STODI AATIKL 25
“Mee Miself Wahn Saach fi Mi Sheep”
“Mee miself wahn saach fi mi sheep, an Ai wahn tek kayr a dehn.”—EZEK. 34:11.
SANG 105 “Gaad Da Lov”
WEH WI WAHN DISKOS? *
1. Wai Jehoava mi kompyaa ihself tu wahn ma?
“HOW wahn ma kuda eva ferget ih oan baybi?” Eena di dayz a di prafit Aizaiya, Jehoava mi aks da kweschan. Gaad mi tel ih peepl, “Eevn if wahn uman ferget, Ai wahn neva ferget unu.” (Isa. 49:15) Gaad noh yoozhwali kompyaa ihself tu wahn ma. Bot dis taim, hihn mi kompyaa ih rilayshanship wid ih peepl tu di rilayshanship weh wahn ma ga wid ih baybi. Ih mi du dis bikaaz ih mi waahn ih peepl noa dat hihn lov dehn wahn lat. Da laik weh wahn sista weh naym Jasmin seh: “Wen yu bresfeed yu baybi, wahn speshal rilayshanship groa bitween unu weh wahn laas fi di res a unu laif.”
2. How Jehoava feel wen wan a fi hihn pikni jrif weh fan ahn?
2 Jehoava noatis wen eevn wan a ih pikni stap goh preech ahn goh da meetin. Tink bowt how ih hat Jehoava haat wen evri yaa ih si towznz a ih servant dehn weh yoostu bee aktiv noh aktiv * nohmoh.
3. Weh Jehoava waahn?
3 Lata dehndeh dyaa bradaz ahn sistaz doo kohn bak tu di kangrigayshan, ahn wi onli hapi fi si dat! Jehoava waahn dehn kohn bak, ahn wee waahn dehn kohn bak tu. (1 Peet. 2:25) How wee ku help dehn fi kohn bak? Bifoa wi ansa da kweschan, ih wuda bee gud fi noa di reezn wai som a dehn stap goh da meetin ahn stap tek paat eena di preechin werk.
WAI SOM BRADAZ AHN SISTAZ STAP SERV JEHOAVA?
4. How som peepl mek dehn jab afek dehn servis tu Jehoava?
4 Som peepl mek dehn jab bee di moas impoatant ting eena dehn laif. Wahn brada weh naym Hung weh liv da Southeast Asia * seh: “Ah spen tu moch taim an enerji da werk. Ah mi foolish. Ah tel miself dat ih wuda bee eeziya fi serv Jehoava beta if Ah mi ga moa moni. Soh Ah mi staat tu werk langa owaz, an Ah staat tu mis moa ahn moa meetin til Ah mi en op di stap goh da meetin. Ih luk laik dis werl set op fi jraa peepl weh fahn Jehoava lee bit bai lee bit.”
5. How sohn prablem mi afek wahn sista?
5 Sohn bradaz ahn sistaz geh diskorij bikaaz dehn ga lata prablem. Wahn sista fahn Britain weh naym Anne seh: “Wan a mi pikni mi baan wid sohn seeryos helt prablemz. Den laytaraan wan a mi daata mi geh disfeloship ahn wan a mi son mi divelop wahn mental helt kandishan. Ah mi feel soh dipres dat Ah mi stap goh da meetin an Ah mi stap preech.” Wi haat goh owt tu Anne an ih famili an ada bradaz weh haftu deel wid simila prablemz!
6. How sombadi ku jrif weh fahn Jehoava if ih noh du weh Koloashanz 3:13 seh?
6 Reed Koloashanz 3:13. Som a wi bradaz er sistaz geh hert bikaaz a weh wahn nada brada er sista seh er du. Di apasl Paal mi seh dat sohntaim wi mait ga reezn fi feel opset bikaaz a sohnting weh wi brada er sista du wi. Maybi dehn neva chreet wi rait. Soh if wi noh kyaaful, wi ku geh beks ahn hoal malis, ahn dat ku eevn mek wi jrif weh fahn Jehoava peepl. Kansida weh mi hapm tu Pablo. Pablo da wahn brada fahn South America weh mi looz ih privilij eena di kangrigayshan bikaaz sohnbadi mi akyooz ahn dat ih du sohnting weh ih neva du. How hihn mi rispan tu dat? Hihn seh, “Ah mi geh beks, ahn lee bit bai lee bit Ah mi jrif weh fahn di kangrigayshan.”
7. How wahn gilti kanshans ku afek sohnbadi?
7 Er if sombadi mi komit wahn seeryos sin eena di paas, di persn mait feel gilti fi wahn lang taim. Ih mait feel laik Gaad kyaahn lov ahn agen. Eevn if ih mi ripent ahn Jehoava mi fergiv ahn, ih mait feel laik ih noh gud inof fi bee wan a Gaad servant. Wahn brada weh naym Francisco mi feel laik dat. Hihn seh, “Ah mi geh disiplin bikaaz Ah mi komit sekshwal imoraliti. Fers, Ah mi kip di goh da meetin, bot den Ah mi geh dipres an Ah mi feel laik Ah noh dizerv fi deh monks Jehoava peepl. Mi kanshans mi-di bada mi, an Ah neva bileev dat Jehoava mi fergiv mi. Afta wahn wail, Ah mi stap goh da meetin ahn stap preech.” How yoo feel bowt bradaz ahn sistaz weh fays dehnya kaina sichuwayshan? Yu haat goh owt tu dehn? Ahn moa impoatant, da how Jehoava feel bowt dehn?
JEHOAVA LOV IH SHEEP
Wahn Izrelait shepad di tek gud kayr a wahn sheep weh laas (Paragraaf 8-9) *
8. Jehoava ferget enibadi weh yoostu serv ahn? Pleez eksplayn yu ansa.
8 How bowt dehn Kristyanz weh mi stap serv Jehoava fi wahn wail? Jehoava noh ferget dehn an ih noh ferget how haad dehn mi werk far ahn needa. (Heeb. 6:10) Di prafit Aizaiya mi rait wahn byootiful iloschrayshan weh shoa how Jehoava tek kayr a fi hihn peepl. Ih rait: “Laik wahn shepad ih wahn tek kayr a ih flak. Wid ih han ih wahn gyada tugeda ih lam dehn, an ih wahn kehr dehn kloas tu ih ches.” (Isa. 40:11) How di Grayt Shepad feel wen wan a ih sheep schray weh fahn di flak? Jeezas mi help wi fi andastan how Jehoava feel wen ih mi aks: “Now unu noh tink seh if wahn shepad ga wahn honjrid sheep, ahn wan a dehn laas, ih noh wahn lef di nainti-nain sheep pahn di hil ahn goh luk fi di wan weh laas? Ah di tel unu di chroot, if ih fain ahn, ih wahn rijais oava da wan deh moa dan di nainti-nain weh neva laas.”—Mach. 18:12, 13.
9. How wahn gud shepad eena Baibl taimz wuda mi chreet ih sheep? (Koment pahn di picha pahn di kova.)
9 Wai wi kompyaa Jehoava tu wahn shepad? Bikaaz eena Baibl taimz wahn gud shepad mi kay wahn lat bowt ih sheep. Fi egzampl, Dayvid mi kil wahn laiyan ahn wahn byaa fi protek ih sheep. (1 Sam. 17:34, 35) Wahn gud shepad wuda noatis if eevn wan a ih sheep goh misn. (Jan 10:3, 14) Da kaina shepad wuda lef ih 99 sheep eena wahn sheep pen er aks wahn nada shepad fi tek kayr a dehn wail hihn wuda goh saach fi di wan weh misn. Jeezas mi yooz da iloschrayshan fi teech wahn impoatant point: “Unu Faada eena hevn noh waahn non a dehnya lee pikni ya geh laas.”—Mach. 18:14.
Wahn Izrelait shepad di tek kayr a wahn sheep weh laas (paragraaf 9)
JEHOAVA SAACH FI FI HIHN SHEEP
10. Akaadn tu Ezekiel 34:11-16, weh Jehoava mi pramis fi du fi ih sheep weh laas?
10 Jehoava lov eech wan a wi, inkloodin di “lee pikni” weh schray weh fan ahn. Chroo di prafit Izeekyel, Gaad mi pramis dat hihn wuda saach fi eni a fi hihn sheep weh mi geh laas ahn help dehn fi get bak wahn gud rilayshanship wid Ahn. Ahn Jehoava mi seh egzakli weh hihn wuda du fi reskyu dehn. Weh hihn wuda du simila tu weh wahn Izrelait shepad wuda du fi sayv ih sheep. (Reed Ezekiel 34:11-16.) * Fers, di shepad wuda saach fi ih sheep, ahn dat kuda tek wahn lata taim ahn haad werk fi du. Den, wans ih fain di sheep weh laas, ih wuda bring it bak tu di flak. If di sheep mi geh hert, ih wuda ban ahn op. If di sheep mi-di staav, ih wuda feed ahn. Ih wuda sopoat di week animal an eevn bak ahn if ih haftu. Eldaz, hoo da di shepadz a Gaad flak, need fi chreet di sheep weh schray weh di saym way. (1 Peet. 5:2, 3) Di eldaz saach fi dehn, help dehn fi kohn bak tu di kangrigayshan, ahn shoa dehn lov az dehn gi dehn di spirichwal sopoat weh dehn need. *
11. Weh wahn gud shepad mi andastan?
11 Wahn gud shepad mi andastan dat wahn sheep mait geh laas. An if wahn sheep mi schray weh fahn di flak, di shepad wudn rof ahn op. Kansida di egzampl weh Gaad mi set wen hihn mi help som a ih servant weh mi schray weh fan ahn fi wahn wail bikaaz a fyaa er diskorijment.
12. How Jehoava mi deel wid Joana?
12 Eevn doa di prafit Joana mi ron weh fan ih asainment, Jehoava neva giv op pan ahn. Laik wahn gud shepad, Jehoava mi reskyu ahn, an giv ahn di schrent fi du ih asainment. (Jonah 2:7; 3:1, 2) Layta, Gaad mi yooz wahn plaant fi help Joana andastan how preshos eech hyooman laif. (Jonah 4:10, 11) Wat da di lesn? Eldaz noh fi kwik fi giv op pahn eni brada er sista weh noh aktiv nohmoh. Insteda dat, di elda dehn fi chrai andastan wai wahn sheep mi schray weh fahn di flak. Ahn wen da sheep kohn bak tu Jehoava di elda dehn shuda kantinyu shoa lov ahn kansaan far ahn.
13. Weh wi ku laan fahn how Jehoava mi deel wid di raita a Psalm 73?
13 Di raita a Psalm 73 mi geh diskorij wen hihn mi si how di wikid dehn mi-di praspa. Hihn mi staat tu wanda if ih mi wert it fi obay Gaad. (Ps. 73:12, 13, 16) Weh Jehoava mi du? Hihn neva kandem di man. Az a mata a fak, Gaad mi inklood weh hihn mi seh eena di Baibl. Di Saamis mi riyalaiz dat fi ga wahn gud rilayshanship wid Jehoava wert moa dan eniting els an ih mek ih laif ga meenin. (Ps. 73:23, 24, 26, 28) Wat da di lesn? Di elda dehn shudn hori fi joj sombadi weh staat tu kweschan weda er nat dehn rilayshanship wid Jehoava wert eniting. Insteda kandem dehn, di elda dehn haftu chrai andastan wai da persn di taak an ak da way. Dat da di onli way di elda dehn ku noa how fi help dehn ahn gi dehn inkorijment fahn di Baibl.
14. Wai Ilaija mi need help, ahn how Jehoava mi help ahn?
14 Di prafit Ilaija mi ron weh fahn Kween Jezibel. (1 Ki. 19:1-3) Hihn mi tink dat hihn da-mi di onli prafit fi Jehoava, ahn dat fi hihn werk neva serv no perpos. Ilaija mi feel soh dipres dat hihn mi waahn ded. (1 Ki. 19:4, 10) Jehoava neva kandem Ilaija. Insteda dat, ih mi tel ahn dat ih neva deh pan ih oan, dat ih kuda mi chros eena Gaad powa, ahn dat ih mi stil ga lata werk fi du. Jehoava mi lisn tu Ilaija wen Ilaija mi tel ahn ih woriz. Ahn Jehoava mi giv ahn sohn nyoo asainment. (1 Ki. 19:11-16, 18) Wat da di lesn? Aala wi, espeshali di elda dehn, shuda bee kain tu Jehoava sheep. Eevn if wahn persn beks er feel laik Jehoava wahn neva fergiv ahn, di elda dehn wahn lisn tu ahn az ih poar owt ih haat tu dehn. Den dehn wahn chrai help di persn fi si dat ih preshos tu Jehoava.
HOW WEE SHUDA FEEL BOWT GAAD SHEEP WEH LAAS?
15. Akaadn tu Jan 6:39, how Jeezas feel bowt ih Pa sheep?
15 How Jehoava waahn wi feel bowt fi hihn sheep weh laas? Jeezas set di egzampl fi wi. Jeezas noa dat aala Gaad sheep preshos tu ahn, soh hihn mi du evriting weh ih kud fi help di “peepl da Izrel weh da laik sheep weh laas” fi kohn bak tu Jehoava. (Mach. 15:24; Look 19:9, 10) Jeezas da wahn gud shepad, soh hihn mi chrai ih bes fi mek shoar dat ih noh looz non a Jehoava sheep.—Reed Jan 6:39.
16-17. How di elda dehn shuda feel bowt enibadi weh schray weh fahn Jehoava? (Si di baks “ How Wahn Sheep Weh Laas Feel.”)
16 Di apasl Paal mi inkorij di elda dehn eena di kangrigayshan da Efisos fi fala Jeezas egzampl. “Unu fi tek kayr a dehn wan weh week, bikaa memba seh dat da di Laad Jeezas ihself mi seh, ‘Gaad bles yu moa wen yu gi dahn wen yu get.ʼ” (Aks 20:17, 35) Dis skripcha shoa wi dat di elda dehn ga di rispansabiliti fi tek kayr a Jehoava sheep. Salvador, wahn elda fahn Spain, seh: “Wen Ah tink bowt humoch Jehoava kay bowt ih sheep, dat mek Ah waahn du evriting weh Ah kud fi help dehn. Ai noa dat Jehoava waahn mek Ah tek kayr a dehn.”
17 Aala di bradaz ahn sistaz weh menshan eena dis aatikl mi geh help fi kohn bak tu Jehoava. Rait now, wahn lat moa bradaz ahn sistaz weh mi schray weh waahn kohn bak tu Jehoava tu. Di neks aatikl wahn diskos moa deetaylz bowt weh wi ku du fi help dehn kohn bak tu Jehoava.
SANG 139 Imajin Yuself Wen Evriting Nyoo
^ párr. 5 Wai som peepl weh serv Jehoava fi yaaz jrif weh fahn di kangrigayshan? How Gaad feel bowt dehn? Dis aatikl wahn diskos di ansaz tu dehndeh kweschanz. Ih wahn aalso diskos how Jehoava mi help sohn peepl eena Baibl taimz weh neva du weh Jehoava mi aks dehn fi du.
^ párr. 2 WEH IH MEEN? Wahn poblisha weh noh aktiv da sohnbadi weh noh ripoat no taim eena di preechin ahn teechin werk fi siks monts er moa. Stilyet, dehn da wi bradaz ahn sistaz, ahn wi lov dehn.
^ párr. 4 Som a di naym dehn chaynj.
^ párr. 10 Ezekiel 34:11-16: “Kaaz dis da weh di Sovrin Laad Jehoava seh: ‘Ah deh rait ya, ahn mee miself wahn saach fi mi sheep, an Ah wahn tek kayr a dehn. Ah wahn main mi sheep laik wahn shepad weh fain ih sheep weh mi skyata bowt ahn feed dehn. Ah wahn reskyu dehn fahn evriway wehpaat dehn mi skyata pahn di bleeki ahn klowdi day. Ah wahn bring dehn owt fahn monks di peepl dehn ahn kalek dehn tugeda fahn di konchri dehn ahn bring dehn tu dehn oan konchri ahn feed dehn pahn di mongtin dehn da Izrel, langsaid di krik dehn an eena aala di plays dehn wehpaat dehn liv eena dehn konchri. Ah wahn feed dehn eena wahn gud paascha, ahn di lan wehpaat dehn eet graas wahn deh pahn di hai mongtin dehn da Izrel. Dehn wahn lidong deh pahn gud paascha lan, ahn dehn wahn eet fahn di bes paascha dehn pahn di mongtin dehn da Izrel.ʼ Di Sovrin Laad Jehoava seh, ‘Mee miself wahn feed mi sheep, ahn mee miself wahn mek dehn lidong. Ah wahn saach fi di wan weh laas, Ah wahn bring bak di wan weh schray, ahn wahn bandij di wan weh geh hert, an Ah wahn schrentn di wan weh week; bot Ah wahn dischrai di fat wan ahn di schrang wan. Ah wahn feed da wan wid jojment.ʼ”
^ párr. 10 Di neks aatikl wahn diskos sohn spesifik wayz how di eldaz ku du dat.
^ párr. 61 DI PICHA: Wahn shepad eena Baibl taimz wuda wori bowt wahn sheep weh geh laas, soh ih wuda saach far it ahn help di sheep fi kohn bak tu di flak. Di spirichwal shepad dehn eena fi wee taim du di saym ting.
^ párr. 65 DI PICHA: Wahn sista weh noh aktiv si too Witnisiz weh hapi di tek paat eena poblik witnisin wail shee di wayt fi lef di bos terminal.
