1. How wi shuda feel bowt di fak dat Jehoava alow wi fi pray tu ahn?

 JEHOAVA, di Wan weh kriyayt hevn an ert, gi wi wahn preshos gif. Hihn alow wi fi pray tu ahn. Jos tink bowt it: Wi ku poar owt wi haat tu Jehoava eni taim an eena eni langwij, ahn wi noh haftu mek wahn apointment. Wi ku pray tu wi lovin Faada eevn if wi deh eena wahn haaspital bed er eena prizn. Ahn wi ku bee shoar dat Jehoava lisn tu wi. Wi soh tankful fi dis gif, noh chroo?

2. How King Dayvid mi shoa dat hihn cherish di privilij fi pray?

² King Dayvid mi cherish fi hihn privilij fi pray. Hihn mi sing tu Jehoava ahn seh: “Mek mi pryaaz bee laik insens weh geh pripyaa fronta yu.” (Ps. 141:1, 2) Eena Dayvid taim, di prees dehn yoostu tek dehn taim fi pripyaa di hoali insens weh dehn mi yooz eena chroo wership. (Ex. 30:34, 35) Soh weh Dayvid mi-di seh da dat ih mi wahn tink gud bowt weh ih mi waahn tel Jehoava wen ih pray tu ahn. Ahn dat da egzakli weh wee waahn du tu. Wi waahn wi pryaaz mek Jehoava hapi.

3. Weh shuda bee fi wee atichood wen wi pray tu Jehoava, ahn wai?

³ Wen wi pray tu Jehoava, wi need fi shoa lata rispek. Jos tink bowt di wandaful vizhan dehn weh Aizaiya, Izeekyel, Danyel, ahn Jan mi get. Aala dehndeh vizhan difrent fahn eech ada, bot dehn ga sohnting in kaman. Aala dehn diskraib Jehoava az wahn powaful  King. Aizaiya “mi si Jehoava di sidong pahn wahn hai hai chroan.” (Isa. 6:1-3) Izeekyel si Jehoava di sidong pan ih chariyat, an aal rong ahn ih mi brait laik wahn raynboa. (Ezek. 1:26-28) Danyel mi si “di Aynshent a Dayz” pan Ih chroan, an Ih kloaz mi wait ahn faiya mi-di kom owt fan Ih chroan. (Dan. 7:9, 10) Ahn Jan si Jehoava di sidong pahn wahn chroan weh mi ga wahn raynboa weh mi-di shain laik wahn emeral stoan aal rong it. (Rev. 4:2-4) Wen wi meditayt pahn how wandaful Jehoava wandaful, ih rimain wi dat da wahn privilij fi pray tu ahn, an dat ih impoatant fi shoa lata rispek wen wi pray tu ahn. Bot how wi shuda pray?

4. Weh wi laan bowt pryaa fahn weh Jeezas mi seh da di biginin a ih pryaa da Machyu 6:9, 10?

⁴ Reed Machyu 6:9, 10. Eena di Sermon Pahn di Mongtin, Jeezas mi teech ih disaiplz fi pray eena wahn way weh wahn mek Jehoava hapi. Afta Jeezas mi seh “dis da how unu mos pray,” hihn menshan di moas impoatant tingz fers eena ih pryaa. Hihn mi pray fi mek Gaad naym bee hoali; fi mek di Kingdom kom, weh wahn dischrai evribadi weh deh gens Jehoava; ahn fi mek aal di gud tingz weh Hihn mi wahn du fi di ert ahn fi peepl eena di fyoocha kohn chroo. Wen wi aks Gaad fi dehnya ting eena wi pryaaz, wi shoa dat weh Gaad waahn impoatant tu wee tu.

5. How wi noa dat Jehoava lisn tu wi wen wi pray bowt persnal tingz?

⁵ Eena di neks paat a ih pryaa, Jeezas mi shoa wi dat ih gud fi mek wi pray bowt persnal tingz. Wi ku aks Jehoava fi gi wi di food weh wi need fi di day, fi fergiv wi sin dehn, fi protek wi fahn temtayshan, ahn fi reskyu wi fahn di wikid wan. (Mach. 6:11-13) Wen wi aks Jehoava fi dehndeh tingz, wi shoa ahn dat wi andastan dat wi need fi hihn help, ahn wi di shoa ahn dat wi waahn ih bee hapi wid wi.

6. Da onli di tingz weh Jeezas mi inklood eena ih pryaa wi ku pray bowt? Pleez eksplayn yu ansa.

⁶ Jeezas neva ekspek fi hihn falowaz fi  kapi fi hihn pryaa werd fi werd evri taim. Wen Jeezas mi seh ada pryaaz, hihn mi pray bowt tingz weh mi-di wori ahn da taim. (Mach. 26:39, 42; Jan 17:1-26) Saym way soh, wee ku pray bowt tingz weh wori wi. Fi egzampl, wen wi haftu mek wahn disizhan, wi ku pray an aks Jehoava fi gi wi wizdom an andastandin. (Ps. 119:33, 34) Wen wi wahn staat wahn asainment weh noh eezi, wi ku pray tu Jehoava an aks ahn fi help wi andastan how fi du wi asainment. (Prov. 2:6) Payrents ku pray fi dehn pikni, pikni ku pray fi dehn payrents, an aala wi shuda pray fi wi Baibl styoodent dehn ahn fi enibadi els weh wi preech tu. Bot wen wi pray, wi noh onli fi aks Jehoava fi tingz.

7. Wai wi shuda prayz Jehoava eena wi pryaaz?

⁷ Wen wi pray, wi shuda memba fi prayz Jehoava, kaaz nobadi dizerv moa prayz dan fi wee Gaad. Hihn “gud ahn redi fi fergiv,” ahn pahn tap a dat, ih “mersiful ahn ga kompashan.” Ih “noh eezi fi geh beks,” an ih “ful op a laayal lov ahn chroot.” (Ps. 86:5, 15) Fi shoar, wi ga gud reezn fi prayz Jehoava fi weh hihn da wahn wandaful Gaad ahn fi weh ih du.

8. Wat da sohn tingz wi ku tank Jehoava fa? (Psalm 104:12-15, 24)

⁸ Da chroo, wi waahn prayz Jehoava eena wi pryaaz, bot wi waahn tank ahn fi aal di wandaful tingz weh ih gi wi tu. Fi egzampl, wi ku tank ahn fi aala di kalaful flowaz weh wi si, di lata nais food weh wi eet, ahn di gud frenz weh wi gat. Wi lovin Faada gi wi aala dehnya tingz ahn lat moa bikaaz hihn waahn wi bee hapi. (Reed Psalm 104:12-15, 24.) * Bot weh moa impoatant dan dat da fi tank Jehoava fi aala di spirichwal  food weh ih gi wi ahn fi di wandaful hoap weh wi ga fi di fyoocha.

9. Weh ku help wi memba fi tank Jehoava? (1 Tesaloanyanz 5:17, 18)

⁹ Ih ku bee eezi fi ferget fi tank Jehoava fi evriting weh ih du fi wi. Bot weh ku help wi fi memba? Wi ku mek wahn lis a di tingz weh wi aks Jehoava fa, an evri now an agen wi ku chek da lis fi si how Jehoava ansa wi pryaaz. Den, wi ku pray ahn tank Jehoava fi di help weh ih gi wi. (Reed 1 Tesaloanyanz 5:17, 18.) Tink bowt dis: Wi feel hapi ahn wi feel adaz lov wi wen dehn shoa dat dehn apreeshiayt wi ahn dehn tankful fi weh wi du. Jos laik dat, wen wi memba fi tank Jehoava fi ansa wi pryaaz, wi mek ahn hapi. (Kol. 3:15) Bot wi ga wahn nada impoatant reezn fi tank wi Gaad.

10. Akaadn tu 1 Peeta 2:21, wai wi ku tank Jehoava fi sen Jeezas tu di ert?

¹⁰ Reed 1 Peeta 2:21. Wi shuda tank Jehoava bikaaz ih sen ih onli Son fi teech wi. Wen wi stodi bowt Jeezas laif, wi laan wahn lat bowt Jehoava ahn how wi ku mek ahn hapi. If wi shoa dat wi ga fayt eena Jeezas sakrifais, wi ku ga wahn kloas rilayshanship wid Jehoava an injai pees wid Ahn.—Roam. 5:1.

11. Wai wi pray tu Jehoava eena Jeezas naym?

¹¹ Wi tank Jehoava bikaaz wi ku pray tu ahn eena di naym a fi hihn Son. Jehoava yooz Jeezas fi gi wi weh wi aks ahn fa. Ahn hihn lisn tu wi pryaaz an ansa dehn wen wi pray eena Jeezas naym. Jeezas mi eksplayn: “Wateva unu aks fa eena mai naym, Ah wahn giv it tu unu, soh dat di Son ku giv aana tu di Faada.”—Jan 14:13, 14.

12. Weh ada reezn wi ga fi tank Jehoava fi ih Son?

¹² Jehoava fergiv wi sin dehn bikaaz a Jeezas ransom sakrifais. Di Baibl seh dat Jeezas da wi “hai prees” weh “di sidong pahn di rait han said a di chroan a di grayt Gaad eena hevn.” (Heeb. 8:1) Jeezas da wi “helpa wid di Faada.” (1 Jan 2:1) Wi tank Jehoava dat hihn gi wi wahn Hai Prees weh andastan wi weeknis dehn ahn weh “taak tu Gaad fi wee”! (Roam. 8:34; Heeb. 4:15) Wi noh perfek, soh if da neva fi Jeezas sakrifais, wi mi wahn kyaahn pray tu Jehoava. Wi kyaahn stap tank Jehoava fi dis preshos gif weh ih gi wi—dis gif weh da fi hihn dyaa Son!

13. Pahn di nait bifoa Jeezas ded, how ih mi shoa dat ih lov ih disaipl dehn?

¹³ Pahn di nait bifoa Jeezas ded, ih mi pray wahn lang taim fi ih disaipl dehn. Ih mi aks ih Pa fi “protek dehn fahn Saytan.” (Jan 17:15) Dat shoa wi jos humoch Jeezas lov ih disaipl dehn! Eevn doa hihn mi wahn soon sofa wahn lat, hihn stil mi-di wori bowt fi hihn apasl dehn.

14. How wi ku shoa dat wi lov wi bradaz ahn sistaz?

¹⁴ Jos laik Jeezas, wi noh tink onli bowt di tingz weh wee need, bot wi pray regyula fi wi bradaz ahn sistaz tu. Wen wi du dat, wi obay di koman weh Jeezas gi wi fi lov wan anada ahn wi shoa Jehoava humoch wi lov wi bradaz ahn sistaz. (Jan 13:34) Ahn da noh wahn ways a taim fi pray fi wi bradaz ahn sistaz, bikaaz dat ku help dehn wahn lat. Di Baibl seh dat “wen wahn raichos man pray haad, dat powaful an ih ku reeli help peepl.”—Jay. 5:16.

15. Wai wi bradaz ahn sistaz need wi fi pray fi dehn?

 ¹⁵ Wi bradaz ahn sistaz need wi fi pray fi dehn bikaaz dehn fays lata chraiyalz. Wi ku aks Jehoava fi help dehn wen dehn di deel wid wahn nachral dizaasta, waar, persikyooshan, siknis, er eni ada prablem. Wi ku aalso pray fi wi bradaz ahn sistaz weh di werk soh haad di du rileef werk. Yu mait noa sohnbadi weh di deel wid dehndeh kaina chalenjiz. Soh wen yu pray, wai yu noh goh hed ahn menshan dehn bai naym? Wi shoa dat wi reeli lov wi bradaz wen wi aks Jehoava fi help dehn bayr op.

16. Wai wi shuda pray fi dehn wan weh di tek di leed monks wi?

¹⁶ Di bradaz weh tek di leed eena di kangrigayshan reeli hapi dat wi menshan dehn eena wi pryaaz, ahn dehndeh pryaaz help dehn. Di apasl Paal mi feel da saym way. Hihn mi rait: “Pahn tap a dat, unu mos pray fi mee, soh dat wen Ah oapm mi mowt Ah wahn ku taak bowt di hoali seekrit a di gud nyooz widowt frayd.” (Ifee. 6:19) Tudeh, wi ga lata bradaz weh di werk haad fi tek di leed monks wi. Ahn wen wi aks Jehoava fi sopoat di werk weh dehn du, wi shoa dat wi lov dehn wahn lat.

17-18. Wen dehn mait aks wi fi pray fi adaz, ahn weh wi shuda memba?

¹⁷ Sohntaim dehn mait aks wi fi seh wahn pryaa fi sohnbadi els. Fi egzampl, wahn sista weh di kandok wahn Baibl stodi mait aks di sista weh ih kehr wid ahn fi seh wahn pryaa. Di sista weh geh invaitid mait noh noa di styoodent soh gud, soh ih mait bee beta if shee pray da di en a di stodi. Da way deh, ih wahn eeziya fi mek ih noa weh fi seh wen ih di pray fi di Baibl styoodent.

¹⁸ Dehn mait aks wahn brada fi pray da wahn meetin fi feel servis er da wahn kangrigayshan meetin. Bradaz weh ga dis privilij shuda memba di perpos a di meetin. Dehn noh fi yooz pryaa fi karek er teech di kangrigayshan er fi mek eni anonksment. Da moas a wi meetin dehn, dehn ga faiv minits fi di sang ahn  pryaa. Soh di brada weh di pray noh need fi seh wahn ‘lang pryaa,’ espeshali da di biginin a di meetin.—Mach. 6:7.

19. Weh wahn help wi fi bee redi fi Jehoava day a jojment?

¹⁹ Wi need fi mek pryaa bee wan a di moas impoatant ting eena wi laif bikaaz Jehoava day a jojment deh kloas. Noatis weh Jeezas mi seh bowt dis: “Soh den, unu mos kip pahn di wach ahn kantinyu bayg Gaad wid aala unu haat fi sayv unu fahn aala dehnya tingz weh wahn haftu hapm.” (Look 21:36) If wi pray regyula, wi fayt wahn bee schrang ahn wi wahn redi wen Gaad day a jojment kohn.

20. Weh wi ku du fi mek wi pryaaz bee laik insens weh smel sweet?

²⁰ Weh wi laan eena dis aatikl? Wi soh tankful dat wi ga di privilij fi pray tu Jehoava. Di moas impoatant tingz weh wi shuda pray bowt shuda bee tingz weh ga fi du wid Jehoava wil. Wi aalso tankful fi Gaad Son ahn fi hihn Kingdom, ahn wi pray fi wi bradaz ahn sistaz. Jehoava waahn wi pray fi di tingz weh wi need evri day, an ih waahn wi pray fi help wi kip wi fayt schrang. Wen wi tink bowt weh wi wahn seh bifoa wi pray, wi shoa dat wi tankful fi dis wandaful privilij weh Jehoava gi wi. Jehoava wahn si wi pryaaz laik insens weh smel sweet, ahn hihn wahn pleez wid dehn.—Prov. 15:8.