1. Wat da sohn kaman tingz weh mek wi feel frayd?

 MEK wi kansida sohn sichuwayshan weh sohn Witnisiz gaahn chroo. Nestor an ih waif, María, mi waahn goh serv wehpaat dehn mi need moa help. * Fi du dat, dehn mi haftu laan fi liv pahn les moni. Bot dehn mi frayd dat if dehn mi haftu liv pahn les moni, dehn neva mi wahn bee hapi. Wen Biniam mi geh baptaiz az wan a Jehoava Witnisiz eena wahn konchri wehpaat di govament deh gens wi werk, hihn mi riyalaiz dat az wan a Gaad peepl, hihn mi wahn fays persikyooshan. Dat mi mek ih feel frayd. Bot hihn mi eevn moa frayd fi noa how ih famili mi wahn riyak wen dehn fain owt bowt ih nyoo rilijan. Valérie mi ga wahn veri bad taip a kyansa, an ih mi haad fi mek shee fain wahn dakta weh wuda rispek ih disizhan weh bays pahn di Baibl fi noh tek blod. Wi ku andastan wai shee mi frayd dat ih mait ded.

2. Wai wi need fi werk haad fi noh bee frayd?

² Lata wi feel frayd jos laik dehn, noh chroo? Wi need fi werk haad fi noh ga da kaina fyaa bikaaz wi ku en op di mek bad disizhanz weh wahn afek wi rilayshanship wid Jehoava. Dat da egzakli weh Saytan waahnt. Hihn aalso yooz da kaina fyaa gens wi soh dat wi noh obay Jehoava laa dehn, inkloodin di koman fi preech di gud nyooz. (Rev. 12:17) Saytan wikid, kruwil, ahn powaful. Bot yu ku stil protek yuself fahn hihn. How yu ku du dat?

3. Weh wahn help wi fi noh bee frayd?

 ³ Wen wi kanvins dat Jehoava deh pahn wi said ahn dat ih lov wi, wi noh wahn frayd fi Saytan. (Ps. 118:6) Fi egzampl, di saamis weh mi rait Psalm 118 mi fays sohn tof sichuwayshan. Hihn mi ga wahn lata enimi ahn som a dehn da-mi impoatant peepl (vers 9, 10). Sohntaim hihn mi feel veri angshos (vers 13). An ih mi eevn geh schrang disiplin fahn Jehoava (vers 18). Bot stil, hihn mi seh eena wahn sang: “Ah noh wahn frayd fi notn.” Weh mi mek hihn feel soh sayf ahn sikyoar? Hihn mi noa dat eevn doa Jehoava mi disiplin ahn, ih hevnli Faada mi lov ahn wahn lat. Hihn mi kanvins dat noh mata weh sichuwayshan hihn wuda goh chroo, ih lovin Gaad mi wahn aalwayz redi fi help ahn.—Ps. 118:29.

4. If wi chros dat Gaad lov wi, weh wi noh wahn frayd fa?

⁴ Wi need fi bee kanvins dat Jehoava lov eech wan a wi. Wen wi kanvins bowt dis, ih wahn help wi fi noh (1) frayd dat wi wahn kyaahn provaid fi wi famili; (2) frayd fi weh peepl mait seh er du tu wi, ahn (3) frayd fi ded. Di bradaz ahn sistaz weh wi mi menshan eena di biginin a dis aatikl mi stap feel frayd bikaaz dehn mi kanvins dat Gaad mi lov dehn.

5. Weh kaina sichuwayshanz mait mek wahn famili hed wori wahn lat? (Koment pahn di picha pahn di kova.)

⁵ Di hed a wahn Kristyan famili tek ih rispansabiliti seeryos fi provaid fi ih famili. (1 Tim. 5:8) If yoo da di hed a yu famili, maybi joorin di pandemik yu mi-di wori dat yu wuda looz yu jab. Maybi yu mi-di wori dat ih mi wahn haad fi mek yu provaid food er wahn plays fi yoo ahn yu famili liv. Ahn yu mi aalso praabli frayd dat if yu mi looz yu jab, yu mi wahn kyaahn fain wahn neks wan. Er laik Nestor ahn María, weh wi mi menshan erliya, yu mait fain it haad fi kot bak pahn yu werk ahn liv pahn les moni. Saytan yooz dehndeh sichuwayshanz fi mek lata peepl wori ahn stap serv Jehoava.

6. Wat da sohn lai weh Saytan waahn mek wi bileev?

⁶ Saytan waahn mek wi bileev dat Jehoava noh kay bowt wi persnali ahn dat ih noh wahn help wi fi provaid fi wi famili. Ahn bikaaz a dat, wi mait feel laik wi need fi du evriting an eniting fi kip wi jab, eevn if da sohnting weh ku brok wi rilayshanship wid Jehoava.

7. Weh pramis Jeezas gi aala wi?

⁷ Jeezas noa ih Pa beta dan enibadi els, ahn hihn pramis wi dat fi wee Gaad “noa weh [wi] need eevn bifoa [wi] aks ahn.” (Mach. 6:8) Ahn Jeezas noa dat Jehoava waahn sopoat wi ahn gi wi weh wi need fi liv. Az Kristyanz, wee da paat a Gaad famili. Jehoava da fi wee famili Hed, ahn wee ku bee shoar dat hihn wahn du egzakli weh hihn tel aala di famili hed dehn fi du da 1 Timoti 5:8.

8. (a) Weh wahn help wi fi noh bee frayd dat wi mait kyaahn provaid fi wi famili? (Machyu 6:31-33) (b) How wi ku kapi di kopl eena di picha weh di shayr sohn food wid wahn sista?

⁸ Wen wi kanvins dat Jehoava lov wee ahn wi famili, wi noh wahn ga eni dowt dat wi wahn ga evriting weh wi need. (Reed Machyu 6:31-33.) Jehoava veri lovin ahn jenaros, an ih waahn tek kayr a wi, soh hihn wahn provaid wi wid weh wi need. Wen Jehoava mi mek di ert, hihn  neva onli gi wi weh wi need fi kantinyu liv, bot hihn mi mek wahn lata tingz pahn ert weh wi ku injai. (Gen. 2:9) Soh eevn if sohntaim wi jos ga di baysik tingz weh wi need ahn notn els, wi need fi memba dat di reezn wai wi ga dehndeh tingz da bikaaz Jehoava provaid it fi wi. (Mach. 6:11) Ih impoatant fi memba dat noh mata weh mateeryal tingz wi wuda giv op now da notn wen wi kompyaa it tu weh Jehoava wahn gi wi now an eena di fyoocha. Dat da weh Nestor ahn María mi geh fi andastan.—Isa. 65:21, 22.

9. Weh yu ku laan fahn Nestor ahn María egzampl?

⁹ Nestor ahn María mi ga wahn nais hows ahn di too a dehn mi ga wahn nais jab weh pay gud da Colombia. Dehn seh: “Wi mi-di tink bowt geh rid a som a di tingz weh wi oan ahn staat tu du moa eena di minischri, bot wi mi frayd dat if wi mi ga les moni wi noh mi wahn bee hapi.” Weh mi help dehn fi noh bee frayd fi goh hed wid dehn planz? Dehn meditayt pahn di lata wayz how Jehoava mi shoa dat ih lov dehn. Dehn mi kanvins dat Jehoava mi wahn aalwayz tek kayr a dehn, soh dehn kwit dehn jab, dehn sel dehn hows, ahn dehn moov tu wahn paat a di konchri wehpaat dehn mi need help eena di preechin werk. How dehn feel bowt di disizhan weh dehn mek? Nestor seh: “Wee si dat weh Machyu 6:33 seh da chroo. Wi ga evriting weh wi need fi liv ahn wi ga wahn hapiya laif now.”

10. Wai ih noh sopraiz wi fi noa dat hyoomanz frayd fi eech ada?

¹⁰ Fahn sins Adam ahn Eev ribel gens Jehoava, hyoomanz onli hert op eech ada. (Eccl. 8:9) Fi egzampl, peepl weh ga atariti abyooz dehn powa ahn chreet adaz bad, di kriminal dehn vailent tuwaadz ada peepl, di buli dehn da skool insolt op ahn chretn dehn klaasmayt, ahn sohn peepl kruwil tuwaadz dehn oan famili membaz. Soh ih noh sopraiz wi dat hyoomanz frayd fi eech ada! How Saytan chrai yooz dat gens wi?

11-12. Sins Saytan noa dat wi frayd fi weh peepl mait seh er du tu wi, how hihn yooz dat gens wi?

¹¹ Saytan chrai mek wi soh frayd a peepl dat wi wuda eevn stap preech ahn stap du ada tingz weh Jehoava tel wi fi  du. Saytan yooz di govament dehn fi ban wi werk ahn persikyoot wi. (Look 21:12; Rev. 2:10) Sins Saytan da di roola a dis werl, lata peepl spred aal kaina lai ahn stoari bowt Jehoava Witnisiz. Peepl weh bileev dehndeh lai tek wi mek papishoh er eevn chrai hert wi eena wahn fizikal way. (Mach. 10:36) Wi shudn bee sopraiz bai di chriks weh Saytan yooz. Hihn don mi-di yooz dehndeh chriks eena di fers senchri.—Aks 5:27, 28, 40.

¹² Saytan noh onli yooz di govament dehn weh deh gens wi fi mek wi feel frayd, bot hihn ga ada tingz weh ih yooz. Som peepl frayd fi weh dehn famili wahn tink wen dehn fain owt dat dehn waahn geh fi bee wahn Witnis. Sohntaim dis kaina fyaa wers dan if dehn wuda beet dehn op er chreet dehn bad. Bikaaz dehn lov dehn famili membaz wahn lat ahn dehn waahn dehn geh fi noa ahn lov Jehoava tu, dehn feel sad wen dehn hyaa dehn famili taak bad bowt Jehoava ahn fi hihn peepl. Bot sohntaim, dehndeh sayhn famili membaz weh mi deh gens dehn eena di biginin wuda staat serv Jehoava laytaraan. Weh wi wahn du if wi famili membaz noh waahn ga notn fi du wid wi bikaaz wi waahn serv Jehoava?

13. If wi kanvins dat Jehoava lov wi, how dat wahn help wi wen wi famili noh waahn ga notn fi du wid wi? (Psalm 27:10)

¹³ Wee ku geh wahn lata komfert fahn di byootiful werdz weh dehn eena Psalm 27:10. (Reed.) * Wen wi memba humoch Jehoava lov wi, wi noh wahn frayd fi weh wahn hapm, eevn if wi famili noh waahn ga notn fi du wid wi. Ahn wi kanfident dat Jehoava wahn bles wi bikaaz wi noh giv op. Jehoava da di onli wan weh wahn gi wi evriting weh wi need fi liv, hihn wahn help wi fi stay kaam ahn bee hapi, an ih wahn help wi fi stay kloas tu hihn. Biniam, weh wi mi menshan erliya, mi laan dis.

14. Weh wi laan fahn Biniam egzampl?

¹⁴ Biniam mi geh fi bee wahn Jehoava Witnis eevn doa hihn mi noa dat di govament eena fi hihn konchri mi-di persikyoot di Witnisiz. Hihn mi noa dat Jehoava lov hihn wahn lat ahn dat mi help ahn fi noh bee frayd fi weh peepl mait  seh er du tu ahn. How hihn mi du dat? Biniam seh: “Di persikyooshan mi wers dan Ah mi imajin. Bot Ah mi moa frayd fi mek mi famili deh gens mi dan fi fays persikyooshan fahn di govament. Ai mi frayd dat mi disizhan fi bee wan a Jehoava Witnisiz wuda disapoint mi pa weh da noh wahn Witnis ahn dat mi famili neva mi wahn rispek mi nohmoh.” Bot Biniam mi noa fi shoar dat Jehoava aalwayz tek kyaa a dehn wan weh Hihn lov. Biniam seh:“Ah mi tink bowt how Jehoava mi help adaz fi bayr op chroo haad taimz, chroo haychrid, ahn chroo persikyooshan. Ai mi noa dat if Ah stay faytful tu Jehoava, hihn mi wahn bles mi. Dehn ares mi an eevn beet mi op lata taim, bot Ah si fi miself how Jehoava aalwayz help wi if wi stay faytful tu Ahn.” Jehoava mi geh fi bee wahn reel Pa tu Biniam, ahn fi Hihn peepl mi proov fi bee wahn reel famili tu hihn tu.

15. Wai ih naamal fi frayd fi ded?

¹⁵ Di Baibl tel wi dat det da wahn enimi. (1 Kor. 15:25, 26) Wi mait feel reeli angshos jos di tink bowt det, espeshali if wahn famili memba er fren weh wi lov sik bad. Wai wi frayd fi ded, doh? Bikaaz Jehoava mek wi wid di dizaiya fi waahn injai laif fareva. (Eccl. 3:11) Bot how dis kaina fyaa ku help wi protek wi laif? Fi egzampl, ih ku help wi staat eet helti, du eksasaiz, ih ku help wi fi noh put wi laif eena daynja, ahn goh da dakta ahn tek medisn wen wi need it.

16. Sins Saytan noa dat wi frayd fi ded, how hihn yooz dat gens wi?

¹⁶ Saytan noa dat laif preshos tu wi. Bot hihn klaym dat wee wuda sakrifais evriting, eevn wi frenship wid Jehoava, jos fi sayv wi laif. (Job 2:4, 5) Weh Saytan seh rang! Bot bikaaz hihn da “di wan weh ku kaaz det,” hihn chrai yooz wi fyaa a det fi mek wi abandan Jehoava. (Heeb. 2:14, 15) Sohntaim, peepl weh Saytan di kanchroal chretn fi kil wi if wi noh giv op wi fayt. Er, Saytan mait si dat wi ga wahn medikal imerjensi ahn hihn mait chrai yooz dat fi mek wi abandan Jehoava. Sohn dakta er wi famili membaz weh noh serv Jehoava mait chrai presha wi fi tek blod, ahn dat goh gens Gaad laa. Er sohnbadi mait chrai kanvins wi fi aksep wahn chreetment weh goh gens Baibl prinsiplz.

17. Akaadn tu Roamanz 8:37-39, wai wi noh haftu frayd fi ded?

¹⁷ Eevn doa non a wi noh waahn ded, wi ku bee shoar dat Jehoava wahn neva stap lov wi eevn if dat wuda hapm. (Reed Roamanz 8:37-39.) Wen wan a Jehoava servants ded, hihn memba dehn jos laik if dehn stil alaiv. (Look 20:37, 38) Hihn eega fi bring dehn bak tu laif. (Job 14:15) Jehoava pay wahn hai prais soh dat wee ku ga di apachooniti fi “liv fareva.” (Jan 3:16) Wee noa humoch Jehoava lov ahn kay bowt wi. Soh insteda ton wi bak pahn Jehoava wen wi sik er wen wi laif geh chretn, wi goh tu Jehoava ahn chros dat hihn wahn gi wi komfert, wizdom, ahn schrent. Dis da egzakli weh Valérie ahn fi shee hozban mi du.—Ps. 41:3.

18. Weh yoo ku laan fahn Valérie egzampl?

¹⁸ Wen Valérie mi 35 yaaz oal, shee mi fain owt dat shee mi ga kyansa. Noatis how di lov weh Jehoava ga fi shee mi help ahn fi noh frayd fi ded. Shee seh: “Wen wi  mi fain owt dat Ah ga kyansa, mee ahn mi hozban kudn bileev it. Di daktaz mi tel mi dat fi mek Ah servaiv, Ah mi need fi tek wahn big serjri. Ah mi taak tu wahn lata dakta, bot non a dehn neva waahn du di serjri widowt blod chransfyoozhan. Ah mi fraitn no miks, bot bikaaz a Gaad koman bowt blod, Ah mi rifyooz fi tek it. Aal chroo mi laif, Jehoava shoa mi lata lov. Now da mi mai tern fi shoa Jehoava humoch Ai lov hihn. Evri taim Ah wuda geh bad nyooz, dat gi mi di schrent fi mek Jehoava prowd ahn fi proov dat Saytan laiyad. Di serjri gaahn gud ahn dehn neva yooz no blod. Eevn doa Ah stil ga helt prablemz, Jehoava aalwayz provaid weh wi need. Fi egzampl, da di kangrigayshan meetin weh wi mi ga pahn di weeken bifoa Ah mi fain owt dat Ah ga kyansa, wi mi diskos di aatikl ‘Meeting Todayʼs Adversities With Courage.ʼ * Dis aatikl mi komfert wi wahn lat. Wi reed it oava ahn oava. Wen wi reed difrent aatikl laik da wan ahn wi kantinyu fi du tingz laik preech ahn goh da wi meetinz, ih help wi fi stay kaam, fi stay balans, ahn fi mek gud disizhanz.”

19. Weh wahn soon hapm?

¹⁹ Kristyanz aal rong di werl di deel wid sohn tof sichuwayshanz, bot wid Jehoava help, dehn ku stan op gens di Devl. (1 Peet. 5:8, 9) Ahn yoo ku du dat tu. Soon, Jehoava wahn mek Jeezas ahn di 144,000 “dischrai evriting weh di Devl du.” (1 Jan 3:8) Afta dat, Gaad peepl weh di serv ahn pahn ert “noh wahn frayd fi notn ahn noh wahn ga reezn fi feel fraitn.” (Isa. 54:14; Mic. 4:4) Bot til da taim kohn, wi haftu werk haad fi noh bee frayd.

20. Weh wahn help wi fi noh frayd fi notn?

²⁰ Wi haftu kantinyu chros dat Jehoava lov ahn protek ih servant dehn. How wi ku du dat? Wi ku meditayt ahn taak bowt how Jehoava protek ih servant dehn eena di paas. Ahn wi ku aalso tink bowt how hihn help wi fays eni chalenjin sichuwayshan. Wid Jehoava help, fi shoar wi noh wahn frayd fi notn!—Ps. 34:4.