STODI AATIKL 24
Jehoava Redi fi Fergiv
“Oa Jehoava, yoo gud ahn redi fi fergiv; yoo ga lata laayal lov fi dehn wan weh kaal pahn yu.”—PS. 86:5.
SANG 42 Di Pryaa a Wahn Servant a Gaad
WEH WI WAHN DISKOS? *
1. Weh King Salaman teech wi da Ecclesiastes 7:20?
KING Salaman mi rait: “No raichos persn deh pahn di ert hoo aalwayz du gud ahn neva sin.” (Eccl. 7:20) Dat da chroo bikaaz aala wi da sinaz! (1 Jan 1:8) Soh aala wi need fergivnis fahn Gaad ahn fahn ada peepl.
2. How yu feel wen wahn kloas fren fergiv yu?
2 Yu praabli memba wahn taim wen yu mi hert wan a yu kloas fren. Sins yu mi waahn mek pees wid yu fren, yu tel ahn dat yu reeli sari. How yu mi feel wen yu fren fergiv yu? Yu mi staat tu feel beta ahn yu mi hapi, noh chroo?
3. Weh wi wahn diskos eena dis aatikl?
3 Wi waahn mek Jehoava bee wi bes Fren, bot sohntaim wi mait du er seh tingz weh hert hihn. Wai wi ku bee shoar dat Jehoava redi fi fergiv? Wat da di difrens bitween di way how Jehoava fergiv ahn how wee fergiv? Ahn hoo Jehoava fergiv?
JEHOAVA REDI FI FERGIV
4. Wai wi ku bee shoar dat Jehoava redi fi fergiv?
4 Di Baibl tel wi dat Jehoava redi fi fergiv. Jehoava mi yooz wahn aynjel fi diskraib Ihself tu Moaziz da Mongt Sainai. Dis da weh di aynjel mi seh: “Jehoava, Jehoava, wahn Gaad weh mersiful ahn weh ga kompashan, wahn Gaad weh noh eezi fi geh beks, ahn weh ful op a laayal lov ahn chroot. Ih shoa lov tu towznz a peepl, an ih fergiv dehn sinz.” (Ex. 34:6, 7) Jehoava da wahn Gaad weh kain, weh shoa mersi, an ih aalwayz redi fi fergiv sinaz weh ripent fi weh dehn du.—Neh. 9:17; Ps. 86:15.
Jehoava noa evriting weh hapm eena wi laif soh hihn andastan wai wi bihayv di way wi bihayv (Paragraaf 5)
5. Akaadn tu Psalm 103:13, 14, weh Jehoava redi fi du bikaaz hihn noa wi soh gud?
5 Bikaaz Jehoava da wi Kriyayta, hihn noa evriting bowt wi. Tink bowt it. Hihn noa evri singl ting bowt eech persn pahn ert! (Ps. 139:15-17) Soh hihn ku si aala di imperfekshanz weh wi inherit fahn wi payrents. Pan tap a dat, hihn noa evriting weh hapm eena wi laif weh mek wi bihayv di way how wi bihayv. Bikaaz Jehoava noa wi soh gud, weh dat moov hihn fi du? Ih mek hihn waahn shoa wi mersi.—Ps. 78:39; reed Psalm 103:13, 14. *
6. How Jehoava proov dat hihn redi fi fergiv wi?
6 Jehoava don proov dat hihn redi fi fergiv. Hihn andastan dat aala wi da sinaz ahn dat wi get oal ahn ded bikaaz a weh di fers man, Adam, mi du. (Roam. 5:12) Wi mi kyaahn geh rid a sin ahn det pahn wi oan. (Ps. 49:7-9) Bot wi lovin Gaad, Jehoava, mi shoa kompashan an ih du sohnting fi sayv wi. Da weh hihn mi du? Jan 3:16 seh dat Jehoava sen ih onli Son soh dat ih ku ded fi wi. (Mach. 20:28; Roam. 5:19) Jeezas mi sofa ahn ded soh dat enibadi weh ga fayt eena hihn ku geh sayv. (Heeb. 2:9) Jehoava mosi mi feel reeli hert fi si ih onli Son ded eena wahn paynful ahn shaymful way! If Jehoava neva reeli waahn fergiv wi, den ih neva mi wahn alow ih Son fi ded fi wi.
7. Hoo da sohn peepl eena di Baibl weh Jehoava mi redi fi fergiv? Yooz di egzampl dehn eena di paragraaf.
7 Di Baibl gat een wahn lata egzampl a peepl weh Jehoava mi fergiv. (Ifee. 4:32) Yoo ku tink bowt eni egzampl? Maybi yu tink bowt King Manaaseh. Hihn da-mi wahn wikid man weh du wahn lata terabl tingz wen ih mi sin gens Jehoava. Hihn mi wership sohn faals gaad an ih mi inkorij adaz fi du di sayhn ting. Hihn mi eevn kil ih oan chiljren an aafa dehn az sakrifais tu sohn faals gaad. An eevn wers dan dat, hihn mi put wahn imij a wahn faals gaad eena Jehoava hoali templ. Dis da weh di Baibl seh bowt Manaaseh: “Hihn mi du wahn lata bad tingz weh Jehoava hayt fi ofen ahn.” (2 Chron. 33:2-7) Bot wen Manaaseh mi shoa dat ih reeli sari fi weh ih du, Jehoava mi redi fi fergiv ahn. Gaad mi eevn alow ahn fi bee king agen. (2 Chron. 33:12, 13) Maybi yu aalso tink bowt King Dayvid. Hihn mi komit sohn seeryos sin gens Jehoava. Hihn mi eevn komit adolchri ahn merda. Bot wen Dayvid mi shoa dat ih reeli sari fi weh ih du an ih mi admit dat ih sin gens Jehoava, Jehoava mi fergiv ahn tu. (2 Sam. 12:9, 10, 13, 14) Yes, wee ku bee shoar dat Jehoava redi fi fergiv. Ahn laik weh wi wahn laan, wen Jehoava fergiv da noh laik wen hyoomanz fergiv.
JEHOAVA DA DI BES JOJ
8. Sins Jehoava da wahn perfek Joj, how dat afek di way hihn fergiv?
8 Jehoava da “di Joj oava aal di ert.” (Gen. 18:25) Wahn gud joj need fi noa di laa gud. Jehoava da wi Joj ahn hihn andastan di laa bikaaz da hihn mek dehn. (Isa. 33:22) Onli Jehoava ga wahn gud andastandin a weh rait ahn weh rang. Wat els wahn gud joj need fi noa? Ih need fi noa aal di faks bifoa ih ku mek wahn disizhan. Jehoava da di bes Joj bikaaz hihn aalwayz noa aala di faks.
9. Wat da sohn tingz Jehoava kansida wen ih di disaid weda ih wahn fergiv wahn persn er nat?
9 Jehoava da noh laik di joj dehn weh egzis rait ya pahn ert, hihn aalwayz noa aala di faks bowt eniting weh hapm. (Gen. 18:20, 21; Ps. 90:8) Hihn noh haftu pen pahn weh hyoomanz si er hyaa. Hihn andastan dat di way how wahn persn groa op, di kwalitiz weh ih geh fan ih payrents, di ejukayshan weh ih geh, di plays wehpaat ih liv, an ih imoashanal ahn mental helt ku afek di way how ih ak. Jehoava ku reed peepl haat, soh hihn andastan egzakli wai wahn persn mait du weh ih du. Nobadi kyaahn haid notn fahn Jehoava. (Heeb. 4:13) Soh wen Jehoava fergiv sohnbadi, da bikaaz ih ga aala di faks bowt weh hapm.
Jehoava chreet evribadi di saym way ahn hihn noh aksep wahn braib (Paragraaf 10)
10. Wai wi ku seh dat Jehoava aalwayz joj eena wahn fyaa way? (Deuteronomy 32:4)
10 Jehoava aalwayz joj eena wahn fyaa way. Hihn aalwayz chreet evribadi di saym. Jehoava noh fergiv wahn persn bikaaz a how ih luk, if ih rich, if ih impoatant, er if ih ga lata skilz. (1 Sam. 16:7; Jay. 2:1-4) Nobadi ku foas Jehoava fi du eniting ahn nobadi ku braib ahn. (2 Chron. 19:7) Hihn noh alow ih feelinz fi afek di disizhan dehn weh ih mek. Soh, hihn noh ponish peepl bikaaz ih beks an ih noh talarayt rangdooin. (Ex. 34:7) Jehoava da di bes Joj bikaaz hihn andastan evriting bowt wi an ih andastan wi sichuwayshan.—Reed Deuteronomy 32:4. *
11. Eena weh way Jehoava fergivnis difrent fahn di way how hyoomanz fergiv?
11 Di man dehn weh mi rait di Heebroo Skripchaz mi rekonaiz dat di way how Jehoava fergiv faar beta fahn di way how peepl fergiv. Dis da weh wahn buk seh bowt wahn werd weh dehn mi yooz eena di Heebroo Skripchaz: “Dehn onli yooz da werd wen dehn rifaa tu di kaina fergivnis weh kohn fahn Gaad, ahn dehn neva did yooz it fi rifaa tu di kaina fergivnis weh wahn persn shoa tuwaadz wahn nada persn.” Onli Jehoava ga di powa fi kompleetli fergiv wahn sina weh sari fi weh ih du. Weh hapm wen Jehoava fergiv wi?
12-13. (a) Wat da sohn blesin wahn persn geh wen Jehoava fergiv ahn? (b) How lang dehndeh blesin laas?
12 Wen wi aksep di fak dat Jehoava fergiv wi, wi wahn feel dat Jehoava di “rifresh [wi],” ahn wi wahn ga pees a main ahn wahn kleen kanshans. Dis kaina fergivnis onli kohn fahn Jehoava. (Aks 3:19) Wen Jehoava fergiv wi, hihn alow wi fi bee ih fren agen ahn da laik wi mi neva eevn sin.
13 Afta Jehoava fergiv wi, hihn wuda neva akyooz wi er disiplin wi fi da sayhn sin agen. (Isa. 43:25; Jer. 31:34) Jehoava put wi sin dehn “az faar az di sonraiz deh fahn di sonset.” * (Ps. 103:12) Wen wi tink bowt di wandaful way how Jehoava fergiv, wi feel soh tankful ahn wi waahn rispek ahn eevn moa. (Ps. 130:4) Bot hoo aal ku geh Jehoava fergivnis?
HOO JEHOAVA WAHN FERGIV?
14. Weh wi laan soh faar bowt weda er nat Jehoava wahn fergiv sohnbadi?
14 Wi laan dat Jehoava noh disaid weda er nat hihn wahn fergiv bays pahn how seeryos di sin weh di persn komit. Ahn wi aalso laan dat Jehoava da wi Kriyayta, di Wan weh mek di laa dehn, ahn wi perfek Joj. Soh hihn noa wen hihn wahn fergiv wahn persn. Bot wat da sohn spesifik tingz Jehoava tink bowt bifoa ih disaid if ih wahn fergiv sohnbadi?
15. Akaadn tu Look 12:47, 48, wat da sohnting weh Jehoava tink bowt wen ih disaid if ih wahn fergiv wi er nat?
15 Sohnting weh Jehoava tink bowt da if di persn mi noa dat weh ih mi du mi rang. Jeezas mi mek dis klyaa da Look 12:47, 48. (Reed.) Wen wahn persn plan fi du sohnting weh wikid an ih noa dat Gaad noh aproov a it, ih di komit wahn seeryos sin. Jehoava mait disaid dat ih noh wahn fergiv da persn. (Maak 3:29; Jan 9:41) Wi haftu admit, doh, dat sohntaim wi du tingz weh wi noa noh rait. Yu tink Jehoava wahn stil fergiv wi? Yes! Bikaaz dehn ga sohnting els weh Jehoava tink bowt wen hihn disaid if ih wahn fergiv wi.
Wi ku bee shoar dat Jehoava wahn fergiv wi if wi reeli ripent (Paragraaf 16-17)
16. Weh ih meen fi ripent, ahn wai ih impoatant fi ripent if wi waahn Jehoava fergiv wi?
16 Sohnting els weh Jehoava kansida da weda er nat wahn sina reeli ripent. Weh ih meen fi ripent? Fi ripent meen dat wahn persn “chaynj di way ih tink, ih chaynj ih atichood, an ih chaynj ih perpos.” Ih aalso meen dat di persn reeli sari an ih feel sad bowt di bad tingz weh ih du er bikaaz ih neva du weh ih shuda mi du. Wahn persn weh ripent noh onli feel sad kaaz a di bad tingz weh ih du, bot ih feel sad bikaaz ih mek ih rilayshanship wid Jehoava geh week ahn dat da weh mek ih du weh ih mi du. Memba dat Jehoava mi fergiv King Manaaseh ahn King Dayvid wen dehn mi ripent eevn doa dehn mi komit sohn seeryos sin. (1 Ki. 14:8) Yes, Jehoava wahn fergiv wi if hihn si dat wi ripentant ahn wi reeli sari fi weh wi du. Bot wi need fi du moa dan jos feel sari fi di sin dehn weh wi komit. Wi haftu bee redi fi du sohnting bowt it. * Ahn dis da sohnting els weh Jehoava tink bowt wen ih disaid if ih wahn fergiv wahn persn.
17. Weh wahn persn need fi du soh dat ih liv eena wahn way how Jehoava waahn? Ahn wai dis impoatant if wi noh waahn ripeet di sin dehn weh wi komit? (Isaiah 55:7)
17 Sohnting els weh Jehoava kansida da weda er nat di persn stap du di bad tingz weh ih mi du ahn staat liv di way Jehoava waahn peepl fi liv. (Reed Isaiah 55:7.) * Di persn haftu chaynj di way ih tink ahn mek Jehoava tinkin gaid ahn. (Roam. 12:2; Ifee. 4:23) Hihn haftu du ih bes fi stap tink bad tingz ahn stap du bad tingz. (Kol. 3:7-10) Af koars, onli if wi ga fayt eena Jeezas sakrifais, Jehoava ku fergiv wi ahn kleen wi fahn sin. Jehoava wahn fergiv wi bikaaz hihn si dat wi di mek chaynjiz eena wi laif.—1 Jan 1:7.
CHROS DAT JEHOAVA WAHN FERGIV YU
18. Weh aal wi laan bowt di way how Jehoava fergiv?
18 Mek wi rivyoo som a di impoatant points weh wi mi diskos eena dis aatikl. Jehoava da di graytis Persn weh fergiv eena di yoonivers. Wai wi seh dat? Fers, bikaaz hihn redi fi fergiv. Sekant, hihn noa evriting bowt wi ahn hihn da di bes Persn fi noa if wi reeli ripentant. Ahn terd, wen Jehoava fergiv wi, hihn noh bring it op agen. Da laik if wi neva sin non ataal. Sayka dat, wi ku ga wahn kleen kanshans ahn Jehoava wahn pleez wid wi.
19. Wai wi ku bee hapi eevn doa wi noa dat wi noh perfek ahn wi wahn kip di sin?
19 Af koars, az lang az wi noh perfek, wi wahn kantinyu sin. Bot wi ku geh komfert fahn di Insight on the Scriptures, Volume 2, payj 771. Ih seh: “Jehoava aalwayz shoa mersi ahn hihn noa dat ih servant dehn week, soh dehn noh need fi feel sad aal di taim bikaaz a imperfekshan ahn bikaaz a di mistayks weh dehn mek. (Ps 103:8-14; 130:3) Az lang az dehn di du dehn bes fi liv di way how Gaad waahn, dehn ku bee hapi. (Fil 4:4-6; 1Jan 3:19-22).” Dat reeli inkorijin, noh chroo?
20. Weh wi wahn kansida eena di neks aatikl?
20 Wi soh tankful dat Jehoava redi fi fergiv wi wen wi reeli sari fi di sin dehn weh wi komit. Eena weh way wi ku kapi Jehoava fergivnis? How Jehoava fergivnis difrent fahn di way how peepl fergiv? How di way wee fergiv simila tu di way how Jehoava fergiv? Wai ih impoatant fi andastan di difrens bitween how Jehoava fergiv ahn di way how wee fergiv? Wi wahn geh di ansa tu dehndeh kweschan eena di neks aatikl.
SANG 45 Di Tingz Weh Deh Eena Mi Haat
^ Eena Jehoava Werd di Baibl, hihn tel wi dat hihn redi fi fergiv dehn wan weh ripent fahn di sinz weh dehn komit. Bot sohntaim wi mait feel laik wi noh dizerv fi hihn fergivnis. Eena dis aatikl, wi wahn laan wai wi ku bee shoar dat Gaad aalwayz redi fi fergiv wi wen wi reeli sari fi di sin dehn weh wi komit.
^ Psalm 103:13, 14: “Laik wahn faada weh ga mersi pan ih son dehn, Jehoava shoa mersi tu dehn wan weh fyaa hihn. 14 Hihn noa gud how wee geh mek; ih memba dat wee da dos.”
^ Deuteronomy 32:4: “‘Evriting weh di Rak du perfek, bikaaz fi hihn wayz jos. Wahn Gaad weh faytful hoo neva joj rang, hihn aalwayz du weh rait ahn hihn jos.ʼ”
^ Si di buk Draw Close to Jehovah, chapta 26, paragraaf 9.
^ WEH IH MEEN? Wahn persn weh “ripentant” chaynj di way how ih tink an ak, an ih feel reeli sari deep dong eena ih haat bikaaz a di way how ih mi-di liv ih laif, di bad tingz weh ih mi du, er bikaaz a di tingz weh ih shuda mi du bot ih neva du.
^ Isaiah 55:7: “Mek di wikid man lef ih wayz ahn di eevl man ih tinkin; mek ih goh bak tu Jehoava, fi wee Gaad, hoo wahn ga mersi ahn wahn fergiv ahn eena wahn big way.”
