Yu don reed dehnya ishu a Di Wachtowa aredi? Wel, mek wi si if yu ku ansa dehnya kweschan:

Wat da sohn tingz wi ku du fi sing beta?

Wi fi stan op schrayt ahn hoal wi sangbuk hai. Wi fi tek wahn deep bret. Ahn wi fi oapm wi mowt waid ahn sing owt soh dat wi ku sing lowda.—w17.11-E, p. 5.

Weh di loakayshan ahn di road dehn weh goh tu di siti dehn a protekshan teech wi?

Dehn mi ga siks siti a protekshan eena Izrel, ahn sohn gud road fi get tu eech wan a dehn siti. Dis kuda mi help wahn persn fi fain protekshan kwik-wan.—w17.11-E, p. 14.

Wai di ransom da di bes gif wi kuda eva get?

Di ransom gi wi wahn hoap fi di fyoocha, an ih wahn free wi fahn sin ahn det. Owta lov, Gaad sen Jeezas fi ded fi wi bikaaz wi da sinaz.—wp17.6-E, p. 6-7.

How wi noa dat Psalm 118:22 di taak bowt Jeezas rezorekshan?

Dehn mi rijek di Mesaiya ahn kil ahn. Soh fi mek ih bee “di cheef kaanastoan,” Jehoava mi need fi rezorek ahn.—w17.12-E, p. 9-10.

Yu tink di famili lain a di Mesaiya da-mi aalwayz chroo di fos baan son?

No, da neva aalwayz chroo di fos baan son. Dayvid da neva Jesi fos baan son, ahn di Mesaiya mi kohn chroo Dayvid famili lain. —w17.12-E, p. 14-15.

Wat da sohn medikal prinsipl weh deh eena di Baibl?

Eena di laa, Jehoava mi seh dat di Izrelait dehn mi fi kip enibadi weh mi ga sertn dizeez separayt fahn di res a di nayshan. Wahn persn weh mi toch wahn ded badi mi haftu wash aaf gud afta dat. Wen dehn yooz di baachroom, dehn mi haftu beri dehn stool. Ahn dehn mi haftu serkomsaiz dehn lee baybi bwai wen ih ayt dayz oal. Dis da-mi bikaaz di blod klat gud afta sevn dayz.—wp18.1-E, p. 7.

Wai ih okay fi mek wahn Kristyan ga wahn mezha a lov fi ihself?

Di Baibl seh dat wi fi lov wi nayba laik how wi lov wiself. (Maak 12:31) Ahn wahn hozban “fi lov ih waif jos laik how ih lov ih oan badi.” (Ifee. 5:28) Af koars, wi haftu bee kyaaful dat wi noh en op di lov wiself tu moch. —w18.01, p. 23.

Wat da sohn tingz wi ku du fi geh schranga spirichwali?

Wi need fi stodi di Baibl ahn meditayt pan it ahn den aplai weh wi laan. Wi haftu alow di hoali spirit fi gaid wi. Ahn wi mos aksep help fahn adaz ahn shoa apreeshiayshan far it.—w18.02, p. 26.

Wai ih rang fi yooz horoskoap, paam reedin an ada tingz laik dat fi pridik di fyoocha?

Wahn lata reezn deh, bot di mayn reezn da bikaaz di Baibl kandem it.—wp18.2-E, p. 4-5.

If wi aksep wahn invitayshan tu wahn meel, how wi shuda vyoo da invitayshan?

If wi mi aksep wahn invitayshan tu wahn meel, wi fi chrai kip wi werd. (Ps. 15:4) Wi noh fi kyansl fi no reezn ataal. Di persn weh mi invait wi mi praabli werk haad fi pripyaa di meel.—w18.03, p. 18.

Weh eldaz ahn ministeeryal servants ku laan fahn Timoti?

Timoti mi reeli kay bowt peepl, an ih mi put spirichwal tingz fos. Ih mi werk haad fi di gud nyooz an aplai di lesn dehn weh ih mi laan eena ih laif. Ih mi kip aan di chrayn ihself ahn pen pahn Jehoava spirit. Soh if yoo da wahn elda er ministeeryal servant, yu ku laan fahn Timoti egzampl.—w18.04, p. 13-14.