Paal mi rait: “Ai ded az faar az di Laa kansaan, bot bikaaz a dat Ai liv fi Gaad.”—Gal. 2:19.

Faals teechaz mi-di chrai chaynj di tinkin a som a di Kristyanz eena di difrent kangrigayshanz da Galaysha. Dehn mi-di teech dat fi geh sayv, peepl mi haftu fala Moaziz Laa, inkloodin di laa pahn serkomsizhan. Bot Paal mi noa dat peepl neva haftu geh serkomsaiz fi serv Gaad nohmoh. Paal mi rait dis vers az paat a wahn eksplanayshan weh proov dat dehndeh faals teechinz mi rang. Dis mi help di bradaz ahn sistaz fi ga schranga fayt eena di ransom sakrifais a Jeezas Krais.—Gal. 2:4; 5:2.

Di Baibl seh dat wen sombadi ded, dehn noh noa notn ahn notn weh hapm rong dehn kud afek dehn. (Eccl. 9:5) Wen Paal mi seh: “Ai ded az faar az di Laa kansaan,” hihn mi-di seh dat hihn neva deh anda Moaziz Laa nohmoh; di Laa neva ga no powa oava hihn. Rada, Paal mi noa dat bikaaz hihn mi ga fayt eena di ransom sakrifais, hihn mi-di “liv fi Gaad.”

Di Laa mi chaynj Paal sichuwayshan. How? Hihn mi jos eksplayn dat “wahn persn noh raichos sayka weh ih fala di Laa, bot ih raichos sayka weh ih ga fayt eena Jeezas Krais.” (Gal. 2:16) Bot di Laa mi did du sohnting impoatant. Paal mi tel di Galayshanz: “Gaad mi gi di Laa soh dat peepl ku noa wat da sin, ahn da Laa mi fi deh til di disendant weh Gaad mi pramis kohn.” (Gal. 3:19) Yes, di Laa mi mek it klyaa dat hyoomanz sinful ahn noh perfek, soh dehn kuda neva kip di Laa eena wahn perfek way ahn dat dehn mi reeli need wahn perfek sakrifais. Soh di Laa mi help peepl fi si dat Jeezas da-mi “di disendant” weh Gaad mi pramis. If wi ga fayt eena Jeezas Krais, den wi ku bee raichos fronta Gaad. (Gal. 3:24) Sayka di Laa, Paal mi aksep ahn shoa fayt eena Jeezas. Soh den, Paal mi “ded az faar az di Laa kansaan,” an ih mi staat tu “liv fi Gaad.” Di Laa neva ga powa oava hihn nohmoh, bot Gaad mi ga powa oava hihn.

Noatis how Paal mi eksplayn da aidyaa eena di leta weh ih mi rait tu di Kristyanz da Roam. Ih mi seh: “Mi bradaz, unu mi deh anda di Laa tu bot bikaaz a di sakrifais a di Krais, unu noh deh anda di Laa nohmoh. . . . Wi free fahn di Laa.” (Roam. 7:4, 6) Soh dat meenz dat wen Paal mi seh “Ai ded az far az di Laa kansaan,” da Galayshanz 2:19, hihn neva meen dat hihn mi ded bikaaz di Laa kandem hihn az wahn sina. Rada, hihn mi-di seh dat hihn mi free fahn di Laa. Di Laa neva ga powa oava hihn er eni ada Kristyan weh mi ga fayt eena Krais ransom sakrifais.