1. Wai wi need fi pripyaa fi persikyooshan?

WI LAAD Jeezas mi noa dat di werl mi wahn hayt evribadi weh chooz fi bee fi hihn disaipl. Soh pahn di nait bifoa ih ded, hihn mi waan dehn bowt it. (Jan 17:14) Fahn da taim til now, peepl weh deh gens chroo wership di persikyoot faytful Kristyan Witnisiz a Jehoava. (2 Tim. 3:12) Az di en a dis sistem a tingz di geh kloasa, wi ekspek wi enimi dehn fi deh gens wi eevn moa.—Mach. 24:9.

2-3. (a) Wai wi need fi wach owt mek fyaa noh tek wi oava? (b) Weh wi wahn kansida eena dis aatikl?

² How wi ku pripyaa wiself fahn now fi fays persikyooshan wen ih kohn? Wi noh need fi picha aala di bad tingz weh ku hapm tu wi. If wi du dat, ih ku kaaz wi fi geh soh frayd dat wi stap serv Jehoava eevn bifoa wi ekspeeryens eni prablem. (Prov. 12:25; 17:22) Fyaa da wahn powaful wepan weh wi ‘enimi, di Devl,ʼ chrai fi yooz gens wi. (1 Peet. 5:8, 9) Weh wee ku du now fi pripyaa wiself fi noh giv op wen wi fays persikyooshan?

³ Eena dis aatikl, wi wahn kansida how wi ku schrentn wi rilayshanship wid Jehoava ahn wai ih impoatant dat wi du it now. Wi wahn aalso diskos weh wi ku du fi geh moa korij. Ahn fainali, wi wahn diskos weh wi ku du wen peepl hayt wi.

4. Weh Heebrooz 13:5, 6 tel wi, ahn wai wi fi bee kanvins a dis?

⁴ Bee kanvins dat Jehoava lov yu ahn dat hihn wahn neva abandan yu. (Reed Heebrooz 13:5, 6.) Sohn yaaz agoa, Di Wachtowa mi seh: “Sombadi weh noa Gaad reeli gud wahn chros ahn wahn lat wen dehn di fays persikyooshan.” Dat da chroo, kaaz fi bee aybl fi bayr op wen anda persikyooshan, wi mos lov Jehoava ahn chros ahn kompleetli, ahn wi mos neva dowt dat hihn lov wi tu.—Mach. 22:36-38; Jay. 5:11.

5. Weh wahn help wi fi feel Jehoava lov?

⁵ Reed di Baibl evri day wid di goal fi jraa kloasa tu Jehoava. (Jay. 4:8) Az yu reed, tink bowt Jehoava byootiful kwalitiz. Chrai fi andastan humoch hihn lov yu az yu reed bowt di tingz weh hihn seh ahn du. (Ex. 34:6) Som mait fain it haad fi bileev dat Gaad lov dehn, bikaaz nobadi eva shoa dehn lov. If yoo feel dis way, chrai mek wahn lis eech day a wayz how Jehoava don shoa mersi ahn kainis tu yu. (Ps. 78:38, 39; Roam. 8:32) Az yu tink bowt yu oan ekspeeryens ahn tink bowt weh yu reed eena Gaad Werd, ih wahn bee eeziya fi mek yu rait dong wahn lis a di tingz weh Jehoava du fi yu. Di moa yu kohn fi apreeshiayt weh Jehoava du, di schranga yu rilayshanship wid hihn wahn bee.—Ps. 116:1, 2.

6. Akaadn tu Psalm 94:17-19, how sinsyaa pryaa ku help wi?

⁶ Pray wahn lat. Imajin wahn lee bwai di geh wahn nais tait hog fahn ih lovin pa. Di lee bwai feel soh sayf dat ih noh frayd fi taak tu ih pa bowt di gud ahn bad tingz weh hapm tu ahn da day. Sinsyaa pryaa ku help wi fi geh kloasa tu Jehoava an injai da sayhn kaina rilayshanship. (Reed Psalm 94:17-19.) * Az yu pray tu Jehoava, “poar owt yu haat laik waata” ahn tel yu lovin Faada bowt aal di tingz weh mek yu frayd er mek yu wori. (Lam. 2:19) Weh wahn bee di rizolt? “Gaad wahn gi [yu] wahn kaina pees weh nobadi kyaahn andastan.” (Fil. 4:6, 7) If yu kantinyu fi pray laik dis, den yu wahn feel kloasa tu Jehoava.—Roam. 8:38, 39.

7. Wai wi need fi bee kanvins dat di pramis dehn weh Gaad mek bowt ih Kingdom wahn kohn chroo?

⁷ Bee kanvins dat di blesinz a Gaad Kingdom wahn kohn chroo. (Num. 23:19) If yu noh reeli bileev dat Gaad pramis dehn wahn kohn chroo, ih wahn bee eeziya fi mek Saytan ahn peepl weh deh anda fi hihn kanchroal fraitn yu. (Prov. 24:10; Heeb. 2:15) How yoo ku schrentn yu kanfidens eena Gaad Kingdom now? Tek taim fi stodi ahn risaach Gaad pramis dehn bowt  ih Kingdom ahn tink bowt di reezn dehn wai yu ku bee shoar dat dehn wahn kohn chroo. How dat wahn help? Kansida di egzampl a Stanley Jones, hoo mi deh eena prizn fi sevn yaaz bikaaz a ih fayt. * Weh mi help hihn fi stay faytful? Hihn seh: “Mai fayt mi schrang bikaaz Ah mi noa bowt Gaad Kingdom ahn weh ih mi wahn du, an Ah neva dowt it. Soh nobadi ku mek Ai stap serv Jehoava.” If yu ga schrang fayt eena Gaad pramis dehn, yu wahn jraa kloasa tu Jehoava ahn yu noh wahn mek fyaa stap yu fahn serv Hihn.—Prov. 3:25, 26.

8. Weh wi ku laan bowt wiself wen wi egzamin wi atichood tuwaadz wi meetinz? Pleez eksplayn yu ansa.

⁸ Aten yu Kristyan meetinz regyula. Meetinz help wi fi jraa kloasa tu Jehoava. Wi atichood tuwaadz wi meetin atendans da wahn gud sain fi shoa humoch wi wahn ku bayr op wen wi fays persikyooshan eena di fyoocha. (Heeb. 10:24, 25) Wai wi seh dat? Wel, if wi alow smaal tingz fi kip wi fahn goh da wi meetinz now, weh wahn hapm eena di fyoocha if wi haftu put wiself eena daynja fi meet wid wi bradaz ahn sistaz? Pahn di ada han, if wi mek op wi main fi goh da aala wi meetinz, wi noh wahn stap goh wen peepl chrai fi stap wi fahn meet tugeda. Now da di taim fi divelop wahn lov fi wi meetinz. Wen wi lov goh da wi meetinz, nobadi, nat eevn wahn laa bai di govament weh seh wi kyaahn ga wi meetinz, wahn stap wi fahn obay Gaad.—Aks 5:29.

9. Wai wi ku seh dat wahn gud way fi pripyaa fi persikyooshan da fi memoraiz skripchaz?

⁹ Memoraiz yu fayvrit skripchaz. (Mach. 13:52) Maybi yu memri noh perfek, bot Jehoava ku yooz ih powaful hoali spirit fi help yu fi rimemba dehn skripchaz. (Jan 14:26) Noatis weh wahn brada weh mi kyaahn ga kantak wid nobadi wen ih mi deh eena prizn da East Germany mi seh: “Da mi soch a blesin dat bai den Ah mi don laan honjridz a skripchaz bai haat! Eevn doa Ah mi deh bai miself, Ah mi kip mi main bizi di tink bowt lata difrent Baibl tapik.” Dehn skripchaz mi help wi brada fi stay kloas tu Jehoava—ahn fi bayr op anda persikyooshan.

10. Wai wi fi memoraiz di sang dehn?

¹⁰ Memoraiz ahn sing sangz weh prayz Jehoava. Wen Paal ahn Sailas mi deh eena prizn da Filipai, dehn mi sing sohn spirichwal sang weh dehn mi memoraiz. (Aks  16:25) Jos laik dat, da how wi bradaz ahn sistaz eena di Soviet Union mi schrentn dehnself wen di govament mi sen dehn tu Siberia? Sista Mariya Fedun seh: “Wee mi sing aala di sang dehn fahn di sangbuk weh wi mi noa bai haat.” Shee seh dat dehn sang mi inkorij aala dehn ahn help dehn feel kloasa tu Jehoava. How bowt yoo? Yoo feel schrentn wen yoo sing yu fayvrit spirichwal sang? Den memoraiz di sang dehn now!—Si di baks “ Gi Mi Korij.”

11-12. (a) Akaadn tu 1 Samuel 17:37, 45-47, wai Dayvid mi ga korij? (b) Weh impoatant lesn wi laan fahn Dayvid egzampl?

¹¹ Fi deel wid persikyooshan, yu need korij. If yu feel laik yu noh ga da kwaliti, weh yu ku du? Memba dat chroo korij noh dipen pahn yu saiz, yu schrent, er weh aal yu ku du. Kansida di egzampl a yong Dayvid wen ih mi fays Golaiyat. Kompyaa tu da jaiyant, Dayvid mi smaala, weeka, ahn neva ga di prapa wepanz. Az a mata fak, hihn mi nat eevn ga wahn soad. Stilyet, hihn mi ful a korij. Dayvid mi ron fi fait da jaiyant brayv-wan.

¹² Wai Dayvid mi ga soh moch korij? Bikaaz hihn mi ga schrang fayt dat Jehoava mi deh wid ahn. (Reed 1 Samuel 17:37, 45-47.) * Dayvid neva foakos pahn how big Golaiyat mi big kompyaa tu hihn. Insted, hihn mi foakos pahn how smaal Golaiyat mi smaal kompyaa tu Jehoava. Weh wi laan fahn dis akonk? Wi wahn ga korij if wi kanfident dat Jehoava deh wid wi ahn dat wi enimi dehn smaal wen wi kompyaa dehn tu di Almaiti Gaad. (2 Chron. 20:15; Ps. 16:8) Weh ku help wi fi bil op wi korij fahn now—bifoa persikyooshan staat?

13. Weh wi ku du fi bil op wi korij? Pleez eksplayn yu ansa.

¹³ Wi ku bil op wi korij fahn now if wi preech tu adaz bowt di gud nyooz a Gaad Kingdom. Wai? Bikaaz wen wi preech, wi laan fi chros eena Jehoava ahn noh frayd  fi peepl. (Prov. 29:25) Jos laik how wi mosl dehn geh schranga wen wi eksasaiz, wi korij geh schranga wen wi preech fahn hows tu hows, eena poblik, infaamali, an eena bizniz teritori. If wi divelop di korij fi preech now, wi wahn bee redi fi kantinyu preech eevn if di govament ban wi werk.—1 Tes. 2:1, 2.

14-15. Weh lesn wi ku laan fahn di egzampl a Nancy Yuen ahn Valentina Garnovskaya?

¹⁴ Wi ku laan wahn lat fahn di egzampl a too faytful sistaz weh mi shoa wahn lata korij. Nancy Yuen mi onli bowt faiv fut (1.5 m) taal, bot shee neva fraitn eezi. * Shee mi rifyooz fi stap preech di gud nyooz a Gaad Kingdom. Bikaaz a dat, dehn mi sen shee da jayl fi moa dan 20 yaaz da China. Di ofishal dehn weh mi chrai fi geh shee fi stap preech mi seh dat shee da-mi di “moas stobant persn” eena di hoal konchri!

¹⁵ Sayhn way soh, Valentina Garnovskaya mi geh lak op eena jayl chree difrent taim fi wahn toatal a 21 yaaz eena di Soviet Union. * Wai? Bikaaz shee mi mek op ih main fi kantinyu fi preech soh moch dat di ofishal dehn kaal shee “wahn reeli daynjaros kriminal.” Weh mi mek dehnya too sistaz ga soh moch korij? Dehn mi kanvins dat Jehoava mi deh wid dehn.

16. Wat da di onli way wi ku geh chroo korij?

¹⁶ Laik weh wi mi diskos, fi bil op wi korij, wi noh fi foakos pahn wi oan schrent an abiliti. Insted, wi need fi bileev dat Jehoava deh wid wi ahn dat hihn da di wan weh di fait fi wi. (Deut. 1:29, 30; Zech. 4:6) Dat da di onli way wi ku geh chroo korij.

17-18. Akaadn tu Jan 15:18-21, weh waanin Jeezas gi wi? Pleez eksplayn yu ansa.

¹⁷ Wi laik it wen peepl rispek wi, bot wi noh fi tink dat wi noh wert notn if peepl noh laik wi. Jeezas seh: “Gaad bles unu wen peepl hayt unu, ahn kip unu owta dehn kompni ahn insolt unu, ahn  bad-mowt unu sayka weh unu bilangz tu di Son a Man.” (Look 6:22) Weh Jeezas mi meen wen ih mi seh dehndeh werdz?

¹⁸ Jeezas neva mi-di seh dat Kristyanz wuda injai it wen peepl hayt dehn. Insted, hihn mi-di waan wi bowt weh mi wahn hapm tu wi. Wee da no paat a dis werl. Wi liv akaadn tu Jeezas teechin ahn wi preech di mesij hihn mi preech. Bikaaz a dis, di werl hayt wi. (Reed Jan 15:18-21.) Wee waahn pleez Jehoava. Soh if peepl hayt wi bikaaz wi lov wi Faada, dat da fi dehn prablem.

19. How wee ku kapi di egzampl a di apasl dehn?

¹⁹ Neva mek notn weh hyoomanz seh er du mek wi feel shaym fi bee wan a Jehoava Witnisiz. (Mic. 4:5) Wi ku laan fi get oava eni fyaa wi mait feel if wi tink bowt weh di apasl dehn eena Jeroosalem mi du rait afta Jeezas mi geh put tu det. Dehn mi noa humoch di Jooish rilijos leedaz mi hayt dehn. (Aks 5:17, 18, 27, 28) Stilyet, evri day dehn mi kantinyu fi goh da di templ ahn shoa dat dehn da Jeezas disaipl. (Aks 5:42) Dehn neva mek fyaa stap dehn. Wee ku aalso get oava fi wee fyaa if wi mek peepl noa dat wee da wan a Jehoava Witnisiz, weda da wen wi deh da werk, da skool, er eena wi naybahud.—Aks 4:29; Roam. 1:16.

20. Wai di apasl dehn mi hapi eevn doa peepl mi hayt dehn?

²⁰ Wai di apasl dehn mi hapi? Dehn mi noa dat peepl mi hayt dehn, ahn dehn mi seeʼt az wahn aana fi mek peepl persikyoot dehn bikaaz dehn di du Jehoava wil. (Look 6:23; Aks 5:41) Laytaraan di apasl Peeta mi rait: “Eevn if unu sofa bikaaz unu di du gud, Gaad wahn bles yu far it.” (1 Peet. 2:19-21; 3:14) Wen wi andastan dat peepl hayt wi fi du weh rait, wi wahn neva mek da hayt stap wi fahn serv Jehoava.

21-22. (a) Weh yoo mek op yu main fi du fi pripyaa fi persikyooshan? (b) Weh wi wahn kansida eena di neks aatikl?

²¹ Wi noh noa wen peepl wahn staat tu persikyoot wi er wen di govament dehn wahn chrai stap wi fahn wership Jehoava. Bot wi doo noa wan ting, dat wi ku pripyaa fahn now if wi schrentn wi rilayshanship wid Jehoava, if wi bil op wi korij, an if wi laan weh wi ku du wen peepl hayt wi. If wi pripyaa now, ih wahn help wi fi kantinyu serv Jehoava now an eena di fyoocha.

²² Bot wat if di govament doo paas wahn laa fi chrai stap wi fahn wership Jehoava? Eena di neks aatikl, wi wahn diskos sohn prinsipl weh wahn help wi fi kantinyu serv Jehoava eevn wen wi anda ban.