STODI AATIKL 24
Geh Rid a Tinkin Weh Goh Gens Weh Jehoava Teech!
“Wi di yooz dehn wepan deh fi kohn gens eni aagyument weh wuda stap peepl fahn noa Gaad.”—2 KOR. 10:5.
SANG 124 Aalwayz Bee Laayal
WEH WI WAHN DISKOS? *
1. Weh di apasl Paal mi waan di anointid Kristyanz bowt?
“UNU mosn stan laik dehn peepl eena dis werl ataal.” (Roam. 12:2) Paal mi rait dehnya werdz tu di Kristyanz weh mi-di liv bak eena di taim a di apasl dehn. Wai hihn mi gi soch a schrang waanin tu peepl weh mi don dedikayt dehn laif tu Gaad ahn weh mi geh anointid wid hoali spirit?—Roam. 1:7.
2-3. How Saytan chrai fi tern wi gens Jehoava, bot how wi ku root owt tingz weh deh deep dong eena wi main?
2 Paal mi kansaan bikaaz ih mi luk laik sohn Kristyanz mi-di alow di haamful tinkin a Saytan werl fi korop dehn tinkin. (Ifee. 4:17-19) Dat ku hapm tu eni wan a wi. Saytan da di gaad a dis sistem a tingz an ih yooz wahn lata difrent wayz fi chrai chrik wi fi mek wi tern wi bak pahn Jehoava. Fi egzampl, if wi waahn bee impoatant er faymos, hihn wahn yooz dat fi chrai tern wi gens Jehoava. Ih mait aalso chrai fi yooz wi bakgrong, wi kolcha, er wi ejukayshan fi mek wi tink di way hihn waahn wi tink.
3 Yu tink ih pasabl fi mek wi root owt tingz weh deh deep dong eena wi main? (2 Kor. 10:4) Noatis how Paal ansa: “Wi di yooz dehn wepan deh fi kohn gens eni aagyument weh wuda stap peepl fahn noa Gaad. Wi tek kanchroal a evri aidyaa ahn evri kaina tinkin, ahn mek dehn kohn fi obay Krais.” (2 Kor. 10:5) Yes, wid Jehoava help wi ku root owt eni rang atichood er tinkin weh wi mait gat. Jos laik how medisn ku tek weh di haam weh paizn du, Gaad Werd ku help tek weh di haam weh Saytan werl du tu wi.
‘CHAYNJ DI WAY YU TINKʼ
4. Weh chaynjiz wahn lata wi mi haftu mek wen wi mi fos aksep di chroot?
4 Tink bak pahn di chaynjiz weh yu mi need fi mek wen yu mi fos aksep di chroot ahn disaid fi serv Jehoava. Fi wahn lata wi, ih mi meen dat wi mi haftu root owt sohn rang kandok. (1 Kor. 6:9-11) Wi soh tankful dat Jehoava help wi fi stap du dehn bad tingz!
5. Akaadn tu Roamanz 12:2, weh too tingz wi need fi du?
5 Wi neva waahn feel laik wi noh need fi mek nohmoh chaynjiz. Eevn doa wi stap du dehn seeryos sin weh wi yoostu du bifoa wi geh baptaiz, wi need fi kantinyu werk haad soh dat notn noh temp wi fi komit dehn sayhn seeryos sin agen. How wi ku du dat? Paal tel wi: “Unu mosn stan laik dehn peepl eena dis werl ataal. Noh du weh dehn du. Insteda dat, unu mos mek Gaad chaynj di way unu tink soh dat evriting weh unu du wahn chaynj.” (Roam. 12:2) Soh wi need fi du too tingz. Fos, wi need fi noh “stan laik dehn peepl eena dis werl,” er noh du weh dehn du. Sekant, wi need fi “chaynj di way [wi] tink.” Dat meenz dat wi need fi alow Gaad fi gaid di way wi tink.
6. Weh wi laan fahn Jeezas werdz da Machyu 12:43-45?
6 Di chaynj weh Paal mi-di taak bowt da moa dan jos chaynj di way wi luk. Da wahn chaynj weh afek di hoal a wi az wahn persn. (Si di baks “ Wi Chaynj Kompleetli er Wi Jos Priten fi Chaynj?”) Wi need fi kompleetli chaynj di way wi tink—wi atichood, wi feelinz, ahn wi dizaiyaz. Soh aala wi need fi aks wiself: ‘Ai onli di priten fi chaynj, er Ai reeli di kohn fi bee wahn Kristyan eena mi haat ahn main?ʼ Wi ansa tu dehnya kweschan veri impoatant. Eena di buk a Machyu 12:43-45, Jeezas tel wi weh wi need fi du. (Reed.) Dehn werdz teech wi wahn impoatant lesn: Ih noh inof jos fi geh rid a di rang tinkin; wi need fi chaynj da kaina tinkin wid tingz weh pleez Gaad.
‘MEK GAAD SPIRIT CHAYNJ YU HAAT AHN DI WAY YU TINKʼ
7. How wi ku chaynj weh eena wi haat ahn wi main?
7 Yu tink ih reeli pasabl fi chaynj weh deh eena wi haat ahn wi main? Di Baibl seh: “Unu fi mek Gaad Spirit chaynj unu haat ahn di way unu tink. Unu fi bihayv laik di nyoo persn weh Gaad mek fi bee laik hihn. Da nyoo persn wahn liv hoali, ahn du weh rait eena Gaad sait.” (Ifee. 4:23, 24) Yes, ih pasabl fi chaynj weh deh eena wi haat ahn wi main, bot ih noh eezi. Wi need fi du moa dan jos hoal bak di rang dizaiyaz ahn stap du rang tingz. Wi need fi ‘chaynj wi haat ahn wi main.ʼ Dat meenz dat wi chaynj wi dizaiyaz, wi bihayvya, ahn di reezn wai wi du weh wi du. Soh wi hafu kantinyu werk pan it dayli.
8-9. How di ekspeeryens a wahn brada shoa di need fi wi chaynj weh eena wi haat ahn main?
8 Mek wi kansida di egzampl a wahn brada weh mi vailent eena di paas. Hihn doz geh jronk ahn fait wid peepl, bot ih mi stap, ahn laytaraan ih mi kwalifai fi geh baptaiz. Dis mi giv wahn wandaful witnis tu di peepl rong di ayrya wehpaat ih mi liv. Bot wan eevnin, sohntaim afta ih mi geh baptaiz, ih mi geh tes eena wahn way weh ih neva ekspek. Wahn man weh mi jronk kohn da ih hows ahn chalenj ahn fi fait. At fers, di brada hoal bak ih dizaiya fi fait. Bot wen di man taak bad bowt Jehoava, wel, dat da-mi di laas schraa, di brada mi kyaahn hoal bak ih anga nohmoh. Ih gaahn owtsaid ahn beet op di man. Wai hihn mi du dat? Aldoa ih stodi a di Baibl mi help ahn fi hoal bak ih dizaiya fi fait, ih neva mi chaynj weh mi deh eena ih haat ahn main yet.
9 Eevn doa dat mi hapm, di brada neva stap chrai chaynj. (Prov. 24:16) Wid di help a di eldaz ih kantinyu fi mek chaynjiz. Laytaraan ih mi kwalifai fi serv az wahn elda. Den wan eevnin, rait owtsaida di Kingdom Haal, di saym kaina tes kom op agen. Wahn man weh mi jronk mi bowt fi beet op wahn neks elda. Weh di brada du? Eena wahn kaam ahn hombl way, ih reezn wid di man weh mi jronk, kaam ahn dong, an eevn help ahn fi get hoam. Weh mi mek di brada rispan difrent dis taim? Di brada mi chaynj weh deh eena ih haat an ih main. Hihn mi chaynj fi bee wahn peesful ahn hombl persn. Dis mi bring prayz tu Jehoava!
10. Weh wi need fi du fi chaynj weh deh eena wi haat ahn main?
10 Dehnya chaynj noh hapm oavanait, ner dehn noh hapm rait away. Wi mait need fi “chrai [wi] bes” fi wahn lang lang taim. (2 Peet. 1:5) Ih noh nof fi jos bee wahn servant a Jehoava fi wahn sertn lent a taim. Wi need fi du aal weh wi kud fi chaynj weh deh eena wi haat ahn wi main. Dehn ga wahn lata baysik ting weh wi ku du fi help wi mek dis chaynj. Mek wi kansida som a dehn.
HOW FI CHAYNJ WEH EENA YU HAAT AHN YU MAIN
11. How pryaa wahn help yu fi chaynj weh eena yu haat ahn yu main?
11 Di fos impoatant step da pryaa. Wi need fi pray laik Dayvid weh mi seh: “Put wahn pyoar haat eena mi, Oa Gaad, ahn put wahn nyoo spirit eena mi; wahn laayal wan.” (Ps. 51:10) Wi mos admit dat wi need fi chaynj weh deh eena wi haat ahn main an aks Jehoava fi help wi. How wi ku bee shoar dat Jehoava wahn help wi mek di chaynj weh wi need fi mek? Wi ku geh komfert fahn weh Jehoava pramis fi du tu di stobant Izrelait dehn eena Izeekyel day. Ih mi seh: “Ah wahn gi dehn wan haat, an Ah wahn put wahn nyoo spirit eena dehn . . . ahn gi dehn wahn haat a flesh [weh ku aalso bee, “wahn obeedyant haat,” ftn.].” (Ezek. 11:19) Jehoava mi wilin fi help dehn Izrelait fi chaynj, ahn hihn wilin fi help wee chaynj tu.
12-13. (a) Akaadn tu Psalm 119:59, weh wi need fi tink bowt? (b) Weh kweschanz yu need fi aks yuself?
12 Di sekant impoatant step da fi meditayt. Az wi dig intu di Baibl eech day, wi need fi tek di taim fi tink bowt weh wi reed soh dat wi ku si wich tinkin ahn feelinz wi need fi chaynj. (Reed Psalm 119:59; * Heeb. 4:12; Jay. 1:25) Wi need fi si if wi ga eni taats er feelinz weh mait di leen tuwaadz dis werl tinkin. Wi need fi bee aanis wid wiself an admit wat da wi weeknis dehn ahn den werk haad fi geh rid a dehn.
13 Fi egzampl, aks yuself: ‘Ai ga eevn wahn lee bit a jelosi eena mi haat?ʼ (1 Peet. 2:1) ‘Ai feel laik Ai beta dan adaz bikaaz a weh Ai kohn fram, bikaaz a mi ejukayshan, er bikaaz a humoch moni Ah ga?ʼ (Prov. 16:5) ‘Ai tink dat peepl weh noh ga di sayhn tingz laik mee, er weh kohn fahn wahn difrent kolcha, da loa-klaas?ʼ (Jay. 2:2-4) ‘Ai laik di tingz weh Saytan werl aafa?ʼ (1 Jan 2:15-17) ‘Ai injai TV proagram er veedyo weh shoa seks ahn vailens?ʼ (Ps. 97:10; 101:3; Amos 5:15) If yu ansa dehnya kweschanz, ih ku help yu fi si difrent ayrya eena yu laif weh yu mait need fi werk pan. Wen wi aybl fi chaynj dehnya schrang taats er feelinz, wi wahn pleez wi hevnli Faada.—Ps. 19:14.
14. Wai ih impoatant dat wi chooz gud frenz?
14 Di terd impoatant step da fi chooz gud frenz. Wi frenz afek wi big taim weda da fi gud er bad. (Prov. 13:20) Weda wi deh da werk er da skool, wi ga wahn lata peepl rong wi weh noh wahn help wi fi tink eena wahn way weh Gaad pleez wid. Bot, wi ku fain di bes kaina frenz da wi Kristyan meetinz. Dat da wehpaat wi ku geh inkorij fi “shoa lov ahn du gud.”—Heeb. 10:24, 25.
“GROA SCHRANGA EENA YU FAYT”
15-16. How Saytan chrai fi chaynj wi tinkin?
15 Memba, Saytan di werk haad fi chaynj wi tinkin. Hihn di chrai aal kaina ting fi stap di Baibl fahn gaid di way wi tink.
16 Saytan stil kantinyu fi aks di sayhn kweschan weh ih mi aks Eev bak eena di gyaadn a Eedn: “Gaad mi reeli seh dat . . . ?” (Gen. 3:1) Eena dis werl weh rool bai Saytan, wi aafn hyaa kweschanz weh ku mek wi dowt weh wi bileev eena. Kweschanz laik: ‘Gaad reeli noh pleez wid saym-seks marij? Gaad reeli noh waahn wi selibrayt Krismos ahn bertday? Gaad reeli noh waahn yu tek wahn blod chransfyoozhan? Gaad reeli ekspek yoo noh fi taak wid yu fren er famili weh disfeloship?ʼ
17. Weh wi shuda du wen sombadi aks wi kweschanz fi mek wi dowt weh wi bileev eena, an akaadn tu Koloashanz 2:6, 7, weh ku bee di rizolt?
17 Wi need fi bee kanvins bowt weh wi bileev eena. If wi noh fain di ansa tu impoatant kweschanz bowt wi bileef dehn, wi ku staat tu dowt dat weh wi bileev eena da di chroot. Afta wahn wail, dehnya dowts ku staat tu twis wi tinkin ahn dischrai wi fayt. Soh weh wi need fi du? Gaad Werd tel wi fi chaynj di way wi tink soh dat evriting weh wi du wahn chaynj. Den dat wahn mek wi noa “weh Gaad waahn, weh gud ahn weh wahn pleez hihn, ahn [wi] wahn noa egzakli how [wi] shuda liv.” (Roam. 12:2) If wi mek it wahn regyula habit fi aalwayz stodi, wi wahn ku bee shoar dat weh wi di laan fahn di Baibl da di chroot. Ahn wi wahn ku bee shoar dat Jehoava standadz rait. Den, wi wahn bee laik wahn chree weh ga ih roots deep deep dong eena di grong, wi “wahn groa schranga eena [wi] fayt.”—Reed Koloashanz 2:6, 7.
18. Weh wahn help fi protek wi fahn di paizn a Saytan werl?
18 Nobadi kyaahn schrentn yu fayt fi yu, soh kantinyu fi chaynj weh deh eena yu haat ahn yu main. Pray wahn lat; bayg Jehoava fi ih hoali spirit fi help yu. Tink bowt weh yu reed; kantinyu fi egzamin yu tinkin ahn di reezn wai yu du weh yu du. Chooz gud frenz; kip peepl rong yu weh wahn help yu fi chaynj di way yu tink. If yu du dat, yu wahn ku protek yuself fahn di paizn a Saytan werl ahn difen yu fayt gens “eni aagyument weh wuda stap peepl fahn noa Gaad.”—2 Kor. 10:5.
SANG 50 Wahn Dedikayshan Pryaa
^ párr. 5 Fi gud er fi bad, wi tinkin aalwayz geh afektid bai wi kolcha, wi ejukayshan, er wi bakgrong. Wi mait fain owt dat sertn rang atichood weh wi gat root deep dong eena wi persnaliti. Dis aatikl wahn help wi fi si how wi ku root owt eni rang atichood weh wi mait ga.
^ párr. 12 Psalm 119:59: “Ai don egzamin mi wayz, soh dat Ah ku ton bak tu yu rimainda dehn.”