1. Wai Jehoava servant dehn mait feel loanli sohntaim?

MOAS a wi feel loanli sohntaim. Fi som a wi, da feelin kom ahn goh. Bot fi adaz, dehn mait feel da way fi wahn lang taim. Wee ku feel loanli eevn wen wi ga lata peepl rong wi. Sohntaim, wen wi moov intu wahn nyoo kangrigayshan, wi fain it haad fi mek nyoo frenz er ih ku bee dat wi kohn fahn wahn famili weh reeli kloas, bot wee mi haftu moov sohnweh els ahn soh wi mait feel loanli. Som a wi mait feel loanli bikaaz sombadi weh wi lov ded ahn wi mis dehn. Ahn som a wi feel loanli bikaaz wi famili er frenz weh noh serv Jehoava rijek wi er persikyoot wi wen wi kom eena di chroot.

2. Weh kweschanz wi wahn ansa eena dis aatikl?

² Jehoava noa wi an ih andastan evriting bowt wi. Hihn noa wen wi feel loanli an ih waahn help wi. How Jehoava help wi? Weh wee ku du fi help wiself? How wi ku help adaz wen dehn feel loanli? Mek wi fain di ansaz tu dehndeh kweschan.

3. How Jehoava mi shoa dat ih kay bowt Ilaija?

³ Jehoava waahn enibadi weh wership ahn fi bee hapi. Hihn dehdeh fi wi, an ih noatis wen wi feel sad er wen wi feel diskorij. (Ps. 145:18, 19) Tink bowt how Jehoava mi  shoa humoch ih kay bowt Ilaija. Ilaija mi liv joorin terabl taimz. Powaful peepl weh neva lov Jehoava mi-di persikyoot enibadi weh wership Hihn. Ahn dehndeh peepl mi waahn kil Ilaija. (1 Ki. 19:1, 2) Ilaija mi feel laik hihn da-mi di onli prafit lef weh mi-di serv Jehoava, ahn dat mi praabli mek ih feel moa diskorij. (1 Ki. 19:10) Rait away Jehoava mi du sohnting fi help Ilaija. Hihn mi sen wahn aynjel fi tel di prafit dat ih neva deh bai ihself. Di aynjel tel ahn dat lata Izrelaits stil mi-di serv Jehoava!—1 Ki. 19:5, 18.

4. How Maak 10:29, 30 shoa wi humoch Jehoava kay bowt fi hihn servant dehn weh looz di sopoat a dehn famili ahn frenz?

⁴ Jehoava andastan dat wen wi chooz fi serv ahn, wi mait haftu giv op wahn lata tingz. Wan a di tingz weh wi mait haftu giv op da di help weh wi yoostu geh fahn wi faamli ahn frenz weh noh serv Jehoava. Maybi dat da weh Peeta mi-di wori bowt wen hihn tel Jeezas: “Bot memba, wee mi lef evriting fi fala yoo; soh, da weh wee wahn get?” (Mach. 19:27) Jeezas mi tel ih disaipl dehn dat di kangrigayshan wuda bee fi dehn famili now. (Reed Maak 10:29, 30.) Ahn Jehoava, di Hed a wi spirichwal famili, pramis dat hihn wahn sopoat enibadi weh waahn serv ahn. (Ps. 9:10) Mek wi diskos sohntingz weh yoo ku du soh dat Jehoava ku help yu wen yu feel loanli.

5. Wai ih gud fi tink bowt how Jehoava di help yoo?

⁵ Tink bowt how Jehoava di help yoo. (Ps. 55:22) Dat wahn help yu fi si dat yu noh deh bai yuself. Carol, * wahn sista weh singl ahn hoo da di onli wan eena ih famili weh deh eena di chroot, seh: “Wen Ah tink bowt how Jehoava help mi fi bayr op chroo haad taimz, dat reeli help mi fi noh feel loanli. Ih shoa mi dat Jehoava wahn aalwayz dehdeh fi mi.”

6. How 1 Peeta 5:9, 10 ku inkorij wi wen wi feel loanli?

⁶ Tink bowt how Jehoava di help wi  bradaz ahn sistaz weh feel loanli. (Reed 1 Peeta 5:9, 10.) Fi yaaz, Hiroshi da-mi di onli wan eena ih famili weh da-mi wahn Witnis. Hihn seh: “Eena di kangrigayshan ih eezi fi si dat evribadi ga prablemz. Wi noa dat wi di du wi bes fi serv Jehoava ahn dat ku inkorij eni wan a wi weh feel laik wee da di onli wan eena wi famili weh deh eena di chroot.”

7. How pryaa help yoo?

⁷ Aalwayz pray, reed di Baibl, ahn goh da meetin. Wen yu pray tu Jehoava, tel ahn egzakli how yu feel. (1 Peet. 5:7) Massiel da wahn yong sista weh feel loanli kaaz shee da di onli wan eena ih famili weh serv Jehoava. Shee seh: “Wan a di moas impoatant tingz weh mi help mee wen Ai mi feel loanli da-mi fi pray tu Jehoava fahn mi haat. Ah mi du dis lata taim joorin di day an Ah tel Ahn how Ah feel. Hihn da-mi wahn reel Pa tu mi!”

8. How yoo benifit wen yu reed Gaad Werd ahn meditayt pan it?

⁸ Reed Gaad Werd regyula ahn meditayt pahn di paats weh proov dat Jehoava lov yoo. Bianca famili laik tel ahn lata tingz weh mek ih feel diskorij. Shee seh: “Ih reeli help mi fi reed di Baibl ahn meditayt pan it ahn fi reed di laif stoari a Jehoava servant dehn weh gaahn chroo simila sichuwayshan.” Sohn Kristyanz memoraiz skripchaz weh gi dehn lata komfert, laik Psalm 27:10 an Isaiah 41:10. Adaz laik lisn tu di aadyo rikaadn a di Baibl er di rikaadn a di mateeryal weh dehn yooz fi pripyaa fi di meetin dehn, ahn dat help dehn fi noh feel soh loanli.

9. How yoo benifit wen yu goh da meetin?

⁹ Du yu bes fi goh da meetin regyula. Di meetin proagram wahn inkorij yu, ahn yu wahn ku geh fi noa yu bradaz ahn sistaz. (Heeb. 10:24, 25) Massiel, weh wi mi menshan erliya, seh: “Eevn doa Ai mi reeli shai, Ah mi mek op mi main fi goh da evri singl kangrigayshan meetin ahn fi gi wahn koment. Dis mi help mi fi feel kloasa tu mi bradaz ahn sistaz eena di kangrigayshan.”

10. Wai ih impoatant fi mek frenz wid bradaz ahn sistaz eena di kangrigayshan?

¹⁰ Mek frenz wid bradaz ahn sistaz eena di kangrigayshan. Mek frenz wid peepl eena di kangrigayshan weh yu ku laan fram, eevn if dehn oalda er yonga dan yoo er if dehn kohn fahn wahn difrent kolcha. Di Baibl rimain wi dat oalda peepl ga moa wizdom. (Job 12:12) Oalda bradaz ahn sistaz eena di kangrigayshan  ku laan fahn faytful yonga bradaz ahn sistaz tu. Dayvid mi moch yonga dan Janatan, bot dat neva stap dehn fahn bee kloas frenz. (1 Sam. 18:1) Dayvid ahn Janatan mi help wan anada fi serv Jehoava eevn wen dehn mi-di goh chroo haad taimz. (1 Sam. 23:16-18) Irina, wahn sista weh da di onli Witnis eena ih famili, seh: “Wi bradaz ahn sistaz ku reeli bee laik wi spirichwal ma er pa, er wi spirichwal brada er sista. Jehoava ku yooz dehn fi bee fi wee famili.”

11. Weh yu need fi du if yu waahn bee kloas frenz wid bradaz ahn sistaz eena di kangrigayshan?

¹¹ Ih noh mait eezi fi mek nyoo frenz, espeshali if yu shai. Ratna da wahn shai sista weh mi kohn eena di chroot eevn doa ada peepl mi chrai stap ahn. Shee seh: “Ai mi haftu aksep dat Ai mi need di help ahn sopoat a mi bradaz ahn sistaz eena di kangrigayshan.” Ih noh aalwayz eezi fi taak tu sombadi bowt how yu reeli feel, bot if yu du dat, da persn ku en op di bee wan a yu kloasis fren. Yu frenz waahn inkorij ahn sopoat yu, bot yoo haftu tel dehn how dehn ku du dat.

12. How di preechin werk ku help yu mek gud frenz?

¹² Wan a di bes wayz fi mek frenz da fi preech wid wi bradaz ahn sistaz. Memba Carol? Shee seh: “Ai mek lata gud frenz wen Ah preech wid sistaz eena di kangrigayshan ahn wen Ah spen taim wid dehn di du ada tingz eena Jehoava servis. Jehoava yooz dehndeh frenz fi help mi oava di yaaz.” Ih aalwayz gud fi mek frenz wid faytful bradaz ahn sistaz. Jehoava ku yooz dehndeh saym frenz fi help wi wen wi feel diskorij er wen wi feel loanli.—Prov. 17:17.

13. Weh rispansabiliti evribadi eena di kangrigayshan gat?

¹³ Evribadi eena di kangrigayshan ga di rispansabiliti fi mek ih bee wahn lovin ahn peesful plays wehpaat nobadi feel loanli. (Jan 13:35) Weh wi du ahn weh wi seh ku inkorij adaz wahn lat! Wahn sista seh: “Ai mi geh wahn nyoo famili wen Ah mi laan di chroot. Ah kuda neva bee wan a Jehoava Witnisiz widowt di sopoat weh Ah get fahn mi bradaz ahn sistaz eena mi nyoo famili.” Weh yoo ku du fi help bradaz ahn sistaz weh noh ga no famili eena di chroot? How yoo ku help dehn feel di lov weh di bradaz ahn sistaz eena di kangrigayshan ga fi dehn?

14. Weh yoo ku du fi bee frenz wid peepl weh jos di staat kohn da meetin?

¹⁴ Chrai fi bee frenz wid peepl weh jos di staat kohn da meetin. Wi ku bee kain tu dehn ahn welkom dehn tu di kangrigayshan. (Roam. 15:7) Bot wi waahn du moa dan jos hayl dehn; wi waahn mek wi frenship groa. Soh bee kain tu dehn ahn shoa dehn dat yu reeli kay bowt dehn ahn dat yu waahn andastan weh dehn di goh chroo. Bot noh intafyaa eena dehn bizniz. Ih mait bee haad fi mek dehn tel yu how dehn feel, soh noh chrai foas dehn fi ansa yu. Rada, bee kain tu dehn ahn bee kyaaful wid di kaina kweschanz weh yu aks dehn. Ahn bee payshent ahn lisn tu dehn wen dehn ansa yu. Fi egzampl, yu ku aks dehn how dehn geh fi noa bowt di chroot.

15. How machoar Kristyanz ku help adaz eena di kangrigayshan?

¹⁵ Wen machoar Kristyanz, espeshali di eldaz, shoa dat dehn kay bowt di bradaz  ahn sistaz eena di kangrigayshan, evribadi fayt wahn geh schranga. Melissa ma mi rayz shee eena di chroot. Melissa seh: “Lata di bradaz eena di kangrigayshan mi chreet mi laik Ai da-mi dehn oan daata. Enitaim Ah mi need wahn spirichwal pa, Ah mi ga sombadi fi taak tu.” Wahn yong brada weh naym Mauricio mi feel sad ahn loanli wen ih Baibl teecha mi lef di chroot. Mauricio seh: “Di eldaz mi shoa dat dehn kay bowt mi ahn dat mi help mi wahn lat. Dehn mi taak tu mi aal di taim. Dehn gaahn owt wid mi pahn feel servis ahn dehn shayr som a di spirichwal chrezhaz weh dehn fain eena dehn persnal Baibl stodi wid mi. Wi mi ga lata fon tugeda.” Melissa ahn Mauricio di serv Jehoava ful-taim.

16-17. Wat els wi ku du fi help adaz?

¹⁶ Du weh yu kud fi help adaz. (Gal. 6:10) Wahn mishineri weh naym Leo serv da wahn plays weh deh faar fahn ih famili. Hihn seh: “Lata taim aal yu need fi du da shoa sohn kainis da di rait taim. Ah memba wan day Ah mi get eena wahn kaar aksident. Ahn bai di taim Ah reech hoam, Ai mi schres owt. Bot den wahn kopl mi invait mi oava fi wahn lee meel. Ai noh memba weh wi mi eet, bot Ah doo memba dat dehn mi kain ahn dat dehn mi lisn tu mi. Ai mi feel moch beta afta dat!”

¹⁷ Aala wi injai di asembli ahn kanvenshan dehn bikaaz wi geh fi spen taim wid wi bradaz ahn sistaz ahn wi geh fi diskos di difrent taak dehn weh wi mi hyaa. Bot, Carol, weh wi menshan erliya, seh dat shee feel veri loanli da di asembli ahn kanvenshan dehn. Wai? Ih seh: “Eevn doa Ah deh wid honjridz er eevn towznz a bradaz ahn sistaz, moas a dehn dehdeh wid dehn famili. Soh wen Ai si dehn, Ai feel veri loanli.” Adaz fain it haad fi goh da wahn asembli er wahn kanvenshan fi di fers taim afta dehn hozban er dehn waif ded. Yoo noa sombadi weh deh eena wahn sichuwayshan laik dat? Ih wuda nais if yoo ahn yu famili invait wahn brada er sista weh di goh chroo sohnting laik dat fi goh wid unu da di neks asembli er kanvenshan.

18. How 2 Korintyanz 6:11-13 ku help wi wen wi di spen taim wid wi bradaz ahn sistaz?

 ¹⁸ Spen taim tugeda. Chrai fi spen taim wid difrent bradaz ahn sistaz, espeshali dehn wan weh mait feel loanli. Wi waahn “oapm op [wi] haat” tu wi bradaz ahn sistaz weh feel loanli. (Reed 2 Korintyanz 6:11-13.) Melissa, weh wi mi menshan erliya, seh: “Wi mi aalwayz hapi wen bradaz ahn sistaz invait wi fi goh da dehn hows ahn spen taim wid dehn ahn dehn famili. Er wen dehn invait wi fi goh pahn wahn chrip wid dehn.” Yoo ku tink bowt enibadi eena fi yoo kangrigayshan weh wuda benifit if yu spen taim wid dehn laik dat?

19. Wen wi bradaz ahn sistaz mait reeli need wi fi spen taim wid dehn?

¹⁹ Dehn mait ga sertn taimz wen wi bradaz ahn sistaz reeli need wi fi spen taim wid dehn. Som a dehn mait fain it haad fi deh rong famili weh da noh Witnisiz wen dehn di selibrayt sertn haliday. Adaz mait feel reeli sad pahn sertn dayz laik di aniversri a di det a sombadi weh dehn lov. Wen wi aafa fi spen taim wid bradaz ahn sistaz weh di goh chroo tingz laik dat, wi shoa dehn dat wi reeli kay bowt dehn.”—Fil. 2:20.

20. How Jeezas werdz da Machyu 12:48-50 ku help wi wen wi feel loanli?

²⁰ Dehn ga lata reezn wai wahn Kristyan mait feel loanli sohntaim. Bot wi mos neva ferget dat Jehoava andastan how wi feel. Lata taim hihn yooz wi bradaz ahn sistaz fi gi wi weh wi need. (Reed Machyu 12:48-50.) Wee ku shoa Jehoava dat wi apreeshiayt di kangrigayshan wen wi du wi bes fi help wi bradaz ahn sistaz. Noh mata how wi mait feel sohntaim, wi neva deh bai wiself bikaaz Jehoava aalwayz deh wid wi!