Jeezas mi teech peepl fi liv tugeda eena pees. Bot wan taim, hihn mi tel ih apasl dehn: “Noh tink dat Ai mi kohn fi bring pees tu di ert; Ai kohn fi bring wahn soad, noh pees. Kaaz Ai kohn fi kaaz divizhan bitween wahn man an ih pa, bitween wahn daata an ih ma, ahn bitween wahn daata-in-laa an ih mada-in-laa.” (Mach. 10:34, 35) Weh Jeezas mi meen wen ih seh dis?

Jeezas neva waahn separayt peepl fahn dehn famili, bot hihn mi noa dat fi hihn teechinz mi wahn kaaz divizhan eena sohn famili. Dat da wai enibadi weh waahn bee wan a Jeezas disaipl ahn geh baptaiz haftu andastan dat sohntaim dehn famili membaz noh wahn bee hapi wid dehn disizhan. Sohntaim dehn marij mayt er wahn famili memba wuda chrai stap dehn ahn mait mek it haad fi dehn kantinyu liv di way Krais teech wi fi liv.

Di Baibl inkorij aal Kristyanz fi “liv eena pees wid evribadi.” (Roam. 12:18) Bot Jeezas teechinz ku bee laik wahn “soad” eena sohn famili. Dis hapm wen sohnbadi chooz fi liv di way Jeezas teech wi fi liv wail ada famili membaz rijek Jeezas teechinz. Wen dat hapm, dehndeh famili membaz mek dehnself wahn “enimi” a di wan weh di laan di chroot.—Mach. 10:36.

Krais disaiplz weh liv eena wahn famili weh noh evribadi serv Jehoava mait fays sohn sichuwayshanz weh tes dehn lov fi Jehoava ahn fi Jeezas. Fi egzampl, dehndeh famili membaz mait chrai foas dehn fi selibrayt wahn rilijos haliday. Wen dehn fays wahn sichuwayshan laik dat, dehn haftu disaid if dehn waahn mek Jehoava ahn Jeezas hapi er dehn famili. Jeezas mi seh: “If wahn persn ga moa afekshan fi ih pa er ih ma dan fi mee, ih noh dizerv fi bee mai disaipl.” (Mach. 10:37) Af koars, Jeezas neva meen dat if sohnbadi waahn bee fi hihn disaipl dehn need fi lov dehn payrents les. Rada, hihn mi-di teech dehn how fi disaid wat da di moas impoatant ting eena laif. If wi ga famili membaz weh chrai stap wi fahn wership Jehoava, wi stil lov dehn, bot wi andastan dat wi lov fi Gaad moa impoatant.

Da chroo, ih reeli hert wi wen wahn famili memba goh gens wi. Bot Jeezas disaipl dehn haftu memba weh hihn seh: “If wahn persn noh aksep ih taacha stayk ahn fala mi, ih noh dizerv fi bee mai disaipl.” (Mach. 10:38) Dat meenz dat wen wahn famili memba goh gens wi, wi see’t az paat a di sofarin weh wi wilin fi goh chroo az Krais disaipl. Bot, wi hoap dat bikaaz a wi gud kandok, wi famili membaz mait chaynj dehn main ahn waahn laan bowt weh di Baibl teech.—1 Peet. 3:1, 2.