EENA di Baibl, wi reed bowt lata faytful man weh mi ga feelinz jos laik wee. (Jay. 5:17) Fi egzampl, wi ku andastan weh Paal mi meen wen ih mi seh da Roamanz 7:21-24: “Wen Ah waahn du rait, eevl deh wid mi. . . . Poa mee! Ah da wahn mizarabl man!” Wen wi haftu fait gens wi oan sinful naycha, ih komfertin fi noa dat wahn faytful man laik Paal mi feel di sayhn way bowt ihself.

Bot Paal mi aalso taak bowt sohn ada feelinz tu. Da Galayshanz 2:20, hihn mi seh sohnting weh ih mi shoar a. Hihn mi seh dat Jeezas “lov [hihn] ahn mi gi ih laif fi [hihn],” persnali! Yoo feel di sayhn way? Maybi noh aalwayz.

If wee stil feel bad er wertles kaaz a wahn mistayk weh wi mek eena di paas, wi mait noh bileev dat Jehoava lov wi ahn don fergiv wi, an ih ku bee haad fi si Jeezas ransom sakrifais az wahn gif fi wee. Yu tink Jeezas reeli waahn wi vyoo fi hihn ransom sakrifais az wahn gif? If yes, weh ku help wi fi du dat? Mek wi egzamin dehndeh too kweschan.

Jeezas waahn wi vyoo fi hihn sakrifais laik wahn persnal gif fahn hihn tu wee. Weh proof wi gat dat dat da chroo? Picha di akonk weh deh da Look 23:39-43. Wahn man mi deh pahn wahn taacha stayk saida Jeezas. Hihn admit dat ih mi gilti a du sohnting bad. Ih mosi mi komit wahn veri seeryos sin, bikaaz di ponishment weh ih mi get da-mi onli fi di kriminal dehn weh du bad tingz. Dis man mi veri worid soh ih bayg Jeezas: “Memba mi wen yu ton King.”

Weh Jeezas mi du? Now, jos imajin humoch payn hihn mi haftu gaahn chroo wen hihn mi ton ih hed fi luk pahn di kriminal aiy tu aiy. Eevn doa ih gaahn chroo soh moch payn, Jeezas smail tu di man ahn komfert ahn. Ih tel ahn: “Ah di tel yu tudeh, yoo wahn deh wid mee eena Paradais.” (Look 23:43, NW) Now, Jeezas kuda mi jos tel di man dat di Son a man kohn “fi giv op fi hihn laif soh dat lat moa peepl ku geh free fahn dehn sin dehn.” (Mach. 20:28) Bot yu mi noatis how Jeezas mi shoa di man dat da sakrifais da-mi fi hihn, persnali? Hihn mi yooz di werdz “yoo” ahn “mee.” Ahn hihn mi pramis di man dat hihn wuda liv eena paradais pahn di ert.

Ih playn fi si dat di sakrifais Jeezas mi wahn soon mek mi wahn aalso benifit di man; da mi wahn persnal gif fi hihn. If Jeezas mi feel dis way fi wahn kriminal weh neva eevn ga di apachooniti fi serv Gaad, imajin how ih feel bowt wahn baptaiz Kristyan hoo di serv Gaad. Weh ku help wee fi reeli bileev dat Jeezas sakrifais wahn benifit wee persnali, eevn doa wi komit sinz eena di paas?

Bikaaz Jeezas mi giv Paal wahn asainment fi goh preech, Paal mi andastan dat Jeezas mi ded fi hihn. How wi noa dat? Hihn mi seh: ‘Ah tel  Krais Jeezas wi Laad tanks bikaaz ih chros mi, ahn soh ih pik mi fi serv ahn. An ih gi mi schrent fi du dis werk. Eevn doa Ai doz insolt Gaad, an Ah doz onli kruwil ahn mek ih peepl dehn sofa.ʼ (1 Tim. 1:12-14) Bikaaz Jeezas mi giv Paal dis asainment, eevn doa Paal mi du aal dehn bad tingz eena di paas, hihn mi kanvins dat Jeezas mi lov ahn, dat ih mi chros ahn, ahn dat ih mi ga mersi pan ahn. Jeezas aalso giv eech wan a wee wahn asainment fi preech di gud nyooz. (Mach. 28:19, 20) Yu tink wee ku vyoo Jeezas sakrifais di way di apasl Paal mi vyoo it?

Albert, hoo kohn bak tu Jehoava afta ih mi disfeloship fi nayli 34 yaaz, seh: “Mi sinz dehn aalwayz deh pahn mi main; Ah kyaahn faget di bad tingz weh Ah du eena di paas. Bot wen Ah deh eena di minischri, Ah feel laik di apasl Paal; Ah ga wahn asainment weh Jeezas gi mee persnali fi preech. Ih mek Ah feel hapiya ahn moa pazitiv bowt miself, bowt mi hoal laif, ahn bowt mi fyoocha.”—Ps. 51:3.

Allan mi komit lata kraim an ih mi veri vailent bifoa ih mi laan di chroot. Hihn seh: “Ah stil tink bowt aal di damij Ah mi kaaz tu peepl. Sohntaim, ih mek Ah feel dipres. Bot Ah tank Jehoava dat hihn gi wahn chaans tu wahn sina laik mee, fi kehr di gud nyooz tu adaz. Wen Ah si how peepl rispan tu di gud nyooz, ih rimain mi a how gud ahn lovin Jehoava. Ah feel dat ih yooz mee fi help ada peepl weh di schrogl wid di bad tingz weh dehn du, jos laik mee.”

Wen wi deh owt eena di minischri, wi di du gud ahn soh wi tink pazitiv tingz. Ih kanvins wi dat Jeezas lov wi, dat ih chros wi, ahn dat ih ga mersi pahn wi.

Bikaaz wi liv eena Saytan werl, sohntaim wi kanshans stil bada wi bowt di sinz weh wi mi komit eena di paas. Bot dehnya feelinz wahn onli laas til Saytan wikid sistem geh dischrai. Meentaim, weh wahn help wi fi fait dehndeh feelinz?

Jean feel wertles sohntaim bikaaz ih feel gilti bowt tingz weh ih mi du wen ih mi-di liv dobl laif eena ih yoot. Ih seh: “Ah lov dat ‘Gaad grayta dan wi kanshans.ʼ” (1 Jan 3:19, 20) Jos laik Jean, wee ku feel beta bikaaz wee noa dat Jehoava ahn Jeezas andastan dat wi sinful. Memba, owta lov dehn pay di ransom fi wi, noh fi perfek hyoomanz, bot fi sinaz weh ripent.—1 Tim. 1:15.

Wee wahn bee kanvins dat di ransom da fi wee persnali if wi pray ahn tink bowt di way Jeezas mi chreet imperfek hyoomanz, an if wi du di bes wi kud eena di minischri weh hihn asain tu wi. Wen wi du dat, jos laik Paal wi ku seh: Jeezas ‘lov mee ahn mi gi ih laif fi mee.ʼ