1. Weh Jehoava mi du lee bit afta Adam ahn Eev mi sin?

 LEE bit afta Adam ahn Eev sin, Jehoava mi yooz wahn prafesi fi gi dehn disendant dehn hoap. Wi ku fain weh hihn seh da Genesis 3:15.—Reed. *

2. Wai dis prafesi impoatant?

² Dis prafesi deh eena di fers buk a di Baibl. Bot wan way er di ada, aala di ada Baibl buk dehn kohn bak tu dis prafesi. Jos laik how wahn staypl jain tugeda aala di payj eena wahn eksasaiz buk, da rait soh Genesis 3:15 mek di infamayshan eena evri Baibl buk kohn tugeda az wan mesij. Da mesij da dat Gaad wahn sen wahn Sayvya weh wahn dischrai Saytan an aala ih wikid falowaz. * Dis wahn bee wahn wandaful blesin fi evribadi weh lov Jehoava!

3. Weh wi wahn diskos eena dis aatikl?

³ Eena dis aatikl, wi wahn ansa dehnya kweschanz bowt di prafesi da Genesis 3:15: Da hoo aal di prafesi di taak bowt? How da prafesi di kohn chroo? Ahn how wee benifit fan it tudeh?

4. Hoo da “di snayk,” ahn how wi noa dat?

⁴ Genesis 3:14, 15 taak bowt wahn “snayk,” di snayk “pikni,” wahn “uman,” ahn di uman “pikni.” Di Baibl help wi fi aidentifai eech wan a dehn. * Mek wi staat wid “di snayk.” Ih mi kyaahn bee wahn reel snayk bikaaz ih wudn andastan weh Jehoava mi seh eena di gyaadn a Eedn. Soh di wan weh Jehoava mi-di joj mi haftu ga andastandin. Soh da hoo Jehoava mi-di taak tu? Revilayshan 12:9 seh dat “di oal snayk” da Saytan di Devl. Bot hoo aal da di snayk pikni?

5. Hoo aal da di snayk pikni?

⁵ Wen di Baibl yooz di werd “pikni” eena wahn simbolik way, ih rifaa tu enibadi weh kapi di tinkin ahn wayz a dehn simbolik pa. Soh di snayk pikni da di wikid aynjel dehn ahn hyoomanz weh goh gens Jehoava an ih peepl, jos laik Saytan. Dat inklood di aynjelz weh lef dehn asainment da hevn eena Noawa dayz ahn wikid hyoomanz weh da laik dehn pa di Devl.—Gen. 6:1, 2; Jan 8:44; 1 Jan 5:19; Jood 6.

6. Wai “di uman” kudn bee Eev?

⁶ Now wi need fi si hoo da “di uman.” Ih kudn bee Eev. Wai nat? Mek wi luk pahn wan reezn. Di prafesi seh dat di uman pikni wuda “krosh” di snayk hed. Laik weh wi jos diskos, di snayk da di wikid aynjel Saytan, ahn non a Eev pikni wuda mi ga di abiliti fi krosh, er dischrai, Saytan. Soh da how Saytan wahn geh dischrai?

7. Laik weh Revilayshan 12:1, 2, 5, 10 seh, hoo da di uman weh Genesis 3:15 taak bowt?

 ⁷ Di laas buk a di Baibl tel wi hoo da di uman weh Genesis 3:15 taak bowt. (Reed Revilayshan 12:1, 2, 5, 10.) Dis da neva wahn uman pahn ert. Shee mi ga di moon andaneeta ih fut an ih mi gat aan wahn krong weh mek owta 12 staar pan ih hed. Shee mi gi bert tu wahn wandaful pikni—Gaad Kingdom. Da Kingdom deh da hevn, soh di uman haftu deh da hevn tu. Shee reprizent di paat a Jehoava aaganaizayshan weh deh da hevn, weh mek op a fi hihn faytful aynjelz.—Gal. 4:26.

8. Hoo da di moas impoatant paat a di uman pikni, ahn how ih mi geh fi bee soh impoatant? (Genesis 22:15-18)

⁸ Gaad Werd help wi fi noa hoo da di moas impoatant paat a di uman pikni, er disendant. Ih mi fi bee wan a Aybraham disendant. (Reed Genesis 22:15-18.) * Laik weh di prafesi seh, Jeezas da-mi Aybraham dairek disendant. (Look 3:23, 34) Bot da disendant wahn haftu bee moa powaful dan wahn hyooman bikaaz hihn mi wahn dischrai Saytan di Devl fareva. Soh wen Jeezas mi bowt 30 yaaz oal, Gaad mi anoint ahn wid ih hoali spirit. Wen Jeezas mi geh anointid, ih mi geh fi bee di moas impoatant paat a di uman disendant. (Gal. 3:16) Afta Jeezas ded, Gaad rezorek Jeezas ahn giv ahn “aana ahn gloari” ahn giv ahn “aal atariti da hevn ahn pahn di ert,” inkloodin atariti “fi dischrai evriting weh di Devl du.”—Heeb. 2:7; Mach. 28:18; 1 Jan 3:8.

9-10. (a) Hoo els da paat a di uman disendant, ahn wen dehn geh fi bee paat a it? (b) Weh wi wahn rivyoo neks?

⁹ Dehn ga adaz weh da paat a di uman disendant lang wid Jeezas. Di apasl Paal tel wi hoo els da paat a di disendant wen hihn mi tel di anointid Kristyanz: “If unu bilangz tu Krais, den unu da Aybraham disendant fi chroo, an unu wahn inherit weh Gaad mi pramis Aybraham.” (Gal. 3:28, 29) Wen Jehoava anoint wahn Kristyan wid fi hihn hoali spirit, dat mek dehn paat a di uman disendant. Soh Jeezas ahn di 144,000 weh rool lang wid ahn da di uman pikni, er disendant. (Rev. 14:1) Aala dehn di chrai fi tink an ak laik dehn Pa, Jehoava Gaad.

¹⁰ Now dat wi noa hoo Genesis 3:15 di taak bowt, wi wahn laan weh Jehoava don du fi mek dis prafesi kohn chroo ahn how ih benifit wi tudeh.

11. Weh di prafesi meen wen ih seh dat di uman pikni mi wahn geh brooz “pan ih heel”?

¹¹ Akaadn tu di prafesi da Genesis 3:15, di snayk mi wahn brooz di uman pikni “pan ih heel.” Saytan mi du dat wen ih yooz di Jooz ahn di Roaman dehn fi kil Gaad Son. (Look 23:13, 20-24) Jos laik how yu kyaahn du notn fi wahn lee wail wen yu hert yu fut bad, saym way soh Jeezas mi kyaahn du notn  wen ih mi ded fi chree dayz.—Mach. 16:21.

12. How ahn wen di snayk hed wahn geh krosh?

¹² Fi mek di prafesi da Genesis 3:15 ku kohn chroo, Jeezas mi wahn kyaahn stay ded. Wai? Bikaaz akaadn tu di prafesi, di disendant mi wahn krosh di snayk hed. Dis meenz dat Jeezas mi wahn need fi geh rezorek. Ahn dat da egzakli weh hapm! Pahn di terd day afta Jeezas mi ded, Jehoava rezorek ahn bak da hevn, ahn now ih kyaahn ded. Wen di taim weh Gaad set kohn, Jeezas wahn dischrai Saytan fareva. (Heeb. 2:14) Krais, lang wid dehn wan weh wahn di rool wid ahn, wahn dischrai aala Gaad enimi dehn, weh da di snayk disendant.—Rev. 17:14; 20:4, 10. *

13. How wee di benifit bikaaz dis prafesi di kohn chroo?

¹³ If yu da wahn servant a Gaad, yu di benifit fahn dis prafesi weh di kohn chroo. Jeezas mi kohn pahn di ert az wahn man, ahn hihn mi kapi fi hihn Pa kwalitiz eena wahn perfek way. (Jan 14:9) Soh wen wi laan bowt Jeezas, wi geh fi noa ahn lov Jehoava. Ahn wi aalso benifit fahn di way how Jeezas teech ahn leed di Kristyan kangrigayshan tudeh. Hihn teech wi fi liv eena wahn way weh pleez Jehoava. Aala wi benifit bikaaz Jeezas mi ded, er geh brooz pan ih heel. How? Afta Jeezas mi ded ahn Jehoava rezorek ahn, Jehoava mi aksep fi hihn Son perfek sakrifais weh “mek wi kleen fahn aal sin.”—1 Jan 1:7.

14. How wee noa dat di prafesi weh Jehoava mi giv da Eedn neva kohn chroo rait away?

¹⁴ Weh Jehoava mi seh da Eedn mi shoa dat di prafesi neva mi wahn hapm rait away. Sohn taim mi wahn haftu paas. Ih mi wahn tek taim fi di uman gi bert tu ih pikni, fi di Devl gyada op fi hihn falowaz, ahn fi mek hayt groa bitween di too groop. If wee andastan dis prafesi, ih help wi bikaaz ih waan wi dat di werl weh Saytan di kanchroal wahn hayt enibadi weh wership Jehoava. Laytaraan, Jeezas waan ih disaipl dehn bowt di saym ting. (Maak 13:13; Jan 17:14) Wee si dis paat a di prafesi kohn chroo, espeshali oava di paas 100 yaaz. How?

15. Wai di werl hayt di uman disendant eevn moa now, bot wai wi noh haftu frayd fi Saytan?

¹⁵ Lee wail afta Jeezas staat rool az King eena 1914, Saytan geh kik owta hevn. Now ih stok ya pahn di ert di wayt fi geh dischrai. (Rev. 12:9, 12) Bot sins den Saytan reeli bizi. Ih beks bad, an ih di atak Gaad peepl. (Rev. 12:13, 17) Dat da wai Saytan werl hayt Gaad peepl eevn moa now. Bot wi noh ga no reezn fi bee frayd fi Saytan ahn fi hihn falowaz. Insteda dat, wee ku ga di saym kanfidens weh di apasl Paal mi ga wen ih rait: “If Gaad deh wid wi, den hoo wahn deh gens wi?” (Roam. 8:31) Wee ku ga kompleet chros eena Jehoava bikaaz wi si dat moas a di prafesi da Genesis 3:15 don kohn chroo.

16-18. How di prafesi da Genesis 3:15 mi help Curtis, Ursula, ahn Jessica?

¹⁶ Di pramis weh Jehoava gi wi da Genesis 3:15 help wi fi deel wid wateva chraiyal wi mait fays eena laif. Curtis,  hoo di serv az wahn mishineri da Guam, seh: “Sohn tingz mi hapm eena mi laif weh mek it haad fi Ah stay laayal tu Jehoava. Bot wen Ah meditayt pahn di prafesi da Genesis 3:15, ih help mi fi kip di chros eena mi hevnli Faada.” Curtis di luk faawod fi di day wen Jehoava wahn put wahn en tu aala wi prablemz.

¹⁷ Sista Ursula fahn Bavaria seh dat wen shee geh fi andastan Genesis 3:15, ih mi kanvins shee dat di Baibl da Gaad Werd fi chroo. Now shee ku si how aala di ada prafesi dehn kanek tu dis prafesi, ahn dat reeli toch ih haat. Shee aalso seh: “Wen Ai laan how Jehoava rait away du sohnting fi gi wi hoap, ih mek Ai lov ahn eevn moa.”

¹⁸ Sista Jessica fahn Micronesia seh: “Ah ku stil memba how Ah mi feel wen Ah fers laan di chroot! Di prafesi da Genesis 3:15 help mi fi memba dat aal di tingz weh wi sofa da noh weh Jehoava waahn fi wi. Dis prafesi aalso gi mi kanfidens dat mai disizhan fi serv Jehoava da di bes disizhan Ah kuda mi eva mek, ahn dat Ah wahn ga wahn eevn beta laif eena di fyoocha.”

 19. Wai wi ku bee shoar dat di laas paat a di prafesi wahn kohn chroo?

¹⁹ Soh wi don laan dat Genesis 3:15 di kohn chroo, ahn wi don noa hoo da di uman pikni ahn hoo da di snayk pikni. Jeezas, weh da di moas impoatant paat a di uman disendant, don geh rezorek, an ih don di rool da hevn az wahn King weh wahn liv fareva. Ahn Jehoava don pik aalmoas aala dehn wan weh wahn rool lang wid ih Son da hevn. Bikaaz di fers paat a di prafesi don kohn chroo, wi ku bee shoar dat di laas paat a dis prafesi, weh seh dat di snayk hed wahn geh krosh, wahn kohn chroo tu. Gaad servant dehn wahn bee reeli hapi wen Saytan geh dischrai! Soh til den, noh giv op, bikaaz wi ku chros wi Gaad, Jehoava. Gaad wahn yooz di uman disendant fi du wahn lata gud tingz fi “aala di peepl weh di liv pahn di ert.”—Gen. 22:18.