1. Wai wi need fi lisn tu Jeezas waanin?

EENA Jeezas prafesi bowt di laas dayz, ih mi seh: “Unu main dat unu haat noh geh bag dong wid . . . di woriz a dis laif.” (Look 21:34) Wai wi need fi lisn tu dat waanin? Bikaaz rait now wi di deel wid di saym kaina schres weh evribadi els di fays.

2. Weh kaina schres wi bradaz ahn sistaz dehn di fays?

² Sohntaim, di prablem dehn weh schres wi owt kohn wan afta di ada ahn pail op pahn wi. Mek wi luk pahn sohn egzampl. Wahn Witnis weh nayhn Jan * weh marid fi 19 yaaz, di sofa fahn wahn terabl dizeez [multiple sclerosis], hihn mi shak wen ih waif lef ahn. Den ih too daata mi stap serv Jehoava. Wahn kopl weh naym Bob ahn Linda mi fays sohn difrent chalenjiz. Dehn mi looz dehn jab ahn dehn hows. Pahn tap a dat, Linda mi fain owt dat ih ga wahn haat dizeez weh ku kil ahn, ahn bad aachraitis weh mek it haad fi ih badi fait di dizeez.

3. Akaadn tu Filipiyanz 4:6, 7, weh wi ku bee shoar a?

³ Wi ku bee shoar dat wi Kriyayta ahn lovin Faada, Jehoava, andastan how schres afek wi. Ahn hihn waahn help wi fi deel wid di chalenjiz wi fays. (Reed Filipiyanz 4:6, 7.) Di Baibl gat een wahn lata egzampl a di chalenjiz weh Gaad servants mi gaahn chroo. Ih aalso tel wi how Jehoava help  dehn fi deel wid dehndeh schresful sichuwayshan. Mek wi luk pahn som a dehn egzampl.

4. Weh chalenjiz Ilaija mi fays, ahn how hihn mi feel bowt Jehoava?

⁴ Ilaija mi serv Jehoava joorin sohn veri haad taimz an ih mi fays sohn seeryos chalenjiz. King Ayhab, weh da-mi wahn king da Izrel, neva faytful tu Jehoava. Ih marid eevl Jezibel, hoo mi wership Bayal. Di too a dehn mi promoat Bayal wership ahn merda wahn lata Jehoava prafit. Ilaija mi manij fi eskayp. Hihn mi aalso servaiv wahn terabl famin bikaaz ih mi pen pahn Jehoava. (1 Ki. 17:2-4, 14-16) Pahn tap a dat, Ilaija mi pen pahn Jehoava wen ih mi chalenj di faals prafit dehn ahn dehn wan weh wership Bayal. Ih inkorij di Izrelait dehn fi serv Jehoava. (1 Ki. 18:21-24, 36-38) Ilaija mi ga wahn lata proof dat Jehoava mi-di sopoat ahn aal chroo dehn schresful taimz.

5-6. Akaadn tu 1 Kings 19:1-4, how Ilaija mi feel, ahn how Jehoava mi shoa dat hihn lov Ilaija?

⁵ Reed 1 Kings 19:1-4. * Bot Ilaija mi geh frayd wen Kween Jezibel chretn fi kil  ahn. Soh ih ron gaahn da Bayr-sheeba. Hihn mi soh diskorij dat “ih aks fi mek ih ded.” Weh mi mek ih mi feel soh? Ilaija da neva wahn perfek man, hihn “da-mi wahn man jos laik mee ahn yoo.” (Jay. 5:17) Maybi hihn mi feel oavakom bai schres ahn reeli taiyad. Ilaija praabli mi tink dat aala ih haad werk fi help peepl fi wership Jehoava mi yoosles, dat notn eena Izrel mi geh beta, ahn dat hihn da-mi di onli wan weh stil di serv Jehoava. (1 Ki. 18:3, 4, 13; 19:10, 14) Ih mait sopraiz wi dat dis faytful prafit mi feel da way. Bot Jehoava mi andastan how Ilaija mi feel.

⁶ Jehoava neva skoal Ilaija fi seh how ih mi feel. Insted, Ih mi help Ilaija fi geh bak ih schrent. (1 Ki. 19:5-7) Laytaraan, eena wahn kain way, Jehoava mi karek di way Ilaija mi-di tink wen ih shoa Ilaija fi hihn amayzin powa. Den Jehoava tel Ilaija dat ih stil ga 7,000 peepl eena Izrel weh rifyooz fi wership Bayal. (1 Ki. 19:11-18) Jehoava gi Ilaija dehnya egzampl fi shoa ahn dat ih stil lov ahn.

7. Weh inkorijment wi geh fahn di way Jehoava mi help Ilaija?

⁷ Yoo di deel wid wahn sichuwayshan weh di schres yu owt? Ih soh komfertin fi noa dat Jehoava mi andastan how Ilaija mi feel! Ih kanvins wi dat hihn andastan weh wee di goh chroo tu. Hihn noa weh wi ku du ahn weh wi kyaahn du, ahn hihn eevn noa weh wi di tink ahn weh wi di feel. (Ps. 103:14; 139:3, 4) If wi kapi Ilaija egzampl ahn pen pahn Jehoava, Hihn wahn help wi fi deel wid di prablemz weh di schres wi owt.—Ps. 55:22.

8. How Jehoava wahn help wi fi deel wid schres?

⁸ Schres ku kaaz wi fi tink dat wi sichuwayshan wahn neva chaynj ahn mek wi feel laik giv op. If dat hapm tu yoo, memba dat Jehoava wahn help yu fi deel wid di schres. How hihn wahn help yu? Ih invait yu fi tel ahn aala yu prablemz ahn how yu di feel. Ahn hihn wahn ansa yu krai fi help. (Ps. 5:3; 1 Peet. 5:7) Soh pray wahn lat tu Jehoava bowt yu prablemz. Hihn noh wahn taak tu yu di sayhn way laik how ih mi taak tu Ilaija, bot ih wahn taak tu yu chroo fi hihn Werd, di Baibl, ahn chroo ih aaganaizayshan. Wen yu reed di egzampl dehn eena di Baibl ih ku komfert yu ahn gi yu hoap. Yu bradaz ahn sistaz ku inkorij yu tu.—Roam. 15:4; Heeb. 10:24, 25.

9. How wahn gud fren mait help wi?

⁹ Jehoava mi tel Ilaija fi gi som a ih werk tu Ilaisha. Eena dis way, Jehoava mi gi Ilaija wahn gud fren hoo kuda mi help ahn fi koap wen ih mi-di feel diskorij. Jos laik dat, wen wi tel wahn gud fren bowt how wi di feel, dehn ku help wi fi koap wid wi imoashanal berdn. (2 Ki. 2:2; Prov. 17:17) Soh if yu feel laik yu noh ga nobadi fi taak tu bowt how yu di feel, pray tu Jehoava fi help yu fain spirichwali machoar bradaz ahn sistaz weh ku gi yu di sopoat yu need.

10. How Ilaija ekspeeryens gi wi hoap, ahn how di pramis da Isaiah 40:28, 29 ku help wi?

¹⁰ Jehoava mi help Ilaija fi koap wid schres ahn fi stay faytful tu ahn fi meni yaaz. Ilaija ekspeeryens gi wi hoap. Sohntaim wi mait soh schres owt dat wi feel sik eena wahn fizikal an imoashanal way. Bot, if wi pen pahn Jehoava, hihn wahn gi wi di powa wi need fi kantinyu serv ahn.—Reed Isaiah 40:28, 29. *

11-13. How schres mi afek chree a Gaad servants bak eena Baibl taimz?

¹¹ Ada peepl eena di Baibl mi fays lata schres tu. Fi egzampl, Hana mi feel schres owt bikaaz ih mi shaym dat shee mi kyaahn ga no pikni, ahn fi shee hozban neks waif mi ga lat, an ih loan mi-di mak Hana. (1 Sam. 1:2, 6) Hana schres mi mek ahn soh sad dat shee mi baal ahn baal ahn ih mi nat eevn feel fi eet.—1 Sam. 1:7, 10.

¹² Sohntaim, King Dayvid mi feel laik ih schres da-mi tu moch fi ahn. Tink bowt di chalenjiz hihn mi haftu fays. Hihn mi feel reeli gilti bikaaz a aala di mistayk dehn weh hihn mi mek. (Ps. 40:12) Absalom, ih son weh ih lov soh moch mi gaahn gens ahn, an dis mi leed tu Absalom det. (2 Sam. 15:13, 14; 18:33) Den wan a Dayvid kloasis fren mi bichray ahn. (2 Sam. 16:23–17:2; Ps. 55:12-14) Wahn lata di saam dehn weh Dayvid rait diskraib how diskorij ih mi di feel, an aalso how schrang ih chros eena Jehoava.—Ps. 38:5-10; 94:17-19.

¹³ Laytaraan, wahn saamis staat tu red-aiy di way how di wikid peepl dehn liv. Maybi hihn da-mi wahn faar relitiv a di Leevait Aysaf, an ih doz serv da di templ eena Jeroosalem. Dis saamis mi sofa soh moch schres dat ih neva hapi ataal. Hihn mi eevn staat tu tink dat di riwaad dehn weh kohn fahn serv Jehoava neva inof.—Ps. 73:2-5, 7, 12-14, 16, 17, 21.

14-15. Weh dehnya chree Baibl egzampl teech wi bowt how fi ton tu Jehoava fi help?

¹⁴ Di chree servants a Jehoava weh wi jos menshan mi pen pahn Jehoava fi help. Dehn mi pray tu Jehoava bowt dehn  prablem. Dehn neva frayd fi tel Jehoava wai dehn mi-di feel schres owt. Ahn dehn mi kantinyu fi goh tu Jehoava plays a wership.—1 Sam. 1:9, 10; Ps. 55:22; 73:17; 122:1.

¹⁵ Jehoava ansa eech wan a dehn wid kompashan. Hana mi geh pees a main. (1 Sam. 1:18) Dayvid mi rait: “Di raichos fays wahn lata prablemz, bot Jehoava sayv dehn fahn aala dehn prablem.” (Ps. 34:19) Ahn laytaraan di saamis mi feel laik Jehoava mi-di “hoal [ahn] bai ih rait han,” ahn gaid ahn wid lovin advais. Hihn mi sing: “Az fi mee, ih gud fi mek Ah geh kloas tu Gaad. Ah mek di Sovrin Laad Jehoava mai plays fi haid.” (Ps. 73:23, 24, 28) Weh wi laan fahn dehnya egzampl? Sohntaim wi wahn ga seeryos prablemz weh wahn schres wi owt. Bot wi ku koap wid dehn if wi tink bowt how Jehoava mi help adaz, if wi pen pahn hihn chroo pryaa, an if wi du weh ih aks wi fi du.—Ps. 143:1, 4-8.

16-17. (a) Wai wi waahn stik tu Jehoava an ih servants ahn noh kip tu wiself? (b) How wi ku geh bak wi schrent?

¹⁶ Dehndeh chree egzampl teech wi wahn nada impoatant lesn, wi fi stik tu Jehoava an ih servants; wi noh waahn kip  tu wiself. (Prov. 18:1) Nancy mi geh reeli schres owt wen ih hozban lef ahn. Shee seh: “Sohn dayz Ah neva mi waahn si ner taak tu enibadi. Bot, di moa Ah mi kip tu miself, di moa sad Ah mi feel.” Wen Nancy mi luk fi wayz fi help adaz hoo mi-di goh chroo fi dehn oan prablemz, tingz chaynj. Shee seh: “Ah lisn az adaz taak bowt di prablemz weh dehn di goh chroo. Ah noatis dat wen Ah foakos pahn dehn ahn fi dehn prablemz, Ah foakos les pahn mee ahn mai oan prablemz.”

¹⁷ Wi ku geh bak wi schrent if wi goh da wi kangrigayshan meetinz. Wen wi goh da wi meetin dehn, wi gi Jehoava moa apachooniti fi “help ahn komfert” wi. (Ps. 86:17) Dat da wehpaat ih help wi chroo ih hoali spirit, ih Werd di Baibl, an ih peepl. Di meetin dehn gi wi wahn apachooniti fi injai di “inkorij wan anada.” (Roam. 1:11, 12) Wahn sista weh naym Sophia seh: “Jehoava ahn wi bradaz ahn sistaz help mi fi noh giv op. Wi kangrigayshan meetinz da di moas impoatant ting tu mee. Ai fain owt dat di moa taim Ah spen eena di minischri ahn wid mi kangrigayshan, di beta Ah ku deel wid schres ahn woriz.”

18. Weh Jehoava ku gi wi wen wi feel diskorij?

¹⁸ Wen wi feel diskorij, mek wi memba dat Jehoava noh onli pramis fi tek weh wi schres eena di fyoocha, bot ih aalso help wi fi deel wid it now. Wen wi feel diskorij ahn hoaples, hihn gi wi di dizaiya ahn di powa fi koap.—Fil. 2:13.

19. Weh pramis Roamanz 8:37-39 gi wi?

¹⁹ Reed Roamanz 8:37-39. Notn ku mek Gaad stap lov wi. How wi ku help wi bradaz ahn sistaz hoo di chrai fi koap wid schres? Di neks aatikl wahn help wi fi si how wi ku kapi Jehoava ahn shoa kompashan ahn sopoat fi wi bradaz ahn sistaz wen dehn schres owt.