1-2. (a) Wai wi noh fi bee sopraiz if di govament chrai fi stap wi werk? (b) Weh wi wahn diskos eena dis aatikl?

EENA 2018, moa dan 223,000 poblishaz a di gud nyooz mi liv eena konchriz wehpaat di govament chrai fi ban eeda aal er som a wi spirichwal aktiviti dehn. Dis noh sopraiz wi ataal. Az wi mi laan eena di aatikl bifoa dis wan, chroo Kristyanz ekspek fi fays persikyooshan. (2 Tim. 3:12) Noh mata wehpaat wi liv, di govament mait paas wahn laa at enitaim ahn widowt waanin fi chrai ban wi fahn wership wi lovin Gaad, Jehoava.

² If di govament wehpaat yu liv disaid fi chrai stap yu fahn wership Jehoava, yu mait aks yuself kweschanz laik: ‘Ah wanda if persikyooshan meenz dat Gaad beks wid wi? Wahn ban meenz dat wi noh wahn wership Jehoava nohmoh? Ai shuda moov tu wahn konchri wehpaat Ah free fi wership Jehoava?ʼ Eena dis aatikl, wi wahn diskos dehnya kweschanz. Wi wahn aalso kansida how wi ku kantinyu fi wership Jehoava wen wi werk deh anda ban, ahn wat da sohn chrap weh wi need fi avoid.

3. (a) Akaadn tu 2 Korintyanz 11:23-27, weh kaina persikyooshan di apasl Paal mi fays, ahn weh wi laan fahn fi hihn egzampl?

³ If di govament ban wi wership, wi mait tink dat Gaad noh hapi wid wi. Bot memba, persikyooshan noh meenz dat Jehoava beks wid wi. Tek, fi egzampl, di apasl Paal. Wi ku bee shoar dat Gaad neva beks wid hihn. Hihn mi ga di privilij fi rait 14 letaz eena di Kristyan Greek Skripchaz,  ahn hihn da-mi wahn apasl tu peepl a di nayshanz. Stilyet, hihn mi fays terabl persikyooshan. (Reed 2 Korintyanz 11:23-27.) Wi laan fahn di apasl Paal ekspeeryens dat Jehoava alow eevn ih faytful servants fi fays persikyooshan.

4. Wai di werl hayt wi?

⁴ Jeezas mi eksplayn wai wi shuda ekspek peepl fi deh gens wi. Hihn mi seh dat peepl wahn hayt wi bikaaz wee da noh paat a dis werl. (Jan 15:18, 19) Persikyooshan da noh wahn sain dat Jehoava beks wid wi. Insted, ih shoa dat wi di du weh rait!

5. Hyoomanz ga di powa fi stap wi fahn wership Jehoava kompleetli? Pleez eksplayn yu ansa.

⁵ Hyoomanz hoo deh gens wi kyaahn stap wi fahn wership di Almaiti Gaad, Jehoava. Wahn lata peepl chrai, an aala dehn fayl. Mek wi kansida weh mi hapm joorin Werl Waar II. Joorin da taim, eena wahn lata konchri di govament dehn mi-di persikyoot Gaad peepl wahn lat. Di werk a Jehoava Witnisiz mi ban noh onli bai di Nazi paati eena Germany bot aalso bai di govament dehn eena Australia, Canada, an ada konchriz. Stilyet, noatis weh hapm. Eena 1939 wen di waar mi staat, dehn mi ga bowt 72,475 poblishaz werlwaid. Eena 1945 wen di waar mi en, dehn mi ga 156,299 poblishaz bikaaz Jehoava mi bles ih peepl. Di nomba a poblishaz mi moa dan dobl!

6. Weh pazitiv tingz ku hapm wen peepl persikyoot wi? Yooz di egzampl eena di paragraaf.

⁶ Insteda fraitn wi, persikyooshan ku mek wi disaid fi serv Jehoava eevn moa. Fi egzampl, wahn kopl hoo mi ga wahn yong chail mi liv eena wahn konchri wehpaat di govament disaid fi ban wi wership. Insteda geh frayd ahn du les fi Jehoava, di kopl staat tu regyula painyaa. Di waif eevn lef ih jab wehpaat ih mi-di mek gud moni soh dat ih kuda mi painyaa. Di hozban seh dat di ban mi mek peepl waahn noa moa bowt Jehoava Witnisiz. Bikaaz a dis, hihn mi fain it eeziya fi staat Baibl stodiz. Di ban mi ga wahn nada gud rizolt. Wahn elda eena da saym konchri seh dat wahn lata bradaz weh mi stap serv Jehoava bifoa di ban, mi staat tu goh da meetin agen ahn staat tu preech agen.

7. (a) Weh wi laan fahn Leviticus 26:36, 37? (b) Weh yu wahn du wen yu deh anda ban?

 ⁷ Wen wi enimi dehn ban wi werk, dehn di hoap dat wi geh frayd ahn stap serv Jehoava. Apaat fahn di ban, dehn mait spred lai bowt wi, dehn mait sen di polees fi saach wi hows, dehn mait foas wi fi goh da koat, er dehn mait eevn sen som a wi da jayl. Dehn hoap dat wi wahn geh frayd bikaaz dehn aybl fi put wahn fyoo a wi eena jayl. If wee alow dehn fi put fyaa eena wi haat, wi mait eevn staat tu “ban” wi oan wership. Wi noh waahn geh laik dehn wan weh di Baibl taak bowt da Leviticus 26:36, 37. * (Reed.) Wi noh wahn alow fyaa fi sloa wi dong er stap wi fahn wership Jehoava. Wi chros kompleetli eena Jehoava ahn rifyooz fi geh fraitn. (Isa. 28:16) Wi pray tu Jehoava fi gaidans. Bikaaz fi wee Gaad di sopoat wi, wi noa dat nat eevn di moas powaful hyooman govament ku stap wi fahn wership wi Gaad.—Heeb. 13:6.

8-9. (a) Weh disizhan eech Kristyan need fi mek fi ihself er ih famili? (b) Weh wahn help wahn persn fi mek wahn waiz disizhan?

⁸ If di govament eena di konchri wehpaat yoo liv ban wi wership, yu mait wanda if yu shuda moov tu wahn konchri wehpaat dehn noh ga wahn ban. Dis da wahn persnal disizhan weh nobadi ku mek fi yoo. Bifoa yu mek op yu main bowt weh fi du, yu ku stodi weh di Kristyanz bak eena di taim a di apasl dehn mi du wen dehn mi-di fays persikyooshan. Afta Steeven mi geh stoan tu det, di disaiplz eena Jeroosalem mi moov tu Judeeya ahn Samayrya an eevn az far az Foneesha, Saipros, an Antiyak. (Mach. 10:23; Aks 8:1; 11:19) Yu ku aalso stodi weh Paal mi du wen di Kristyanz mi fays persikyooshan agen. Hihn mi mek op ih main fi stay wehpaat peepl neva laik di preechin werk, eevn doa ih kuda mi bee daynjaros fi hihn. Hihn mi du dis bikaaz hihn mi waahn preech di gud nyooz ahn schrentn di bradaz weh mi-di fays persikyooshan.—Aks 14:19-23.

⁹ Weh wi laan fahn dehnya akonk? Wi laan dat eech famili hed need fi mek wahn persnal disizhan bowt weda fi moov er nat. Bifoa ih disaid weh fi du, ih shuda pray ahn den kyaafuli tink bowt how di moov wahn afek ih famili, weda da eena wahn pazitiv er negitiv way. Wen ih kohn tu dis, eech Kristyan mos bee “rispansabl fi how [ih] liv.” (Gal. 6:5) Wi noh fi joj adaz fi di disizhan weh dehn mek.

10. Weh dairekshan di branch aafis ahn di eldaz wahn giv?

¹⁰ How yu ku kantinyu fi wership Jehoava wen wi werk deh anda ban? Di branch aafis wahn giv di loakal eldaz inschrokshanz ahn yoosful sojeshanz bowt how fi geh spirichwal food, how fi meet tugeda fi wership, ahn how fi preech di gud nyooz. If di branch kyaahn kantak di eldaz, den di eldaz wahn help yoo ahn evribadi eena di kangrigayshan fi kantinyu wership Jehoava. Dehn wahn gaid wi bays pahn weh di Baibl ahn weh di poblikayshanz seh.—Mach. 28:19, 20; Aks 5:29; Heeb. 10:24, 25.

11. Wai yu ku bee shoar dat yu wahn aalwayz ga evriting yu need fi kip yu fayt schrang, ahn weh yu ku du fi protek yu Baibl ahn yu poblikayshanz?

 ¹¹ Jehoava pramis dat ih servants wahn ga aal weh dehn need fi kip dehn fayt schrang. (Isa. 65:13, 14; Look 12:42-44) Soh yu ku bee shoar dat fi hihn aaganaizayshan wahn du evriting pasabl fi provaid di spirichwal inkorijment weh yu need. Bot weh yoo ku du? Wen anda ban, fain wahn gud plays fi haid yu Baibl an ada poblikayshanz. Bee kyaaful noh fi lef yu Baibl an ada poblikayshanz—weda da wahn paypa kapi er wahn ilekchranik kapi—eena wahn plays wehpaat ih eezi fi mek dehn fain it. Eech wan a wi mos du weh wi kud fi kip wi fayt schrang.

12. How di eldaz ku aaganaiz meetinz soh dat peepl noh noatis weh wi di du?

¹² Weh wahn hapm tu wi meetin dehn? Di eldaz wahn aaganaiz meetinz eena wahn way soh dat peepl hoo deh gens wi noh wahn noatis it. Di eldaz mait dairek yu fi meet eena smaala groops, ahn dehn wahn praabli eevn chaynj di meetin taim er loakayshan aafn. Yu ku help protek yu bradaz if yu taak kwaiyet wen yu di kohn tu di meetin dehn er wen yu di lef. Yu mait eevn need fi jres eena wahn way weh noh jraa atenshan tu yuself.

13. Weh wi ku laan fahn wi bradaz weh mi deh eena di Soviet Union?

¹³ Wen ih kohn tu di preechin werk, di sichuwayshan wahn difrent eena eech loakayshan. Bot wi lov Jehoava an injai fi tel adaz bowt fi hihn Kingdom, soh wi wahn aalwayz fain wahn way fi preech. (Look 8:1; Aks 4:29) Emily B. Baran, wahn laydi weh stodi hischri, mi koment bowt di preechin werk a Jehoava Witnisiz eena di Soviet Union. Ih seh: “Wen di govament mi tel Jehoava Witnisiz dat dehn mi kyaahn preech tu adaz, di Witnisiz mi staat kanvasayshan wid dehn nayba, werkmayt dehn, ahn frenz. Wen di govament mi sen di Witnisiz tu prizn bikaaz a dis, dehn mi preech tu di priznaz.” Eevn doa dehn werk mi deh anda ban, wi bradaz eena di Soviet Union neva stap preech. If dehn eva ban di preechin werk wehpaat yoo liv, wi pray dat yoo kapi dehnya bradaz egzampl!

14. Weh chrap Psalm 39:1 ku help wi fi avoid?

¹⁴ Bee kyaaful bowt weh yu tel adaz. Joorin wahn ban, wi need fi rekonaiz wen da taim fi “kip kwaiyet.”(Eccl. 3:7) Wi need fi protek sensitiv infamayshan, laik di naymz a wi bradaz ahn sistaz, di loakayshan wehpaat wi meet, how wi du wi preechin werk, ahn how wi geh wi spirichwal food. Wi noh wahn tel dehnya tingz tu peepl weh werk fi di govament er tu wi frenz er famili, weda dehn liv eena fi wee  konchri er eena wahn nada konchri. Kaaz if wi tel dehn, wi ku put wi bradaz eena daynja.—Reed Psalm 39:1. *

15. (a) Weh Saytan wahn chrai fi du tu wi, ahn how wi ku avoid fi hihn chrap?

¹⁵ Noh mek smaal prablemz divaid wi. Saytan noa dat “if wahn famili di fait gens wan anada, dehn noh wahn mek it.” (Maak 3:24, 25) Soh hihn wahn aalwayz chrai fi kaaz prablemz fi divaid wi. Eena da way, hihn hoap dat wi wahn staat tu fait gens wan anada insteda fait hihn.

16. Weh gud egzampl Sista Gertrud Poetzinger mi set?

¹⁶ Eevn machoar Kristyanz need fi bee kyaaful noh fi faal intu dis chrap. Kansida di egzampl a too anointid sistaz, Gertrud Poetzinger an Elfriede Löhr. Dehn mi deh eena prizn wid ada Kristyan sistaz eena wahn Nazi kansenchrayshan kyamp. Gertrud mi geh jelos wen Elfriede yoostu gi inkorijin taaks tu di ada sistaz eena di kyamp. Laytaraan, Gertrud mi feel shaym an ih mi bayg Jehoava fi help. Shee rait: “Wi haftu laan fi aksep it wen adaz beta at sohnting dan wee er ga moa rispansabiliti dan wee.” Weh mi help shee fi stap feel jelos? Gertrud mi foakos pahn Elfriede gud kwalitiz an ih frenli persnaliti. Eena dis way, shee mi get bak ih gud rilayshanship wid Elfriede. Di too a dehn servaiv di kansenchrayshan kyamp ahn serv Jehoava faytful til di en a dehn laif pahn ert. If wi werk haad fi get oava prablemz wid wi bradaz, wi wahn avoid dis chrap weh ku divaid wi.—Kol. 3:13, 14.

17. Wai wi fi aalwayz fala dairekshanz fahn Jehoava aaganaizayshan?

¹⁷ Aalwayz fala dairekshan. If wi mek it wahn habit fi aalwayz fala di dairekshan weh wi geh fahn rispansabl bradaz, wi wahn avoid prablemz. (1 Peet. 5:5) Fi egzampl, eena wahn konchri wehpaat di werk deh anda ban, di rispansabl bradaz mi tel di poblishaz noh fi lef poblikayshanz wid peepl eena di minischri. Bot, wahn painyaa brada mi feel dat hihn noa beta, an ih stil lef poblikayshanz wid di howshoalda dehn. Wat da-mi di rizolt? Wahn lee wail afta dehn mi du sohn infaamal witnisin, di polees stap dehn ahn kweschan dehn. Ih luk laik di polees dehn mi-di fala di bradaz ahn dehn mi aybl fi geh di poblikayshan dehn weh di brada mi-di giv owt. Weh dis ekspeeryens teech wi? Wi need fi fala dairekshan eevn if wi noh gree wid it. Jehoava aalwayz bles wi  wen wi fala di bradaz hoo hihn apoint fi tek di leed monks wi.—Heeb. 13:7, 17.

18. Wai wi shudn mek roolz weh noh nesiseri?

¹⁸ Noh mek roolz weh noh nesiseri. If eldaz mek roolz weh noh nesiseri, dehn wahn mek it haad fi adaz. Joorin di ban da Czechoslovakia, Brada Juraj Kaminský seh dat “afta di rispansabl bradaz ahn lata di eldaz mi geh arestid, som a di bradaz weh neva geh arestid staat tu mek dehn oan roolz fi di poblishaz, ahn dehn mi-di tel dehn weh dehn fi du ahn weh dehn noh fi du.” Jehoava noh gi wi di rait fi mek roolz fi wi bradaz. Sombadi hoo mek roolz weh noh nesiseri noh di protek di bradaz; ih di chrai fi bee di maasta oava ih brada fayt.—2 Kor. 1:24.

19. Akaadn tu 2 Chronicles 32:7, 8 wai wi ku ga korij noh mata weh Saytan du?

¹⁹ Wi mayn enimi, weh da di Devl, noh wahn stap chrai fi persikyoot Jehoava faytful servants. (1 Peet. 5:8; Rev. 2:10) Saytan ahn peepl weh sopoat ahn wahn chrai fi ban wi wership tu Jehoava. Bot eevn if wi frayd, wi wahn neva stap serv Jehoava! (Deut. 7:21) Jehoava deh pahn wi said, ahn hihn wahn kantinyu fi sopoat wi eevn if wi werk geh ban.—Reed 2 Chronicles 32:7, 8. *

20. Weh yoo mek op yu main fi du?

²⁰ Mek wi mek op wi main jos laik di bradaz bak eena di taim a di apasl dehn, hoo mi tel di roola dehn: “Unu joj fi unuself; unu tink seh eena Gaad sait ih beta fi obay man er Gaad? Wi kyaahn help wiself. Wee hafu taak bowt weh wi si wid wi oan too aiy, ahn weh wi yehr wid wi oan too ayz.”—Aks 4:19, 20.