1. Weh ih meenz fi ga lata rispek fi Gaad, ahn wai peepl weh lov Jehoava haftu ga da rispek?

SOM peepl seh dehn lov Gaad, bot dehn frayd far ahn. Bot Kristyanz noh frayd fi Gaad, dehn ga lata rispek far ahn. Eena dis aatikl wi wahn diskos weh ih meenz fi rispek Gaad. Peepl weh ga dis kaina rispek noh waahn du notn weh noh pleez dehn hevnli Faada, bikaaz dehn noh waahn damij dehn rilayshanship wid ahn.—Ps. 111:10; Prov. 8:13.

2. Bays pahn weh King Dayvid mi seh da Psalm 86:11, weh too ting wi wahn diskos?

² Reed Psalm 86:11. * Wen yu tink bowt dehndeh werdz, yu ku tel dat King Dayvid mi andastan how impoatant ih impoatant fi ga lata rispek fi Gaad. Mek wi diskos Dayvid pryaa ahn si how wi ku yooz weh hihn mi seh eena wi laif. Fers, wi wahn luk pahn sohn reezn wai wi shuda ga lata rispek fi Gaad naym. Sekant, wi wahn diskos how wi ku shoa dat wi rispek Gaad naym eena wi evriday laif.

3. Weh ekspeeryens kuda mi help Moaziz fi aalwayz ga lata rispek fi Gaad naym?

³ Tink bowt how Moaziz mosi mi feel wen ih mi-di haid eena wahn hoal eena wahn big big rak an ih si wahn vizhan a Jehoava gloari di paas fronta ahn. Dis da-mi wahn amayzin ekspeeryens fi eni hyooman! Den Moaziz mi hyaa  wahn aynjel seh dehnya werdz: “Jehoava, Jehoava, wahn Gaad weh mersiful ahn kompashanayt, weh noh eezi fi geh beks, weh ful a laayal lov ahn chroot. Hihn di shoa laayal lov tu towznz a peepl, ih di fagiv dehn mistayk ahn sin dehn, bot fi shoar hihn wahn ponish di gilti wan dehn.” (Ex. 33:17-23; 34:5-7) Moaziz mosi mi tink bowt da ekspeeryens wen ih yooz Jehoava naym. Dat da praabli wai laytaraan Moaziz mi waan di Izrelait dehn fi “shoa lata rispek fi dis grayt ahn wandaful naym.”—Deut. 28:58.

4. Weh ku help wi fi ga eevn moa rispek fi Jehoava?

⁴ Wen wi tink bowt Jehoava naym, wi shuda aalso tink bowt weh kaina persn hihn. Wi shuda tink bowt Jehoava kwalitiz, laik ih powa, wizdom, jostis, ahn lov. Wen wi tink bowt dehnya kwalitiz ahn di ada kwalitiz weh ih gat, dat wahn help wi fi ga eevn moa rispek far ahn.—Ps. 77:11-15.

5-6. (a) Weh Gaad naym meenz? (b) Akaadn tu Exodus 3:13, 14 an Isaiah 64:8, how Jehoava mek eniting weh hihn waahn hapm?

⁵ Weh Gaad naym meenz? Lata peepl weh stodi di langwij a di Baibl agree dat di naym Jehoava meenz “Hihn Wahn Mek Ih Bee er Hapm.” Dat rimain wi dat notn kyaahn stap Jehoava fahn du weh hihn waahn du, ahn hihn ku mek eniting weh ih waahn fi hapm, hapm. How hihn du dat?

⁶ Jehoava ku mek eniting weh hihn waahn hapm bikaaz hihn ku mek ihself bee wateva ih need fi mek ih perpos kohn chroo. (Reed Exodus 3:13, 14.) * Lata taim wi poblikayshan dehn inkorij wi fi tink bowt da amayzin paat a Gaad persnaliti. Jehoava ku aalso mek fi  hihn hyooman servant dehn weh noh perfek bee wateva dehn need fi bee fi serv hihn ahn mek fi hihn perpos kohn chroo. (Reed Isaiah 64:8.) * Dehnya da di wayz how Jehoava mek tingz hapm di way how hihn waahn. Notn kyaahn stap ahn fahn mek fi hihn perpos kohn chroo.—Isa. 46:10, 11.

7. Weh wi ku du fi mek wi apreeshiayt wi hevnli Faada eevn moa?

⁷ Wi wahn apreeshiayt wi hevnli Faada eevn moa if wi tink bowt weh hihn du ahn weh ih help wee fi du. Fi egzampl, wen wi tink bowt aala di ting dehn weh Jehoava kriyayt, dehn soh amayzin ahn dat mek wi ga lata rispek far ahn. (Ps. 8:3, 4) Ahn wen wi tink bowt aal weh Jehoava help wee fi du soh dat wi ku du weh hihn waahn, wi wahn rispek ahn eevn moa. Jehoava naym reeli dizerv lata rispek! Da naym stan fi evriting bowt wi Faada, inkloodin aal weh ih du op tu now, an aal weh ih wahn du eena di fyoocha.—Ps. 89:7, 8.

8. Akaadn tu Deuteronomy 32:2, 3, weh Jehoava waahn ih servant dehn du wid ih naym?

⁸ Jos bifoa di Izrelait dehn gaan eena di Pramis Lan, Jehoava mi teech Moaziz di werdz fi wahn sang. (Deut. 31:19) Ahn Moaziz mi fi teech da sang tu di peepl. (Reed Deuteronomy 32:2, 3.) * Wen wi tink bowt weh vers 2 ahn 3 seh, ih klyaa fi si dat Jehoava noh waahn ih naym bee wahn seekrit. Hihn noh waahn mek peepl feel laik ih tu hoali fi mek dehn yooz it. Hihn waahn mek evribadi noa fi hihn naym! Da mi wahn grayt privilij fi di Izrelait dehn hyaa Moaziz teech dehn bowt Jehoava ahn fi Hihn wandaful naym! Weh Moaziz mi teech dehn schrentn dehn fayt an inkorij dehn, jos laik how rayn help wahn plaant fi groa schrang. How wi ku mek shoar dat wi teech laik Moaziz?

9. How wee ku help mek peepl noa dat Jehoava naym hoali?

⁹ Wen wi deh owt pahn feel servis, wi ku yooz wi Baibl fi shoa peepl dat Gaad naym Jehoava. Wi ku aafa dehn amayzin lichricha, veedyo, an ada mateeryal weh deh pahn wi websait weh aana Jehoava. Wi ku luk fi eni apachooniti fi taak tu peepl bowt wi Gaad ahn wai wi lov ahn, weda wi deh da werk, da skool, er wen wi di chravl. Wi ku tel dehn bowt di wandaful tingz weh Jehoava wahn du fi wee ahn fi di ert. Wen wi du dat dehn mait si fi di fers taim humoch Jehoava lov wi. Wen wi tel peepl di chroot bowt wi lovin Faada, wi di help dehn fi mek dehn noa dat Jehoava naym hoali. Wi help ekspoaz di lai dehn weh peepl laan bowt Jehoava. Weh wi teech peepl fahn di Baibl da laik gud, helti food weh wahn inkorij dehn ahn schrentn dehn fayt.—Isa. 65:13, 14.

10. Wai wen wi kandok Baibl stodiz wi haftu teech dehn moa dan jos Gaad laa dehn?

¹⁰ Wen wi kandok Baibl stodiz, wi waahn help wi styoodent dehn fi noa ahn yooz Jehoava naym. Ahn wi waahn help dehn geh fi noa Jehoava gud gud. Yu tink wi wahn ku help dehn fi noa Jehoava gud if aal weh wi du da teech dehn ih laa dehn? Wahn gud styoodent mait laan bowt Gaad  laa dehn, an ih mait eevn apreeshiayt dehn. Bot yu tink di styoodent wahn obay Jehoava bikaaz di styoodent lov ahn? Memba, Eev mi noa Gaad laa, bot needa shee ner Adam mi lov Gaad. (Gen. 3:1-6) Soh wi need fi teech peepl bowt moa dan jos Gaad laa dehn.

11. Wen wi di teech peepl bowt Gaad laa dehn, how wi ku help wi styoodent dehn fi laan fi lov di Gaad weh gi wi dehndeh laa?

¹¹ Jehoava laa dehn aalwayz gud fi wi. (Ps. 119:97, 111, 112) Bot wi styoodent dehn noh mait tink soh if dehn noh andastan dat Jehoava gi wi dehndeh laa bikaaz ih lov wi. Soh wi ku aks wi styoodent dehn: “Wai yu tink Gaad gi wi disya laa? Weh dat tel wi bowt hihn?” If wi help wi styoodent dehn fi tink bowt Jehoava ahn fi laan fi lov fi hihn grayt naym, ih wahn bee eeziya fi reech dehn haat. Wi styoodent dehn wahn laan fi lov noh onli di laa dehn, bot aalso di Gaad weh gi wi dehndeh laa. (Ps. 119:68) Dehn fayt wahn groa schranga ahn dat wahn help dehn fi fays eni tes weh kohn pahn dehn.—1 Kor. 3:12-15.

12. How Dayvid mi looz ih foakos, ahn weh mi hapm sayka dat?

¹² Di werdz “wid aala mi haat” weh King Dayvid mi rait da Psalm 86:11 veri impoatant. Joorin fi hihn laif, hihn mi si how eezi ih ku bee fi giv een tu temtayshan if sohnting di divaid yu haat. Wan taim, hihn mi deh pahn ih howstap an ih mi si wahn nada man waif di bayd. Yu tink Dayvid mi foakos pahn du weh rait wen ih mi dehdeh pahn di howstap, er ih mi looz ih foakos? Hihn mi noa Jehoava laa: “Yu noh fi waahn tek weh wahn nada man waif.” (Ex. 20:17) Bot hihn mi stil kantinyu fi luk. Ih neva foakos pahn pleez Jehoava, bikaaz eena ih haat ih mi waahn di uman, Bat-sheeba. Eevn doa Dayvid mi lov ahn ga lata rispek fi Jehoava fi wahn lang taim, hihn mi giv een tu weh ih selfish haat mi waahn. Sayka dat, Dayvid mi du sohn veri bad tingz. Hihn mi gi Jehoava wahn bad naym. Dayvid mi hert wahn lata inosent peepl, eevn ih oan famili.—2 Sam. 11:1-5, 14-17; 12:7-12.

13. How wi noa dat Dayvid mi staat foakos agen pahn du weh rait?

¹³ Jehoava mi disiplin Dayvid, ahn hihn mi get bak ih gud rilayshanship wid ahn. (2 Sam. 12:13; Ps. 51:2-4, 17) Dayvid mi memba humoch damij ih mi kaaz wen ih haat neva foakos pahn du weh rait.  Jehoava mi ansa Dayvid pryaa ahn help ahn fi get bak ih foakos ahn serv ahn agen wid aala ih haat? Yes, kaaz laytaraan Jehoava Werd seh dat Dayvid da-mi wahn man weh “serv ih Gaad Jehoava wid aala ih haat.”—1 Ki. 11:4; 15:3.

14. Weh kweschan wi haftu aks wiself, ahn wai?

¹⁴ Dayvid egzampl ku inkorij wi, bot da wahn waanin fi wee tu. Dayvid mi komit wahn seeryos sin, ahn dat da wahn waanin fi aala Gaad servant dehn tudeh. Weda wi jos staat serv Jehoava er wi di serv ahn fi wahn lang taim, wi haftu aks wiself, ‘Ai di chrai haad fi rijek Saytan wen ih chrai mek Ah looz foakos ahn stap serv Jehoava wid aala mi haat?ʼ

15. If wi ga lata rispek fi Gaad, how dat ku protek wi wen wi si doti pichaz?

¹⁵ Fi egzampl, weh yoo du if yu si wahn picha pahn TV er di Intanet weh ku mek yu tink bowt tingz weh imoaral? Ih mait bee eezi fi tink dat di picha er moovi da noh reeli poarnografi. Bot yu tink dat ku bee sohnting weh Saytan ku yooz fi divaid yu haat? (2 Kor. 2:11) Da picha ku bee laik wahn aks weh yu yooz fi split wahn big pees a wud. Wen yu swing di aks fi di fers taim, ih noh wahn split di wud rait away. Bot afta yu swing it wahn fyoo taimz, di wud wahn split. Da jos laik dat wen wi luk pahn pichaz weh mek wi tink bowt imoaral tingz. Wi mait feel laik dehn kyaahn hert wi. Bot if wahn persn kantinyu fi luk pahn dehn, dis ku kaaz dehn fi sin gens Jehoava. Soh noh mek notn weh rang get eena yu haat! Aalwayz rispek Jehoava naym wid aala yu haat!

16. Wen wi fays temtayshan, wat da sohn kweschan weh wi shuda aks wiself?

¹⁶ Saytan noh onli yooz doti pichaz fi temp wi, bot ih aalso yooz lata ada tingz fi dischrak wi tu. Weh wi du wen dat  hapm? Ih eezi fi tink dat dehnya tingz noh reeli bad. Fi egzampl, wi mait tink: ‘Wel, Ah noh wahn geh disfeloship if Ah du dis, soh Ai noh tink da sohnting seeryos.ʼ Da kaina tinkin veri rang. Ih wuda bee beta if wi aks wiself kweschanz laik dehnya: ‘Saytan di chrai yooz dis temtayshan fi dischrak mai haat? If Ah giv een tu rang dizaiyaz, Ai wuda gi Jehoava wahn bad naym? If Ai du dis, ih wahn jraa mi kloasa tu mai Gaad, er ih wahn push mi weh fan ahn?ʼ Tink bowt dehnya kweschan. Pray fi wizdom soh dat yu ku bee aanis wid yuself wen yu ansa dehn. (Jay. 1:5) Dat ku protek yu ahn help yu fi stan op schrang ahn noh giv een tu temtayshan, jos laik weh Jeezas mi du wen ih seh: “Goh fahn ya, Saytan.”—Mach. 4:10.

17. Wai wahn haat weh noh foakos noh wert notn? Yooz di egzampl eena di paragraaf.

¹⁷ Wahn haat weh noh foakos noh wert notn. Wai? Sopoaz di playaz pahn wahn futbaal teem kyaahn get lang wid wan anada. Wat if som a dehn waahn geh aala di gloari fi dehnself, som a dehn noh waahn fala di roolz, ahn som a dehn noh ga no rispek fi di koach. Wahn teem laik dat wuda praabli neva win wahn gaym. Pahn di ada han, wahn teem weh yoonaitid wahn bee moa laikli fi win. Yu haat ku bee laik da teem weh win. Bot yu dizaiyaz, yu tinkin, ahn yu feelinz haftu werk tugeda fi mek yu ku serv Jehoava. Memba, Saytan wuda lov fi divaid yu haat. Hihn waahn mek yu oan rang dizaiya dehn fait gens weh yu noa Jehoava waahn yu du. Bot yoo need fi serv Jehoava wid aala yu haat. (Mach. 22:36-38) Neva alow Saytan fi divaid yu haat!

18. Laik weh Micah 4:5 seh, weh yoo mek op yu main fi du?

¹⁸ Pray tu Jehoava jos laik how Dayvid mi pray: “Help mi fi rispek yu naym wid aala mi haat.” Du aal weh yu kud fi liv akaadn tu da pryaa. Evri day, mek shoar dat evri disizhan weh yu mek shoa dat yu ga lata rispek fi Jehoava hoali naym. Wen yoo, weh da wan a Jehoava Witnisiz, liv yu laif laik dat, yu wahn gi Jehoava wahn gud naym. (Prov. 27:11) An aala wi wahn ku seh di saym ting weh di prafit Maika seh: “Wee wahn waak eena di naym a fi wee Gaad Jehoava fareva an eva.”—Mic. 4:5.