1. Weh Jehoava pramis tu peepl weh sin ahn ripent fi weh dehn du?

 EEVN doa Jehoava da wi Kriyayta, wi Joj, ahn di Wan weh gi wi laa, hihn da aalso wi lovin hevnli Faada. (Ps. 100:3; Isa. 33:22) Wen wi sin gens Jehoava ahn wi ripent fi weh wi du, hihn noh onli ga di atariti fi fergiv wi bot ih aalso ga di dizaiya fi fergiv wi. (Ps. 86:5) Jehoava mi yooz di prafit Aizaiya fi rait dehnya komfertin werdz: “Eevn if wi sin dehn brait red laik wahn pees a red klaat, dehn wahn ton wait laik snoa.”—Isa. 1:18.

2. Weh wi shuda du if wi waahn liv eena pees wid adaz?

² Sins wi noh perfek, aala wi seh er du tingz weh ofen adaz. (Jay. 3:2) Dat noh meenz dat wi kyaahn bee gud frenz wid adaz. Wi ku ga wahn gud rilayshanship wid adaz if wi laan fi fergiv. (Prov. 17:9; 19:11; Mach. 18:21, 22) Wen wi hert wan anada, laik bai di tingz weh wi seh er du, Jehoava waahn fergiv wan anada. (Kol. 3:13) Wee ga gud reezn fi du dat. Wai? Bikaaz Jehoava fergiv “eena wahn big way.”—Isa. 55:7.

3. Weh wi wahn laan eena dis aatikl?

³ Eena dis aatikl, wi wahn laan how hyoomanz ku kapi Jehoava egzampl ahn fergiv adaz. Weh kaina sinz di eldaz need fi noa bowt? Wai Jehoava waahn wi fergiv adaz?  Weh wi ku laan fahn bradaz ahn sistaz hoo sofa bikaaz adaz seh er du sohnting weh hert dehn?

4. (a) Weh wahn servant a Jehoava sopoas tu du if ih komit wahn seeryos sin? (b) Wat da di rispansabiliti a di eldaz wen dehn taak tu sohnbadi weh komit wahn seeryos sin?

⁴ Wi shuda tel di eldaz wen sohnbadi komit wahn seeryos sin. Wi ku fain wahn lis a dehnya sinz da 1 Korintyanz 6:9, 10. Wen sohnbadi komit wahn seeryos sin, dehn reeli goh gens Gaad laa. If wahn servant a Jehoava komit dehndeh kaina sin, ih haftu pray tu Jehoava an aks ahn fi fergivnis, an ih haftu taak tu di eldaz eena di kangrigayshan. (Ps. 32:5; Jay. 5:14) Wat da di eldaz rispansabiliti? Jehoava da di onli wan weh ga di ful atariti fi fergiv sinaz, weh onli pasabl kaaz a di ransom sakrifais. * Bot hihn chros di eldaz fi yooz di Baibl fi disaid weda wahn sina ku stay eena di kangrigayshan er nat. (1 Kor. 5:12) Di eldaz ku yooz wahn lis a kweschanz fi fain owt if wahn persn reeli sari fi weh ih du, som a dehnya kweschan da: Di persn mi plan fi sin? Di persn mi chrai haid di sin fahn ada peepl? Di persn mi komit di seeryos sin oava ahn oava fi wahn wail? Bot moas impoatant, dehn ga eni proof weh shoa dat di persn rigret weh ih du ahn dat ih reeli waahn fiks ih rilayshanship wid Jehoava? Dehn ga eni proof dat Jehoava don fergiv ahn?—Aks 3:19.

5. How di hoal kangrigayshan benifit wen di eldaz chrai fi help sohnbadi weh komit wahn sin?

⁵ Wen di eldaz taak tu di persn weh komit wahn seeryos sin, fi dehn goal da fi mek di saym disizhan weh Jehoava don mek da hevn. (Mach. 18:18) How di disizhan weh di eldaz mek benifit di kangrigayshan? Ih protek di kangrigayshan fahn daynja an ih mek shoar dat di persn weh noh ripent fi weh ih du noh stay an afek di res a di kangrigayshan. (1 Kor. 5:6, 7, 11-13; Taitos 3:10, 11) Ih ku aalso help di sina fi ripent fi weh ih du ahn geh Jehoava fergivnis. (Look 5:32) Di eldaz pray wid di persn hoo sari fi weh ih du ahn dehn aks Jehoava fi help di persn fiks bak ih rilayshanship wid Ahn.—Jay. 5:15.

6. If wahn persn geh disfeloship, ih stil pasabl fi mek Jehoava fergiv ahn? Pleez eksplayn yu ansa.

⁶ Wat if wahn persn weh komit wahn seeryos sin noh sari fi weh ih du wen ih taak tu di eldaz? Den, eena da kays, ih wahn geh disfeloship fahn di kangrigayshan. If di persn brok wan a di laaz fahn di konchri wehpaat ih liv, di eldaz noh wahn protek ahn. Ih wahn haftu pay fi weh ih du. Noh mata if di persn sari fi weh ih du er nat, Jehoava alow di govament dehn fi joj er ponish enibadi weh brok di laa. (Roam. 13:4) Bot if laytaraan di persn riyalaiz dat weh ih mi du mi rang, ih feel sari fi weh ih mi du, an ih chaynj di way how ih tink an ak, Jehoava wahn redi fi fergiv ahn. (Look 15:17-24) Jehoava wahn fergiv ahn eevn if ih komit wahn veri seeryos sin.—2 Chron. 33:9, 12, 13; 1 Tim. 1:15.

7. Weh ih meen fi fergiv sohnbadi weh sin gens wi?

⁷ Ih gud fi noa dat non a wee, inkloodin di eldaz, haftu persnali disaid if sohnbadi weh sin dizerv fergivnis, da Jehoava mek da disizhan! Bot dehn ga sohnting  weh wi doo need fi disaid. Sohntaim, wahn persn mait sin gens wi ahn tel wi dehn sari an aks wi fi fergivnis. Bot sohn ada taim, dehn mait noh eevn seh sari er aks fi fergivnis. Stilyet, wee ku chooz fi fergiv di persn ahn chrai noh stay beks. Wi haftu werk haad fi du dat, an ih mait tek wahn lata taim espeshali if di persn mi reeli hert wi. Di Septemba 15, 1994 Watchtower seh: “Wen yu fergiv sohnbadi weh sin gens yu, ih noh meenz yu pleez wid weh dehn du. Wahn Kristyan weh fergiv, chros dat Jehoava wahn joj di mata eena wahn perfek way. Hihn da di onli perfek Joj eena di hoal yoonivers, ahn hihn wahn mek shoar dat wi geh jostis da di rait taim.” Wai Jehoava inkorij wi fi fergiv, ahn wai ih waahn wi chros dat hihn wahn joj di mata eena wahn fyaa way?

8. Weh wi du fi shoa dat wi tankful fi di lata taimz Jehoava don fergiv wi?

⁸ Wen wi fergiv adaz, wi shoa dat wi tankful fi di lata taim Jehoava don fergiv wi. Eena wan a Jeezas iloschrayshan, hihn mi kompyaa Jehoava tu wahn maasta weh mi tel ih slayv dat ih neva need fi pay bak di big amonk a moni weh ih mi oa ahn. Bot wen sohnbadi els mi oa da saym slayv wahn smaala amonk a moni, hihn neva shoa ahn mersi. (Mach. 18:23-35) Weh Jeezas mi-di teech wi? If wi fergiv adaz, wi shoa dat wi reeli tankful fi di lata taim Jehoava don fergiv wi. (Ps. 103:9) Yaaz agoa, Di Wachtowa mi seh: “Noh mata humoch taim wi fergiv adaz, ih kuda neva mach op wid di amonk a taim Jehoava fergiv eech wan a wi bays pahn di ransom sakrifais a Krais.”

9. Hoo Jehoava shoa mersi tu? (Machyu 6:14, 15)

⁹ If wee fergiv adaz, den Jehoava wahn fergiv wi. Jehoava shoa mersi tu dehn wan weh shoa mersi tu adaz. (Mach. 5:7; Jay. 2:13) Jeezas mi mek dat klyaa wen ih mi teech ih disaipl dehn how fi pray. (Reed Machyu 6:14, 15.) Wi laan sohnting simila fahn weh Jehoava mi tel ih servant Joab. Joab mi sofa ahn feel hert bikaaz a weh Elifaz, Bildad, ahn Zoafar mi tel ahn. Bot Jehoava mi tel Joab fi pray fi dehn. Afta hihn mi du dat, Jehoava mi bles ahn.—Job 42:8-10.

10. How wi hert wiself wen wi stay beks wid sohnbadi? (Ifeezhanz 4:31, 32)

¹⁰ Wen wi stay beks wid adaz, wi onli di hert wiself. Jehoava waahn wi geh rid a anga bikaaz hihn waahn wi ga pees. (Reed Ifeezhanz 4:31, 32.) Hihn tel wi fi “let goh [wi] anga ahn noh hoal aan tu it.” (Ps. 37:8) If wi fala da advais, ih wahn help wi. Wai? Bikaaz wen wi stay beks wid sohnbadi weh hert wi, wi onli di damij wi fizikal ahn mental helt. (Prov. 14:30) Wen wi stay beks wid sohnbadi da laik wi di jrink paizn; wi onli di hert wiself. Bot if wi fergiv da persn, da laik if wi di gi wiself wahn gif. (Prov. 11:17) Wi wahn ga pees, ahn wi wahn ku kantinyu serv Jehoava.

11. Weh di Baibl seh bowt tek rivenj gens sohnbadi? (Roamanz 12:19-21)

¹¹ Venjans bilangz tu Jehoava. Jehoava noh gi wi di atariti fi tek rivenj gens sohnbadi weh seh er du sohnting weh hert wi. (Reed Roamanz 12:19-21.) Sins wi noh perfek ahn wi noh ga aala di faks, wi kyaahn joj wahn sichuwayshan di way how Gaad joj. (Heeb. 4:13) Sohntaim, wi feelinz ku mek it haad fi mek wi noa wat da di rait ting fi du. Jehoava mi mek  Jaymz rait dis: “Wen sombadi geh beks, ih noh du weh rait eena Gaad sait.” (Jay. 1:20) Wee ku chros dat Jehoava wahn du weh rait ahn hihn wahn tek kayr a mataz eena fi hihn oan taim.

12. How wi shoa dat wi chros eena Jehoava jostis?

¹² Wen wi fergiv, wi shoa dat wi chros eena Jehoava jostis. Wen wi lef mataz eena Jehoava han, wi shoa dat wi chros dat hihn wahn geh rid a aala di prablemz weh sin kaaz. Eena di nyoo werl, “wi noh wahn memba aala dehndeh tingz weh mi deh eena di paas ahn dehn noh wahn afek wi haat eeda.” (Isa. 65:17) Bot wen sohnbadi hert wi reeli bad, yu tink ih pasabl fi stap bee beks wid da persn ahn noh hoal malis? Mek wi laan bowt sohn peepl weh du dat.

13-14. Weh yu laan bowt fergivnis fahn Tony ahn José ekspeeryens?

¹³ Wahn lata wi bradaz ahn sistaz chooz fi fergiv adaz eevn wen adaz hert dehn reeli bad. Weh kaina blesinz dehn geh bikaaz dehn du dat?

¹⁴ Yaaz bifoa Tony, * weh liv da di Philippines, mi laan di chroot, hihn mi fain owt dat wahn man weh naym José mi kil wan a ih oalda breda. Bak den, Tony da-mi wahn vailent persn ahn hihn mi waahn tek rivenj. Dehn mi ares José ahn dehn put ahn eena prizn. Laytaraan, wen José mi kom owta prizn, Tony mi mek op ih main fi hont ahn dong ahn kil ahn. Hihn mi eevn bai wahn gon fi kil ahn wid. Meenwail, doh, Tony mi staat tu stodi di Baibl wid di Witnisiz. Hihn seh: “Mi Baibl stodi mi help mi fi si dat Ah mi need fi chaynj mi wayz, ahn dat mi inklood fi let goh aala di anga weh Ah mi ga.” Afta sohn taim, Tony mi geh baptaiz. Wahn wail afta dat, hihn mi staat tu serv az wahn elda eena di kangrigayshan. Jos imajin how hihn mi feel wen ih mi fain owt dat José mi aalso geh baptaiz ahn dat ih mi-di serv Jehoava! Wen Tony ahn José mi meet, dehn hog eech ada, ahn Tony mi tel José dat ih mi fergiv ahn. Tony seh dat wen ih mi fergiv José, hihn mi feel soh hapi dat ih kudn eevn  diskraib how gud ih mi feel. Ih klyaa fi si dat Jehoava mi bles Tony bikaaz hihn mi wilin fi fergiv.

15-16. Weh yu mi laan bowt fergivnis fahn Peter ahn Sue ekspeeryens?

¹⁵ Eena 1985, Peter ahn Sue mi deh da wahn meetin da di Kingdom Haal wen sodn-wan wahn big eksploazhan hapm. Wahn man, hoo da neva wahn Witnis, mi put wahn bom eensaida di Kingdom Haal! Sue too aiy an ayz mi geh hert reeli bad. Shee mi aalso looz ih sens a smel. * Peter ahn Sue mi kip di aks dehnself: ‘Weh kaina persn wuda du sohnting soh eevl?ʼ Yaaz layta, dehn mi ares di man weh mi put di bom eena di Kingdom Haal ahn dehn sentens ahn tu laif eena prizn. Wen peepl aks Peter ahn Sue if dehn fergiv di man, dehn seh: “Jehoava teech wi dat wen wi kantinyu fi tink bowt wi payn ahn wi anga, ih ku hert wi eena wahn fizikal, imoashanal, ahn mental way. Soh afta di eksploazhan, wi mi aks Jehoava fi help wi fergiv soh dat wi kuda ga pees eena wi laif.”

¹⁶ Yu tink ih mi aalwayz eezi fi mek dehn fergiv di man ahn noh stay beks wid ahn? No. Dehn seh: “Now an agen wen Sue ga payn, wi feel beks aal oava agen. Bot wi noh kip di tink bowt it, soh dehndeh feelinz wuda goh weh kwik-wan. Az a mata a fak, wi ku aanisli seh dat if wan day di man geh fi bee wi brada, wi wahn welkom ahn. Dis ekspeeryens teech wi dat Baibl prinsiplz reeli help wi bikaaz dehn set wi free fahn wahn lata tingz! Wi aalso geh komfert bikaaz wi noa dat soon Jehoava wahn geh rid a evriting weh bring wi payn.”

17. Weh yu laan bowt fergivnis fahn Myra ekspeeryens?

¹⁷ Myra mi laan di chroot afta ih mi marid an ih mi ga too smaal pikni. Fi shee hozban neva kom eena di chroot. Ahn laytaraan, hihn mi cheet pan ih waif  an ih mi abandan shee ahn dehn too lee pikni. Myra seh: “Wen mi hozban mi abandan wi, Ah mi feel terabl, Ah mi eena shak, an Ah kudn bileev it. Ah mi sad an Ah mi ga lata anga. Ah mi blaym miself fi weh hapm.” Eevn doa dehn mi en op di geh wahn divoas, shee mi stil feel di payn bikaaz fi shee hozban mi bichray ahn. Myra seh: “Dehndeh feelinz mek Ah feel kanfyooz fi monts, den Ah staat tu noatis dat dis mi-di afek mi rilayshanship wid Jehoava ahn wid adaz.” Myra seh dat shee noh beks wid ih eks-hozban nohmoh, an ih noh waahn notn bad hapm tu ahn. Shee hoap dat wan day hihn wuda jraa kloas tu Jehoava. Bikaaz shee noh beks nohmoh, shee ku foakos pahn di fyoocha. Az wahn singl payrent, shee rayz ih too chiljren fi serv Jehoava. Tudeh, Myra hapi di serv Jehoava lang wid ih too son ahn fi dehn famili.

18. Weh wi ku bee shoar Jehoava wahn du az di Sopreem Joj?

¹⁸ Ih gi wi pees fi noa dat da noh wee wahn disaid how adaz shuda geh joj! Jehoava da di Sopreem Joj, soh hihn wahn bee di wan fi joj evribadi. (Roam. 14:10-12) Wi ku chros dat Jehoava wahn aalwayz yooz fi hihn perfek standadz a weh rait ahn rang fi joj peepl. (Gen. 18:25; 1 Ki. 8:32) Hihn wahn aalwayz du weh rait!

19. Weh Jehoava wahn du az di perfek Joj?

¹⁹ Wi di wayt fi di taim wen Jehoava wahn geh rid a evriting weh wi di goh chroo bikaaz a imperfekshan ahn sin. Wen dat hapm, aala wi fizikal an imoashanal payn wahn geh heel. (Ps. 72:12-14; Rev. 21:3, 4) Wi noh wahn memba dehn tingz nohmoh. Wail wi di wayt fi da wandaful taim fi kohn, wi soh tankful dat Jehoava gi wi di abiliti fi kapi fi hihn egzampl ahn bee wilin fi fergiv.