STODI AATIKL 28
Gaad Kingdom Don Di Rool!
“Di Kingdom a Gaad ahn di wan weh hihn chooz fi bee di Krais di rool oava hyoomanz.”—REV. 11:15.
SANG 22 Pray Mek di Kingdom Kohn!
WEH WI WAHN DISKOS? *
1. Weh aala di prablemz eena di werl proov, ahn wai wi ku seh dat?
YOO fain it haad fi bileev dat tingz wahn geh beta wen yu si aala di prablemz eena di werl tudeh? Famili membaz noh eevn get lang wid wan anada er lov eech ada nohmoh. Peepl di geh moa ahn moa vailent ahn dehn onli tink bowt dehnself. Wahn lata peepl fain it haad fi chros adaz weh ga atariti. Bot akchwali, aala dehnya tingz ku help wi fi bee shoar dat tingz wahn geh beta. Wai? Bikaaz peepl di bihayv jos laik how di Baibl seh peepl mi wahn bihayv eena “di laas dayz.” (2 Tim. 3:1-5) No aanis persn ku seh dat dis prafesi noh di kohn chroo. Ahn di moa wi si dis prafesi di kohn chroo, di moa proof wi get dat Jeezas don staat tu rool az King a Gaad Kingdom. Bot dis da jos wan prafesi owta aala di prafesi dehn bowt Gaad Kingdom. Mek wi luk pahn sohn ada prafesi weh kohn chroo eena di paas fyoo yaaz soh dat wi ku schrentn wi fayt.
Jos laik how di peesiz a wahn pozl fit tugeda, Baibl prafesi fahn di buk a Daniel ahn di buk a Revilayshan fit tugeda fi help wi andastan tingz weh wahn soon hapm akaadn tu Jehoava perpos (Paragraaf 2)
2. Weh wi wahn kansida eena dis aatikl, ahn wai? (Koment pahn di picha pahn di kova.)
2 Eena dis aatikl, wi wahn kansida (1) wahn prafesi weh help wi andastan wen Gaad Kingdom staat tu rool, (2) sohn prafesi weh help wi rekonaiz dat Jeezas da di King a Gaad Kingdom, ahn (3) sohn prafesi weh shoa wi how Gaad Kingdom wahn dischrai aala ih enimi dehn. Wi wahn si how aala dehnya prafesi fit tugeda laik wahn pozl. Wen wi luk pahn di hoal picha wi wahn si dat di en di kohn soon, jos laik weh Jehoava pramis.
HOW WI NOA WEN DI KINGDOM STAAT ROOL?
3. Weh di prafesi da Daniel 7:13, 14 proov bowt di King a Gaad Kingdom?
3 Di prafesi da Daniel 7:13, 14 proov dat Jeezas Krais da di bes Persn fi rool Gaad Kingdom. Peepl fahn evri nayshan wahn hapi fi “serv ahn,” an nobadi els wahn rool afta hihn. Wahn nada prafesi eena di buk a Daniel seh dat Jeezas mi wahn staat rool az King a da Kingdom da di en a wahn taim peeryad weh di prafesi kaal sevn taimz. Yu tink ih pasabl fi mek wi noa wen Jeezas mi staat rool az King?
4. How Daniel 4:10-17 help wi fi fain owt wich yaa Jeezas mi staat rool az King? (Koment pahn di futnoat.)
4 Reed Daniel 4:10-17. * Di “sevn taimz” stan fi wahn taim peeryad a 2,520 yaaz. Da taim peeryad mi staat eena 607 B.C.E. wen di Babiloanyan dehn mi kyapcha Jeroosalem laas king ahn tek ahn aafa Jehoava chroan. Da taim peeryad mi en eena 1914 C.E. wen Jehoava mek Jeezas—“di wan weh ga di leegal rait”—di King a Gaad Kingdom. *—Ezek. 21:25-27.
5. Wat da wan way how di prafesi bowt di “sevn taimz” ku help wi?
5 How dis prafesi ku help wi? If wi andastan di prafesi bowt di “sevn taimz,” wi wahn noa fi shoar dat Jehoava pramis dehn aalwayz kohn chroo pahn taim. Jehoava don set di taim wen Jeezas mi wahn staat rool az King. Ahn wen da taim mi kohn, hihn mek ih hapm. Saym way soh, hihn wahn mek shoar dat aal di ada prafesi dehn kohn chroo da di taim weh hihn disaid. Soh fi shoar Jehoava day “noh wahn bee layt!”—Hab. 2:3.
HOW WI NOA DAT KRAIS DA DI KING A GAAD KINGDOM
6. (a) Weh di hapm pahn ert weh proov dat Krais di rool da hevn? (b) How Revilayshan 6:2-8 proov dat dis da chroo?
6 Wen Jeezas mi nayli finish ih minischri pahn ert, ih tel ih falowaz bowt sohn tingz weh mi wahn hapm aal rong di werl eena di fyoocha. Dehndeh prafesi mi wahn help ih falowaz fi noa wen hihn staat rool da hevn. Som a di tingz weh hihn mi menshan da waar, famin, an ertkwayk. Hihn mi aalso seh dat dehn mi wahn ga dizeez “eena wahn lata plays,” ahn di COVID-19 pandemik da wahn gud egzampl a dat. Di Baibl kaal dehnya tingz “di sain” dat Krais kohn bak fi deh wid ih falowaz. (Mach. 24:3, 7; Look 21:7, 10, 11) Moa dan 60 yaaz afta Jeezas mi ded ahn gaahn bak da hevn, hihn mi gi di apasl Jan moa proof dat dehnya tingz mi wahn hapm. (Reed Revilayshan 6:2-8.) Aala dehnya ivent tek plays sins Jeezas staat tu rool az King a Gaad Kingdom eena 1914.
7. Wai soh moch bad tingz hapm pahn ert afta Jeezas staat rool az King?
7 Wai tingz pahn ert mi geh wers wen Jeezas staat rool az King? Revilayshan 6:2 menshan wahn impoatant deetayl. Ih tel wi dat di fers ting weh Jeezas mi du afta hihn staat rool az King da-mi fi fait eena wahn waar. Bot da hoo ih mi fait gens? Ih mi fait gens di Devl ahn fi hihn deemon dehn. Eena Revilayshan chapta 12, wi laan dat Saytan mi looz da fait, ahn hihn an ih deemon dehn mi geh chroa dong pahn di ert. Bikaaz a dat, Saytan beks bad an ih di atak peepl ahn kaaz lata “chrobl fi di ert.”—Rev. 12:7-12.
Wi noh hapi wen bad tingz hapm, bot wen wi si Baibl prafesi di kohn chroo tudeh, ih proov dat Gaad Kingdom don di rool (Paragraaf 8)
8. How wi benifit wen wi si di prafesi dehn bowt di Kingdom kohn chroo?
8 How dehnya prafesi ku help wi? Wen wi si di tingz weh di hapm rong di werl ahn how peepl atichood di chaynj ahn geh wers, ih help wi fi andastan dat Jeezas da King aredi. Soh, insteda geh beks wen wi si how peepl di geh moa selfish ahn kruwil, wi need fi memba dat di way dehn bihayv di shoa wi dat Baibl prafesi di kohn chroo. Gaad Kingdom di rool now fi chroo! (Ps. 37:1) An az Armagedon geh kloasa, wi ku ekspek dat tingz eena di werl wahn kip di geh wers. (Maak 13:8; 2 Tim. 3:13) Wi soh tankful dat wi lovin Faada help wi fi andastan wai wi ga soh moch prablemz eena dis werl, noh chroo?
HOW GAAD ENIMI DEHN WAHN GEH DISCHRAI
9. Weh di prafesi da Daniel 2:28, 31-35 seh bowt di laas werl powa, ahn wen ih mi staat rool?
9 Reed Daniel 2:28, 31-35. * Wee di si dis prafesi di kohn chroo tudeh. Eena wahn jreem, Nebyukadneza mi si weh mi wahn hapm eena di “laas dayz,” afta Krais staat tu rool. Jeezas enimi dehn pahn ert mi wahn inklood di laas werl powa weh di Baibl taak bowt, weh da di “fut dehn weh mi mek owta aiyan ahn klay.” Dis werl powa don di rool aredi. Ih mi staat rool joorin Werl Waar I wen Britain ahn di United States mek wahn speshal agreement ahn staat tu werk kloas tugeda az wan werl powa. Di stachu eena Nebyukadneza jreem gi wi at lees too deetayl bowt dis werl powa weh mek ih stan owt az difrent fahn aal di res a werl powa bifoa it.
10. (a) How Danyel prafesi bowt Britain ahn di United States di kohn chroo tudeh? (b) Weh daynja wi need fi avoid? (Koment pahn di baks “ Wach Owt fi di Klay!”)
10 Mek wi si di fers deetayl weh mek dis laas werl powa stan owt az difrent. Eena Nebyukadneza jreem, da salid metal laik goal ahn silva mi stan fi di ada werl powa dehn. Bot dis werl powa mek owta aiyan ahn klay miks tugeda. Di klay reprizent di kaman peepl. (Dan. 2:43) Tudeh, ih klyaa fi si dat di way how dehnya peepl afek difrent ilekshan, kampayn fi hyooman raits, proates, ahn layba yoonyan mek it haad fi di leedaz a dis werl powa du weh dehn waahn.
11. Weh deetayl mek wi chros dat wi di liv joorin di taim a di en?
11 Di sekant deetayl da di fak dat di fut a di big stachu stan fi di laas werl powa weh di Baibl mi prafesai bowt. Dis meenz dat afta dis werl powa, no ada hyooman govament wahn rool. Gaad Kingdom wahn dischrai dis werl powa an aal di aada hyooman govament dehn joorin Armagedon. *—Rev. 16:13, 14, 16; 19:19, 20.
12. Wat els Danyel prafesi proov ahn how dat gi wi komfert ahn hoap?
12 How dis prafesi ku help wi? Danyel prafesi gi wi moa proof dat wi di liv eena di taim a di en. Oava 2,500 yaaz agoa, Danyel mi seh dat afta Babilan, dehn mi wahn ga foa ada werl powa weh mi wahn rool oava Gaad peepl. Pahn tap a dat, hihn mi seh dat di laas werl powa weh mi wahn rool wuda bee Britain ahn di United States. Dis komfert wi ahn gi wi hoap dat soon Gaad Kingdom wahn dischrai aala di hyooman govament dehn an ih wahn rool oava di hoal ert.—Dan. 2:44.
13. Hoo di “ayt king” ahn “di ten king” weh Revilayshan 17:9-12 taak bowt reprizent, ahn how dis prafesi kohn chroo?
13 Reed Revilayshan 17:9-12. Werl Waar I mi kaaz lata dischrokshan, ahn dat mek wahn nada Baibl prafesi bowt di laas dayz kohn chroo. Laik how di werl leedaz mi waahn mek shoar dat wi ga pees aal rong di werl, eena Janiweri 1920, dehn faam di League of Nations. Ahn den, eena Aktoaba 1945, di United Nations mi tek di plays a da League. Di Baibl seh dat dis aaganaizayshan da di “ayt king.” Bot ih da noh wahn werl powa. Ih onli ga powa bikaaz a di govament dehn weh sopoat it. Di Baibl kaal dehndeh govament “ten king.”
14-15. (a) Weh Revilayshan 17:3-5 tel wi bowt “Babilan di Grayt”? (b) Weh di hapm tu di sopoat weh faals rilijan get?
14 Reed Revilayshan 17:3-5. Eena wahn vizhan weh di apasl Jan mi geh fahn Gaad, ih si wahn prastichoot weh stan fi aala faals rilijan. Di Baibl kaal da prastichoot “Babilan di Grayt.” Da how dis vizhan kohn chroo? Fi wahn lang taim faals rilijan di werk kloas tugeda wid di govament dehn a dis werl ahn sopoat dehn. Bot soon, Jehoava wahn mek di govament leeda dehn du “weh [Hihn] wahn dehn du.” Weh wahn bee di rizolt? Dehndeh govament, weh da “di ten king,” wahn atak aala faals rilijan ahn dischrai it.—Rev. 17:1, 2, 16, 17.
15 How wi noa dat Babilan di Grayt wahn soon geh dischrai? Fi help wi ansa da kweschan, ih gud fi memba dat di Yoofraytis Riva mi protek di aynshent siti a Babilan. Di buk a Revilayshan seh dat di milyanz a peepl weh sopoat Babilan di Grayt da laik “waata” weh protek ahn. (Rev. 17:15) Bot ih aalso tel wi dat da waata mi wahn ‘jrai op.’ Dis meenz dat aala faals rilijan wahn looz lata di sopoat weh dehn geh fahn di peepl. (Rev. 16:12) Dis prafesi di kohn chroo tudeh bikaaz wahn lata peepl noh rilijos nohmoh ahn dehn di ton sohn way els fi fain di solooshan tu dehn prablemz.
16. How wi benifit wen wi andastan di prafesi bowt wen di United Nations mi wahn apyaa ahn wen Babilan di Grayt wahn geh dischrai?
16 How dehnya prafesi ku help wi? Di fak dat di United Nations egzis ahn dat lata peepl noh sopoat faals rilijan nohmoh proov dat wi di liv eena di laas dayz. Da chroo, lata peepl di stap sopoat Babilan di Grayt, bot dat da noh how faals rilijan wahn geh dischrai. Laik weh wi menshan erliya, Jehoava wahn mek di “ten king”—di govament dehn weh sopoat di United Nations—du “weh [Hihn] waahn dehn du.” Dehndeh govament wahn dischrai Babilan di Grayt sodn-wan, ahn dat wahn shak di werl. * (Rev. 18:8-10) Wen Babilan di Grayt geh dischrai, ih wahn reeli afek di hoal werl an ih wahn kaaz lata sofarin, bot Gaad peepl wahn ga at lees too reezn fi bee hapi. Fers, faals rilijan da wan a Jehoava Gaad enimi fahn way bak, an ih noh wahn egzis nohmoh. Ahn sekant, da soon taim fi mek Gaad sayv wi fahn dis wikid werl!—Look 21:28.
GA FAYT DAT JEHOAVA WAHN PROTEK IH PEEPL EENA DI FYOOCHA
17-18. (a) How wi ku kantinyu schrentn wi fayt? (b) Weh wi wahn diskos eena di neks aatikl?
17 Danyel mi prafesai dat wi wahn ga “lata chroo nalij.” Ahn wi ga wahn lat fi chroo! Now wi andastan som a di prafesi dehn bowt di taim weh wi di liv eena. (Dan. 12:4, 9, 10) Dehnya prafesi soh karek dat dehn mek wi ga eevn moa rispek fi Jehoava ahn fi ih Werd di Baibl. (Isa. 46:10; 55:11) Soh, mek wi kantinyu fi schrentn wi fayt. How wi ku du dat? Wi haftu stodi di Baibl gud ahn help adaz fi bee Jehoava fren. Wi Gaad wahn protek evribadi weh chros eena ahn fi evriting, an ih wahn gi dehn “pees weh wahn laas.”—Isa. 26:3.
18 Eena di neks aatikl, wi wahn diskos sohn prafesi bowt di Kristyan kangrigayshan eena di taim a di en. Wi wahn laan how dehnya prafesi proov dat wi di liv eena di laas dayz. Ahn wi wahn si moa proof dat Jeezas—fi wee King—di leed fi hihn laayal falowaz.
SANG 61 Ga Korij fi Witnis fi Jehoava!
^ Wi di liv eena sohn reeli eksaitin taimz eena hyooman hischri! Jos laik weh lata Baibl prafesi seh mi wahn hapm, Gaad Kingdom don di rool. Eena dis aatikl, wi wahn diskos som a dehndeh prafesi soh dat wi ku schrentn wi fayt eena Jehoava, stay kaam, ahn fays di fyoocha wid kanfidens.
^ Daniel 4:10-17: “Wail Ah mi-di sleep pahn mi bed Ah geh wahn vizhan. Ah si wahn taal taal chree di stan op midl a di ert. 11 Di chree mi groa big ahn schrang, ahn di tap mi reech way op da hevn, ahn peepl kuda mi see’t fahn aal oava di ert. 12 Ih mi ga lata priti leef, ih mi projoos lata froot, an ih mi ga food fi evribadi. Di wail animal dehn wuda fain shayd anda it, ahn di berd dehn eena di skai mi liv pahn di lim dehn, an evri livin ting wuda eet fan it. 13 Az Ah kantinyu wach di vizhan wail Ah mi deh pahn mi bed, Ah si wahn mesinja, wahn hoali aynjel, di kohn dong fahn hevn. 14 Ih hala haad ahn seh: ‘Chap dong di chree, kot aaf aala di lim, shayk aaf aala di leef, ahn skyata aala di froot! Mek aala di animal dehn ron weh fahn anda it, ahn mek di berd dehn flai weh fahn aala di lim. 15 Bot lef di stomp eena di graas, wid di root eena di grong, ahn put wahn aiyan schrap ahn wahn kapa schrap rong it. Mek di joo fahn hevn wet it, ahn mek ih stay monks di wail animal ahn plaant dehn. 16 Mek ih haat chaynj soh dat ih ga di haat a wahn wail animal insteda wahn hyooman, til sevn taimz paas. 17 Di mesinja dehn anonks dis koman, ahn di hoali aynjel dehn anonks dis disizhan, soh dat peepl ku noa dat di Moas Hai da di Roola oava di kingdom a man ahn hihn gi atariti tu hoosoeva hihn waahn, eevn tu di lees impoatant persn.’”
^ Si lesn 32 point 4 a di Injai Laif Fareva! buk, ahn pahn jw.org, wach di veedyo weh naym God’s Kingdom Began Ruling in 1914.
^ Daniel 2:28, 31-35: “Dehn ga wahn Gaad eena hevn weh ku mek yu noa eni seekrit, ahn hihn mek King Nebyukadneza noa weh wahn hapm eena di laas dayz. Dis da yu jreem, ahn dehnya da di vizhan weh yu si wen yu mi-di sleep pahn yu bed: 31 Yoo, Oa king, mi-di wach, ahn yu mi si wahn big big stachu. Da stachu, weh mi big ahn reeli brait, mi deh rait fronta yu, an ih mi luk fraitnin. 32 Di hed a di stachu mi mek owta di bes goal, ih ches an ih han dehn mi mek owta silva, ih beli an ih tai mi mek owta kapa, 33 ih leg dehn mi mek owta aiyan, an ih fut dehn mi mek owta aiyan ahn klay. 34 Yu mi kip di luk til wahn stoan geh kot owt, noh bai han, an ih schraik di stachu fut dehn weh mi mek owta aiyan ahn klay ahn krosh dehn op. 35 Da sayhn taim di aiyan, di klay, di kapa, di silva, ahn di goal, aala dehn tugeda, mi geh krosh op ahn ton laik di chrash fahn aafa di floa weh dehn fan owt grayn joorin soma taim, ahn di breez bloa dehn weh soh dat dehn kudn fain notn ataal. Bot di stoan weh mi schraik di stachu mi ton intu wahn big big mongtin, an ih mi ful op di hoal ert.”
^ Fi moa infamayshan pahn Danyel prafesi, si di Joon 15, 2012, kapi a The Watchtower, payj 14-19.
^ Fi moa infamayshan bowt weh wahn hapm eena di fyoocha, si chapta 21 a di buk God’s Kingdom Rules!
