh Jeezas koman ih disaiplz fi du, bot wi aalso need fi help di styoodent fi noa how fi obay dehndeh koman eena ih laif. Wi fi bee payshent wid ahn an help ahn fi yooz Baibl prinsiplz eena ih laif. Som styoodents ku chaynj dehn tinkin ahn habits eena jos wahn fyoo monts, wail adaz mait tek lat moa taim.

16. Weh yoo laan fahn Raul ekspeeryens?

¹⁶ Wahn mishineri brada da Peru mi ga gud rizolts bikaaz ih mi payshent. Di brada seh: “Ah mi stodi too buks wid wahn Baibl styoodent weh naym Raul. Bot hihn mi stil ga big prablemz eena ih laif. Ih marij mi ful a chrobl, ih mi kos wahn lat, an ih chiljren neva rispek ahn bikaaz a how ih mi bihayv. Bot stil, hihn mi kohn tu di meetin dehn regyula, soh Ah mi kantinyu vizit ahn fi help hihn an ih famili. Moa dan chree yaaz afta Ah mi meet ahn, hihn mi kwalifai fi geh baptaiz.”

17. Weh wi wahn diskos eena di neks aatikl?

¹⁷ Jeezas mi tel wi fi “goh ahn chrayn peepl fahn owta aala di nayshan dehn fi bee [ih] disaipl dehn.” Fi fala da koman meenz dat wi haftu taak tu peepl weh tink difrent fahn wee. Som a dehn noh bilangz tu wahn cherch er noh eevn bileev eena Gaad. Di neks aatikl teech wi how wi ku shayr di gud nyooz tu dehndeh peepl.