1. Wat da Jehoava wil tudeh?

 TUDEH, Jehoava wil da fi mek di gud nyooz a di Kingdom geh preech aal oava di werl. (Maak 13:10; 1 Tim. 2:3, 4) Dis da Jehoava werk, an ih soh impoatant dat hihn put ih Son, Jeezas, fi gaid it. Wi ku bee shoar dat bikaaz wi ga Jeezas di gaid wi, di preechin werk wahn finish bifoa di en kohn, jos laik how Jehoava waahn.—Mach. 24:14.

2. Weh wi wahn diskos eena dis aatikl?

² Eena dis aatikl, wi wahn si how Jeezas yooz di “faytful ahn waiz slayv” fi provaid spirichwal food ahn fi aaganaiz fi hihn falowaz fi di bigis preechin kampayn eena hischri. (Mach. 24:45) Wi wahn aalso si weh eech wan a wi ku du fi sopoat Jeezas ahn di faytful slayv.

3. Weh atariti Jehoava gi Jeezas?

³ How wi ku bee shoar dat Jeezas di gaid di preechin werk? Rait bifoa Jeezas gaahn da hevn, hihn mi meet op wid som a ih faytful falowaz pahn wahn mongtin da Gyalilee. Hihn mi tel dehn: “Gaad gi mi aal atariti da hevn  ahn pahn di ert.” Den noatis weh ih mi seh neks: “Goh ahn teech peepl fahn aala di nayshan dehn fi bee mai disaipl.” (Mach. 28:18, 19) Soh wan a di tingz weh Jeezas ga di atariti fi du da fi gaid di preechin werk.

4. How wi ku bee shoar dat Jeezas stil di gaid di preechin werk?

⁴ Jeezas seh dat fi hihn falowaz mi wahn preech ahn mek disaiplz eena “aal di nayshan dehn” ahn dat hihn mi wahn deh wid dehn “evri day til di en a dis sistem a tingz.” (Mach. 28:20) Weh Jeezas seh rait deh proov dat hihn wahn di gaid di preechin werk rait dong tu fi wee day.

5. How wee help fi mek Psalm 110:3 kohn chroo?

⁵ Jeezas neva mi-di wori dat ih neva mi wahn ga inof werkaz joorin di en a dis sistem a tingz. Hihn mi noa dat weh di saamis seh mi wahn kohn chroo; ih mi seh: “Yu peepl wahn wilin fi serv pahn di day wen yu leed yu aami fi goh da waar.” (Ps. 110:3) If yoo di preech di gud nyooz, yu di sopoat Jeezas ahn di faytful slayv ahn yu di help da prafesi kohn chroo. Di werk di get don, bot ih noh aalwayz eezi.

6. Wat da wahn chalenj weh Jehoava peepl fays tudeh wen dehn goh preech?

⁶ Wahn chalenj weh Jehoava peepl fays wen dehn goh preech da persikyooshan. Apastayts, rilijos leedaz, ahn palitishanz tel wahn lata lai bowt di werk weh wi du. Wi famili, peepl weh wi noa, ahn peepl weh wi werk wid bileev dehnya lai. Ahn dehn wuda presha wi fi stap serv Jehoava ahn fi stap preech. Eena sohn konchri, wi enimi dehn chretn, atak, er ares wi bradaz ahn sistaz, an dehn eevn sen dehn da jayl. Wi noh sopraiz wen peepl chreet wi laik dis. Jeezas mi seh: “dehn wahn hayt unu bikaaz unu da mai falowaz.” (Mach. 24:9) Di fak dat peepl di chreet wi dis way da proof dat wi ga Jehoava blesin. (Mach. 5:11, 12) Di Devl deh bihain aala dis. Bot Jeezas moch moa powaful dan Saytan! Sins Jeezas di sopoat dis werk, di gud nyooz wahn reech peepl aal rong di werl fahn aala di nayshan dehn. How wi noa dat?

7. Weh proof wi ga dat Revilayshan 14:6, 7 di kohn chroo?

⁷ Wahn nada chalenj weh wi ga wen wi di preech da dat peepl taak difrent langwij. Eena di vizhan weh Jeezas mi gi di apasl Jan, Jeezas akchwali mi-di tel ahn dat dat neva mi wahn stap wi fahn preech di gud nyooz. (Reed Revilayshan 14:6, 7.) How wi deel wid da chalenj? Wi di gi az moch peepl az pasabl di chaans fi hyaa di Kingdom mesij. Tudeh, peepl fahn aal rong di werl ku reed infamayshan weh bays pahn di Baibl pahn wi websait, jw.org, bikaaz ih deh eena moa dan 1,000 langwij! Di Govanin Badi mi aproov fi chranslayt di Injai Laif Fareva! buk, weh da wi mayn poblikayshan weh wi yooz fi mek disaiplz, eena moa dan 700 langwij! Dehn aalso provaid spirichwal food di yooz veedyo rikaadn fi peepl weh def, ahn brayl poblikayshanz fi peepl weh blain. Wi di si how Baibl prafesi di kohn chroo eena fi wee taim. Peepl fahn “owta aala di langwij a di nayshan dehn” di taak di “pyoar langwij.” Di pyoar langwij da di chroot fahn di Baibl. (Zech. 8:23; Zeph. 3:9) Aala dis di hapm bikaaz Jeezas Krais da wi Leeda.

8. Weh rizolts wi geh fahn di preechin werk op tu now?

 ⁸ Tudeh, moa dan 8,000,000 peepl eena 240 konchri ahn teritori da paat a Jehoava aaganaizayshan. An evri yaa, towznz moa di geh baptaiz. Bot, eevn moa impoatant dan di amonk a peepl da di Kristyan kwalitiz weh dehn laan fi shoa. Dehn laan fi put aan “di nyoo persn.” (Kol. 3:8-10) Wahn lata dehn stap bee imoaral, vailent, ahn prejudis, ahn dehn noh feel laik fi dehn konchri beta dan di res. Di prafesi weh deh da Isaiah 2:4 weh seh dat “dehn noh wahn laan waar nohmoh” di kohn chroo. Bikaaz wee werk haad fi put aan di nyoo persn, wi di help fi jraa peepl kloas tu Gaad aaganaizayshan ahn wi di proov dat wi di fala Jeezas gaidans. (Jan 13:35; 1 Peet. 2:12) Wai dis di hapm? Bikaaz Jeezas di gi wi di help weh wi need.

9. Akaadn tu Machyu 24:45-47, weh Jeezas seh mi wahn hapm joorin di taim a di en?

⁹ Reed Machyu 24:45-47. Jeezas mi seh dat joorin di taim a di en, hihn mi wahn apoint wahn “faytful ahn waiz slayv” fi gi wi di spirichwal food weh wi need. Soh wi ku si how di slayv di werk haad eena fi wee taim. Jeezas yooz wahn smaal groop a man weh anointid fi gi Gaad peepl an enibadi weh inchrestid, spirichwal “food da di rait taim.” Dehnya man noh tink dat dehn da maasta oava enibadi fayt. (2 Kor. 1:24) Insted, dehn noa dat Jeezas Krais da di ‘leeda ahn roola’ a fi hihn peepl.—Isa. 55:4.

10. Wich wan a di poblikayshanz eena di picha kanvins yoo fi staat serv Jehoava?

¹⁰ Sins 1919, di faytful slayv put tugeda  lata difrent poblikayshan fi giv enibadi weh inchrestid wahn chaans fi laan di chroot fahn Gaad Werd di Baibl. Eena 1921, di slayv pripyaa di buk The Harp of God fi help peepl laan baysik Baibl chroots. Az tingz chaynj, dehn mek sohn moa poblikayshan. Wich wan a dehnya poblikayshan mi help yoo fi geh fi noa Jehoava ahn fi lov ahn? Da mi “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Weh di Baibl ku Teech Wi?, er Injai Laif Fareva!, wi laytes buk? Aala dehnya poblikayshan mi dizain fi help wi mek disaiplz, ahn dehn mi kom owt da di karek taim.

11. Wai ih impoatant fi mek aala wi geh spirichwal food?

¹¹ Peepl weh jos di laan di chroot need salid spirichwal food, bot da noh onli dehn. Aala wi need it. Di apasl Paal mi rait: “Salid food da fi machoar peepl.” Hihn mi aalso seh dat wen wi yooz weh wi laan fahn di Baibl, ih wahn help wi fi “tel di difrens bitween gud ahn bad.” (Heeb. 5:14) Ih ku bee haad fi obay Jehoava standadz bikaaz nowadayz lata peepl reeli imoaral. Bot Jeezas mek shoar dat wi geh di spirichwal food weh wi need fi kip wi fayt schrang. Wi spirichwal food kohn fahn Gaad Werd di Baibl. Di faytful ahn waiz slayv pripyaa ahn giv owt dis food anda Jeezas dairekshan.

12. Laik Jeezas, how wee aana Gaad naym?

¹² Jos laik Jeezas, wee gi Gaad naym di aana weh ih dizerv. (Jan 17:6, 26) Fi egzampl, eena 1931 wi chaynj wi naym tu Jehoava Witnisiz. Wen wi du dat,  wi shoa how impoatant Gaad naym tu wee. Wi waahn evribadi aidentifai wi az Jehoava peepl. (Isa. 43:10-12) Ahn sins Aktoaba da saym yaa, Jehoava naym deh pahn di kova a evri kapi a wi magazeen. Pahn tap a dat, di New World Translation of the Holy Scriptures put Gaad naym bak eena di Baibl wehpaat ih bilangz. Dis kompleetli difrent fahn di ada rilijan dehn weh tek Jehoava naym fahn owta lata dehn Baibl!

13. Weh kanvins yoo dat Jeezas di yooz di “faytful ahn waiz slayv” tudeh? (Jan 6:68)

¹³ Jeezas yooz “di faytful ahn waiz slayv” fi bil wahn wandaful aaganaizayshan pahn ert fi sopoat pyoar wership. How yoo feel bowt da aaganaizayshan? Yu praabli feel laik di apasl Peeta weh mi tel Jeezas: “Da hoo els wee wahn ton tu? Evriting weh yoo teech wi leed tu evalastin laif.” (Jan 6:68) Wehpaat eni a wi mi wahn deh tudeh if wi neva fain Jehoava aaganaizayshan? Chroo dis aaganaizayshan, Krais mek shoar wi ga evriting weh wi need fi stay faytful tu Gaad. Hihn chrayn wi fi du beta eena di minischri. Pahn tap a dat, hihn help wi fi liv “di nyoo way a laif,” soh dat wi ku geh Jehoava blesin.—Ifee. 4:24.

14. How Jehoava aaganaizayshan help yoo joorin di COVID-19 pandemik?

¹⁴ Jeezas gi wi waiz dairekshan joorin dehnya haad taimz. Wi ku si how dat mi help wi wen di COVID-19 pandemik mi staat. Wail wahn lata peepl eena di werl neva noa weh fi du, Jeezas mi mek shoar dat wi geh klayr gaidans pahn how  fi stay sayf. Wi mi geh inschrokshan fi wayr fays maas wen wi deh eena poblik ahn fi du fizikal distansin. Di eldaz mi geh inschrokshan fi kip in kantak wid evribadi eena di kangrigayshan ahn fain owt weh dehn need fi stay sayf, helti, ahn kloas tu Jehoava. (Isa. 32:1, 2) Pahn tap a dat, wi geh ada dairekshan an inkorijment chroo di Govanin Badi opdayt dehn.

15. Weh inschrokshan wi geh bowt meetin ahn feel servis joorin di pandemik, ahn wat da-mi di rizolt?

¹⁵ Joorin di pandemik, wi mi geh klyaa inschrokshanz pahn how wi wahn du meetin ahn how wi wahn preech. Kwik-wan wi staat du wi meetin, wi asembli, ahn wi kanvenshan dehn onlain. Pahn tap a dat, wi staat preech di du leta raitin ahn foan witnisin. Jehoava reeli bles aala wi haad werk. Wahn lata di branch dehn ripoat dat dehn si di amonk a poblishaz groa wahn lat. In fak, wahn lata di bradaz mi ga sohn inkorijin ekspeeryens joorin dehnya taim.—Si di baks “ Jehoava Bles Wi Preechin Werk.”

16. Weh wee ku bee shoar a?

¹⁶ Sohn peepl maita mi feel laik di aaganaizayshan mi tu kyaaful wid di inschrokshanz weh dehn gi wi joorin di pandemik. Bot oava ahn oava wi si evidens dat di dairekshan weh wi geh mi waiz. (Mach. 11:19) Ahn wen wi meditayt pahn di lovin way how Jeezas leed fi hihn peepl, wi ku bee shoar dat noh mata weh hapm eena di fyoocha Jehoava ahn fi hihn Son wahn deh wid wi.—Reed Heebrooz 13:5, 6.

17. How yoo feel bowt yu Leeda, Jeezas?

¹⁷ Wi soh hapi dat Jeezas da wi Leeda. Wi noh mek wi kolcha, konchri, er langwij divaid wi. Wi geh wahn lata spirichwal food ahn wi geh aal di chraynin weh wi need soh dat wi ku goh preech. Eech wan a wi di geh help fi liv di nyoo way a laif ahn wi di laan fi lov wan anada. Wi ga wahn lata reezn fi boas bikaaz Jeezas da wi Leeda!