Rehobowam pa da-mi Salaman, hoo mi rool Izrel fi 40 yaaz. (1 Ki. 11:42) Salaman mi ded eena 997 B.C.E. Den Rehobowam chravl fahn Jeroosalem tu Sheekem fi mek dehn krong ahn az king. (2 Chron. 10:1) Yu tink dat maybi ih mi-di wori if ih mi wahn ku bee laik ih pa, hoo mi ga lata wizdom? Rehobowam neva riyalaiz dat ih mi wahn fays lata prablemz eena ih kingdom an ih mi wahn need wizdom fi deel wid dehn.

Wen Rehobowam get da Izrel, ih mosi mi noatis how schres owt evribadi mi feel. In taim, Jerobowam ahn sohn ada Izrelait kohn si ahn an tel ahn playn ahn schrayt bowt di tingz weh dehn mi-di wori bowt. Dehn tel ahn: “Yu pa mek wi werkload haad fi wi. Bot if yu mek it eeziya fi wi ahn yu laitn di hevi werkload hihn mi put pahn wi, wi wahn serv yu.”—2 Chron. 10:3, 4.

Rehobowam mosi mi feel laik dehn push ahn eena wahn kaana! If ih mi lisn tu di peepl dehn, maybi hihn an ih famili an adaz eena di palis mi wahn haftu kot bak pahn som a di nais tingz weh dehn yoostu injai. Dehn wuda mi haftu eez op pahn di werkload a di kaman peepl. Pahn di ada han, if ih mi rifyooz fi du it, di peepl wuda mi ribel gens ahn. Soh di nyoo king taak wid di oalda man dehn fos, di saym wan dehn weh mi yoostu gi advais tu Salaman. Bot den, Rehobowam gaahn taak wid sohn yonga man, weh da-mi moa fi hihn ayj. Wel, ih lisn tu di yong man dehn advais ahn dis da weh ih tel di peepl dehn: “Ai wahn mek unu werkload heviya, an Ai wahn ad tu it. Mai pa mi ponish unu wid wip, bot Ai wahn ponish unu wid di wip weh mek owta leda ahn metal.”—2 Chron. 10:6-14.

Bikaaz a dat, 10 owta di 12 chraib separayt dehnself fahn di res a di nayshan ahn faam di naadan kingdom. (2 Chron. 10:16) If Rehobowam mi onli lisn tu di advais a di oalda man dehn dat neva mi wahn hapm! Wat da di lesn fi wee? Wi oalda  spirichwali machoar bradaz ahn sistaz ga moa ekspeeryens. Dehn ku si wat wahn bee di en rizolt a wahn disizhan ahn gi wi gud advais.—Job 12:12.

Bikaaz di peepl mi ribel gens Rehobowam, ih mi waahn goh afta dehn wid ih aami. Bot Jehoava stap ahn chroo di prafit Shimaaya. Jehoava seh: “Unu noh fi goh fait gens yu Izrelait bradaz. Eech wan a unu fi goh bak hoam, bikaaz da mee mek dis hapm.”—1 Ki. 12:21-24. *

Yu tink ih mi eezi fi mek Rehobowam lisn tu Jehoava? Weh di peepl mi wahn tink bowt hihn az wahn nyoo king? Memba ih mi tel di peepl dehn dat hihn mi wahn lash dehn wid wip moa dan ih pa, soh imajin weh dehn mi wahn seh if ih neva du notn bowt dis ribelyan. (Kompyaa 2 Chronicles 13:7.) Eevn soh, di king an ih aami “obay weh Jehoava tel dehn fi du ahn gaahn bak hoam.”

Weh wi ku laan fahn dis? Wel, dat ih waiz fi mek wi obay Gaad eevn if adaz wuda mek fon a wi. Wen wi obay Gaad, hihn wahn bee pleez wid wi ahn bles wi.—Deut. 28:2.

Weh Rehobowam mi du? Ih obay ahn neva fait di nyoo nayshan—di naadan kingdom. Insted, ih staat bil op sohn nyoo siti eena di teritori a Jooda ahn Benjamin, di ayrya weh ih stil mi-di rool oava. Ih mek som a di siti weh mi don dehdeh moa schranga. (2 Chron. 11:5-12) Fi wahn taim, ih mi obay Jehoava laa ahn dat mi moa impoatant. Wen da nyoo nayshan er ten-chraib kingdom staat wership aidol, wahn lata di Izrelait dehn fahn deh mi chravl tu Jeroosalem fi sopoat chroo wership. (2 Chron. 11:16, 17) Soh bikaaz Rehobowam mi obay Jehoava, ih schrentn ih oan rool.

Wen Rehobowam kingdom mi staybl, ih du sohnting reeli schupid. Ih disobay Jehoava jos fi gayn fayva wid di peepl weh wership faals gaad! Wai ih mi du dis? Yu tink dat maybi ih ma er fi shee famili mi-di presha ahn? (1 Ki. 14:21) Wel wateva da-mi ih reezn, di hoal nayshan fala ahn. Jehoava alow King Shaishak a Eejip fi tek oava wahn lata di siti dehn eena Jooda, eevn doa Rehobowam mi don schrentn dehn!—1 Ki. 14:22-24; 2 Chron. 12:1-4.

Wel, tingz geh wos wen Shaishak reech Jeroosalem, wehpaat Rehobowam mi-di rool. Rong dis taim, Shimaaya di prafit gi Rehobowam an ih prins dehn Gaad mesij. Ih tel dehn: “Yu lef mi, soh now Ai wahn lef yu tu di han a Shaishak.” How Rehobowam mi rispan tu dis mesij? Eena wahn gud way! Di Baibl seh: “Di prins dehn a Izrel an di king hombl dehnself ahn seh: ‘Jehoava raichos.ʼ” Soh, Jehoava sayv Rehobowam ahn Jeroosalem fahn dischrokshan.—2 Chron. 12:5-7, 12.

Afta dat, Rehobowam kantinyu fi rool oava di sodan kingdom. Bifoa ih mi ded doh, ih mi gi ih son dehn lata gif. Ih mosi mi du dis soh dat dehn noh chrai fait Abaija, ih son hoo mi wahn bee di neks king. (2 Chron. 11:21-23) Eena dis kays, Rehobowam mi shoa wizdom, sohnting weh ih neva mi gat erliya.

In spait a aala di gud tingz weh Rehobowam mi du, ih stil neva stay az Gaad fren. Di Baibl seh dis bowt fi hihn rool: “Hihn mi du weh bad.” Wai? Bikaaz “ih neva disaid eena ih haat dat ih wahn saach fi Jehoava.”—2 Chron. 12:14.

Tink bowt weh dis meen. Rehobowam did obay Gaad som a di taim. An ih did du sohn gud tingz fi Jehoava peepl dehn. Bot ih neva werk fi ga wahn kloas frenship wid Jehoava ner ga wahn dizaiya fi pleez ahn. Soh ih staat du weh rang ahn wership ada gaad. Dis mait mek yu wanda doh: ‘Wen Rehobowam mi rispan tu kongsl fahn Jehoava, ih mi du it bikaaz ada peepl mi tel ahn fi du it? Er bikaaz ih mi reeli sari fi weh ih mi du an ih mi waahn pleez Gaad?ʼ (2 Chron. 11:3, 4;  12:6) Laytaraan eena ih laif ih en op di du bad agen. Hihn mi difrent fahn fi hihn granfaada, King Dayvid! Da chroo, Dayvid mi mek sohn mistayk eena ih laif, bot ih mi lov Jehoava ahn lov chroo wership, an ih mi reeli sari bowt eni sinz ih mi komit.—1 Ki. 14:8; Ps. 51:1, 17; 63:1.

Wi ku laan wahn lesn fahn Rehobowam. Ih gud wen peepl provaid weh dehn famili need ahn chrai fi du ada gud tingz eena dehn laif. Bot fi ga Jehoava blesinz, wi haftu put chroo wership fos eena wi laif ahn stik tu it.

Wi wahn ku du dis if wi chrai fi kip wi lov fi Jehoava schrang. Jos laik how wi put wud eena wahn faiya soh dat ih noh owt, saym way wi need fi kip wi lov fi Jehoava alaiv chroo wi stodi a fi hihn Werd. Wi haftu tink bowt weh wi reed ahn noh giv op eena wi pryaaz. (Ps. 1:2; Roam. 12:12) Wi lov fi Jehoava wahn schrentn wi dizaiya fi pleez ahn. An if wi lov Jehoava, wi wahn ripent fahn wi haat wen wi sin. Soh, noh mek wi bee laik Rehobowam, mek wi stay laayal tu chroo wership.—Jood 20, 21.