1. Wat da wan ting weh mek wi haiya dan di animal dehn?

JEHOAVA mi gi hyoomanz sohnting veri speshal—wahn kanshans. Dat da wan ting weh mek wi haiya dan di animal dehn. Da soh Gaad mi mek hyoomanz fahn di biginin. Afta Adam ahn Eev mi brok Jehoava laa, dehn haid. Dis mi shoa dat dehn kanshans mi-di bada dehn.

2. How wi kanshans da laik wahn kompas? (Koment pahn di picha da di biginin a dis aatikl.)

² Wahn persn weh ga wahn kanshans weh noh chrayn eena di rait way, da laik wahn ship wid wahn kompas weh noh di werk gud. Ih ku bee daynjaros fi goh pahn wahn chrip widowt wahn gud kompas. Di breez ahn wayv dehn a di see ku mek di ship goh aaf chrak. Bot wahn kompas weh di werk gud ku help di kyaptin fi stay pahn chrak. Wi kanshans da laik wahn kompas eena wi laif. Ih help wi fi noa weh rait er weh rang an ih ku gaid wi soh wi ku stay pahn di rait chrak. Bot fi mek wi kanshans bee wahn gud gaid, wi haftu chrayn it.

3. Weh ku hapm wen wahn persn kanshans noh chrayn eena di rait way?

³ Wen wahn persn kanshans noh chrayn eena di rait way,  ih noh wahn waan dehn wen dehn di du rang tingz. (1 Tim. 4:1, 2) Wahn kanshans weh noh chrayn mait eevn kanvins wi dat “bad da gud.” (Isa. 5:20) Jeezas mi waan ih falowaz: “Di taim wahn kohn wen dehn wahn kil unu ahn tink seh dehn di du Gaad wahn fayva.” (Jan 16:2) Di peepl hoo mi merda di disaipl Steeven, an adaz laik dehn, mi tink da saym way. (Aks 6:8, 12; 7:54-60) Imajin dat! Di peepl hoo merda er du ada kraim fi rilijos reezn di brok Gaad laa, di saym Gaad dehn seh dehn di wership! (Ex. 20:13) Fi dehn kanshans neva gaid dehn eena di rait way; ih mi fool dehn!

4. How wi ku mek shoar dat wi kanshans di werk gud?

⁴ Non a wi waahn wi kanshans stap werk. Soh weh wi ku du? Di laa ahn prinsipl dehn eena Gaad Werd ‘teech di chroot, ahn mek wi noa dehn ting weh rang eena wi laif. Ih skoal wi wen wi need it, an ih teech wi how fi liv rait.ʼ (2 Tim. 3:16) Soh, wi ku chrayn wi kanshans wen wi stodi di Baibl, wen wi tink bowt weh ih di seh, ahn wen wi du weh ih seh eena wi laif. Ahn wen wi kanshans chrayn, wi wahn tink moa laik Gaad. Ahn wi kanshans wahn bee wahn gaid weh wi ku pen pan. Mek wi kansida how Jehoava laa ahn prinsipl dehn ku help wi chrayn wi kanshans.

5, 6. Weh wi need fi du if wi waahn benifit fahn Gaad laa dehn?

⁵ If wi waahn benifit fahn Gaad laa, wi need fi du moa dan jos geh fi noa dehn er reed bowt dehn. Wi haftu lov ahn rispek dehn. Di Baibl seh: “Hayt weh bad, ahn lov weh gud.” (Amos 5:15) Bot how wi ku du dat? Wi haftu laan fi vyoo tingz Jehoava way. Fi egzampl: Imajin dat yu di ga prablemz fi sleep. Yu dakta tel yu fi eet helti food, geh moa eksasaiz, ahn chaynj yu way a laif. Afta yu chrai weh ih tel yu fi du, yu staat tu sleep beta fi chroo! How yu wuda feel tuwaadz da dakta? Af koars, yu wuda apreeshiayt how ih help yu fi ga wahn beta laif.

⁶ Wi Kriyayta da laik da dakta. Ih gi wi difrent laa soh dat wi kud protek wiself fahn di haam weh sin ku kaaz tu wi. Dehn saym laa help wi fi ga wahn beta laif. Tink bowt how wi benifit wen wi fala di laa dehn eena di Baibl. Fi egzampl, ih seh noh fi tel lai, noh ga bad main gens peepl, ahn noh fi teef. Ih aalso seh dat wi noh fi yooz vailens, praktis spiritizm, ner du eni sin weh ga fi du wid seks. (Reed Proverbs 6:16-19; * Rev. 21:8) Wen wi ekspeeryens di blesinz weh kohn fahn du tingz Jehoava way, wi geh fi lov an apreeshiayt Jehoava an ih laa dehn eevn moa.

7. How wi ku benifit wen wi reed ahn meditayt pahn di difrent reel-laif egzampl weh deh eena di Baibl?

⁷ Peepl seh: “Ayz haad pikni goh da maakit too taim.” Wel, wi noh need fi brok Gaad laa ahn laan di haad way, kaaz wi ku laan fahn di mistayk a adaz eena di Baibl. Proverbs 1:5 seh: “Wahn waiz persn wahn lisn ahn tek een moa inschrokshan.” Wi geh di bes inschrokshan wen wi reed ahn meditayt pahn di reel-laif egzampl weh deh eena di Baibl. Fi egzampl, tink bowt di payn weh King Dayvid mi gaahn chroo  afta ih mi disobay Jehoava ahn komit adolchri wid Baat-sheeba. (2 Sam. 12:7-14) Wen wi di reed ahn meditayt pahn dis egzampl, wi ku aks wiself: ‘Weh King Dayvid kuda mi du fi avoid di payn ih mi gaahn chroo? Ah wanda if Ai wuda ga di schrent fi rijek wahn temtayshan if Ah fain miself eena wahn sichuwayshan laik dat? Hoo Ah wuda bee laik, Joazef er Dayvid?ʼ (Gen. 39:11-15) Stap ahn tink bowt di payn weh kohn fahn sin. Dis wahn schrentn wi haat fi “hayt weh bad.”

8, 9. (a) Wat da di perpos a wi kanshans? (b) How wi kanshans werk lang wid Baibl prinsiplz?

⁸ Wi mait stay faar fahn tingz weh Gaad hayt. Bot weh wi wahn du wen wi deh eena wahn sichuwayshan weh di Baibl noh spel owt weh rang fahn weh rait? How wi wahn noa weh pleez Gaad ahn weh noh pleez ahn? Da den wi need wahn kanshans weh chrayn eena di rait way.

⁹ Owta lov, Jehoava gi wi prinsiplz weh gaid wi ahn help wi fi chrayn wi kanshans. Hihn tel wi: “Ai, Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak.” (Isa. 48:17, 18) Wen wi yooz wi main ahn haat fi andastan Baibl prinsipl, wi wahn ku karek, dairek, ahn shayp wi kanshans eena di rait way. Den, wi wahn ku mek waiz disizhan.

10. Wat da wahn prinsipl? Ahn how Jeezas mi yooz dehn eena ih teechinz?

¹⁰ Wahn prinsipl da wahn baysik chroot er wahn jenaral laa er wahn baysik teechin weh wi ku yooz fi gaid wi tinkin an akshan. Fi mek wi andastan dehn prinsiplz, wi haftu fos andastan di way di persn hoo gi wi di laa tink ahn wai ih mi gi wi sertn laa. Wen Jeezas mi deh pahn di ert, ih mi teech ih disaipl dehn sohn baysik chroot. Dehnya chroot mi help dehn fi si weh ku hapm if wahn persn ga wahn bad atichood er ak eena wahn bad way. Fi egzampl, ih mi teech dat if wahn persn hoal aan tu anga, ih ku leed tu vailens. An if wahn persn los afta wahn neks persn, ih ku leed tu adolchri. (Mach. 5:21, 22, 27, 28) If wi waahn ga wahn kanshans weh chrayn eena di rait way, wi haftu mek Baibl prinsiplz gaid wi. Den, wi wahn ku bring aana tu Gaad.—1 Kor. 10:31.

11. How too peepl mait ga kanshans weh difrent fahn wan anada?

¹¹ Pahn sertn mataz, too Kristyan mait mek too difrent disizhanz eevn doa di too a dehn chrayn dehn kanshans wid Baibl prinsiplz. Tek fi egzampl di yoos a alkahol. Di Baibl noh kandem alkahol. Bot ih kandem jronkinis. (Prov. 20:1; 1 Tim. 3:8) Yu tink dis meen dat wahn Kristyan noh haftu wori bowt eniting els jos az lang az ih noh di abyooz alkahol er geh jronk? Non ataal! Wahn Kristyan haftu kansida di kanshans a adaz, eevn if fi hihn wan noh di bada ahn.

12. How di werdz da Roamanz 14:21 ku help wi rispek di kanshans a adaz?

¹² Paal mi seh dat wahn Kristyan need fi tink bowt di kanshans a adaz. Ih seh: “Unu noh fi eet meet ner jrink wain ner du notn els weh wahn mek yu brada sin.” (Roam. 14:21) Yoo wuda giv op yu raits soh dat yu noh stombl yu brada weh ga wahn difrent kanshans fahn yoo? Af koars yu wuda du dat. Bifoa som a wi bradaz mi laan di chroot, dehn yoostu abyooz alkahol, bot now dehn reeli  waahn avoid it aal tugeda. Wi noa dat non a wi wuda waahn bee rispansabl fi kaaz wi brada fi goh bak tu di laif weh ih yoostu liv! (1 Kor. 6:9, 10) Soh, if wee invait wahn brada er sista tu wi hoam, ih wudn bee lovin fi foas ahn fi jrink alkahol if ih don seh ih noh waahn eni.

13. How Timoti mi set wahn gud egzampl fi di sayk a di Kingdom?

¹³ Tink bowt di egzampl Timoti mi set. Wail ih mi deh eena ih erli 20ʼs moa er les, ih get wahn serkomsizhan. Dat mi paynful bad. Bot ih mi du it soh dat ih noh stombl di Jooz hoo ih mi-di preech tu. Hihn ahn di apasl Paal mi vyoo tingz di saym way. (Aks 16:3; 1 Kor. 9:19-23) Soh mek wi bee laik Timoti ahn bee wilin fi mek persnal sakrifais fi di benifit a adaz.

14, 15. (a) Weh wi haftu du if wi waahn bee machoar Kristyanz? (b) Wat da di kanekshan bitween lov ahn wi proagres az wahn machoar Kristyan?

¹⁴ Aal Kristyanz haftu groa spirichwali. Wi haftu groa paas di baysik teechinz a Krais ahn groa fi bee machoar Kristyanz. (Heeb. 6:1) Dis noh hapm rait soh. Wi haftu werk tuwaadz dat. If wi waahn bee wahn machoar Kristyan, wi haftu ad tu wi nalij an andastandin a di Skripchaz. Dats wai wi hyaa oava an oava agen dat wi need fi reed wi Baibl evri day. (Ps. 1:1-3) Dat da fi yoo goal? Di moa wi du wi Baibl reedin, di moa wi wahn andastan Jehoava laa ahn prinsiplz. Ahn wi wahn ga wahn deepa andastandin a di Werd a Gaad.

¹⁵ Di moas impoatant laa fi wahn Kristyan da di laa a lov. Jeezas mi tel ih disaipl dehn: “If unu lov wan anada, den evribadi wahn noa dat unu da fi mee disaipl.” (Jan 13:35) Jeezas haaf brada Jaymz mi kaal di laa di “perfek komanment.” (Jay. 2:8) Paal mi seh: “Wen yu lov, yu di du evriting weh di Laa seh yu fi du.” (Roam. 13:10) Ih noh sopraiz wi doh dat di Baibl taak soh moch bowt lov kaaz “Gaad da lov.” (1 Jan 4:8) Gaad noh jos taak bowt lov, ih shoa wi lov. Jan mi seh: ‘Dis da di way how Gaad mi shoa ih lov tu wi: ih sen ih onli Son eena di werl soh dat chroo hihn, wee ku ga  laif weh wahn neva en.ʼ (1 Jan 4:9) Soh mek wi werk haad fi shoa lov fi Jehoava, Jeezas, wi bradaz ahn sistaz, ahn fi evribadi els. Bikaaz, di haada wi werk fi shoa dis lov, di moa spirichwali machoar wi wahn get.—Mach. 22:37-39.

16. Wai Baibl prinsiplz moa impoatant tu wi wen wi geh fi bee wahn machoar Kristyan?

¹⁶ Wen wi geh fi bee wahn machoar Kristyan, wi wahn fain owt dat Baibl prinsiplz moa impoatant. Dat da bikaaz wahn laa mait aplai tu wahn spesifik sichuwayshan. Bot wahn prinsipl ku aplai tu wahn lata tingz. Fi egzampl, wahn pikni noh andastan weh ku hapm tu ahn wen ih spen taim wid di rang krowd, soh payrents need fi set roolz fi protek ahn. (1 Kor. 15:33) Bot az da pikni groa, ih staat tu andastan moa tingz, inkloodin Baibl prinsiplz. Den ih wahn ku mek waiz disizhan bowt ih frenz. (Reed 1 Korintyanz 13:11; 14:20.) Soh di moa wi laan fi aplai Baibl prinsiplz, di moa wi tink laik Gaad. Ahn wi kanshans wahn bee wahn gaid weh wi ku pen pan.

17. Wai wi ku seh dat wi ga evriting weh wi need fi mek waiz disizhanz?

¹⁷ Yu tink wi ga evriting wi need fi mek waiz disizhanz weh pleez Jehoava? Yes! Wen wi laan fi yooz di laa ahn prinsiplz fahn di Baibl eena di rait way, wi wahn “bee redi fi evri gud werk.” (2 Tim. 3:16, 17) Soh, saach fi Baibl prinsiplz soh dat ‘wi ku andastan weh di Laad waahn wi du.ʼ (Ifee. 5:17) Mek gud yoos a di provizhan dehn fi stodi, laik di Watch Tower Publications Index, di Research Guide for Jehovahʼs Witnesses, di Watchtower Library, di Wachtowa ONLAIN LAIBRI, ahn di JW Library ap. Dehnya provizhan fahn Jehoava ku help wi geh di moas benifit fahn wi persnal ahn famili stodi.

18. Wat da som a di blesinz wi get wen wi mek Jehoava laa ahn prinsiplz gaid wi?

¹⁸ Jehoava wahn bles wi wen wi obay fi hihn laa ahn yooz ih prinsiplz eena wi laif. Psalm 119:97-100 seh: “Ah reeli lov yu laa! Ah stodi it aal day lang. Yu komanment dehn mek Ah geh waiza dan mi enimi dehn, bikaaz ih deh wid mi fareva. Ah ga moa andastandin dan mi teecha dehn, bikaaz Ah tink bowt yu rimainda dehn. Ah bihayv wid moa andastandin dan di oalda man dehn, bikaaz Ah fala yu aadaz.” Wi ku ak wid moa wizdom an andastandin if wi tek di taim fi “stodi” Gaad laa ahn prinsiplz. If wi werk haad fi mek Gaad laa ahn prinsiplz chrayn wi kanshans, den wi wahn “groa op ahn geh fi bee jos laik Krais eena evri way.”—Ifee. 4:13.