1. Weh chaynj hapm eena sohn konchri noh tu lang agoa?

FI TOWZNZ a yaaz, moas a di peepl eena di werl mi bilangz tu wahn rilijan. Bot noh tu lang agoa, wahn big chaynj hapm. Moa ahn moa peepl noh kansida dehnself rilijos. In fak, da sohn konchri, moas peepl seh dat dehn noh fala no rilijan. *—Mach. 24:12.

2. Weh mait eksplayn wai soh moch peepl noh rilijos nohmoh?

² Bot wai moa ahn moa peepl di seh dat dehn noh bilangz tu wahn rilijan? Wel, som peepl mait foakos tu moch pahn plezha er pahn dehn prablemz. (Look 8:14) Som peepl weh yoostu bileev eena Gaad, now bileev dat Gaad noh egzis. Adaz bileev eena Gaad bot tink dat rilijan oal-fashan, ahn dat ih noh gree wid saiyens an ih noh mek sens. Dehn mait hyaa dehn frenz, dehn teechaz, er di meedya seh dat laif mi staat owt bai evolooshan, ahn dehn noh hyaa eni gud reezn fi bileev eena Gaad. Adaz kyaahn stan dat di rilijos leedaz greedi fi moni ahn powa. Da sohn konchri, di govament ga laa weh ban sertn rilijos aktiviti.

3. Wat da di perpos a dis aatikl?

³ Jeezas ekspek wi fi “goh ahn chrayn peepl fahn owta aala di nayshan dehn fi bee [ih] disaipl.” (Mach. 28:19) How wee ku help peepl weh noh rilijos fi laan fi lov Gaad ahn fi bee wahn falowa a Krais? Wi need fi riyalaiz dat di way wahn persn rispan tu wi mesij mait dipenz pahn wehpaat ih mi groa op. Fi egzampl, wen wi preech tu peepl da  Europe, dehn noh mait rispan di saym way az peepl fahn Asia. Wai? Wel, da Europe, lata peepl noa sohnting bowt di Baibl ahn dehn fameelya wid di teechin dat Gaad mek evriting. Bot da Asia, moas a di peepl noa lee bit er notn ataal bowt di Baibl, ahn dehn mait noh eevn bileev eena wahn Kriyayta. Di perpos a dis aatikl da fi mek wi reech di haat a di peepl weh wi meet eena di minischri, noh mata wehpaat dehn kohn fram er wat dehn bileev.

4. Wai wi need fi kip wahn pazitiv atichood?

⁴ Bee Pazitiv. Evri yaa, peepl weh neva yoostu bee rilijos chaynj ahn geh baptaiz az wan a Jehoava Witnisiz. Adaz hoo ga hai moaral standadz, bot hoo sik ahn taiyad a aala di hipokrisi eena rilijan, stodi ahn geh baptaiz tu. Ahn den adaz hoo mi ga loa moaral standadz lef dehn bad habits ahn staat serv Jehoava. Wid Jehoava help, wee ku bee shoar dat wi wahn fain di peepl weh “ga di rait haat kandishan fi evalastin laif.”—Aks 13:48, NW; 1 Tim. 2:3, 4.

5. Weh yoozhwali mek peepl rispan gud tu di mesij wi shayr?

⁵ Bee Kain ahn Jentl. Yoozhwali, peepl rispan gud tu wi mesij, noh bikaaz a weh wi seh, bot bikaaz a how wi seh it. Dehn laik it wen wi kain, wen wi jentl, ahn wen wi reeli inchrestid eena dehn. Wee noh foas dehn fi hyaa weh wi ga fi seh. Insted, wi chrai fi andastan di reezn wai fi dehn opinyan bowt rilijan difrent. Fi egzampl, wi laan dat som peepl noh laik taak bowt rilijan wid peepl weh dehn noh noa. Adaz feel dat da bad manaz fi aks sombadi weh dehn tink bowt Gaad. Ahn dehn ga ada peepl weh feel shaym wen ada peepl si dehn di reed di Baibl, espeshali wid wan a Jehoava Witnisiz. Noh mata wat da di reezn, wi chrai fi andastan dehn feelinz.—2 Tim. 2:24.

6. How di apasl Paal mi shoa dat hihn adap tu di peepl dehn serkomstans, ahn how wi ku kapi fi hihn egzampl?

⁶ Weh wi ku du if wi noatis dat sombadi noh laik it wen wi yooz werdz laik “Baibl,” “kriyayshan,” “Gaad,” er “rilijan”? Wi ku kapi di apasl Paal ahn chaynj di way wi taak tu dehn. Wen hihn mi-di taak tu di Jooz, Paal mi reezn wid dehn fahn di Skripchaz. Bot wen Paal mi stan op fronta di Kongsl da Atenz, hihn neva koat fahn di Baibl. (Aks 17:2, 3, 22-31) How wee ku kapi Paal egzampl? If yoo meet sombadi weh noh aksep di Baibl, ih wuda bee beta if yu noh seh: “Di Baibl seh . . . ,” er sohnting laik dat. If yu feel laik wahn persn noh laik it wen adaz si ahn di reed di Baibl wid yu, chrai fi shoa ahn di skripchaz eena wahn way weh adaz noh wahn noatis, laik maybi pahn yu foan er tablet.

7. Weh wi wuda haftu du if wi waahn kapi Paal egzampl da 1 Korintyanz 9:20-23?

⁷ Bee Andastandin ahn Lisn. Wi need fi chrai fi andastan wai di peepl wi meet tink di way dehn tink. (Prov. 20:5) Mek wi luk pahn Paal egzampl agen. Hihn mi groa op monks loan Jooish peepl. Fi shoar, hihn mi haftu chaynj di way ih preech wen ih mi preech tu peepl weh da neva Joo, peepl weh neva noa moch bowt Jehoava ahn di Skripchaz. Wee mait haftu du sohn risaach er taak tu bradaz er sistaz eena di kangrigayshan weh ga moa ekspeeryens soh dat wi ku andastan how peepl eena wi teritori tink ahn feel.—Reed 1 Korintyanz 9:20-23.

8. Wat da wan way wi ku staat wahn kanvasayshan bowt di Baibl?

 ⁸ Wi goal da fi fain peepl wid di rait haat kandishan. (Mach. 10:11) Fi du dis, wi need fi aks peepl wat dehn tink, ahn wi need fi pay atenshan ahn lisn gud wen dehn ansa. Wahn brada da England aks peepl weh dehn tink bowt tapiks laik how fi rayz chiljren, er how fi deel wid injostis. Afta hihn lisn tu dehn koments, hihn wuda seh: “Weh yu tink bowt dis advais weh egzis nayli 2,000 yaaz now?” Den, widowt eevn seh di werd “Baibl,” hihn shoa dehn skripchaz pahn ih foan weh ga fi du wid da sayhn tapik.

9. How wi mait help peepl weh naamali noh laik taak bowt Gaad?

⁹ How wi ku reech peepl haat if dehn noh laik taak bowt Gaad? Wi ku taak bowt sohnting weh dehn laik er weh dehn fameelya wid. Fi egzampl, lata peepl admaiya naycha. Soh wi mait seh sohnting laik: “Yoo praabli don noa dat wen saiyentis invent nyoo tingz, dehn yoozhwali kapi tingz weh don egzis eena naycha. Fi egzampl, peepl weh mek kamara stodi di hyooman aiy, ahn peepl weh mek maikrofoan er speeka stodi di hyooman ayz. Weh ron chroo yu main wen yu tink bowt naycha? Yu tink dat da jos wahn powaful foas, wahn persn, er sohnting els?” Afta wi lisn gud tu weh dehn seh, wi ku tel dehn: “Wen saiyentis laan fahn di dizain a di hyooman ayz ahn di aiy, wee mait wanda hoo dehn di laan it fram. Sohnting wahn poawet mi rait wahn lang taim agoa mi veri inchrestin tu mee. Ih mi seh: ‘Di Wan hoo mek di ayz, hihn ku hyaa? Di Wan hoo mek di aiy, hihn ku si? . . . Hihn da di Wan hoo giv andastandin tu peepl!ʼ Som saiyentis gree wid dis ahn bileev eena kriyayshan.” (Ps. 94:9, 10) Wi ku shoa dehn wan a di veedyo pahn jw.org^® anda “Interviews and Experiences” eena di seeriz “Viewpoints on the Origin of Life.” (Luk anda PUBLICATIONS > VIDEOS.) Er wi ku gi dehn eni a dehnya too broashoar: Was Life Created? er The Origin of Life—Five Questions Worth Asking.

10. How wi mait staat wahn kanvasayshan wid sombadi hoo noh waahn taak bowt Gaad?

¹⁰ Moas peepl waahn wahn beta fyoocha. Bot lata peepl frayd dat di ert wahn geh dischrai ahn dat nobadi wahn ku liv pan it. Wahn chravlin oavaseeya da Norway  seh dat peepl weh noh waahn taak bowt Gaad yoozhwali laik taak bowt weh di hapm rong di werl. Afta ih meet sombadi an inchrojoos ihself, hihn wuda seh: “Weh yu tink bowt wi fyoocha? Hoo yu tink ku gi wi hoap? Palitishanz, saiyentis, er sombadi els?” Afta ih lisn kyaafuli, hihn wuda reed er koat wahn skripcha weh taak bowt wahn beta fyoocha. Som peepl inchrestid eena di Baibl pramis dat di ert wahn laas fareva ahn dat gud peepl wahn liv pan it fareva.—Ps. 37:29; Eccl. 1:4.

11. Wai wi shuda chrai difrent wayz fi staat kanvasayshanz, ahn how wi ku kapi Paal egzampl da Roamanz 1:14-16?

¹¹ Ih gud fi chrai difrent wayz fi staat kanvasayshan wid di peepl wi meet. Wai? Bikaaz evri persn difrent. Weh mek wan persn lisn noh mait mek sombadi els waahn lisn. Som peepl noh main taak bowt Gaad er di Baibl, bot adaz prifaa fi taak bowt ada tingz fos. Eena eeda sichuwayshan, wi shuda tek di apachooniti fi taak tu peepl. (Reed Roamanz 1:14-16.) Af koars, wi rimemba dat Jehoava da di wan weh mek di chroot groa eena di haat a di peepl weh lov weh rait.—1 Kor. 3:6, 7.

12. Weh wi ku du fi get chroo tu peepl fahn Asian konchriz hoo noh bileev eena wahn Kriyayta?

¹² Aal oava di werl, poblishaz meet peepl fahn konchriz da Asia, inkloodin peepl weh kohn fahn plays wehpaat di govament ban som a wi rilijos werk. Da som a dehn Asian konchriz, lata peepl neva eva reeli tink fi dehnself weda Gaad egzis er nat. Som mait waahn noa moa ahn dehn mait aksep wahn Baibl stodi rait away, bot adaz noh mait bee inchrestid ataal. Soh weh wi ku du fi help dehn? Som a wi bradaz weh ga ekspeeryens fain dat di bes way da fi staat wahn frenli kanvasayshan. Dis shoa di persn dat dehn kay bowt dehn, ahn wen ih pasabl, di poblisha ku tel dehn how adaz ga wahn beta laif bikaaz dehn staat tu yooz Baibl prinsiplz eena dehn laif.

13. Weh ku help peepl fi bee inchrestid eena di Baibl? (Koment pahn di picha pahn di kova.)

¹³ Lata peepl laik hyaa di waiz prinsiplz weh deh eena di Baibl. (Eccl. 7:12) Da New York, wahn sista weh vizit peepl weh taak Mandarin seh: “Ah chrai shoa peepl dat Ai kay fi dehn, an Ah lisn tu weh dehn ga fi seh. If Ai laan dat dehn jos kohn fahn wahn nada konchri, Ai wuda aks dehn sohnting laik: ‘How yu di mek it? Yu don fain wahn jab? Di peepl oava ya di chreet yu gud?ʼ” Sohntaim dis help shee fi inchrojoos wahn Baibl teechin. Weneva pasabl, di sista mait aks: “Weh yoo tink da di moas impoatant ting fi du fi ga wahn gud rilayshanship wid ada peepl? Ah ku shoa yu wahn praverb fahn di Baibl? Ih seh: ‘Fi staat wahn fait da laik fi oapm wahn flodgayt; bifoa di kwaaril staat op, waak weh.ʼ Yoo tink dat dis advais ku help wi fi get lang wid ada peepl?” (Prov. 17:14) Dehnya kaina kanvasayshan ku help wi fi fain peepl weh waahn laan moa bowt di Baibl.

14. How wahn brada weh liv da Asia help peepl weh seh dat dehn noh bileev eena Gaad?

¹⁴ Weh wi ku tel peepl hoo tel wi dat dehn noh bileev eena Gaad? Wahn brada weh di preech fi wahn lang taim tu peepl da Asia seh: “Naamali, wen wahn persn seh: ‘Ai noh bileev eena Gaad,ʼ ih akchwali meen dat hihn noh bileev eena di gaadz weh moas peepl eena di ayrya bileev  eena. Soh yoozhwali, Ai agree wid dehn dat moas gaadz da weh man mek ahn dehn noh reel. Ah wuda reed Jeremiah 16:20: ‘Yu tink wahn man ku mek gaadz fi ihself wen dehn da noh reeli gaadz?ʼ Den Ah wuda aks: ‘How wi ku tel di difrens bitween wahn reel gaad ahn wan weh man mek?ʼ Ah lisn kyaafuli, ahn den Ah wuda reed Isaiah 41:23: ‘Tel wi weh wahn hapm eena di fyoocha, soh dat wi ku noa dat unu da gaadz. Yes, du sohnting, gud er bad, soh dat wi ku geh sopraiz wen wi seeʼt.ʼ Den Ah wuda shoa dehn wahn egzampl a how Jehoava mi seh weh wahn hapm eena di fyoocha.”

15. Weh wi ku laan fahn di egzampl a wahn brada fahn di eestan paat a Asia?

¹⁵ Wen wahn brada eena di eestan paat a Asia mek ritern vizits, dis da weh hihn seh ih du: “Ai shoa dehn sohn egzampl a Baibl wizdom, Baibl prafesi weh don kohn chroo, ahn laaz weh kanchroal di yoonivers. Den Ah shoa dehn how aala dis proov dat wahn Gaad deh. Wen wahn persn staat tu tink dat ih pasabl dat Gaad egzis, den Ah wuda staat tu shoa ahn weh di Baibl seh bowt Jehoava.”

16. Akaadn tu Heebrooz 11:6, wai styoodents need fi ga fayt eena Gaad an eena di Baibl, ahn how wi ku help dehn fi divelop da fayt?

¹⁶ Wen wi kandok Baibl stodiz wid peepl weh noh rilijos, wi need fi help dehn fi schrentn dehn fayt dat Gaad egzis. (Reed Heebrooz 11:6.) Ahn wi need fi help dehn bil fayt eena di Baibl. Dis mait meenz dat wi ripeet wahn mayn point oava ahn oava. Evri taim wi stodi wid dehn, wi mait need fi diskos proof dat di Baibl da reeli Gaad Werd. Dis mait inklood wahn shaat diskoshan a how Baibl prafesi don kohn chroo, how di Baibl karek wen ih taak bowt saiyens ahn hischri, ahn how di Baibl help wi eena wi evriday laif.

17. How wi lov fi peepl ku afek dehn?

¹⁷ Wen wi shoa lov fi peepl weda dehn rilijos er nat, wi help dehn fi bee disaiplz a Krais. (1 Kor. 13:1) Az wi teech dehn, wi goal da fi shoa dat Gaad lov wi ahn dat hihn waahn wi lov hihn tu. Evri yaa, towznz a peepl weh neva ga no inchres eena Gaad er rilijan bifoa, geh baptaiz bikaaz dehn laan fi lov Gaad. Soh bee pazitiv, ahn shoa lov ahn persnal inchres eena peepl. Lisn tu dehn. Chrai fi andastan how dehn feel ahn tink. Teech dehn bai fi yoo egzampl how fi bee disaiplz a Krais.