1-2. Weh tapiks reeli impoatant fi Jehoava Witnisiz?

TOO tapik weh impoatant fi wi tudeh da Jehoava naym ahn fi hihn rait fi rool. Wee weh da Jehoava Witnisiz lov fi taak bowt dehnya inchrestin tapik. Wi taak bowt dehn laik dehn da too difrent ting, bot dat da reeli di kays? No.

² Aala wi geh fi andastan dat wi haftu kip Gaad naym hoali. Wi aalso laan dat Jehoava noh onli ga di rait fi rool bot hihn da di bes roola tu. Soh di too a dehnya tapik veri impoatant tu wee.

3. Weh aal Jehoava naym stan fa?

³ Akchwali, di naym Jehoava stan fi evriting weh ga fi du wid fi wee Gaad, inkloodin di way how hihn rool. Soh if wi seh dat di moas impoatant tapik da fi kip Jehoava naym hoali, den da jos laik if wi di seh dat wi haftu proov tu evribadi dat Jehoava da di bes roola. Di way how Jehoava rool ga wahn lat fi du wid fi hihn naym, er repyutayshan.—Si di baks “ Jehoava Hoali Naym—Weh Aal Dat Stan Fa?”

4. Weh Psalm 135:13 seh bowt Gaad naym, ahn weh kweschanz wi wahn ansa eena dis aatikl?

⁴ Di naym Jehoava moa impoatant dan eni ada naym. (Reed Psalm 135:13.) * Wai Gaad naym soh impoatant? How Saytan mi fers gi Jehoava wahn bad naym? How Gaad kip ih naym hoali? Ahn how wee ku help fi kip Gaad  naym hoali? Mek wi ansa dehnya kweschanz.

5. Wen wi taak bowt how wi haftu kip Gaad naym hoali, weh kweschan peepl mait aks?

⁵ “Mek wi kip yu naym hoali.” (Mach. 6:9) Jeezas mi seh dat dis da wan a di moas impoatant ting fi pray fa. Bot weh Jeezas mi meen wen ih seh wi fi pray fi kip Gaad naym hoali? Fi mek wi kip sohnting hoali meenz fi kip it kleen ahn pyoar. Bot peepl mait aks, ‘Gaad naym noh don hoali aredi?ʼ Fi mek wi ku ansa dat, wi need fi tink bowt weh aal wahn naym stan fa.

6. Weh mek wahn naym impoatant?

⁶ Wahn naym da noh jos wahn werd weh yu seh er rait dong pahn paypa. Noatis weh di Baibl seh: “Ih beta fi chooz wahn gud naym insteda richiz.” (Prov. 22:1; Eccl. 7:1) Wai wahn naym soh impoatant? Bikaaz wen yu hyaa sombadi naym yu tink bowt di persn repyutayshan. How yu seh di naym er rait it noh reeli impoatant. Weh reeli impoatant da hoo ahn wat di naym stan fa eena peepl main ahn haat.

7. How peepl gi Gaad wahn bad naym?

⁷ Wen peepl tel lai bowt Jehoava, dehn gi Gaad wahn bad naym. Wen peepl si bad tingz di hapm dehn blaym Gaad far it, ahn dat giv hihn wahn bad naym. Di fers taim sombadi mi gi Gaad wahn bad naym da-mi eena di gyaadn a Eedn. Mek wi si weh wi ku laan fahn dat.

8. Weh Adam ahn Eev mi noa, ahn weh kweschanz wi ku aks?

⁸ Adam ahn Eev mi noa dat Gaad naym da Jehoava, ahn dehn mi noa wahn lata impoatant tingz bowt ahn. Dehn mi noa dat hihn da dehn Kriyayta, di Wan weh gi dehn laif, weh gi dehn di wandaful Paradais fi liv eena, ahn weh gi dehn wahn perfek marij. (Gen. 1:26-28; 2:18) How yu tink dat mi afek dehn? Dehn mi kip di tink bowt evriting weh Jehoava mi du fi dehn? Dehn mi kip di schrentn dehn lov an apreeshiayshan fi Jehoava? Ih mi klyaa fi si di ansaz tu dehndeh kweschanz wen Gaad enimi mi tes dehn.

9. Akaadn tu Genesis 2:16, 17 ahn 3:1-5, weh Jehoava mi tel Adam ahn Eev, ahn how Saytan mi mek dehn tink bad bowt Jehoava?

 ⁹ Reed Genesis 2:16, 17 * ahn 3:1-5. * Saytan mi mek ih luk laik wahn snayk mi-di taak tu Eev an aks ahn: “Da chroo Gaad seh yu noh fi eet fahn aala di chree eena di gyaadn?” Da kweschan mi gat een wahn lai bowt Gaad, ahn dis mi mek Eev staat tu tink bad bowt Gaad. Gaad mi akchwali tel dehn dat dehn ku eet fahn evri chree eena di gyaadn eksep wan. Soh lata difrent chree mi deh fi dehn eet fram. (Gen. 2:9) Jehoava jenaros fi chroo. Stilyet, Jehoava mi tel dehn noh fi eet fahn wan chree eena di gyaadn, an ih mi mek shoar dehn noa da wich wan. Soh Saytan kweschan mi akchwali twis di chroot. Saytan mi mek ih luk laik Gaad stinji. Eev mosi mi wanda if Gaad di hoal bak sohnting gud fan ahn.

10. How Saytan mi gi Gaad wahn bad naym, ahn weh mi hapm sayka dat?

¹⁰ Wen Saytan mi aks Eev da kweschan, shee mi stil obeedyant tu Jehoava. Shee mi tel Saytan egzakli weh Jehoava mi tel shee. Eev mi seh dat dehn neva eevn mi fi toch di chree. Shee mi noa di waanin weh Gaad mi gi dehn; if dehn mi eet di froot dehn mi wahn ded. Bot Saytan tel ahn: “Ah di tel yu, yu noh wahn ded.” (Gen. 3:2-4) Fers, Saytan onli mi-di sojes dat Jehoava mi lai tu dehn, bot now ih mi-di tel Eev playn ahn schrayt dat Jehoava lai tu dehn. Dat da how Saytan kohn fi bee wahn devl, weh meenz sombadi weh tel lai pahn peepl fi gi dehn wahn bad naym. Eev mi bileev di lai weh Saytan tel ahn. (1 Tim. 2:14) Shee mi chros Saytan moa dan Jehoava. Dats wai ih mi eezi fi mek Eev mek di wers disizhan eva. Shee mi disaid fi disobay Jehoava ahn staat eet di froot weh Jehoava mi tel dehn noh fi eet. Laytaraan, Adam mi eet som a di froot tu.—Gen. 3:6.

11. Weh wi fers payrents shuda mi du, bot weh dehn mi du insted?

¹¹ Imajin if Eev mi tel Saytan sohnting laik dis: “Ah noh noa hoo yoo, bot Ai noa mai Faada, Jehoava, an Ah lov ahn chros ahn. Hihn gi mee an Adam evriting weh wi ga. How yoo ku seh sohnting bad bowt hihn? Goh fahn ya!” Imajin how hapi Jehoava  mi wahn feel fi hyaa wahn laayal ansa laik dat fahn ih lovin daata! (Prov 27:11) Adam ahn Eev neva ga laayal lov fi Jehoava, dats wai dehn neva difen ih naym wen Saytan mi tel lai pan ahn.

12. How Saytan mi plaant dowt eena Eev main, ahn weh Adam ahn Eev neva du?

¹² Soh wi si dat Saytan mi staat tu giv Gaad wahn bad naym wen ih mi plaant dowt eena Eev main. Dat mi mek shee staat tu kweschan weh kaina persn Jehoava. Den Adam ahn Eev neva stan op fi Jehoava ahn difen ih gud naym. Sayka dat ih mi eezi fi mek dehn lisn tu Saytan ahn ribel gens Jehoava. Ih stil di du di saym ting tudeh. Saytan loan tel lai bowt Jehoava fi gi ahn wahn bad naym. Ih eezi fi mek peepl weh bileev Saytan lai dehn rijek Jehoava raichos roolaship.

13. How Ezekiel 36:23 help wi fi andastan wat da di mayn mesij a di Baibl?

¹³ Jehoava wahn talarayt aala dehndeh lai widowt du notn bowt it? Non ataal! Di hoal Baibl tel wi bowt aal di tingz weh Jehoava du fi proov dat evriting weh Saytan mi seh bowt ahn eena di gyaadn a Eedn da loan lai. (Gen. 3:15) Az a mata a fak, dis da di mayn mesij a di Baibl: Jehoava wahn yooz fi hihn Kingdom, wid fi hihn Son az King, fi mek evribadi noa dat fi Hihn naym hoali ahn fi bring bak raichosnis ahn pees pahn di ert. Di Baibl gat een infamayshan weh help wi fi andastan how Jehoava wahn mek evribadi noa dat fi hihn naym hoali.—Reed Ezekiel 36:23. *

14. How Jehoava mek ih naym hoali wen ih deel wid di ribelyan da Eedn?

¹⁴ Saytan di du aal weh ih kud fi stap Jehoava perpos fahn kohn chroo. Bot notn weh Saytan du ku stap Jehoava fahn du weh hihn waahn. Di Baibl tel wi weh Jehoava du, an ih proov dat Jehoava da  wahn lovin Faada ahn di bes Roola. Yes, Saytan an evribadi weh tek fi hihn said hert Jehoava wahn lat wen dehn ribel gens ahn. (Ps. 78:40) Bot Jehoava shoa wizdom, payshens, ahn jostis eena di way how hihn deel wid di lai weh dehn seh bowt ahn. Ahn hihn shoa ih powa eena lata difrent wayz. Bot moa dan eniting els, hihn shoa lov eena evriting weh ih du. (1 Jan 4:8) Jehoava neva stap werk fi mek evribadi noa dat fi hihn naym hoali.

15. How Saytan di tel lai bowt Gaad naym tudeh, ahn wat da di rizolt?

¹⁵ Saytan stil di tel lai bowt Gaad naym tudeh. Hihn chrai mek peepl dowt Gaad powa, jostis, wizdom ahn lov. Fi egzampl, Saytan chrai kanvins peepl dat Jehoava neva kriyayt notn. An if peepl doo bileev eena Gaad, Saytan chrai mek peepl tink dat Gaad tu schrik, ahn dat ih noh fyaa. Hihn eevn teech peepl dat Gaad noh kay bowt nobadi ahn dat hihn da wahn kruwil Gaad weh bon op peepl da hel. Wen dehn bileev dehndeh lai, ih eeziya fi mek dehn rijek Jehoava raichos roolaship. Saytan wahn kantinyu fi giv Jehoava wahn bad naym til Jehoava dischrai ahn. Ahn hihn wahn chrai get yoo fi rijek Jehoava tu. Saytan wahn ku mek yoo rijek Jehoava?

16. Weh yoo ku du weh Adam ahn Eev neva du?

¹⁶ Jehoava alow hyoomanz fi help mek evribadi noa dat fi hihn naym hoali. Soh yoo ku du weh Adam ahn Eev neva du. Eevn doa wi liv eena wahn werl weh ful op wid peepl weh tel lai bowt Jehoava ahn weh insolt ih naym, yoo ga di apachooniti fi difen Jehoava naym ahn tel peepl dat hihn hoali, raichos, gud, ahn lovin. (Isa. 29:23) Yoo ku chooz hihn fi bee yu Roola. Yoo ku help peepl fi andastan dat onli Jehoava roolaship raichos an onli fi hihn roolaship wahn bring pees ahn hapinis fi evribadi.—Ps. 37:9, 37; 146:5, 6, 10.

17. How Jeezas mi mek evribadi noa weh kaina persn Jehoava?

¹⁷ Wen wi difen Jehoava naym, wi di fala Jeezas Krais egzampl. (Jan 17:26) Wen Jeezas mi seh dat hihn mek peepl noa hoo da Jehoava, da neva jos bikaaz hihn mi yooz Jehoava naym, bot hihn mi aalso difen Jehoava repyutayshan. Fi egzampl,  di Farisee dehn mi teech peepl dat Jehoava kruwil, dat ih tu schrik, ahn dat hihn noh kay bowt er ga mersi pahn nobadi, bot Jeezas mi teech dehn dat Jehoava reeznabl, payshent, lovin, ahn fergivin. Hihn mi aalso help peepl fi si how Jehoava stan bikaaz hihn mi kapi fi hihn pa eena evriting weh ih du.—Jan 14:9.

18. How wi ku ekspoaz di lai dehn bowt Jehoava?

¹⁸ Jos laik Jeezas, wi ku tel peepl weh wi noa bowt Jehoava soh dat dehn ku noa ahn rispek fi hihn hoali naym. Wi ku aalso teech dehn bowt fi hihn lovin ahn kain wayz. Wen wi du dat, wi ekspoaz aala di lai dehn weh peepl seh bowt Jehoava. Wi ku chrai wi bes fi bee laik Jehoava eena evriting weh wi du. Wi ku du dat eevn doa wi noh perfek. (Ifee. 5:1, 2) Wen wi chrai wi bes fi bee laik Jehoava eena weh wi seh ahn du, wi ku shoa peepl how Jehoava stan. Eena da way wi help mek peepl noa dat Jehoava naym hoali. Wi klayr Jehoava naym wen wi help fi set peepl free fahn aala di lai dehn weh dehn mait bileev. Wi aalso proov dat hyoomanz ku bee laayal eevn doa dehn noh perfek.—Job 27:5.

19. How Isaiah 63:7 help wi fi si weh shuda bee di mayn goal a wi teechin?

¹⁹ Mek wi luk pahn wahn nada gud lesn weh wi ku laan. Wen wi teech peepl di chroot fahn di Baibl, wi teech dehn dat Gaad ga di rait fi rool di yoonivers. Dat da chroo, bot eevn doa ih impoatant fi foakos pahn Gaad laa dehn, wi mayn goal da fi help adaz laan fi lov Jehoava, wi Faada, ahn fi bee laayal tu ahn. Soh wi haftu shoa dehn Jehoava gud kwalitiz ahn help dehn fi si di kaina persn weh di naym Jehoava stan fa. (Reed Isaiah 63:7.) * Wen wi teech laik dat, wi help peepl fi lov Jehoava ahn fi obay ahn bikaaz dehn waahn bee laayal tu ahn.

20. Weh wi wahn kansida eena di neks aatikl?

²⁰ Wi waahn mek shoar dat weh wi du ahn di way how wi teech mek peepl tink gud tingz wen dehn hyaa Jehoava naym ahn mek dehn waahn jraa kloas tu ahn. How wi ku du dat? Di neks aatikl wahn ansa da kweschan.