LAIF STOARI
Ah Put Jehoava Fers Plays Eena Evri Disizhan Weh Ah Mek
AH MI liv eena wahn rich naybahud da Caracas, Venezuela. Wan day, wen Ah mi-di goh da werk, Ah mi-di tink bowt wahn aatikl weh Ah mi reed eena di Wachtowa magazeen. Di aatikl mi taak bowt how wi nayba dehn si wi. Az Ah mi-di luk pahn di hows dehn lang di way, Ah aks miself: ‘Wen mai naybaz dehn si mi, da weh dehn si? Dehn si sombadi weh werk da wahn bank ahn weh waahn geh rich? Er dehn si wahn servant a Gaad weh di chrai mek wahn livin fi sopoat ih famili?ʼ Ah mi riyalaiz dat mi naybaz onli si mi az sombadi weh ga wahn gud jab da bank. Ah neva laik dat soh Ah mi disaid fi du sohnting bowt it.
Ai mi baan eena May 19, 1940, da Amioûn, Lebanon. Wahn fyoo yaaz layta, mi famili mi moov tu Tripoli. Ah mi groa op eena wahn lovin ahn hapi famili weh noa ahn lov Jehoava Gaad. Ah mi ga chree sista ahn wan breda. Ai da-mi di yongis wan owta aala dehn. Mi payrents neva vyoo dehn jab az di moas impoatant ting eena dehn laif. Di moas impoatant ting fi wi famili da-mi fi stodi di Baibl, goh da di Kristyan meetin dehn, ahn help adaz geh fi noa Gaad.
Wi mi ga sevral anointid Kristyanz eena wi kangrigayshan. Wan a dehn mi naym Michel Aboud, ahn hihn yoostu kandok di Kangrigayshan Buk Stodi. Hihn mi laan di chroot da New York an hihn da-mi di fers persn fi preech da Lebanon eena 1921. Ah memba how ih mi shoa lata rispek an ih mi veri helpful tu too yong sistaz weh mi grajuayt fahn Gilyad Skool—Anne ahn Gwen Beavore. Wi mi geh fi bee gud frenz wid dehn. Yaaz layta, Ah mi veri hapi fi meet Anne da di United States. Wahn lee wail afta dat, Ah meet Gwen da di branch aafis da London, England. Shee mi geh marid tu wahn brada weh naym Wilfred Gooch ahn dehn mi-di serv da Betel deh.
WI PREECHIN WERK DA LEBANON
Wen Ah mi yong, onli lee bit a Witnisiz mi deh da Lebanon. Bot wi mi stil eega fi teech peepl bowt di Baibl. Wi mi du dat eevn doa sohn rilijos leedaz mi chrai stap wi. Ah stil memba som a di tingz weh mi hapm tu wi.
Wan day, mee ahn mi sista Sana mi-di preech eena wahn apaatment bildin ahn wahn prees mi kom op da di floa wehpaat wi mi deh. Sombadi mosi mi kaal ahn. Di prees mi staat tu insolt op mi sista. Hihn mi geh vailent an ih mi push Sana dong di steps ahn shee mi geh hert. Sombadi mi kaal di polees ahn dehn mi kohn, dehn mi mek shoar dat Sana geh di help weh ih mi need. Den dehn mi kehr di prees da di polees stayshan ahn dehn mi fain owt dat hihn mi ga wahn gon. Di polees cheef mi aks ahn: “Yoo teech peepl bowt Gaad er yoo teech peepl fi bee vailent?”
Ah memba wahn nada taim wi kangrigayshan mi rent wahn bos fi mek wi goh preech da wahn tong weh mi deh faar fahn di siti. Wi mi-di injai wiself til wen di loakal prees hyaa weh wi mi-di du ahn hihn gaahn chrai gyada wahn hoal krowd a peepl fi atak wi. Dehn atak wi ahn dehn mi eevn stoan wi op. Mi pa mi geh hert ahn blod mi deh aal oava ih fays. Hihn ahn mi ma gaahn bak da di bos ahn di res a wi mi fala dehn. Ah wahn neva ferget weh mi ma seh wail ih mi-di kleen op mi pa fays. Shee mi seh: “Jehoava, pleez fergiv dehn. Dehn no noa weh dehn di du.”
Ah memba wahn nada taim wi gaahn vizit wi faamli da wi hoamtong. Wi mi meet wahn bishop da wi grampa hows. Di bishop mi noa dat mi payrents da-mi Jehoava Witnisiz. An eevn doa Ai mi jos siks yaaz oal, hihn mi chrai shaym mi an ih aks mi, “Wai yoo noh baptaiz?” Soh Ah tel ahn dat Ah mi stil yong ahn fi geh baptaiz Ah mi need fi noa moa bowt di Baibl an Ah mi need fi ga schranga fayt. Hihn neva laik mi ansa soh ih tel mi grampa dat Ai mi disrispek ahn.
Bad ekspeeryens laik dehndeh neva hapm aal di taim. Yoozhwali, Lebanese peepl frenli ahn haspitabl. Soh wi mi geh fi taak tu lata peepl bowt di Baibl ahn wi mi aybl fi stodi wid lata dehn tu.
MI FAMILI MI DISAID FI MOOV TU WAHN NADA KONCHRI
Wen Ah mi stil di goh da skool, wahn yong brada fahn Venezuela mi vizit Lebanon. Hihn mi deh eena fi wee kangrigayshan ahn wahn lee wail afta dat, ih mi staat tu dayt mi sista Wafa. Afta wahn wail, dehn mi geh marid ahn gaahn liv da Venezuela. Wafa yoostu rait letaz tu wi ahn chrai kanvins mi pa fi mek wi hoal famili goh liv da Venezuela. Shee mi du dat bikaaz shee mi mis wi wahn lat. Afta wahn wail, wi mi disaid fi gaahn liv deh!
Wi gaahn liv da Venezuela eena 1953 ahn wi mi disaid fi liv da Caracas, kloas tu di palis wehpaat di prezident mi liv. Ah mi stil
yong soh Ah yoostu geh eksaitid fi si di prezident paas wi hows eena ih fansi kaar. Bot ih neva eezi fi mek mi payrents ajos tu di nyoo konchri, langwij, kolcha, food, ahn weda. In fak, dehn jos mi-di geh yoostu dehn nyoo laif wen sohnting terabl mi hapm.Fahn lef tu rait: Mi pa. Mi ma. Dis da mee eena 1953 wen mi famili moov da Venezuela
SOHNTING TERABL MI HAPM
Mi pa mi staat tu feel sik. Dat neva naamal bikaaz hihn da-mi aalwayz wahn schrang ahn helti persn. Wi kudn eevn memba di laas taim hihn mi geh sik. Den di dakta mi tel wi dat mi pa mi ga kyansa, an ih mi haftu tek wahn serjri. Sad fi seh, wan week layta ih mi ded.
Ih haad fi eksplayn how sad wi mi feel. Ai mi 13 yaaz oal wen mi pa ded. Wi neva ekspek hihn fi ded, ahn wi mi feel laik wi kuda neva bee hapi agen. Mi ma mi fain it haad fi aksep dat ih hozban mi ded. Bot wi mi haftu kantinyu liv wi laif, ahn wid Jehoava help wi mi bayr op. Wen Ah mi 16, Ah mi grajuayt fahn hai skool da Caracas, an Ah mi reeli waahn help sopoat mi famili.
Mi sista, Sana, an ih hozban, Rubén, mi help mi fi jraa kloasa tu Jehoava
Rong dis taim, mi sista Sana mi marid Rubén Araujo, hoo mi grajuayt fahn Gilyad Skool ahn gaahn bak da Venezuela. Den dehn moov tu New York. Mi famili mi disaid fi mek Ah goh stodi da wahn yooniversiti. Soh Ah mek op mi main fi goh da New York ahn stay wid mi sista ahn mi braalee wail Ah goh da skool. Dehn mi help mi fi jraa kloasa tu Jehoava. Dehn mi ga lata machoar bradaz eena wi Brooklyn Spanish kangrigayshan. Ah mi hapi fi geh fi noa Brada Milton Henschel ahn Brada Frederick Franz, hoo mi serv da Brooklyn Betel.
Dis da wen Ah mi geh baptaiz eena 1957
Rong di en a mi fers yaa da yooniversiti, Ah mi staat tu tink bowt weh Ah mi-di du wid mi laif. Ah mi reed ahn meditayt pahn difrent aatikl eena di Wachtowa magazeen weh taak bowt Kristyanz weh mi ga goalz eena Jehoava servis. Ah mi si dat di painyaa dehn ahn di Betelait dehn eena wi kangrigayshan mi veri hapi. An Ai mi waahn bee laik dehn, bot Ah neva baptaiz yet. Ah mi noa dat Ah mi haftu dedikayt mi laif tu Jehoava. Soh Ah mi du dat ahn den Ah mi geh baptaiz pahn Maach 30, 1957.
IMPOATANT DISIZHANZ
Afta Ah mi geh baptaiz, Ah mi reeli waahn bee wahn painyaa, bot Ah mi noa dat dat mi wahn bee haad fi du. Ah neva shoar if Ah kuda mi painyaa ahn stil goh da yooniversiti saym taim, soh Ah mi rait wahn leta tu mi famili fi tel dehn weh Ah mi waahn du. Wi mi rait tu eech ada wan lat an Ah mi eksplayn tu dehn dat Ah mi disaid fi stap goh da yooniversiti an dat Ah waahn goh bak da Venezuela ahn staat painyaa.
Ah gaahn bak da Caracas eena Joon 1957. Bot Ah kuda mi si dat di sichuwayshan weh mi famili mi eena neva gud. Dehn mi need sombadi els fi werk ahn help provaid fi di famili. Wahn bank mi aafa mi wahn jab. Bot
Ah mi stil waahn painyaa bikaaz dat da weh Ah mi gaahn bak hoam fi du. Ah mi disaid dat Ah mi wahn werk an Ah mi wahn painyaa. Fi yaaz Ah mi werk ful taim an Ah mi painyaa. Neva eena mai laif Ah mi feel soh bizi ahn soh hapi!Ah mi hapi fi meet Sylvia, wahn byootiful sista weh lov Jehoava. Shee mi moov tu Venezuela lang wid ih payrents. Wi mi geh marid, ahn wi mi en op di ga wi son, Michel (Mike), ahn wi daata, Samira. Ah mi aalso staat tu tek kayr a mi ma wen shee mi kohn liv wid wi. Ah mi haftu stap painyaa fi tek kayr a mi famili, bot Ah mi stil lov di minischri. Mee ahn Sylvia wuda agzilari painyaa weneva wi kud joorin vakayshan taim.
WAHN NADA BIG DISIZHAN
Di pikni dehn stil mi-di goh da skool wen Ah mi ga di ekspeeryens weh Ah mi menshan da di biginin a dis aatikl. Ah haftu seh, wi mi ga wahn gud ahn komfatabl laif, ahn peepl weh mi werk da di bank dehn mi rispek mi. Bot Ah mi reeli waahn peepl si mi az wahn servant a Jehoava. Ah mi kip di tink bowt weh Ah kuda mi du soh dat peepl wuda si mi da way. Soh mee ahn mi waif mi sidong ahn taak bowt how wi ku manij wi moni. Bikaaz, if Ah mi stap werk da bank, Ah wuda mi geh wahn big pay chek. Ahn sins wi neva oa nobadi wi figa dat if wi mi chrai liv wahn simpl laif wi wuda mi ga inof moni fi sopoat wi fi wahn lang taim.
Ih neva eezi fi du dat, bot mi dyaa waif ahn mi ma mi sopoat mi disizhan. Soh Ah mi wahn ku painyaa agen. Dat mi mek Ah feel reeli hapi. Ah mi redi fi staat painyaa, bot wi mi geh sohn nyooz weh wi neva ekspek.
WAHN HAPI SOPRAIZ!
Wi terd pikni, Gabriel, da-mi wahn hapi sopraiz
Wan day wen wi mi gaahn da dakta, wi mi fain owt dat Sylvia pregnant; wi mi sopraiz. Wi mi soh hapi fi geh da nyooz! Bot ih mek Ah tink bowt mi disizhan fi staat painyaa. Ah mi-di wanda if Ah kuda stil painyaa. Wi mi-di luk faawod tu wen di baybi baan. Bot Ah stil mi-di wanda if Ai mi wahn aybl fi painyaa.
Afta wi mi diskos wi planz, wi mi disaid dat Ah mi wahn stil painyaa. Wi son Gabriel mi baan eena Aypril 1985. Ah mi en op di lef mi jab da di bank ahn staat tu regyula painyaa agen eena Joon 1985. Laytaraan, Ah mi geh di privilij fi serv az wahn memba a di Branch Komiti. Bot di branch neva deh da Caracas,
soh Ah mi haftu chravl bowt 50 mailz (80 km) fi too er chree dayz eech week.WI MOOV TU WAHN NADA TONG
Di branch aafis mi deh da wahn tong weh naym La Victoria. Soh, wi mi disaid dat wi hoal famili mi wahn moov deh fi mek wi deh kloasa tu Betel. Dat da-mi wahn big chaynj fi wi. Ah kyaahn eevn tel yu humoch Ah apreeshiayt mi famili, dehn mi ga wahn reeli gud atichood ahn dat mi help wahn lat. Mi sista Baha mi wilin fi tek kayr a wi ma. Mike mi don geh marid, bot Samira ahn Gabriel mi stil liv wid wi hoam. Soh wen wi gaahn liv da La Victoria, dehn mi haftu lef bihain frenz da Caracas. Aalso, mi dyaa waif Sylvia mi haftu geh yoostu liv eena wahn smaal tong insteda di bizi kyapital siti. An aala wi mi haftu geh yoostu liv eena wahn smaala hows. Yes, dis da-mi wahn big chaynj fi wi wen wi moov fahn Caracas tu La Victoria.
Tingz mi chaynj agen. Gabriel mi geh marid, ahn Samira mi geh ih oan hows. Den mee ahn Sylvia mi geh invaitid fi jain di Betel famili eena 2007, ahn wi stil di serv deh. Mike, wi oaldis son, di serv az wahn elda an ih di painyaa lang wid ih waif, Monica. Gabriel da wahn elda tu, an ih serv da Italy lang wid ih waif, Ambra. Samira di painyaa an ih aalso di serv az wahn rimoat valantyaa da Betel.
Fahn lef tu rait: Mee ahn mi waif, Sylvia, da di Venezuela branch aafis. Wi oaldis son, Mike, an ih waif, Monica. Wi daata, Samira. Wi son, Gabriel, an ih waif, Ambra
AH WUDA MEK DI SAYM DISIZHANZ AGEN
Yes, Ah mi haftu mek lata big disizhanz eena mi laif. Bot Ah wudn chaynj non a dehn. Ah wuda mek di saym disizhanz agen. Ah reeli apreeshiayt aala di tingz weh Ah mi aybl fi du fi Jehoava. Oava di yaaz, Ah mi geh fi si dat ih veri impoatant fi mantayn wahn schrang frenship wid Jehoava. Weda wi haftu mek big er smaal disizhanz, hihn ku gi wi di kaina pees “weh peepl kyaahn andastan.” (Fil. 4:6, 7) Mee ahn Sylvia lov serv da Betel, ahn wi feel laik Jehoava aalwayz bles wi disizhanz bikaaz wi aalwayz put hihn fers plays eena wi laif.