STODI AATIKL 26
Help Adaz fi Koap Wid Schres
“Aala unu mos ga di sayhn tinkin ahn kansaan fi wan anada. Unu fi lov wan anada laik breda ahn sista, ahn unu fi kain ahn hombl tu wan anada.”—1 PEET. 3:8.
SANG 107 Jehoava Lovin Wayz
WEH WI WAHN DISKOS? *
1. How wi ku kapi wi lovin Faada, Jehoava?
JEHOAVA lov wi soh moch. (Jan 3:16) Wee waahn kapi wi lovin Faada. Soh wi chrai haad fi shoa lov tu “wan anada laik breda ahn sista, ahn fi [bee] kain ahn hombl tu wan anada,” an “espeshali [tu] dehn wan weh da wi oan bradaz ahn sistaz.” (1 Peet. 3:8; Gal. 6:10) Wen wi bradaz ahn sistaz di goh chroo schres, wi eega fi help dehn.
2. Weh wi wahn diskos eena dis aatikl?
2 Evribadi weh waahn bee paat a Jehoava famili wahn haftu goh chroo sohn rof sichuwayshanz. (Maak 10:29, 30) Az wi geh kloasa ahn kloasa tu di en a dis sistem, fi shoar wi wahn haftu deel wid moa ahn moa chraiyalz. How wi ku help wan anada? Mek wi luk eena di Baibl ahn si weh wi ku laan fahn Lat, Joab, ahn Naiyoami. Wi wahn aalso diskos som a di chalenjiz weh wi oan bradaz ahn sistaz di goh chroo tudeh, ahn wi wahn si how wi ku help dehn fi koap wid dehn prablemz.
GA PAYSHENS
3. Weh bad disizhan Lat mi mek akaadn tu 2 Peeta 2:7, 8, ahn wat da-mi di rizolt?
3 Lat mi mek wahn bad disizhan. Ih kehr ih famili gaahn liv monks veri wikid peepl da Sadam. (Reed 2 Peeta 2:7, 8.) Sadam da-mi wahn veri komfatabl plays fi liv, bot Lat mi gaahn chroo wahn lata prablemz kaaz ih gaahn liv deh. (Gen. 13:8-13; 14:12) Ih luk laik Lat waif mi lov eeda di siti er som a di peepl weh mi liv deh soh moch dat ih neva obay wen Jehoava mi tel dehn fi lef widowt luk bak. Dat mi mek shee disobay Jehoava. Shee mi looz ih laif wen faiya ahn brimstoan mi rayn dong pahn di reejan. Ahn tink bowt Lat too daata dehn. Dehn mi fi geh marid tu too man weh mi ded da Sadam. Lat mi looz ih hows, evriting weh ih mi oan, an ih mi eevn looz ih waif. (Gen. 19:12-14, 17, 26) Yu tink dat wid aala dis, Jehoava mi looz ih payshens wid Lat? Non ataal.
Owta lov, Jehoava sen ih aynjel dehn fi sayv Lat an ih famili (Paragraaf 4)
4. How Jehoava mi shoa dat ih payshent wid Lat? (Koment pahn di picha pahn di kova.)
4 Eevn doa Lat mi liv da Sadam, Jehoava mi shoa dat ih mi feel far ahn, kaaz ih mi sen too aynjel fi reskyu hihn an ih famili bifoa di siti mi geh dischrai. Bot insteda obay di koman a di aynjel dehn, Lat mi-di “tek ih sweet taim.” Di aynjel dehn mi grab ih han ahn help hihn an ih famili fi get owta di siti. (Gen. 19:15, 16) Den di aynjelz mi tel ahn fi ron tu di mongtin dehn. Insteda obay Jehoava, Lat mi aks fi goh da wahn neks tong kloas bai. (Gen. 19:17-20) Agen, Jehoava mi payshent wid Lat an ih mi mek ih goh da di tong weh ih mi prifaa fi goh. Lat mi feel frayd fi liv deh, soh ih stil mi en op di goh da di sayhn plays weh Jehoava mi tel ahn fi goh fahn di biginin. (Gen. 19:30) Dis reeli shoa jos humoch payshens Jehoava mi ga tuwaadz Lat! How wi ku kapi Jehoava?
5-6. How wi ku aplai 1 Tesaloanyanz 5:14 eena wi laif wen wi kapi Gaad?
5 Jos laik Lat, wahn brada er sista mait mek bad disizhanz ahn kaaz seeryos prablemz fi ihself. If dat da di kays, weh wi wuda du? Wee mait bee temtid fi tel ahn dat ih di reep weh ih soa. Dat mait noh bee wahn lai. (Gal. 6:7) Bot wee ku handl dis beta if wi kapi di way how Jehoava mi help Lat. How wi ku du dat?
6 Jehoava neva onli mi sen aynjelz fi waan Lat, bot aalso fi help ahn ron weh fahn di dischrokshan a Sadam. Sayhn way soh, wi mait need fi waan wi brada if wi si dat hihn di du sohnting weh ku bring ahn chrobl. Bot wi ku help ahn tu. Eevn if hihn sloa fi aplai di kongsl fahn di Baibl, wi waahn bee payshent wid ahn. Bee laik di too aynjelz. Insteda giv op pahn wi brada, help ahn. Wi shuda waahn help ahn, noh onli bai weh wi seh bot bai di tingz weh wi du tu. (1 Jan 3:18) Wi mait haftu help wi brada yooz di saym advais wi gi ahn fahn di Baibl, ahn bee payshent wid ahn.—Reed 1 Tesaloanyanz 5:14.
7. How ku kapi di way Jehoava mi feel bowt Lat?
7 Jehoava kuda mi foakos pahn Lat imperfekshan. Bot insteda dat, hihn mi mek di apasl Peeta rifaa tu Lat az wahn raichos man. Wi soh hapi fi noa dat Jehoava fergiv wi mistayk dehn! (Ps. 130:3) Yu tink wi ku kapi di way Jehoava mi feel bowt Lat? If wi foakos pahn wi bradaz ahn sistaz gud kwalitiz, ih wahn eeziya fi mek wi bee moa payshent wid dehn. Ahn dis wahn mek it eeziya fi mek dehn aksep fi wee help.
SHOA KOMPASHAN
8. If wi ga kompashan, weh dat mek wi waahn du?
8 Lat ahn Joab mi difrent, kaaz Joab neva sofa bikaaz a wahn bad disizhan weh ih mi mek. Stilyet, hihn mi gaahn chroo sohn seeryos prablemz. Hihn mi looz evriting weh ih mi ga, inkloodin di pozishan weh ih mi ga eena di kamyooniti an ih gud helt. Ahn weh eevn wers, hihn an ih waif mi looz aala dehn chiljren eena det. Pahn tap a dat, Joab chree soa-kaal frenz mi deh gens ahn. Wai dehn chree soa-kaal frenz neva ga kompashan far ahn? Dehn neva andastan weh reeli mi-di hapm tu
ahn; dehn onli mi si weh mi-di hapm pahn di owtsaid. Dehn mi ga rang aidyaaz ahn soh dehn joj Joab rang. Weh wi ku du soh wi noh mek da mistayk? Kip in main dat da onli Jehoava noa aala di faks bowt wahn persn sichuwayshan. Lisn kyaafuli tu di persn weh di sofa. Ga kompashan far ahn; feel weh ih di feel; put yuself eena fi hihn shooz. Da onli soh yu wahn ku shoa yu brada er sista dat yu andastan weh ih di goh chroo.9. Weh wi wudn du if wi ga kompashan, ahn wai yu seh dat?
9 If wi ga kompashan, wi noh wahn di spred lai er gasip bowt weh adaz di goh chroo; wi noh wahn taak bowt dehn prablemz. Sombadi weh gasip, er shush, noh yoonait di kangrigayshan; ih brok it op; ih divaid it. (Prov. 20:19; Roam. 14:19) If da persn tink ih kain, ih rang, kaaz ih werdz di hert op sombadi weh don di sofa. (Prov. 12:18; Ifee. 4:31, 32) Ih way beta fi luk fi di gud eena di persn ahn tink bowt how wi ku help ahn deel wid ih chraiyalz!
Wen wahn brada er sista taak widowt tink, lisn payshent-wan ahn fain di rait taim fi komfert ahn (Paragraaf 10-11) *
10. Weh Job 6:2, 3 teech wi?
10 Reed Job 6:2, 3 *. Sohntaim Joab mi taak widowt tink—di Baibl kaal it “krayzi taak.” Bot laytaraan, hihn mi admit dat som a di tingz weh hihn mi seh mi rang. (Job 42:6) Jos laik Joab, sombadi weh di goh chroo schres mait seh tingz weh ih noh reeli meen fi seh, ahn layta ih wahn rigret dat ih mi seh it. Weh wee shuda du eena dis kays? Insteda joj di persn, wi shuda feel kompashan far ahn. Memba dat da neva Jehoava perpos fi mek wi di deel wid prablemz ahn schres. Wen wi tink laik dis, wi andastan wai wahn faytful servant a Jehoava seh krayzi tingz wen ih deh anda lata schres. Eevn if ih seh tingz bowt wee er bowt Jehoava weh noh karek, wi noh fi bee kwik fi hoal it gens ahn. Wi noh waahn joj ahn er eevn geh beks fi weh ih mait seh.—Prov. 19:11.
11. How kangrigayshan eldaz ku kapi di egzampl a Ilaihyu wen dehn di gi kongsl?
11 Sohntaim, wahn persn weh di goh chroo schres need kongsl er disiplin tu. (Gal. 6:1) How di eldaz ku du dat? Dehn shuda kapi di kompashan weh Ilaihyu mi ga wen ih mi lisn tu Joab. (Job 33:6, 7) Ilaihyu neva aafa kongsl til afta ih mi andastan weh mi-di goh chroo Joab main. Sayhn way soh, eldaz shuda lisn an andastan wahn persn sichuwayshan fers. Den, wen da taim fi gi kongsl, dehn ku reech di persn haat.
TAAK WID KOMPASHAN
12. How di det a Naiyoami hozban an ih too son mi afek shee?
12 Naiyoami da-mi wahn laayal uman weh mi lov Jehoava. Bot afta ih hozban an ih too son mi ded, shee mi waahn chaynj ih naym tu “Maara,” weh meenz “Bita.” (Ruth 1:3, 5, 20, ftn., 21) Naiyoami daata-in-laa, Root, mi stay wid ahn wen ih mi-di goh chroo ih chraiyalz. Root noh onli mi sopoat ih mada-in-laa bot ih mi aalso komfert ahn wen ih mi taak tu ahn. Root mi shoa humoch ih lov Naiyoami bai di werdz weh ih mi yooz wid ahn.—Ruth 1:16, 17.
13. Wai dehn wan weh looz wahn mayt eena det need wi sopoat?
13 Wen wan a wi brada er sista looz wahn mayt eena det, ih need wi sopoat. Wi ku seh dat wahn marid kopl da laik too chree weh groa kloas tu eech ada. Az di yaaz paas bai, di roots dehn tangl op wid wan anada. Wen wan a di chree geh pul owta di grong ahn ded, di neks wan sofa reeli bad. Jos laik dat, wen wahn persn looz ih mayt eena det, hihn er shee mait ga miks feelinz fi wahn wail. Paala, * hoo hozban mi ded sodn-wan, seh: “Mai laif mi chaynj kopmleetli, Ah mi feel laik Ah kyaahn help miself. Ah mi looz mi bes fren. Ah yoostu taak tu mi hozban bowt evriting. Wee mi hapi tugeda an hihn mi aalwayz dehdeh fi mi wen Ah mi need ahn. Hihn yoostu aalwayz lisn tu mi wen Ah taak bowt weh di bada mi. Ah mi reeli feel laik Ah mi kot eena haaf.”
Weh wi ku du fi sopoat dehn wan weh looz wahn mayt eena det? (Paragraaf 14-15) *
14-15. How wi ku komfert sombadi hoo looz ih marij mayt eena det?
14 How wi ku komfert sombadi hoo looz ih marij mayt eena det? Di fers ting wi shuda du da taak tu di persn, eevn if wi feel laik wi noh noa weh fi seh. Paala, weh wi mi menshan erliya, seh: “Ai andastan dat som peepl noh noa weh fi du er seh wen sombadi ded. Dehn wori dat weh dehn seh mait ofen sombadi. Bot notn ku bee wers dan sombadi weh noh seh notn ataal.” Sombadi weh di moarn noh ekspek wi fi seh sohnting reeli waiz. Paala seh: “Ai reeli apreeshiayt it wen frenz wuda seh, ‘Ah sari fi weh yu di goh chroo.ʼ”
15 William, hoo waif mi ded sohn yaaz agoa, seh: “Ai laik it wen adaz tel mi di gud tingz dehn memba bowt mi waif; ih mek Ah noa dat dehn mi lov ahn rispek ahn. Dis da wahn big help fi mi. Dehn werdz gi mi komfert bikaaz mi waif mi soh preshos tu mee an ih da-mi wahn big paat a mi laif.” Wahn wido weh naym Bianca seh: “Ah geh komfert wen adaz pray wid mi ahn reed wan er too skripcha wid mi.
Ih help mi wen dehn taak bowt mi hozban ahn wen dehn lisn tu mi wen Ai taak bowt hihn.”16. (a) Wai wee shuda gi sopoat tu sombadi weh looz wahn famili memba eena det? (b) Akaadn tu Jaymz 1:27, wat da fi wee rispansabiliti?
16 Jos laik how Root mi stay wid Naiyoami afta ih mi looz ih famili eena det, wee need fi kip di sopoat dehn wan weh looz wahn famili memba er mayt eena det. Paala, weh wi mi menshan erliya, seh: “Rait afta mi hozban mi ded, Ah mi geh lata sopoat. Dehn mi komfert mi ahn help mi. Bot afta wahn wail, evribadi mi bizi wid dehn laif, evriting gaahn bak tu naamal fi dehn; bot noh fi mee. Mai laif mi chaynj. Ih reeli help wen adaz andastan dat wahn persn weh di moarn need help ahn sopoat eena di monts ahn eevn yaaz ahed.” Da chroo dat evribadi difrent. Som peepl ajos kwik tu dehn nyoo laif. Fi adaz, doh, evritaim dehn du sohnting weh dehn yoostu du wid di persn weh ded, ih rimain dehn bowt di payn agen. Evribadi moarn eena wahn difrent way. Mek wi aalwayz memba dat Jehoava gi wi di privilij ahn di rispansabiliti fi luk afta wi bradaz weh looz dehn mayt eena det.—Reed Jaymz 1:27.
17. Wai wi bradaz weh geh abandan bai dehn mayt need wi sopoat?
17 Som marij mayt haftu deel wid di payn ahn schres weh kohn wen dehn mayt abandan dehn. Joyce hozban mi lef ahn fi wahn neks uman, shee seh: “Di payn weh Ah mi feel wen Ah mi-di geh divoas mi
wers dan if mi hozban mi ded. If hihn mi ded eena wahn aksident er fahn wahn siknis, ih neva mi wahn bee ih chois. Bot eena dis kays, mai hozban mi chooz fi abandan mee. Ai mi feel laik Ah neva wert notn.”18. Weh wi ku du fi help dehn wan weh noh ga dehn marij mayt agen?
18 Wen wi du kain tingz fi dehn wan weh noh ga dehn marij mayt agen, wi shoa dat wi reeli lov dehn. Now dat dehn deh bai dehnself, dehn need gud frenz moa dan eva. (Prov. 17:17) Weh yoo ku du fi proov dat yoo da dehn fren? Yu ku invait dehn oava fi wahn lee meel; notn big. Ahn yu ku aafa fi spen taim wid dehn eena di minischri er du fon tingz tugeda. Wahn neks gud opshan da fi invait dehn now an agen fi jain yu fi yu famili wership eevnin. If yu du dat, yu wahn mek Jehoava hapi, kaaz hihn deh “kloas tu dehn wan weh sad eena dehn haat” an ih “gi protekshan tu di wido dehn.”—Ps. 34:18; 68:5.
19. Akaadn tu 1 Peeta 3:8, weh wi fi du?
19 Soon, wen Gaad Kingdom rool pahn di ert, “nobadi wahn memba di prablem dehn.” Wi luk faawod tu di taim wen “wi noh wahn memba aala dehndeh tingz weh mi deh eena di paas ahn dehn noh wahn afek wi haat eeda.” (Isa. 65:16, 17) Til da day kohn, mek wi sopoat wan anada ahn proov bai weh wi seh ahn weh wi du dat wi lov aala wi bradaz ahn sistaz.—Reed 1 Peeta 3:8.
SANG 111 Di Ting Dehn Weh Mek Wi Feel Hapi
^ párr. 5 Lat, Joab, ahn Naiyoami mi laayal tu Jehoava, bot dehn stil mi haftu goh chroo sohn haad taimz eena dehn laif. Dis aatikl taak bowt weh wi ku laan fahn fi dehn ekspeeryens. Ih aalso diskos wai ih impoatant fi mek wi bee payshent ahn shoa kompashan an inkorij wi bradaz ahn sistaz weh di goh chroo haad taimz.
^ párr. 10 Job 6:2, 3: “If mi payn kuda onli geh way pahn wahn skayl lang wid mi sofarin! Ih wuda bee heviya dan di san a di see. Dat da wai mi werdz da krayzi taak.”
^ párr. 13 Som a di naym dehn chaynj.
^ párr. 58 DI PICHA DEHN: Wahn brada beks ahn di taak owta ih hed. Wahn elda di lisn tu ahn payshent-wan. Laytaraan, afta di brada kaam dong, di elda giv ahn kain kongsl.
^ párr. 60 DI PICHA: Wahn yong marid kopl di spen taim wid wahn brada weh mi looz ih waif eena det. Dehn di memba sohn gud memriz bowt di brada waif.