STODI AATIKL 27
“Hoap Eena Jehoava”
“Hoap eena Jehoava; ga korij ahn bee schrang.”—PS. 27:14.
SANG 128 Stay Faytful Dong tu di En
WEH WI WAHN DISKOS? *
1. (a) Weh hoap Jehoava gi wi? (b) Weh ih meen fi “hoap eena Jehoava”? (Koment pahn di futnoat.)
JEHOAVA giv evribadi weh lov hihn wahn byootiful hoap. Soon hihn wahn geh rid a siknis, payn, ahn det. (Rev. 21:3, 4) Hihn wahn help “di hombl” wan dehn weh ga hoap eena hihn fi mek di ert bee wahn paradais. (Ps. 37:9-11) Ahn hihn wahn mek it pasabl fi mek eech wan a wi ga wahn kloas ahn persnal rilayshanship wid hihn; wahn kaina rilayshanship weh eevn beta dan weh wi injai rait now. Dat da wahn wandaful hoap fi chroo! Wai wi ku bee shoar dat Jehoava pramis dehn wahn kohn chroo? Bikaaz Jehoava aalwayz du weh ih seh ih wahn du, ahn dat da wai wi ku “hoap eena Jehoava.” * (Ps. 27:14) Wi shoa dat wi hoap eena Jehoava wen wi wayt wid payshens ahn wid jai fi mek ih pramis dehn kohn chroo.—Isa. 55:10, 11.
2. Weh Jehoava don du?
2 Jehoava don proov dat evriting weh hihn pramis kohn chroo. Mek wi kansida wahn egzampl. Eena di buk a Revilayshan, Jehoava mi pramis dat eena fi wee taim, hihn wuda bring tugeda wahn big krowd a peepl fahn owta aala di nayshan dehn ahn chraib ahn rays ahn peepl weh taak difrent langwij fi wership hihn tugeda. Tudeh, wi kaal dis groop a peepl di “big krowd.” (Rev. 7:9, 10) Eevn doa dis groop mek op a aal kaina man, uman, ahn pikni fahn aal rong di werl, dehn da wahn peesful ahn yoonaitid famili. (Ps. 133:1; Jan 10:16) Dehn wan weh da paat a di big krowd eega fi preech, ahn dehn aalwayz redi fi shayr dehn hoap bowt wahn beta werl wid evribadi weh waahn lisn. (Mach. 28:19, 20; Rev. 14:6, 7; 22:17) If yoo da paat a dis big krowd, den fi shoar dis hoap bowt wahn beta werl preshos tu yoo.
3. Weh Saytan waahn wi bileev?
3 Di Devl noh waahn mek yu ga wahn hoap fi di fyoocha. Hihn waahn mek yu bileev dat Jehoava noh kay bowt yu ahn dat hihn noh wahn kip ih pramis dehn. If wi bileev Saytan lai dehn, wi di mek ih geh rid a wi hoap, wi wahn looz korij, ahn wi mait eevn stap serv Jehoava. Az wi goh chroo dis aatikl, wi wahn si how di Devl mi chrai geh rid a Joab hoap ahn mek ih stap serv Jehoava.
4. Weh wi wahn laan eena dis aatikl? (Job 1:9-12)
4 Eena dis aatikl, wi wahn laan how Saytan mi chrai foas Joab fi stap bee faytful tu Jehoava. (Reed Job 1:9-12.) * Wi wahn aalso si weh wi ku laan fahn Joab egzampl ahn wai wi need fi memba dat Jehoava lov wi ahn dat Ih wahn mek evriting weh Ih pramis kohn chroo.
SAYTAN MI CHRAI GEH RID A JOAB HOAP
5-6. How Joab laif mi chaynj sodn-wan?
5 Joab mi ga wahn gud laif. Hihn mi ga wahn kloas frenship wid Jehoava. Hihn mi ga wahn big hapi famili, an ih mi veri rich. (Job 1:1-5) Bot eena jos wan day, hihn mi looz nayli evriting weh ih mi gat. Fers, ih mi looz aala ih animal dehn. (Job 1:13-17) Den, aala ih chiljren mi ded. Tink bowt aala di sofarin Joab mi gaahn chroo. Wen wahn payrent looz wan a ih pikni, ih hert ahn wahn lat. Soh imajin how hert Joab an ih waif mi feel wen dehn mi fain owt dat aala dehn chiljren ded. Wi ku si wai Joab mi tayr ih kloaz ahn jrap pahn di grong!—Job 1:18-20.
6 Afta dat, Saytan mek Joab geh sik bad, ahn da siknis mi mek Joab feel shaym anaal. (Job 2:6-8; 7:5) Bifoa dat, peepl mi ga wahn lata rispek fi Joab; dehn wuda eevn goh tu hihn fi advais. (Job 31:18) Bot now, dehn nat eevn mi waahn goh kloas tu ahn. Ih oan breda dehn, ih fren dehn, an ih servant dehn mi abandan ahn!—Job 19:13, 14, 16.
Tudeh, lata bradaz ahn sistaz ku andastan how Joab mi feel wen ih mi fays seeryos chraiyalz (Paragraaf 7) *
7. (a) Akaadn tu Joab, wai hihn mi-di sofa, bot weh hihn mi rifyooz fi du? (b) Weh chraiyal wahn Kristyan mait fays weh simila tu weh deh eena di picha fi paragraaf 7?
7 Saytan mi waahn Joab bileev dat hihn mi-di sofa bikaaz Jehoava mi beks wid ahn. Dat da wai Saytan mek wahn schrang breez bloa dong Joab hows wail aala ih ten chiljren mi-di eet tugeda. (Job 1:18, 19) Hihn mi aalso mek faiya kohn dong fahn hevn ahn dischrai Joab animal dehn lang wid di servants weh mi-di tek kayr a di animal dehn. (Job 1:16) Bikaaz di schrang breez ahn faiya mi kohn dong fahn hevn, Joab mi tink dat Jehoava mi sen dehn ahn dat mi aalso mek Joab bileev dat Jehoava mi beks wid ahn. Bot stilyet, Joab neva taak bad bowt ih Pa weh deh da hevn. Joab mi noa dat aala di gud tingz weh hihn mi geh eena ih laif mi kohn fahn Jehoava. Soh dat da wai hihn mi figa dat if hihn kuda mi aksep di gud tingz, den ih shuda wilin fi aksep di bad tingz tu. Hihn mi seh: “Mek di naym a Jehoava kantinyu fi geh prayz.” (Job 1:20, 21; 2:10) Eevn doa Joab mi looz aala ih richiz, ih looz ih chiljren, an ih mi geh sik, hihn mi stay faytful tu Jehoava. Bot Saytan neva giv op, ih mi chrai sohnting els.
8. Wat els Saytan mi du tu Joab?
8 Afta dat, Saytan mi yooz chree man weh mi priten fi bee Joab fren fi mek ih feel wertles. Dehn man mi seh dat Joab mi-di sofa bikaaz hihn mi du wahn lata bad tingz. (Job 22:5-9) Dehn aalso mi-di chrai mek ih bileev dat noh mata humoch gud tingz Joab mi du, Jehoava neva kay bowt dat ataal. (Job 4:18; 22:2, 3; 25:4) Dehn mi-di chrai mek Joab tink dat Gaad noh lov ahn, dat Gaad noh kay bowt ahn, an dat no gud reezn deh wai hihn shuda serv Gaad. Di tingz weh dehn mi seh kuda mi mek Joab feel laik ih neva ga no hoap.
9. Weh mi help Joab fi ga korij ahn bee schrang?
9 Imajin dis. Joab di sidong monks di ashiz an ih deh eena lata payn. (Job 2:8) Ih soa-kaal fren dehn kip di seh dat hihn da noh wahn gud persn ahn dehn chrai dischrai ih repyutayshan. Joab mi don ga wahn lata tingz fi deel wid ahn pahn tap a dat, hihn mi haftu deel wid di sadnis weh ih feel bikaaz ih chiljren mi ded. At fers, Joab neva seh notn. (Job 2:13–3:1) If Joab soa-kaal frenz mi tink dat bikaaz ih neva seh notn ih mi meenz dat hihn mi wahn abandan Jehoava, den dehn mi rang. Afta wahn wail, Joab mi praabli rayz ih hed an ih mi luk pahn dehn ahn seh: “Ah noh wahn giv op mi laayalti eevn if Ah haftu ded!” (Job 27:5) Weh mi help Joab fi ga korij ahn bee schrang eevn doa ih mi-di sofa wahn lat? Eevn wen Joab mi feel reeli sad, hihn neva looz hoap dat fi hihn lovin Gaad wuda help ahn. Hihn mi noa dat eevn if ih mi ded, Jehoava wuda mi bring ahn bak tu laif.—Job 14:13-15.
HOW WI KU KAPI JOAB EGZAMPL?
10. Weh Joab stoari teech wi?
10 Joab stoari teech wi dat Saytan kyaahn foas nobadi fi abandan Jehoava ahn dat Jehoava si evriting weh hapm eena wi laif. Joab ekspeeryens ku aalso help wi fi ga wahn beta andastandin bowt di ishu weh Saytan bring op bowt Jehoava rait fi rool. Mek wi diskos som a di spesifik lesn dehn weh wi ku laan fahn Joab.
11. If wi kantinyu put wi chros eena Jehoava, weh wi ku bee shoar bowt? (Jaymz 4:7)
11 Joab mi proov dat if wi kantinyu chros eena Jehoava, wi ku fays eni chraiyal ahn stan op gens Saytan. If wi du dat, weh wahn hapm? Di Baibl pramis wi dat di Devl wahn ron weh fahn wi.—Reed Jaymz 4:7.
12. How di rezorekshan hoap mi mek Joab fayt geh schranga?
12 Wi need fi ga schrang fayt eena di rezorekshan hoap. Laik weh wi mi laan eena di laas aatikl, Saytan noa dat wi frayd fi ded soh hihn chrai yooz dat fi mek wi stap bee faytful tu Jehoava. Eena Joab kays, Saytan mi seh dat Joab wuda mi du eniting fi sayv ih laif, eevn if dat mi meen fi stap serv Jehoava. Saytan mi rang. Eevn wen Joab mi tink dat ih mi wahn soon ded, hihn mi stay faytful tu Jehoava. Wai hihn neva giv op? Bikaaz hihn mi chros dat Jehoava gud ahn bikaaz ih mi shoar dat Jehoava wuda set mataz schrayt eena di fyoocha. Joab mi ga fayt dat if Jehoava neva help ahn wen ih alaiv, Jehoava wuda mi rezorek ahn eena di fyoocha. Joab mi chros eena di rezorekshan hoap. If wee chros eena di rezorekshan hoap, den wee wahn ku stay faytful tu Jehoava eevn if wi fays det.
13. Weh wi ku laan fahn weh Saytan mi du tu Joab?
13 Wi need fi pay atenshan tu di difrent tingz weh Saytan mi yooz fi chrai mek Joab stap bee faytful tu Jehoava bikaaz Saytan chrai du di sayhn ting wid wee. Noatis weh Saytan mi seh bowt aal hyoomanz: “Wahn man [noh jos Joab] wahn giv op evriting weh ih gat fi sayv ih laif.” (Job 2:4, 5) Da laik if Saytan di seh dat wi noh reeli lov Jehoava Gaad ahn dat wi wahn abandan Ahn jos fi sayv wi laif. Saytan aalso seh dat Gaad noh lov wi ahn dat Hihn noh noatis evriting weh wi du fi pleez Ahn. Bikaaz wi noa di chriks weh Saytan yooz, wi noh wahn bileev ih lai dehn.
14. Weh wi ku laan bowt wiself fahn di chraiyalz weh wi fays? Yooz di egzampl eena di paragraaf.
14 Wi shuda yooz di chraiyalz weh wi fays az wahn apachooniti fi laan bowt wiself. Di chraiyalz weh Joab mi fays mi help ahn fi si ih weeknis dehn an ih help ahn fi karek dehn. Fi egzampl, hihn mi laan dat ih mi need fi bee moa hombl. (Job 42:3) Wi ku laan wahn lat bowt wiself wen wi di fays chraiyalz. Wahn brada weh naym Nikolay * mi geh put eena prizn eevn doa hihn mi ga sohn seeryos helt prablemz. Hihn seh: “Prizn da laik wahn eks-chray, bikaaz ih help wahn Kristyan fi si di kwalitiz weh ih need fi werk pan.” Wen wi fain owt wat da wi weeknis dehn, den wi ku werk haad fi fiks dehn.
15. Hoo wi shuda lisn tu, ahn wai?
15 Wi need fi lisn tu Jehoava ahn noh tu wi enimi dehn. Joab mi reeli lisn tu Jehoava wen Ih mi-di taak tu ahn. Gaad mi help Joab fi si humoch Hihn mi kay bowt ahn. In ada werdz, da laik if Jehoava mi-di tel ahn, ‘Yoo si humoch powa Ai ga wen yu luk pahn di tingz weh Ah mek? Ah si evriting weh hapm tu yu, yoo noh tink dat Ai ku tek kayr a yu?ʼ Bikaaz Joab mi hombl an ih mi shoa dat ih reeli graytful fi aala di gud tingz weh Jehoava du, ih seh: “Mi ayz dehn hyaa bowt yoo, bot now Ah di si yu wid mi oan too aiy.” (Job 42:5) Wen Joab mi seh dehndeh werdz, hihn praabli stil mi-di sidong monks di ashiz, ih badi mi ful op a soar, an ih mi sad bikaaz ih chiljren mi ded. Eevn soh, Jehoava mi mek Joab noa dat Ih lov ahn, an dat Ih mi pleez wid ahn.—Job 42:7, 8.
16. Akaadn tu Isaiah 49:15, 16, weh wi need fi memba wen wi di fays chraiyalz?
16 Tudeh, peepl mait insolt wi ahn chreet wi laik wi wertles. Dehn mait chrai dischrai wi repyutayshan ahn “tel aal kaina wikid lai” bowt wi ahn bowt Jehoava aaganaizayshan. (Mach. 5:11) Joab ekspeeryens teech wi dat Jehoava chros dat wi wahn stay laayal tu ahn eevn wen wi goh chroo chraiyalz. Jehoava lov wi an ih wahn neva abandan enibadi weh chros eena hihn. (Reed Isaiah 49:15, 16.) * Noh pay main tu no lai weh Gaad enimi dehn seh! Noatis weh hapm tu James, wahn brada fahn Turkey. Hihn an ih famili mi gaahn chroo sohn seeryos chraiyalz; hihn seh: “Wi mi riyalaiz dat if wi lisn tu di lai dehn weh peepl seh bowt Gaad servants, wi kuda mi feel diskorij. Soh wi disaid fi foakos pahn di Kingdom hoap ahn wi stay bizi di serv Jehoava. Dat mi help wi fi kip wi jai.” Wee lisn tu Jehoava jos laik Joab, ahn dat da wai di lai dehn weh wi enimiz seh noh dischrai wi hoap!
YU HOAP WAHN SCHRENTN YU
Jehoava mi bles Joab bikaaz ih mi stay faytful tu Ahn. Joab an ih waif mi ga wahn lang ahn hapi laif (Paragraaf 17) *
17. How di egzampl a di faytful man ahn uman dehn weh Heebrooz chapta 11 menshan ku help wi?
17 Joab da noh di onli servant a Jehoava weh mi ga korij ahn weh mi stay schrang wen ih mi-di goh chroo seeryos chraiyalz. Wen Paal mi rait ih leta tu di Heebrooz, hihn mi menshan sohn ada peepl weh mi stay faytful. Hihn mi seh dat dehn da wahn “big krowd a peepl weh da laik wahn big klowd.” (Heeb. 12:1) Aala dehn gaahn chroo sohn seeryos chraiyalz, bot dehn mi stay faytful tu Jehoava fi dehn hoal laif. (Heeb. 11:36-40) Yu tink dat dehn mi werk haad an indyoar fi notn? Af koars nat! Eevn doa dehn neva geh fi si Gaad pramis kohn chroo wen dehn mi alaiv, dehn mi kantinyu chros eena di hoap weh Jehoava mi gi dehn. Ahn bikaaz dehn mi shoar dat Jehoava mi pleez wid dehn, dehn mi kanfident dat dehn wuda mi si di pramis dehn kohn chroo. (Heeb. 11:4, 5) Fi dehn egzampl ku help wi mek op wi main fi kantinyu chros eena Jehoava.
18. Weh yu mek op yu main fi du? (Heebrooz 11:6)
18 Tudeh wi di liv eena wahn werl weh di goh fahn bad tu wers. (2 Tim. 3:13) Saytan stil di put Gaad peepl tu di tes. Mek wi mek op wi main fi werk haad fi Jehoava noh mata weh chalenjiz wi mait fays eena di fyoocha. Ahn wi fi bee kanfident dat wi di “put wi chros eena wahn livin Gaad.” (1 Tim. 4:10) Ahn memba, di blesin weh Gaad mi gi Joab proov dat “Jehoava ful a mersi ahn kompashan.” (Jay. 5:11) Mek wi bee laik Joab ahn mek op wi main fi stay laayal tu Jehoava bikaaz wi ku bee shoar dat Hihn wahn bles “di wan dehn weh di chrai dehn bes fi du ih wil.”—Reed Heebrooz 11:6.
SANG 150 Luk tu Gaad fi Salvayshan
^ Wen wi tink bowt sohnbadi hoo mi gaahn chroo sohn tof sichuwayshanz, wi yoozhwali tink bowt Joab, noh chroo? Weh wi ku laan fahn da faytful man ekspeeryens? Wi laan dat Saytan kyaahn foas nobadi fi abandan Jehoava. Wi aalso laan dat Jehoava aalwayz noa evriting weh hapm tu wi. Ahn jos laik how Jehoava mi en aala Joab chraiyalz, wan day hihn wahn en aala fi wee sofarin tu. If wee shoa eena di ting dehn weh wi du dat wi bileev dis, den wi da laik dehn wan weh “hoap eena Jehoava.”
^ WEH IH MEEN? Di Heebroo werd fi “hoap” meen dat yu reeli kyaahn “wayt fi” mek sohnting hapm. Ih aalso meen dat wi chros sohnbadi er pen pan ahn.—Ps. 25:2, 3; 62:5.
^ Job 1:9-12: “Den Saytan tel Jehoava: ‘Yu tink dat da jos fi notn Joab fyaa yoo? 10 Da neva yoo put wahn fens rong ahn, ih hows, an evriting weh ih gat? Yu don bles evriting weh ih du, an ih ga lata animal aal oava di lan. 11 Bot, jos fi wahn chaynj, schrech owt yu han ahn schraik evriting weh ih gat, ahn yu wahn si how ih kers yu ahn ton ih bak pahn yu.ʼ 12 Deh Jehoava mi tel Saytan: “Evriting weh hihn ga deh eena yu kanchroal. Jos noh hert hihn! Soh Saytan gaahn fahn fronta Jehoava.””
^ Som a di naym dehn chaynj.
^ Isaiah 49:15-16: “Yu tink wahn uman ku faget ih oan baybi, ahn noh ga no kompashan fi ih oan son weh kohn fahn ih beli? An eevn if dat hapm, Ai wahn neva faget yu. 16 Ah rait dong yu naym pahn di paam a mi han dehn. Yu waal dehn aalwayz deh fronta mi.”
