1. Weh Jeezas disaiplz mi tel wahn big krowd a peepl fi du?

WAHN big krowd a peepl mi gaahn da Jeroosalem. Dehn mi kohn fahn lata difrent konchri ahn dehn mi taak difrent langwij. Sodn-wan, som a di Jooz mi taak eena di difrent langwij weh di peepl taak. Dis mi reeli amayzin! Bot di mesij weh Peeta mi gi dehn mi eevn moa amayzin. Di peepl dehn mi laan dat if dehn mi shoa fayt eena Jeezas Krais, dehn kuda mi geh sayv. Dat mi reeli toch dehn haat dat dehn mi aks: “Bradaz, da weh wi need fi du now?” Peeta ansa dehn: “Unu mos ripent ahn geh baptaiz.”—Aks 2:37, 38.

2. Weh wi wahn diskos eena dis aatikl? (Koment pahn di picha pahn di kova.)

² Afta dat, bowt 3,000 peepl mi geh baptaiz fi bee disaiplz a Krais. Dat da-mi wahn wandaful ting! Dis da-mi di biginin a di teechin werk weh Jeezas mi koman ih disaiplz fi du. Fi hihn falowaz stil di du da werk. Tudeh, peepl noh wahn geh baptaiz if wi jos taak tu dehn bowt di Baibl fi wahn fyoo owaz. Insted, ih mait tek monts er eevn wahn yaa er moa til wahn styoodent reech da goal. Da chroo, ih tek lata haad werk fi help sombadi fi geh baptaiz. Eena dis aatikl, wi wahn diskos weh yoo ku du fi help yu Baibl styoodent fi geh baptaiz.

3. Weh Machyu 28:19, 20 seh wahn styoodent need fi du fi kwalifai fi geh baptaiz?

³ Bifoa wahn Baibl styoodent ku geh baptaiz, ih need fi yooz weh ih laan eena ih laif. (Reed Machyu 28:19, 20.)  Wen wahn Baibl styoodent du dat, dehn da laik di “waiz man” eena Jeezas iloschrayshan weh dig deep dong ahn bil ih hows pahn salid rak. (Mach. 7:24, 25; Look 6:47, 48) How wi ku help wahn Baibl styoodent fi yooz weh ih laan eena ih laif? Mek wi diskos chree tingz weh wi ku du.

4. How wi ku help wi styoodent fi kip di werk haad soh dat ih ku kwalifai fi geh baptaiz? (Si di baks “ Help Yu Styoodent fi Si Weh Ih Need fi Werk Pan an Help Ahn fi Reech ih Goalz.”)

⁴ Help yu styoodent fi ga goalz fi werk pahn. Wai yu shuda du dat? Tink bowt dis: Imajin dat yu di goh pahn wahn lang chrip ahn yu disaid fi stap da sohn nais spat lang di way. Dehndeh shaat stap wahn mek yu injai di hoal chrip ahn yu nat eevn wahn feel laik di chrip mi lang aftaraal. Saym way soh, wen wahn Baibl styoodent set goalz weh ih ku reech eena wahn shaat taim, an ih werk pahn dehn, den ih noh wahn feel laik di jerni tuwaadz baptizm mi lang ataal. Yooz di “Sohnting fi Werk Pahn” sekshan eena di Injai Laif Fareva! buk fi help yu styoodent mek proagres. Wen unu finish wid eech lesn, diskos how di goal weh unu set wahn help yu styoodent du weh ih laan eena ih laif. If yoo az di teecha ga wahn neks goal weh yu wuda waahn yu styoodent werk pahn, yu ku rait it eena di spays weh seh “Sohnting Els fi Werk Pahn.” Mek shoar fi yooz dis sekshan fi rivyoo wid yu styoodent di goalz weh ih ku reech eena wahn shaat taim ahn di wanz weh mait tek lee langa.

5. Akaadn tu Maak 10:17-22, weh Jeezas mi tel wahn rich man fi du, ahn wai hihn mi tel ahn dat?

⁵ Help yu styoodent fi mek chaynjiz eena ih laif. (Reed Maak 10:17-22.) Jeezas mi noa dat ih mi wahn bee haad fi mek wahn rich man sel evriting weh ih gat. (Maak 10:23) Bot stil, Jeezas mi tel di man fi  mek dis big chaynj eena ih laif. Wai? Bikaaz Jeezas mi lov ahn. Sohntaim, wi mait noh tel wi styoodent fi yooz weh ih di laan eena ih laif bikaaz wi mait feel laik ih noh redi fi mek dehndeh kaina chaynjiz. Ih mait tek taim fi mek peepl mek chaynjiz eena dehn laif ahn put aan di nyoo persn. (Kol. 3:9, 10) Bot di soona yu taak tu yu styoodent bowt di kaina chaynjiz ih need fi mek, di beta ih wahn bee. Wen yu du dat, yu di shoa dat yu kay bowt yu styoodent.—Ps. 141:5; Prov. 27:17.

6. Wai wi shuda aks wi styoodent weh dehn tink ahn how dehn feel bowt weh dehn di laan?

⁶ Wi waahn aks wi styoodent weh dehn tink ahn how dehn feel bowt wahn sertn sobjek. Dis wahn help wi fi noa weh wi styoodent andastan ahn bileev eena. If yu du dis regyula, ih wahn bee eeziya fi mek dehn aksep dat dehn haftu mek chaynjiz eena dehn laif. Di Injai Laif Fareva! buk ga lata kweschanz weh wi ku yooz fi fain owt how wahn styoodent feel bowt sertn mataz. Fi egzampl, lesn 04 aks: “How yu tink Jehoava feel wen yu yooz fi hihn naym?” Ahn lesn 09 aks: “Wat da sohn tingz weh yoo wuda waahn pray bowt?” At fers, yu styoodent mait noh fain it eezi fi ansa dehnya kweschanz. Bot yoo ku help ahn fi tink bowt di skripchaz ahn di pichaz weh deh eena di buk.

7. How wi ku yooz ada peepl ekspeeryens fi help wi styoodent?

⁷ Wen yu styoodent andastan weh ih need fi du, yooz ada peepl ekspeeryens fi help ahn mek chaynjiz. Fi egzampl, if yu styoodent fain it haad fi deh da aala di meetin dehn, yu ku shoa ahn di veedyo Jehoava Kyaa fi Mi weh deh anda di “Fain Owt Moa” sekshan da lesn 14. Yu wahn fain dehndeh ekspeeryens eena lata di lesn dehn eena di Injai Laif Fareva! buk. Yu ku fain it anda di “Saach fi Moa” sekshan er di “Fain Owt Moa” sekshan. * Bot mek shoar dat yu noh kompyaa yu styoodent wid sombadi els ahn seh, “If hihn ku du it, yoo ku du it tu.” Mek di styoodent figa dat owt pan ih oan. Bot weh yu ku du da taak bowt impoatant tingz weh mi help di persn eena di veedyo. Maybi yu ku bring op di mayn skripcha er sohnting impoatant weh mi help da persn. Weneva pasabl, mek shoar yu menshan how Jehoava mi help da persn.

8. How wi ku help wi styoodent fi laan fi lov Jehoava?

⁸ Help yu Baibl styoodent fi laan fi lov Jehoava. How yu ku du dat? Fain wayz how yu ku help yu styoodent fi laan moa bowt Jehoava kwalitiz. Help ahn fi andastan dat Jehoava da di hapi Gaad weh aalwayz dehdeh fi peepl weh lov ahn. (1 Tim. 1:11; Heeb. 11:6) Shoa yu styoodent dat ih wahn benifit if ih yooz weh ih di laan eena ih laif, an eksplayn tu ahn dat dehndeh benifits da proof dat Jehoava lov ahn. (Isa. 48:17, 18) Yu styoodent wahn bee wilin fi chaynj ih laif az ih geh fi lov Jehoava moa ahn moa.—1 Jan 5:3.

9. Laik weh Maak 10:29, 30 seh, weh ku help wahn persn fi kwalifai fi geh baptaiz?

⁹ Fi mek wahn styoodent kwalifai fi geh baptaiz, ih mait need fi giv op sohn tingz. Jos laik di rich man eena Jeezas iloschrayshan, sohn styoodents mait need  fi giv op mateeryal tingz. Maybi di kaina werk weh dehn du goh gens Baibl prinsiplz, soh dehn mait haftu kwit dehn jab ahn fain wahn neks wan. Som mait haftu stap bee frenz wid peepl weh noh lov Jehoava. Adaz mait ga famili weh noh laik di Witnisiz, sayka dat dehn famili mait noh waahn ga notn fi du wid dehn agen. Jeezas mi eevn seh dat ih mait bee haad fi mek sohn peepl giv op dehndeh tingz. Bot hihn pramis dehn dat if dehn giv op dehndeh tingz, dehn noh wahn rigret it ataal bikaaz Jehoava wahn bles dehn wid wahn big lovin famili. (Reed Maak 10:29, 30.) How yoo ku help yu Baibl styoodent benifit fahn dis wandaful gif?

10. Weh yu laan fahn Manuel ekspeeryens?

¹⁰ Bee di kaina fren weh yu styoodent need. Ih impoatant fi mek yu shoa yu styoodent dat yu kay bowt ahn. Wai? Noatis weh Manuel, hoo liv da Mexico, memba wen sombadi mi-di stodi wid hihn. Ih seh: “Evritaim bifoa wi staat stodi, mi teecha wuda aks mi how Ah di du. Dis mi mek Ah feel komfatabl fi taak tu ahn bowt eniting. Ai mi noa dat hihn mi reeli kay bowt mi.”

11. How wi styoodent dehn ku benifit if wi spen taim wid dehn?

¹¹ Jos laik how Jeezas mi spen taim wid ih falowaz, wee fi spen taim wid wi styoodents tu. (Jan 3:22) Fi egzampl, if yu styoodent di mek chaynjiz eena ih laif, ih wuda nais if yu invait ahn oava fi wahn lee snak, wahn meel, er fi wach di braadkyaastin fi di mont. Yu styoodent wahn bee graytful if yu du dat, espeshali rong di taim wen ih feel loanli kaaz ih frenz ahn famili di selibrayt haliday weh noh gree wid di Baibl. Kazibwe, fahn Uganda, seh: “Di taim weh Ah spen wid mi teecha, mi teech mi az moch bowt Jehoava az di taim weh Ah mi spen di stodi di Baibl. Ai mi geh fi si humoch Jehoava lov ih peepl an how hapi dehn mi hapi. Dat da di kaina laif weh Ai mi waahnt.”

12. Wai wi shuda invait difrent poblishaz fi goh wid wi pahn wi stodi?

 ¹² Invait difrent poblishaz fi goh wid yu pahn yu Baibl stodi. Sohntaim wi mait feel laik ih eeziya fi goh pahn wi oan er fi aalwayz kehr di saym persn pahn wi Baibl stodi. Dis mait bee eeziya, bot wi Baibl styoodent wahn benifit moa if wi invait difrent poblishaz fi goh wid wi. Dmitrii, weh liv da Moldova, seh: “Evri singl poblisha weh mi kohn wid mi teecha pahn mi stodi wuda eksplayn tingz eena wahn difrent way. Dat mi help mi fi luk fi ada wayz fi si how Ah ku put intu praktis weh Ah mi-di laan. Bot aalso, Ah neva feel soh shai ahn nervos wen Ah gaahn da mi fers meetin sins Ah mi don meet som a di bradaz ahn sistaz.”

13. Wai wi shuda help wi styoodent fi goh da meetin?

¹³ Help yu styoodent fi goh da di kangrigayshan meetin dehn. Wai wi need fi du dat? Bikaaz Jehoava koman evribadi weh wership ahn fi meet tugeda. (Heeb. 10:24, 25) Noh onli dat, wi bradaz ahn sistaz eena di kangrigayshan da laik wi famili; wee da wahn spirichwal famili. Wen wi jain dehn fi di meetinz, da laik wi di shayr wahn nais meel tugeda. Wen wi du wi bes fi help wi Baibl styoodent fi goh da di meetin dehn, wi akchwali di help dehn fi tek wahn impoatant step soh dat dehn ku kwalifai fi geh baptaiz. Bot memba, ih noh mait bee eezi fi mek dehn staat goh da meetin. How di Injai Laif Fareva! buk ku help wi styoodent fi deel wid eniting weh di stap ahn fahn goh da meetin?

14. How wi ku help wi styoodent fi ga di dizaiya fi goh da meetin?

¹⁴ Yooz lesn 10 a di Injai Laif Fareva! buk fi help yu styoodent fi ga di dizaiya fi goh da meetin. Bifoa dis buk mi kom owt, sohn poblishaz mi tes di buk ahn yooz dis saym lesn wid dehn styoodent. Dehn seh dat ih mi werk gud an ih mi help dehn styoodents fi staat goh da meetin. Af koars, noh wayt til yu reech da lesn ten fi invait yu styoodents fi goh da meetin. Du it az soon az pasabl ahn kip di invait dehn. Evri Baibl styoodent ga difrent prablemz. Soh pay atenshan tu yu styoodent ahn fain wayz how yu ku help ahn. Noh giv op if ih noh kohn da meetin rait away, ih mait tek lee taim. Bot bee payshent ahn kip di invait ahn.

15. Weh yu styoodent mait frayd fa?

¹⁵ Yu mait memba how yoo mi feel wen yu mi-di stodi di Baibl. Maybi yu mi feel laik yu kuda neva goh preech wid di kangrigayshan. Er maybi yu mi frayd dat yu famili er frenz mait ton gens yu. If dis da how yoo mi feel, den yu mait andastan how yu Baibl styoodent feel. Jeezas mi seh dat ih naamal fi som peepl feel dis way. Bot hihn mi tel ih falowaz noh fi mek dat stap dehn fahn serv Jehoava. (Mach. 10:16, 17, 27, 28) How Jeezas mi help ih falowaz fi noh bee frayd? How yoo ku du di saym ting wid yu styoodent?

16. How wi ku chrayn wi styoodent fi tel adaz bowt weh ih di laan?

¹⁶ Lee bit bai lee bit, chrayn yu styoodent fi taak bowt ih fayt. Jeezas disaiplz mosi mi feel frayd ahn nervos wen hihn mi sen dehn owt fi preech. Bot Jeezas mi help dehn, hihn mi tel dehn wehpaat fi preech ahn weh fi preech bowt. (Mach. 10:5-7) How wi ku kapi Jeezas egzampl? Help yu styoodent fi si wen ih ku preech.  Fi egzampl, aks ahn if ih noa enibadi weh ku benifit fahn wahn spesifik Baibl chroot. Den shoa ahn wahn eezi way how fi du it. Weneva pasabl yu ku praktis wid ahn, an yooz di “Weh Sohn Peepl Seh” ahn “Weh Yu Wuda Seh If” sekshan fahn di Injai Laif Fareva! buk. Mek shoar dat yu mayn foakos da fi chrayn yu styoodent fi yooz di Baibl soh dat ih ku eksplayn tingz eena wahn eezi ahn rispekful way.

17. How wi ku yooz Machyu 10:19, 20, 29-31 fi help wi styoodent fi chros eena Jehoava?

¹⁷ Help yu styoodent fi chros eena Jehoava. Jeezas mi tel ih disaiplz dat Jehoava mi wahn help dehn bikaaz Hihn lov dehn. (Reed Machyu 10:19, 20, 29-31.) Rimain yu styoodent dat Jehoava wahn help ahn tu. Wen yu pray wid yu styoodent, aks Jehoava fi help ahn werk pan ih goalz. Dis wahn help ahn fi chros eena Jehoava. Franciszek, weh liv da Poland, seh: “Mi teecha yoozhwali pray bowt weh Ah need fi werk pan. Wen Ah mi si how Jehoava ansa mi teecha pryaaz, dat mi mek Ai staat pray. Ah mi si how Jehoava mi help mi wen Ah mi haftu aks fi taim aaf fahn werk fi goh da meetinz ahn kanvenshan.”

18. How Jehoava feel bowt di teechin werk weh Kristyanz di du tudeh?

¹⁸ Wi Baibl styoodents reeli impoatant tu Jehoava. Hihn noa how haad Baibl teechaz need fi werk fi help peepl fi jraa kloasa tu hihn, ahn hihn lov dehn fi aal weh dehn di du. (Isa. 52:7) Ahn if yu noh di kandok wahn Baibl stodi rait now, yu stil ku help Baibl styoodents fi mek proagres ahn kwalifai fi geh baptaiz wen yu jain ada poblishaz pahn dehn stodi.