AALA wi bileev dat Jehoava di leed ih peepl an ih di gi dehn weh dehn need fi stay kloas tu ahn joorin dehnya “laas dayz.” (2 Tim. 3:1) Bot eech wan a wi haftu obay Jehoava. Wi ku kompyaa fi wee sichuwayshan tu di sichuwayshan weh di Izrelait dehn mi fays eena di wildanes. Dehn mi fi tek akshan wen dehn mi hyaa di song a wahn chrompit.

Jehoava mi tel Moaziz fi mek too chrompit owta silva “fi kaal di peepl tugeda ahn fi mek dehn noa wen fi pak op evriting fi moov di kyamp.” (Num. 10:2) Di prees dehn mi fi bloa di chrompit dehn eena difrent wayz fi mek di peepl noa weh fi du. (Num. 10:3-8) Tudeh, Gaad dairek ih peepl eena lata wayz. Eena dis aatikl wi wahn diskos chree a di wayz Gaad dairek ih peepl tudeh. Wi wahn kompyaa di wayz Gaad dairek ih peepl tu di way di prees dehn mi bloa di chrompit eena di taim a di Izrelait dehn. Dehnya chree wayz da wen wi geh invitayshan tu difrent spirichwal proagram an ivent, wen di elda dehn geh chraynin, ahn wen di dairekshan fi di kangrigayshan dehn chaynj.

Wen Jehoava mi waahn “aala di peepl” fi gyada tugeda da di gayt pahn di ees said a di tabernakl, di prees dehn mi bloa di too chrompit dehn. (Num. 10:3) Aala di chraib dehn mi kyamp rong ahn rong di tabernakl eena foa sekshan, bot dehn stil kuda mi hyaa di song a di chrompit. Peepl weh mi kyamp kloas tu di tabernakl kuda mi reech deh faas. Di peepl weh mi kyamp ferda mi praabli need moa taim fi reech. Bot ih noh mata if dehn mi kyamp kloas er faar, Jehoava mi waahn aala dehn gyada tugeda fi hyaa fi hihn inschrokshanz.

Tudeh day, wee noh gyada tugeda da wahn tabernakl, bot wi aalwayz geh invitayshan fi gyada tugeda az Gaad peepl. Wi gyada tugeda da reejinal kanvenshan an ada spirichwal proagram an ivent, ahn wi geh impoatant infamayshan ahn dairekshan. Aal oava di werl, Jehoava peepl injai di saym proagram. Soh aal hoo aksep da invitayshan ahn kohn da dehndeh meetin da paat a wahn big, hapi groop. Som a dehn haftu chravl fahn faar wail adaz deh kloasa. Stilyet, evribadi weh kohn da dehndeh meetin noa dat dehn wahn benifit wahn lat.

How bowt dehn groop a bradaz ahn sistaz weh deh faar fahn eni a dehndeh spirichwal proagram an ivent? Bikaaz a di teknalaji weh wi ga nowadayz, lata dehn ku stil benifit fahn di saym proagram ahn eevn feel laik dehn da paat a di spirichwal proagram an ivent. Fi egzampl, joorin di vizit a wahn brada fahn hedkwaataz, di branch da  Benin mi schreem di proagram tu Arlit, Niger, wahn tong eena di Sahara Desert. Tweni-wan bradaz, sistaz, an adaz mi gyada deh. Eevn doa dehn mi deh faar, dehn mi stil feel yoonaitid wid di big asembli a 44,131 peepl. Wan brada mi rait: “Tank yu fahn di batam a wi haat fi schreem di proagram fi wi. Ih shoa wi agen humoch unu lov wi.”

Wen di Izrelait prees dehn mi onli bloa wan chrompit, “onli di cheef dehn, weh da hed oava di towznz,” mi fi kohn da di tabernakl. (Num. 10:4) Rait deh, dehn kuda mi geh infamayshan ahn chraynin fahn Moaziz. Dat wuda mi help dehn fi tek kayr a dehn rispansabiliti eena dehn chraib. If yoo da-mi wan a dehndeh cheef, yoo wuda mi du evriting weh yu kud fi ansa di chrompit kaal ahn benifit fahn Jehoava dairekshan?

Tudeh day, di kangrigayshan elda dehn da noh no “cheef,” ner dehn noh baas op di peepl weh deh eena dehn kyaa. (1 Peet. 5:1-3) Bot dehn du dehn bes fi mek shoar dehn shepad di kangrigayshan gud. Soh wen dehn geh wahn invitayshan fi geh moa chraynin, laik fi goh da di Kingdom Minischri Skool, dehn eega fi aksep di invitayshan. Joorin dehndeh skool, di elda dehn laan how fi tek beta kayr a di kangrigayshan. Bikaaz a da chraynin, evribadi eena di kangrigayshan ku jraa kloasa tu Jehoava. Eevn if yu neva yet gaahn da wan a dehndeh skool, yu stil di benifit bikaaz bradaz weh gaan aredi di yooz weh dehn laan fi help di kangrigayshan.

Sohntaim di Izrelait prees dehn wuda bloa di chrompit dehn fi mek wahn song weh di noat goh op ahn dong. Dis da-mi fi mek di peepl noa dat Jehoava mi waahn dehn moov di hoal kyamp. (Num. 10:5, 6) Wen di peepl mi moov di kyamp, dehn mi wel aaganaiz, bot dat mi tek lata werk fahn evribadi. Sohntaim som a di Izrelait dehn maita mi tink haad fi moov di kyamp fahn wan plays tu di neks. Wai?

Maybi som a dehn mi feel laik dehn mi haftu moov tu moch taim er di kaal kohn wen dehn neva ekspek it. “Sohntaim di klowd wuda stay onli fahn eevnin til maanin.” Sohntaim “da mi too dayz, wahn mont, er langa” bifoa dehn mi haftu moov agen. (Num. 9:21, 22) Ahn humoch taim dehn mi haftu moov di kyamp? Numbers chapta 33 menshan bowt 40 difrent plays wehpaat di Izrelait dehn mi kyamp.

Sohntaim, som a dehn maybi mi fain wahn plays fi kyamp weh ga shayd. Dat wuda gud kaa dehn mi deh eena wahn “grayt ahn terabl wildanes.” (Deut. 1:19) Soh dehn kuda mi bee temtid fi feel dat if dehn mi moov, dehn mi wahn en op sohnweh weh neva komfatabl.

Wans di chraib dehn mi staat tu pik op ahn goh, som a di peepl maita mi fain it haad fi wayt fi fi dehn tern fi moov. Evribadi mi hyaa wen dehn mi bloa di chrompit, bot noh aala dehn kuda mi moov owt saym taim. Di signal fahn di chrompit mi meen dat di chraib dehn weh mi kyamp pahn di ees said mi fi moov. Dat meenz dat Jooda, Isakar, ahn Zebyulon mi wahn lef fers. (Num. 2:3-7; 10:5, 6) Afta dehn mi lef, di prees dehn wuda bloa di saym signal pahn di chrompit dehn agen. Dat da-mi di signal fi mek di chree chraib dehn weh kyamp tu di sowt staat tu moov owt. Di prees dehn mi kantinyu fi du dis til evribadi eena di kyamp mi lef.

Maybi yoo fain sohn chaynjiz eena di aaganaizayshan weh haad fi aksep. Maybi yu feel laik tu moch ting di chaynj weh yu neva ekspek. Er maybi yu feel komfatabl wid di way tingz mi deh bifoa ahn yu wish dehn neva chaynj. Maybi dehndeh chaynjiz mi tes yu payshens, an ih tek taim fi geh yoos tu di chaynj. Stilyet, if wi chrai haad fi aksep di chaynjiz di way wi noa wi sopoas tu, den wi wahn si dat di chaynjiz gud fi wi ahn dat Jehoava pleez wid wi.

Eena Moaziz day, Jehoava mi gaid milyanz a peepl chroo di wildanes. Widowt fi hihn kyaa ahn dairekshan, dehn neva mi wahn servaiv. Tudeh day, Jehoava di gaid wee chroo dehnya daynjaros laas dayz. Hihn help wi fi stay kloas tu hihn ahn kip wi fayt schrang. Soh den, mek aala wi mek op wi main fi bee obeedyant laik di faytful Izrelait dehn an ansa wen wi hyaa di klyaa song a di chrompit dehn!