DEHN mi kaal dehndeh buk di raynboa set. Wen Ah staat tu reed dehn, Ah mi laik di brait ahn byootiful pichaz weh mek Ah staat tink bowt di fyoocha. Bikaaz a dat, fan Ah yong, Ah mi feel laik Ah mi hongri fi Baibl chroot.

Wen Werl Waar II mi-di luk laik ih mi wahn tek oava India, Ah mi feel laik mi hoal werl mi-di faal apaat. Mi payrents separayt fahn wan anada, ahn layta, geh wahn divoas. Ah kudn andastan wai too peepl hoo Ai mi lov wuda lef wan anada. Ah mi feel hoaples, laik nobadi mi waahnt mi. Ah neva ga no breda ner sista soh nobadi mi dehdeh fi komfert ahn sopoat mi.

Mee ahn mi ma mi liv da Karachi. Wahn day, wahn lee oal dakta weh mi naym Fred Hardaker kohn vizit wi da wi hows. Hihn mi bilang tu di saym rilijan laik di mishineri weh mi ma mi geh dehn buk fram. Ih mi aks mi ma if shee waahn stodi di Baibl. Bot mi ma tel ahn no, ahn dat maybi  Ai wuda bee inchrestid. Ah mi staat stodi wid Brada Hardaker di neks week.

Wahn fyoo weeks layta, Ah staat goh da di Kristyan meetin dehn da Brada Hardaker medikal klinik. Bowt 12 oalda Witnisiz yoostu goh deh fi di meetin. Dehn mi tek kayr a mi ahn komfert mi laik wahn son. Ah memba how dehn yoostu sidong wid mi ahn taak tu mi laik wahn chroo fren. Ai mi reeli need dat at dis point eena mi laif.

Soon Brada Hardaker invait mi fi goh lang wid ahn eena di feel minischri. Ih mi teech mi fi yooz di foanograaf soh dat wi ku play rekad weh mi ga sohn shaat Baibl taak. Wahn fyoo a di taak dehn mi dairek, ahn sohn peepl neva laik dat ataal. Bot Ai mi laik di minischri. Ah mi eega fi laan Baibl chroot an Ai mi lov fi taak tu adaz bowt it.

Wen di Japaneez aami mi-di luk fi tek oava India, di British atariti put moa presha pahn Jehoava Witnisiz. Den, eena Joolai 1943, da presha afek mee tu. Di skool prinsipal, hoo da-mi wahn Anglikan minista, kik mi owta skool kaaz hihn seh dat Ai da-mi bad kompani. Ih tel mi ma dat Ai di set wahn bad egzampl fi di res a di styoodent dehn bikaaz Ah di spen taim wid di Witnisiz. Wel, mai ma mi beks ahn stap mi fahn deh rong di Witnisiz. Layta, shee ship mi aaf tu mi pa da Peshawar, bowt 850 mail fahn weh wi mi liv. Ah geh spirichwali week bikaaz Ah neva di geh eni spirichwal food ner deh rong mi bradaz ahn sistaz.

Eena 1947, Ah gaahn bak tu Karachi fi luk fi werk. Wen Ah mi dehdeh, Ah gaahn vizit Dakta Hardaker da ih klinik. Ih mi gi mi wahn big ahn waam welkom.

Ih aks mi: “Da weh di bada yu?” Hihn mi tink dat Ai mi sik.

Ah tel ahn: “Dak, Ah noh sik, Ah noh ga wahn fizikal siknis. Ah ga wahn spirichwal siknis. Ah need wahn Baibl stodi.”

Ih aks mi: “Soh, wen yu wuda waahn staat?”

Ah tel ahn: “Rait now if Ah kud.”

Wel, wi spen wahn wandaful eevnin di stodi di Baibl. Ah mi feel laik Ah kom bak hoam spirichwali. Mi ma mi chrai haad fi stap mi agen fahn deh rong di Witnisiz, bot dis taim Ah mi mek op mi main fi serv Jehoava. Pahn Aagas 31, 1947, Ah geh baptaiz. Den, wen Ah mi 17, Ah staat regyula painyaa.

Mi fos painyaa asainment da-mi Quetta, weh yoostu bee wahn British militari kyamp. Eena 1947, di konchri geh divaidid intu India ahn Pakistan. * Dis mi kaaz wahn lata vailens gens peepl weh rilijos. Bikaaz a dat, 14 milyan peepl staat tu moov owt fahn dehn ayrya. Peepl fahn di Mozlim rilijan da India gaahn tu Pakistan. Ahn peepl fahn di Hindoo ahn Seek rilijan da Pakistan moov tu India. Eena aala dis komoashan, Ah get pahn wahn chrayn weh mi soh ful ih kudn kehr wahn nada persn, ahn hed tu Quetta. Fi moas a di way, Ah hoal aan tu di han rayl pahn di owtsaida di chrayn. Ah hoal aan fi dyaa laif.

Da Quetta, Ah mi meet Brada George Singh, wahn speshal painyaa weh mi deh eena ih 20ʼs. Ih mi gi mi wahn oal baisikl weh Ah kuda mi raid er push rong eena di teritori, kaaz ih mi onli ga lata hil. Moas a di taim, Ah yoostu preech bai miself. Eena siks monts, Ah mi ga 17 Baibl stodiz, ahn som a dehn mi kom eena di chroot. Wan a dehn da-mi wahn aami aafisa weh mi naym Sadiq Masih. Hihn mi help mee ahn George chranslayt sohn Baibl poblikayshan intu Urdu, di mayn langwij a Pakistan. In taim, Sadiq mi geh fi bee wahn schrang poblisha a di gud nyooz.

Laytaraan, Ah gaahn bak da Karachi ahn serv wid too mishineri weh mi naym Henry Finch ahn Harry Forrest. Dehn mi jos grajuayt fahn Gilyad. Ai apreeshiayt di teeyokratik chraynin dehnya bradaz mi gi mi! Wahn taim Ah gaan wid Brada Finch pahn wahn preechin chrip tu naadan Pakistan. Wi mi fain sohn hombl peepl weh taak  Urdu. Dehn mi hongri fi di chroot. Too yaaz layta, mee miself mi gaahn da Gilyad Skool. Ah mi geh asain bak tu Pakistan az wahn paat-taim serkit oavaseeya. Ah mi liv da wahn mishineri hoam da Lahore, lang wid chree ada bradaz hoo da-mi mishineri tu.

Eena 1954 sohnting sad mi hapm. Di mishineri dehn kudn get lang wid wan anada ahn dis mi kaaz di branch aafis fi mek nyoo asainment fi evribadi. Bikaaz Ah mi tek said eena di aagyument, Ah mi geh schrang kongsl. Ah mi disapointid an Ah mi feel laik Ah neva mi gud fi notn. Soh Ah moov bak tu Karachi ahn den tu London, England. Ah mi-di hoap fi mek wahn nyoo spirichwal staat.

Da London, Ah yoostu goh da wahn kangrigayshan weh mi ga lata Betelait fahn di London Betel famili. Di branch servant, Brada Pryce Hughes, tek wahn inchres eena mi ahn chrayn mi. Wahn day, ih tel mi bowt wahn taim wen ih mi geh schrang kongsl fahn Brada Joseph F. Rutherford. Ih seh dat wen hihn mi chrai eksplayn ihself, Brada Rutherford giv ahn schranga kongsl. Ai mi sopraiz fi si dat Brada Hughes stil smail wen hihn taak bowt da ekspeeryens. Ih seh dat hihn mi opset fi di fos. Bot layta ih riyalaiz dat ih mi need di schrang kongsl ahn dat da-mi how Jehoava shoa ih lov far ahn. (Heeb. 12:6) Weh ih tel mi toch mi haat ahn help mi fi get bak mi jai eena mi servis tu Jehoava.

Rong da saym taim, mi ma mi moov tu London ahn mi aksep wahn Baibl stodi fahn Brada John E. Barr, hoo mi layta serv pahn di Govanin Badi. Shee mek stedi proagres ahn mi geh baptaiz eena 1957. Layta Ah fain owt dat mi pa mi stodi wid Jehoava Witnisiz bifoa ih mi ded.

Eena 1958, Ah mi geh marid tu Lene, wahn sista fahn Denmark hoo mi liv da London. Di neks yaa, wi mi ga wi fos daata, weh naym Jane. Wi mi ga faiv chiljren in aal. Ah mi aalso geh sohn privilij eena di Fulham Kangrigayshan. Bot in taim, Lene geh sik ahn wi mi haftu moov sohnweh waam. Soh eena 1967, wi moov tu Adelaide, Australia.

Wi kangrigayshan da Adelaide mi gat een 12 oalda anointid Kristyanz. Dehn mi put dehn haat intu di preechin werk. Rait away, wi set op wahn skejul fi di minischri.

 Eena 1979, mee ahn Lene mi ga wi fif pikni. Wi mi naym ahn Daniel. Hihn mi sik bad wid Down syndrome, * ahn di dakta dehn seh ih neva mi wahn liv lang. Eevn now Ah schrogl fi taak bowt di payn wi mi feel. Eevn doa wi mi werk haad fi tek kayr a Daniel, wi mi chrai fi noh niglek di ada foa pikni dehn needa. Sohntaim Daniel yoostu geh bloo bikaaz ih neva di geh inof aksijin sayka di too hoal eena ih haat. Wen dis hapm, wi wuda haftu rosh ahn tu di haaspital. Eevn doa ih mi soh sik, hihn da-mi wahn smaat lee bwai an ih mi onli lovin. Ih mi lov Jehoava tu. Wen wi wuda di seh di pryaa bifoa wi eet, ih put ih too lee han dehn tugeda, bow ih hed, ahn seh wahn lowd “Aymen” wen wi don. Den, ih wuda eet ih food.

Wen Daniel mi foa, ih get leukemia. Mee ahn Lene mi soh taiyad. Ah mi feel laik Ah mi wahn geh wahn nervos braykdong. Bot, wen wi mi feel laik wi kudn tek it nohmoh, wi serkit oavaseeya, Brada Neville Bromwich, mi kohn vizit wi. Da nait, ih hog wi ahn krai wid wi. Ah kyaahn tel yu how moch ih lovin ahn kain werdz mi komfert wi. Ih lef bowt wan aklak di maanin. Noh lang afta dat, Daniel mi ded. Wen wi looz wi lee bwai, dat da-mi di moas paynful ting wi eva gaahn chroo. Bot wi mi deel wid wi payn. Wi noa dat notn—noh eevn det—ku separayt Daniel fahn Jehoava lov. (Roam. 8:38, 39) Wi kyaahn wayt fi si ahn wen ih rezorek eena di nyoo werl!—Jan 5:28, 29.

Eevn doa Ah mi servaiv too schroak, Ah stil di serv az wahn elda eena mi kangrigayshan. Di tingz dehn weh Ah gaahn chroo help mi fi bee kain tu adaz ahn shoa kompashan tu dehn. Ah chrai noh fi joj dehn. Insted, Ah aks miself: ‘How dis persn bakgrong afek di way ih tink, feel, an ak? How Ah kuda shoa da persn dat Ah kay bowt ahn? How Ah ku inkorij da persn fi du tingz Jehoava way?ʼ Ah reeli lov fi goh du shepadin vizit pahn mi bradaz ahn sistaz eena di kangrigayshan an inkorij dehn! Wen Ah komfert ahn bil op adaz, Ai feel komfert ahn bil op miself tu.

Ah feel laik di saamis hoo seh: “Wen Ah feel laik mi woriz da tu moch fi mek Ah deel wid, [Jehoava] komfert ahn kaam mi soal.” (Ps. 94:19) Jehoava help mi chroo aala mi famili prablemz. Ih help mi chroo rilijos persikyooshan ahn dipreshan. Jehoava da wahn reel Faada tu mee!