Ai mi baan eena 1935 da Darlaston, England, eena wahn ayrya weh dehn kaal di Blak Konchri. Ih naym laik dat bikaaz a aala di blak smoak fahn di fakchri dehn. Wen Ah mi foa yaaz oal, mi ma ahn mi pa staat stodi di Baibl wid Jehoava Witnisiz. Ahn wen Ah da-mi wahn teenayja, Ai mi kanvins dat dis da di chroot, soh Ah geh baptaiz eena 1952 wen Ah mi 16 yaaz oal.

Rong da saym taim, Ah staat werk da wahn fakchri weh mek han toolz ahn paats fi kaar. Dehn staat chrayn mi fi wahn impoatant pozishan eena di kompani, an Ah mi reeli laik di werk weh Ah mi-di du.

Ah mi haftu mek wahn impoatant disizhan wen wahn serkit oavaseeya mi invait mi fi staat kandok di Kangrigayshan Buk Stodi da mi kangrigayshan da Willenhall. Bot Ah mi haftu disaid weh Ah mi wahn du bikaaz joorin da taim Ah mi-di goh da too kangrigayshan. Joorin di week, Ah wuda goh da di kangrigayshan weh deh kloasa tu wehpaat Ah werk da Bromsgrove, bowt 20 mailz (32 km) fahn mi hows. Ahn pahn di weeken, wen Ah goh bak da mi payrents hows, Ah wuda goh da di kangrigayshan da Willenhall.

Ai mi waahn sopoat Jehoava aaganaizayshan, soh Ah aksep di invitayshan weh di serkit oavaseeya gi mi, eevn doa dis mi meen dat Ah mi wahn haftu lef di jab weh Ah mi injai wahn lat. Ah neva rigret mi disizhan fi mek Jehoava gaid mi laif, an Ah geh fi liv wahn gud laif.

Wail Ah mi-di goh da di kangrigayshan da Bromsgrove, Ah meet wahn priti ahn spirichwal sista weh naym Anne. Wi geh marid eena 1957, ahn wi mi geh wahn lata wandaful asainments fahn Jehoava. Wi geh fi regyula painyaa, speshal painyaa, du serkit werk, ahn serv da Betel. Joorin aal wi yaaz tugeda, Anne mek mi reeli hapi.

Eena 1966, wi mi hapi fi gaahn da di 42nd klaas a Gilyad. Wi mi geh asain fi goh da Malawi,  wahn plays weh lata peepl seh da di waam haat a Africa bikaaz di peepl veri kain ahn haspitabl. Bot wi neva ekspek dat wi mi wahn kyaahn stay deh fi lang.

Wi reech Malawi pahn Febiweri 1, 1967. Wi spen di fers mont di laan di langwij, an afta dat wi staat du dischrik werk. Wi mi jraiv wahn Kaiser Jeep weh sohn peepl mi tink wi kuda jraiv eniway, eevn chroo di riva. Bot dat neva chroo, wi kuda mi onli jraiv it chroo shalo waata. Sohntaim, wi wuda stay eena wahn tach hows weh wi mi need fi put wahn taap anda di roof joorin rayni seezn. Da mi wahn schresful way fi bigin wi mishineri asainment, bot wi mi lov it!

Eena Aypril, Ah mi riyalaiz dat soon di govament mi wahn staat tu gi wi chrobl. Ah mi hyaa wahn speech pahn di rayjo weh di prezident a Malawi, Dr. Hastings Banda, mi giv. Hihn mi seh dat Jehoava Witnisiz noh pay taks ahn dat wi kaaz prablemz fi di govament. Af koars, weh hihn seh da neva chroo. Wi mi noa dat di govament neva laik dat wi neva ga notn fi du wid palitiks, an espeshali dat wi neva bai di membaship kyaad fi dehn politikal paati.

Bai Septemba, wi mi reed eena di nyoozpaypa dat di prezident seh di bradaz di kaaz chrobl evriway wehpaat dehn deh. Hihn mi anonks dat di govament mi wahn soon ban Jehoava Witnisiz. Soh pahn Aktoaba 20, 1967, dehn ban wi werk. Lee wail afta dat, sohn polees an imigrayshan aafisa mi kohn da di branch aafis fi shet it dong ahn fi kik di mishineriz owta di konchri.

Afta wi mi eena jayl fi chree dayz, dehn sen wi  da Mauritius, wahn konchri weh Britain kanchroal. Bot di govament da Mauritius neva waahn wi stay deh az mishineriz. Soh wi geh wahn nyoo asainment fi goh da Rhodesia, weh da Zimbabwe now. Wen wi reech deh, wi meet wahn imigrayshan aafisa weh mi reeli meen weh rifyooz fi mek wi goh eena di konchri. Ih tel wi: “Unu kyaahn stay ya da Malawi. Dehn neva waahn unu stay da Mauritius, ahn now unu onli deh ya bikaaz dehn noh waahn unu stay eena dehn konchri.” Anne mi staat tu krai. Wi mi feel laik nobadi neva waahnt wi! Rait den, Ah mi feel laik fi jos goh bak hoam da England. Fainali, di imigrayshan aafisa dehn mek wi stay oavanait da di branch aafis, bot dehn tel wi dat wi mi haftu goh bak da fi dehn hedkwaataz di neks day. Eevn doa wi mi taiyad, wi mi wayt fi si how Jehoava mi wahn help wi. Di neks aftanoon, sodn-wan wi geh permishan fi stay da Zimbabwe az vizitaz. Ah wahn neva ferget how Ah mi feel pahn da day. Ai mi kanvins dat Jehoava mi-di gaid wi.

Da di Zimbabwe branch aafis, Ah mi geh asain fi werk eena di Servis Dipaatment fi tek kayr a di frenz da Malawi ahn Mozambique. Di bradaz weh mi deh da Malawi mi-di goh chroo sohn terabl persikyooshan. Paat a mai jab da-mi fi chranslayt di ripoat dehn fahn di serkit oavaseeya dehn da Malawi. Ahn wan eevnin wen Ah mi-di werk layt fi finish wahn ripoat, Ah staat tu krai wen Ah reed bowt di harabl abyoos weh di bradaz ahn sistaz mi-di goh chroo. * Bot, ih mi inkorij mi wahn lat fi si dat dehn mi-di stay faytful, laayal, ahn dehn neva giv op.—2 Kor. 6:4, 5.

Wi mi du evriting wi kud fi mek shoar dat wi bradaz weh mi stay da Malawi ahn wi bradaz weh mi haftu ron gaahn da Mozambique sayka vailens geh di poblikayshan dehn. Di chranslayshan teem fi di Chichewa langwij, di moas kaman langwij da Malawi, mi moov tu wahn big faam weh wahn brada mi ga da Zimbabwe. Hihn mi hapi fi bil sohn hows ahn wahn aafis fi dehn. Ahn rait deh dehn mi kantinyu dehn impoatant werk fi chranslayt di poblikayshan dehn.

Wi mi mek araynjment fi mek di serkit oavaseeya dehn fahn Malawi kohn da Zimbabwe evri yaa fi di Chichewa dischrik kanvenshan. Wen dehn mi dehdeh, dehn wuda geh di taak owtlain dehn fi di kanvenshan. Ahn pahn dehn way bak tu Malawi, dehn wuda chrai dehn bes fi shayr dehn wid di bradaz. Wahn yaa wen deh mi vizit Zimbabwe, wi mi aaganaiz wahn Kingdom Minischri Skool fi inkorij dehndeh serkit oavaseeya.

Eena Febiweri 1975, Ah mi chravl da Malawi fi vizit di Witnisiz weh mi ron gaahn da di kyamp dehn weh deh da Mozambique. Dehnya bradaz mi-di fala di laytes dairekshan fahn Jehoava aaganaizayshan, inkloodin di nyoo araynjment fi ga wahn badi a eldaz. Dehnya nyoo eldaz mi mek araynjments fi giv poblik taak, diskos di dayli teks ahn Di Wachtowa, an eevn fi ga asembli an ada tingz laik dat. Dehn aaganaiz di kyamp jos laik wahn kanvenshan, wid difrent dipaatment fi kleenin, fi shayr owt food, ahn fi sikyoariti. Wid Jehoava blesin dehnya faytful bradaz mi du wahn lat, an afta Ah mi vizit dehn Ah mi feel soh inkorij.

Eena di layt 1970’s, di Zambia branch aafis staat tu tek kayr a di frenz da Malawi. Bot Ah mi stil tink wahn lat bowt di bradaz da Malawi, soh mee an adaz wuda pray fi dehn. Bikaaz Ah da-mi wahn memba a di Zimbabwe Branch Komiti, lata taim Ah wuda meet wid bradaz fahn werl hedkwaataz, lang wid ada bradaz fahn Malawi, South Africa, ahn Zambia. Evri taim, wi wuda aks di saym kweschan, “Wat els wi ku du fi di bradaz da Malawi?”

Afta wahn wail, di persikyooshan mi eez op. Di bradaz weh mi lef Malawi mi-di kohn bak lee bit bai lee bit, ahn dehn wan weh mi stay  mi-di ekspeeryens les persikyooshan. Sohn ada konchri mi staat alow Jehoava Witnisiz fi preech ahn meet tugeda, ahn dehn tek aaf di rischrikshan weh dehn mi put pahn dehn. Afta dat, Mozambique mi du di saym ting eena 1991. Bot wi mi-di wanda, ‘Wen Jehoava Witnisiz da Malawi wahn geh fi bee free?’

Afta wahn wail, di politikal sichuwayshan mi chaynj da Malawi, an eena 1993 di govament mi en di ban weh dehn mi put pahn Jehoava Witnisiz. Soon afta dat, Ah mi-di taak tu wahn mishineri ahn hihn mi aks mi, “Yoo gwehn bak da Malawi?” Ah mi 59 yaaz oal, soh Ah tel ahn, “Noh, Ai don tu oal!” Bot da saym day, di Govanin Badi sen mi wahn mesij fi invait wi fi goh bak.

Wi mi lov wi asainment da Zimbabwe, soh dis da-mi wahn haad disizhan fi wi. Zimbabwe da-mi wi hoam, wi mi don setl deh ahn wi mi ga gud frenz deh. Di Govanin Badi mi reeli lovin, ahn dehn tel wi dat wi kuda stay da Zimbabwe if wi mi waahn. Soh ih kuda mi bee eezi fi mek wi oan disizhan fi stay da Zimbabwe. Bot Ah memba di tink bowt how Aybraham ahn Saara mi lef dehn komfatabl hows wen dehn mi don oal aredi soh dat dehn kuda mi obay weh Jehoava aks dehn fi du.—Gen. 12:1-5.

Soh wi disaid fi fala di dairekshan weh Jehoava aaganaizayshan gi wi. Wi gaahn bak da Malawi pahn Febiweri 1, 1995, egzakli 28 yaaz afta wi mi fers reech. Dehn mi asain mee ahn too ada bradaz fi bee paat a di nyoo Branch Komiti, ahn soon wi mi-di werk haad fi aaganaiz di werk a Jehoava Witnisiz.

Da mi wahn blesin fi si how Jehoava mek di werk groa soh faas! Di amonk a poblishaz gaan op fahn 30,000 eena 1993 tu moa dan 42,000 eena 1998. * Di Govanin Badi mi aproov fi mek wahn nyoo branch aafis tek kayr a di lata werk weh wi mi gat fi du. Wi mi geh 30 aykaz a lan da Lilongwe, an Ai mi geh asain fi werk pahn di kanschrokshan komiti.

Brada Guy Pierce, wahn memba a di Govanin Badi, mi gi wahn taak fi dedikayt di nyoo branch aafis eena May 2001. Moa dan too towzn loakal bradaz ahn sistaz mi kohn, ahn moas a dehn mi baptaiz fi moa dan 40 yaaz.  Dehnya faytful bradaz ahn sistaz gaahn chroo harabl persikyooshan fi yaaz wen dehn mi deh anda ban. Dehn neva ga lata moni, bot dehn mi ga wahn lata fayt ahn wahn schrang rilayshanship wid Jehoava. Ahn now dehn mi hapi fi si di nyoo Betel. Evriway dehn gaan eena di nyoo Betel, dehn mi sing di Kingdom sang dehn African stail. Ih mi reeli waam mi haat fi si dat. Dis da proof dat Jehoava reeli bles dehn wan weh stay faytful ahn bayr op anda persikyooshan.

Afta dehn mi finish bil di branch, Ah mi hapi fi geh di asainment fi dedikayt Kingdom Haal. Di kangrigayshan dehn da Malawi mi-di benifit fahn di araynjment weh di aaganaizayshan ga fi bil Kingdom Haal reeli faas eena plays weh di bradaz noh ga lata moni. Bifoa dat, di bradaz dehn yoostu meet anda sohn lee shelta weh mek owta eucalyptus chree. Dehn wuda weev graas fi kova di roof ahn mek sohn bench owta mod, ahn wans di mod jrai dehn kuda mi sidong pahn dehn fi meetin. Now, dehn mek wahn oavn ahn dehn werk haad fi bayk lata brik soh dat dehn ku bil sohn byootiful nyoo plays wehpaat dehn ku ga dehn meetin. Di bradaz prifaa fi yooz bench eena di Kingdom Haal bikaaz yu ku aalwayz mek spays fi wan moa persn pahn wahn bench!

Ih mi eksaitin fi si how Jehoava mek peepl groa fi bee machoar Kristyanz. Di yong African bradaz mi reeli impres mi, kaaz dehn mi wilin fi help ahn dehn mi kwik fi laan wahn lat fahn di chraynin weh dehn mi geh fahn Jehoava aaganaizayshan. Bikaaz a dat, dehn kuda mi tek aan moa rispansabiliti da Betel an eena dehn kangrigayshan. Di kangrigayshan dehn mi geh sohn nyoo serkit oavaseeya fahn eena di ayrya. Wahn lata dehn mi marid ahn tugeda wid dehn waif dehn mi gi di kangrigayshan wahn lata inkorijment. Dehnya kopl disaid noh fi ga pikni eena dis sistem soh dat dehn ku serv Jehoava moa, eevn doa wahn lata peepl an eevn fi dehn famili ekspek dehn fi ga pikni.

Afta wi mi deh da Africa fi 52 yaaz, Ah staat tu ga sohn helt prablemz. Di Govanin Badi mi aksep di rekomendayshan fahn di Branch Komiti fi mek wi geh asain bak da di branch da Britain. Wi mi sad fi haftu lef dis asainment weh wi mi lov wahn lat, bot di Betel famili da Britain di tek gud kayr a wi eena wi oal ayj.

Ai kanvins dat fi alow Jehoava fi gaid mi eena mi laif da di bes disizhan Ai kuda mi eva mek. If Ai mi pen pahn mi oan andastandin, mai laif mi wahn ton owt difrent. Bot Jehoava mi noa egzakli how fi ‘gaid mi eena di rait way.’ (Prov. 3:5, 6) Az wahn yong man, Ai mi eksaitid fi laan how fi werk da wahn big kompani. Bot Jehoava aaganaizayshan gi mi wahn beta kareeya. Ah geh fi serv Jehoava fi meni yaaz, an Ah stil di serv ahn now. Fi mee, dat da di bes ting Ah kuda eva du, an ih mek Ah ga wahn hapi laif.